[1587] Diṭṭhigatasampayutto phasso akusaloti. Āmantā.
Diṭṭhigataṁ akusalanti. Na hevaṁ vattabbe .pe. Diṭṭhigatasampayuttā
vedanā .pe. Saññā cetanā cittaṁ akusalanti. Āmantā.
Diṭṭhigataṁ akusalanti. Na hevaṁ vattabbe .pe.

[1588] Diṭṭhigataṁ abyākatanti. Āmantā. Aphalaṁ avipākanti.
Na hevaṁ vattabbe .pe. Nanu saphalaṁ savipākanti. Āmantā.
Hañci saphalaṁ savipākaṁ no vata re vattabbe diṭṭhigataṁ abyākatanti.

[1589] Diṭṭhigataṁ abyākatanti. Āmantā. Nanu micchādiṭṭhiparamāni
vajjāni vuttāni bhagavatāti. Āmantā. Hañci
micchādiṭṭhiparamāni vajjāni vuttāni bhagavatā no vata re vattabbe
diṭṭhigataṁ abyākatanti.

[1590] Diṭṭhigataṁ abyākatanti. Āmantā. Nanu vuttaṁ
bhagavatā micchādiṭṭhi kho vaccha akusalā sammādiṭṭhi kusalāti 1
attheva suttantoti. Āmantā. Tena hi na vattabbaṁ diṭṭhigataṁ
abyākatanti.

[1591] Diṭṭhigataṁ abyākatanti. Āmantā. Nanu vuttaṁ
bhagavatā micchādiṭṭhikassa kho ahaṁ puṇṇa dvinnaṁ gatīnaṁ aññataraṁ
gatiṁ vadāmi niriyaṁ vā tiracchānayoniṁ vāti 2 attheva suttantoti.
Āmantā. Tena hi na vattabbaṁ diṭṭhigataṁ abyākatanti.
1 Ma. Ma. 255. 2 Ma. Ma. 83.

[1592] Na vattabbaṁ diṭṭhigataṁ abyākatanti. Āmantā.
Nanu vuttaṁ bhagavatā sassato lokoti kho vaccha abyākatametaṁ
asassato lokoti kho vaccha abyākatametaṁ antavā lokoti kho
vaccha .pe. Anantavā lokoti kho vaccha ... Taṁ jīvaṁ taṁ sarīranti
kho vaccha ... Aññaṁ jīvaṁ aññaṁ sarīranti kho vaccha ... Hoti tathāgato
parammaraṇāti kho vaccha ... Na hoti tathāgato parammaraṇāti kho vaccha ...
Hoti ca na ca hoti tathāgato parammaraṇāti kho vaccha ... Neva
hoti na nahoti tathāgato parammaraṇāti kho vaccha abyākatametanti
attheva suttantoti. Āmantā. Tena hi diṭṭhigataṁ abyākatanti.

[1593] Diṭṭhigataṁ abyākatanti. Āmantā. Nanu vuttaṁ
bhagavatā micchādiṭṭhikassa bhikkhave purisapuggalassa yañceva kāyakammaṁ
yathādiṭṭhi samattaṁ samādinnaṁ .pe. Yañca vacīkammaṁ .pe. Yañca
manokammaṁ yathādiṭṭhi samattaṁ samādinnaṁ yā ca cetanā yā ca patthanā
yo ca paṇidhi ye ca saṅkhārā sabbe te dhammā aniṭṭhāya akantāya
amanāpāya ahitāya dukkhāya saṁvattantīti 1 attheva suttantoti.
Āmantā. Tena hi na vattabbaṁ diṭṭhigataṁ abyākatanti.
Abyākatakathā.
------------
1 aṁ. eka. 41.
Apariyāpannakathā

[1594] Diṭṭhigataṁ apariyāpannanti. Āmantā. Maggo phalaṁ
nibbānaṁ sotāpattimaggo sotāpattiphalaṁ sakadāgāmimaggo sakadāgāmiphalaṁ
anāgāmimaggo anāgāmiphalaṁ arahattamaggo arahattaphalaṁ satipaṭṭhānaṁ
sammappadhānaṁ iddhipādo indriyaṁ balaṁ bojjhaṅgoti. Na hevaṁ
vattabbe .pe.

[1595] Na vattabbaṁ diṭṭhigataṁ apariyāpannanti. Āmantā.
Puthujjano kāmesu vītarāgoti vattabboti. Āmantā. Vigatadiṭṭhiyoti
vattabboti. Na hevaṁ vattabbe .pe. Tenahi diṭṭhigataṁ
apariyāpannanti.
Apariyāpannakathā.
Cuddasamo vaggo.
Tassa uddānaṁ
akusalamūlaṁ paṭisandahati kusalamūlaṁ kusalamūlaṁ paṭisandahati
akusalamūlaṁ saḷāyatanaṁ chaviññāṇakāyā ariyarūpaṁ
mahābhūtānaṁ upādāya sveva anusayo taṁ pariyuṭṭhānaṁ
pariyuṭṭhānaṁ cittavippayuttaṁ yathādhātukañceva anuseti
diṭṭhigataṁ abyākataṁ diṭṭhigataṁ apariyāpannanti.
------------
Paccayatākathā

[1596] Paccayatā vavatthitāti. Āmantā. Nanu vīmaṁsā
hetu so ca adhipatīti. Āmantā. Hañci vīmaṁsā hetu so ca
adhipati tena vata re vattabbe hetupaccayena paccayo adhipatipaccayena
paccayoti.