[1607] Nanu purimā purimā kusalā dhammā pacchimānaṁ pacchimānaṁ
kusalānaṁ dhammānaṁ anantarapaccayena paccayo sā ca āsevanāti.
Āmantā. Hañci purimā purimā kusalā dhammā pacchimānaṁ
pacchimānaṁ kusalānaṁ dhammānaṁ anantarapaccayena paccayo sā ca
āsevanā tena vata re vattabbe anantarapaccayena paccayo
āsevanapaccayena paccayoti.

[1608] Nanu purimā purimā akusalā dhammā pacchimānaṁ pacchimānaṁ
akusalānaṁ dhammānaṁ anantarapaccayena paccayo sā ca āsevanāti.
Āmantā. Hañci purimā purimā akusalā dhammā pacchimānaṁ
pacchimānaṁ akusalānaṁ dhammānaṁ anantarapaccayena paccayo sā ca
āsevanā tena vata re vattabbe anantarapaccayena paccayo
āsevanapaccayena paccayoti.

[1609] Nanu purimā purimā kiriyābyākatā dhammā pacchimānaṁ
pacchimānaṁ kiriyābyākatānaṁ dhammānaṁ anantarapaccayena paccayo sā
Ca āsevanāti. Āmantā. Hañci purimā purimā kiriyābyākatā
dhammā pacchimānaṁ pacchimānaṁ kiriyābyākatānaṁ dhammānaṁ anantarapaccayena
paccayo sā ca āsevanā tena vata re vattabbe anantarapaccayena
paccayo āsevanapaccayena paccayoti.

[1610] Na vattabbaṁ paccayatā vavatthitāti. Āmantā.
Hetupaccayena paccayo hoti ārammaṇapaccayena paccayo hoti
anantarapaccayena paccayo hoti samantarapaccayena paccayo hotīti.
Na hevaṁ vattabbe .pe. Tena hi na vattabbaṁ paccayatā vavatthitāti.
Paccayatākathā.
---------
Aññamaññapaccayakathā

[1611] Avijjāpaccayāva saṅkhārā na vattabbaṁ saṅkhārapaccayāpi
avijjāti. Āmantā. Nanu avijjā saṅkhārena sahajātāti.
Āmantā. Hañci avijjā saṅkhārena sahajātā tena vata re
vattabbe avijjāpaccayāpi saṅkhārā saṅkhārapaccayāpi avijjāti.

[1612] Taṇhāpaccayāva upādānaṁ na vattabbaṁ upādānapaccayāpi
taṇhāti. Āmantā. Nanu taṇhā upādānena sahajātāti.
Āmantā. Hañci taṇhā upādānena sahajātā tena vata re
vattabbe taṇhāpaccayāpi upādānaṁ upādānapaccayāpi taṇhāti.

[1613] Jarāmaraṇapaccayā bhikkhave jāti jātipaccayā bhavoti
attheva suttantoti. Natthi. Tenahi avijjāpaccayāva saṅkhārā
na vattabbaṁ saṅkhārapaccayāpi avijjā taṇhāpaccayāva upādānaṁ
na vattabbaṁ upādānapaccayāpi taṇhāti.

[1614] Viññāṇapaccayā bhikkhave nāmarūpaṁ nāmarūpapaccayāpi
viññāṇanti attheva suttantoti. Āmantā. Tena hi
avijjāpaccayāpi saṅkhārā saṅkhārapaccayāpi avijjā taṇhāpaccayāpi
upādānaṁ upādānapaccayāpi taṇhāti.
Aññamaññapaccayakathā.
---------
Addhākathā

[1615] Addhā parinipphannoti. Āmantā. Rūpanti. Na
hevaṁ vattabbe .pe. Vedanā .pe. Saññā .pe. Saṅkhārā
.pe. Viññāṇanti. Na hevaṁ vattabbe .pe. Atīto addhā
parinipphannoti. Āmantā. Rūpanti. Na hevaṁ vattabbe .pe.
Vedanā .pe. Saññā .pe. Saṅkhārā .pe. Viññāṇanti.
Na hevaṁ vattabbe .pe. Anāgato addhā parinipphannoti.
Āmantā. Rūpanti. Na hevaṁ vattabbe .pe. Vedanā .pe.
Saññā .pe. Saṅkhārā .pe. Viññāṇanti. Na hevaṁ vattabbe
.pe. Paccuppanno addhā parinipphannoti. Āmantā. Rūpanti.
Na hevaṁ vattabbe .pe. Vedanā .pe. Saññā .pe. Saṅkhārā
.pe. Viññāṇanti. Na hevaṁ vattabbe .pe. Atītaṁ rūpaṁ
vedanā saññā saṅkhārā viññāṇaṁ atīto addhāti. Āmantā.
Atītā pañcaddhāti. Na hevaṁ vattabbe .pe. Anāgataṁ rūpaṁ vedanā
saññā saṅkhārā viññāṇaṁ anāgato addhāti. Āmantā.
Anāgatā pañcaddhāti. Na hevaṁ vattabbe .pe. Paccuppannaṁ
rūpaṁ vedanā saññā saṅkhārā viññāṇaṁ paccuppanno addhāti.
Āmantā. Paccuppannā pañcaddhāti. Na hevaṁ vattabbe .pe.
Atītā pañca khandhā atīto addhā anāgatā pañca khandhā
anāgato addhā paccuppannā pañca khandhā paccuppanno addhāti.
Āmantā. Paṇṇarasa addhāti. Na hevaṁ vattabbe .pe. Atītāni
dvādasāyatanāni atīto addhā anāgatāni dvādasāyatanāni anāgato
addhā paccuppannāni dvādasāyatanāni paccuppanno addhāti.
Āmantā. Chattiṁsa addhāti. Na hevaṁ vattabbe .pe. Atītā
aṭṭhārasa dhātuyo atīto addhā anāgatā aṭṭhārasa dhātuyo
anāgato addhā paccuppannā aṭṭhārasa dhātuyo paccuppanno
addhāti. Āmantā. Catupaññāsa addhāti. Na hevaṁ vattabbe
.pe. Atītāni bāvīsatindriyāni atīto addhā anāgatāni
bāvīsatindriyāni anāgato addhā paccuppannāni bāvīsatindriyāni
Paccuppanno addhāti. Āmantā. Chasaṭṭhī addhāti. Na hevaṁ
vattabbe .pe.

[1616] Na vattabbaṁ addhā parinipphannoti. Āmantā. Nanu
vuttaṁ bhagavatā tīṇimāni bhikkhave kathāvatthūni. Katamāni tīṇi. Atītaṁ
vā bhikkhave addhānaṁ ārabbha kathaṁ katheyya evaṁ ahosi atītamaddhānanti
anāgataṁ vā bhikkhave addhānaṁ ārabbha kathaṁ katheyya evaṁ bhavissati
anāgatamaddhānanti etarahi vā bhikkhave paccuppannaṁ addhānaṁ ārabbha
kathaṁ katheyya evaṁ hoti etarahi paccuppannanti imāni kho bhikkhave
tīṇi kathāvatthūnīti attheva suttantoti. Āmantā. Tenahi
addhā parinipphannoti.
Addhākathā.
-------
Khaṇalayamuhuttakathā