[1617] Khaṇo parinipphanno layo parinipphanno muhuttaṁ parinipphannanti.
Āmantā. Rūpanti. Na hevaṁ vattabbe .pe. Vedanā .pe.
Saññā .pe. Saṅkhārā .pe. Viññāṇanti. Na hevaṁ vattabbe .pe.

[1618] Na vattabbaṁ muhuttaṁ parinipphannanti. Āmantā. Nanu
vuttaṁ bhagavatā tīṇimāni bhikkhave kathāvatthūni. Katamāni tīṇi. Atītaṁ
vā bhikkhave addhānaṁ ārabbha kathaṁ katheyya evaṁ ahosi atītamaddhānanti
Anāgataṁ vā bhikkhave addhānaṁ ārabbha kathaṁ katheyya evaṁ bhavissati
anāgatamaddhānanti etarahi vā bhikkhave paccuppannaṁ addhānaṁ ārabbha
kathaṁ katheyya evaṁ hoti etarahi paccuppannanti imāni kho bhikkhave
tīṇi kathāvatthūnīti attheva suttantoti. Āmantā. Tenahi
muhuttaṁ parinipphannanti.
Khaṇalayamuhuttakathā.
---------
Āsavakathā

[1619] Cattāro āsavā anāsavāti. Āmantā. Maggo
phalaṁ nibbānaṁ sotāpattimaggo sotāpattiphalaṁ .pe. Bojjhaṅgoti.
Na hevaṁ vattabbe .pe. Na vattabbaṁ cattāro āsavā anāsavāti.
Āmantā. Atthaññeva anāsavā yehi āsavehi te āsavā sāsavā
hontīti. Na hevaṁ vattabbe. Tena hi cattāro āsavā anāsavāti.
Āsavakathā.
----------
Jarāmaraṇakathā

[1620] Lokuttarānaṁ dhammānaṁ jarāmaraṇaṁ lokuttaranti.
Āmantā. Maggo phalaṁ nibbānaṁ sotāpattimaggo sotāpattiphalaṁ
.pe. Bojjhaṅgoti. Na hevaṁ vattabbe .pe. Sotāpattimaggassa
jarāmaraṇaṁ sotāpattimaggoti. Na hevaṁ vattabbe .pe. Sotāpattimaggassa
jarāmaraṇaṁ sotāpattimaggoti. Āmantā. Sotāpattiphalassa
jarāmaraṇaṁ sotāpattiphalanti. Na hevaṁ vattabbe .pe. Sakadāgāmimaggassa
.pe. Sakadāgāmiphalassa .pe. Anāgāmimaggassa .pe.
Anāgāmiphalassa .pe. Arahattamaggassa jarāmaraṇaṁ arahattamaggoti.
Na hevaṁ vattabbe .pe. Arahattamaggassa jarāmaraṇaṁ arahattamaggoti.
Āmantā. Arahattaphalassa jarāmaraṇaṁ arahattaphalanti. Na hevaṁ vattabbe
.pe. Satipaṭṭhānānaṁ sammappadhānānaṁ iddhipādānaṁ indriyānaṁ balānaṁ
.pe. Bojjhaṅgānaṁ jarāmaraṇaṁ bojjhaṅgoti. Na hevaṁ vattabbe .pe.

[1621] Na vattabbaṁ lokuttarānaṁ dhammānaṁ jarāmaraṇaṁ lokuttaranti.
Āmantā. Lokiyanti. Na hevaṁ vattabbe .pe.
Tena hi lokuttaranti.
Jarāmaraṇakathā.
-----------
Saññāvedayitakathā

[1622] Saññāvedayitanirodhasamāpatti lokuttarāti. Āmantā.
Maggo phalaṁ nibbānaṁ sotāpattimaggo sotāpattiphalaṁ .pe. Bojjhaṅgoti.
Na hevaṁ vattabbe .pe. Na vattabbaṁ saññāvedayitanirodhasamāpatti
Lokuttarāti. Āmantā. Lokiyāti. Na hevaṁ
vattabbe .pe. Tenahi lokuttarāti.
Saññāvedayitakathā.
------------
Dutiyasaññāvedayitakathā

[1623] Saññāvedayitanirodhasamāpatti lokiyāti. Āmantā.
Rūpanti. Na hevaṁ vattabbe .pe. Vedanā .pe. Saññā .pe.
Saṅkhārā .pe. Viññāṇanti. Na hevaṁ vattabbe .pe. Kāmāvacarāti.
Na hevaṁ vattabbe .pe. Rūpāvacarāti. Na hevaṁ vattabbe
.pe. Arūpāvacarāti. Na hevaṁ vattabbe .pe.

[1624] Na vattabbaṁ saññāvedayitanirodhasamāpatti lokiyāti.
Āmantā. Lokuttarāti. Na hevaṁ vattabbe .pe. Tena hi lokiyāti.
Dutiyasaññāvedayitakathā.
-----------
Tatiyasaññāvedayitakathā

[1625] Saññāvedayitanirodhaṁ samāpanno kālaṁ kareyyāti.
Āmantā. Atthi saññāvedayitanirodhaṁ samāpannassa māraṇantiyo
phasso māraṇantiyā vedanā māraṇantiyā saññā māraṇantiyā
Cetanā māraṇantiyaṁ cittanti. Na hevaṁ vattabbaṁ .pe. Natthi
saññāvedayitanirodhaṁ samāpannassa māraṇantiyo phasso māraṇantiyā
vedanā māraṇantiyā saññā māraṇantiyā cetanā māraṇantiyaṁ
cittanti. Āmantā. Hañci natthi saññāvedayitanirodhaṁ samāpannassa
māraṇantiyo phasso māraṇantiyā vedanā māraṇantiyā saññā
māraṇantiyā cetanā māraṇantiyaṁ cittaṁ no vata re vattabbe
saññāvedayitanirodhaṁ samāpanno kālaṁ kareyyāti.

[1626] Saññāvedayitanirodhaṁ samāpanno kālaṁ kareyyāti.
Āmantā. Atthi saññāvedayitanirodhaṁ samāpannassa phasso vedanā
saññā cetanā cittanti. Na hevaṁ vattabbe .pe. Natthi saññāvedayitanirodhaṁ
samāpannassa phasso vedanā saññā cetanā cittanti.
Āmantā. Aphassakassa kālakiriyā avedanakassa kālakiriyā .pe.
Acittakassa kālakiriyāti. Na hevaṁ vattabbe .pe. Nanu saphassakassa
kālakiriyā .pe. Sacittakassa kālakiriyāti. Āmantā. Hañci
saphassakassa kālakiriyā .pe. Sacittakassa kālakiriyā no vata re
vattabbe saññāvedayitanirodhaṁ samāpanno kālaṁ kareyyāti.