[1577] Na vattabbaṁ añño anusayo aññaṁ pariyuṭṭhānanti.
Āmantā. Puthujjano kusalābyākate citte vattamāne sānusayoti
vattabboti. Āmantā. Pariyuṭṭhitoti vattabboti. Na hevaṁ
vattabbe .pe. Tenahi añño anusayo aññaṁ pariyuṭṭhānanti.
Puthujjano kusalābyākate citte vattamāne sarāgoti vattabboti.
Āmantā. Pariyuṭṭhitoti vattabboti. Na hevaṁ vattabbe .pe.
Tena hi añño rāgo aññaṁ pariyuṭṭhānanti.
Añño anusayotikathā.
-------------
Pariyuṭṭhānaṁ cittavippayuttantikathā

[1578] Pariyuṭṭhānaṁ cittavippayuttanti. Āmantā. Rūpaṁ
nibbānaṁ cakkhāyatanaṁ .pe. Phoṭṭhabbāyatananti. Na hevaṁ vattabbe
.pe. Pariyuṭṭhānaṁ cittavippayuttanti. Āmantā. Natthi sarāgaṁ
cittaṁ sadosaṁ cittaṁ samohaṁ cittaṁ .pe. Akusalaṁ cittaṁ
saṅkiliṭṭhaṁ cittanti. Na hevaṁ vattabbe .pe. Nanu atthi sarāgaṁ
cittaṁ sadosaṁ cittaṁ samohaṁ cittaṁ .pe. Akusalaṁ cittaṁ saṅkiliṭṭhaṁ
cittanti. Āmantā. Hañci atthi sarāgaṁ cittaṁ sadosaṁ cittaṁ
samohaṁ cittaṁ .pe. Akusalaṁ cittaṁ saṅkiliṭṭhaṁ cittaṁ no vata
re vattabbe pariyuṭṭhānaṁ cittavippayuttanti.
Pariyuṭṭhānaṁ cittavippayuttantikathā.
----------
Pariyāpannakathā

[1579] Rūparāgo rūpadhātuṁ anuseti rūpadhātupariyāpannoti.
Āmantā. Samāpattesiyo upapattesiyo diṭṭhadhammasukhavihāro
samāpattesiyena cittena upapattesiyena cittena diṭṭhadhammasukhavihārena
cittena sahagato sahajāto saṁsaṭṭho sampayutto ekuppādo
ekanirodho ekavatthuko ekārammaṇoti. Na hevaṁ vattabbe
.pe. Nanu na samāpattesiyo na upapattesiyo na diṭṭhadhammasukhavihāro
na samāpattesiyena cittena na upapattesiyena cittena
na diṭṭhadhammasukhavihārena cittena sahagato sahajāto saṁsaṭṭho sampayutto
ekuppādo ekanirodho ekavatthuko ekārammaṇoti. Āmantā.
Hañci na samāpattesiyo na upapattesiyo na diṭṭhadhammasukhavihāro
.pe. Ekārammaṇo no vata re vattabbe rūparāgo rūpadhātuṁ
anuseti rūpadhātupariyāpannoti .pe.

[1580] Rūparāgo rūpadhātuṁ anuseti rūpadhātupariyāpannoti.
Āmantā. Saddarāgo saddadhātuṁ anuseti saddadhātupariyāpannoti.
Na hevaṁ vattabbe .pe. Rūparāgo rūpadhātuṁ anuseti rūpadhātupariyāpannoti.
Āmantā. Gandharāgo .pe. Rasarāgo .pe. Phoṭṭhabbarāgo
phoṭṭhabbadhātuṁ anuseti phoṭṭhabbadhātupariyāpannoti. Na
hevaṁ vattabbe .pe.

[1581] Saddarāgo saddadhātuṁ anuseti na vattabbaṁ saddadhātu-
pariyāpannoti. Āmantā. Rūparāgo rūpadhātuṁ anuseti na vattabbaṁ
rūpadhātupariyāpannoti. Na hevaṁ vattabbe .pe. Gandharāgo .pe.
Rasarāgo .pe. Phoṭṭhabbarāgo phoṭṭhabbadhātuṁ anuseti na vattabbaṁ
phoṭṭhabbadhātupariyāpannoti. Āmantā. Rūparāgo rūpadhātuṁ anuseti
na vattabbaṁ rūpadhātupariyāpannoti. Na hevaṁ vattabbe .pe.

[1582] Arūparāgo arūpadhātuṁ anuseti arūpadhātupariyāpannoti.
Āmantā. Samāpattesiyo upapattesiyo diṭṭhadhammasukhavihāro
samāpattesiyena cittena uppattesiyena cittena diṭṭhadhammasukhavihārena
cittena sahagato sahajāto saṁsaṭṭho sampayutto ekuppādo ekanirodho
ekavatthuko ekārammaṇoti. Na hevaṁ vattabbe .pe. Nanu na
samāpattesiyo na upapattesiyo na diṭṭhadhammasukhavihāro na
samāpattesiyena cittena .pe. Ekārammaṇoti. Āmantā.
Hañci na samāpattesiyo na upapattesiyo .pe. Ekārammaṇo
no vata re vattabbe arūparāgo arūpadhātuṁ anuseti arūpadhātupariyāpannoti.

[1583] Arūparāgo arūpadhātuṁ anuseti arūpadhātupariyāpannoti.
Āmantā. Saddarāgo saddadhātuṁ anuseti saddadhātupariyāpannoti.
Na hevaṁ vattabbe .pe. Arūparāgo arūpadhātuṁ anuseti arūpadhātu-
pariyāpannoti. Āmantā. Gandharāgo .pe. Rasarāgo .pe.
Phoṭṭhabbarāgo phoṭṭhabbadhātuṁ anuseti phoṭṭhabbadhātupariyāpannoti.
Na hevaṁ vattabbe .pe.

[1584] Saddarāgo saddadhātuṁ anuseti na vattabbaṁ saddadhātu-
pariyāpannoti. Āmantā. Arūparāgo arūpadhātuṁ anuseti na
vattabbaṁ arūpadhātupariyāpannoti. Na hevaṁ vattabbe .pe.
Gandharāgo .pe. Rasarāgo .pe. Phoṭṭhabbarāgo phoṭṭhabbadhātuṁ
anuseti na vattabbaṁ phoṭṭhabbadhātupariyāpannoti. Āmantā.
Arūparāgo arūpadhātuṁ anuseti na vattabbaṁ arūpadhātupariyāpannoti.
Na hevaṁ vattabbe .pe.

[1585] Na vattabbaṁ rūparāgo rūpadhātuṁ anuseti rūpadhātupariyāpanno
arūparāgo arūpadhātuṁ anuseti arūpadhātupariyāpannoti.
Āmantā. Nanu kāmarāgo kāmadhātuṁ anuseti kāmadhātupariyāpannoti.
Āmantā. Hañci kāmarāgo kāmadhātuṁ anuseti
kāmadhātupariyāpanno tena vata re vattabbe rūparāgo rūpadhātuṁ
anuseti rūpadhātupariyāpanno arūparāgo arūpadhātuṁ anuseti
arūpadhātupariyāpannoti.
Pariyāpannakathā.
------------
Abyākatakathā

[1586] Diṭṭhigataṁ abyākatanti. Āmantā. Vipākābyākataṁ
kiriyābyākataṁ rūpaṁ nibbānaṁ cakkhāyatanaṁ .pe. Phoṭṭhabbāyatananti.
Na hevaṁ vattabbe .pe. Diṭṭhigataṁ abyākatanti. Āmantā.
Diṭṭhigatasampayutto phasso abyākatoti. Na hevaṁ vattabbe
.pe. Diṭṭhigataṁ abyākatanti. Āmantā. Diṭṭhigatasampayuttā
vedanā .pe. Saññā .pe. Cetanā .pe. Cittaṁ abyākatanti.
Na hevaṁ vattabbe .pe.