[1627] Saññāvedayitanirodhaṁ samāpanno kālaṁ kareyyāti.
Āmantā. Saññāvedayitanirodhaṁ samāpannassa kāye visaṁ kameyya
satthaṁ kameyya aggi kameyyāti. Na hevaṁ vattabbe .pe.
Saññāvedayitanirodhaṁ samāpannassa kāye visaṁ na kameyya satthaṁ
Na kameyya aggi na kameyyāti. Āmantā. Hañci saññāvedayitanirodhaṁ
samāpannassa kāye visaṁ na kameyya satthaṁ na kameyya
aggi na kameyya no vata re vattabbe saññāvedayitanirodhaṁ
samāpanno kālaṁ kareyyāti.

[1628] Saññāvedayitanirodhaṁ samāpanno kālaṁ kareyyāti.
Āmantā. Saññāvedayitanirodhaṁ samāpannassa kāye visaṁ kameyya
satthaṁ kameyya aggi kameyyāti. Āmantā. Na nirodhaṁ samāpannoti.
Na hevaṁ vattabbe .pe. Saññāvedayitanirodhaṁ samāpanno na kālaṁ
kareyyāti. Āmantā. Atthi so niyāmo yena niyāmena
niyato saññāvedayitanirodhaṁ samāpanno na kālaṁ kareyyāti. Natthi.
Hañci natthi so niyāmo yena niyāmena niyato saññāvedayitanirodhaṁ
samāpanno na kālaṁ kareyya no vata re vattabbe saññāvedayitanirodhaṁ
samāpanno na kālaṁ kareyyāti.

[1629] Cakkhuviññāṇasamaṅgī na kālaṁ kareyyāti. Āmantā.
Atthi so niyāmo yena niyāmena niyato cakkhuviññāṇasamaṅgī na kālaṁ
kareyyāti. Natthi. Hañci natthi so niyāmo yena niyāmena
niyato cakkhuviññāṇasamaṅgī na kālaṁ kareyya no vata re vattabbe
cakkhuviññāṇasamaṅgī na kālaṁ kareyyāti.
Tatiyasaññāvedayitakathā.
-----------
Asaññasattūpikākathā

[1630] Saññāvedayitanirodhasamāpatti asaññasattūpikāti.
Āmantā. Atthi saññāvedayitanirodhaṁ samāpannassa alobho
kusalamūlaṁ adoso kusalamūlaṁ amoho kusalamūlaṁ saddhā viriyaṁ sati
samādhi paññāti. Na hevaṁ vattabbe .pe. Natthi saññāvedayitanirodhaṁ
samāpannassa alobho kusalamūlaṁ adoso kusalamūlaṁ .pe. Paññāti.
Āmantā. Hañci natthi saññāvedayitanirodhaṁ samāpannassa alobho
kusalamūlaṁ adoso kusalamūlaṁ amoho kusalamūlaṁ saddhā viriyaṁ sati
samādhi paññā no vata re vattabbe saññāvedayitanirodhasamāpatti
asaññasattūpikāti.

[1631] Saññāvedayitanirodhasamāpatti asaññasattūpikāti.
Āmantā. Atthi saññāvedayitanirodhaṁ samāpannassa phasso vedanā
saññā cetanā cittanti. Na hevaṁ vattabbe .pe. Natthi
saññāvedayitanirodhaṁ samāpannassa phasso vedanā saññā cetanā
cittanti. Āmantā. Aphassakassa maggabhāvanā .pe. Acittakassa
maggabhāvanāti. Na hevaṁ vattabbe .pe. Nanu saphassakassa maggabhāvanā
.pe. Sacittakassa maggabhāvanāti. Āmantā. Hañci saphassakassa
maggabhāvanā .pe. Sacittakassa maggabhāvanā no vata re vattabbe
saññāvedayitanirodhasamāpatti asaññasattūpikāti.

[1632] Saññāvedayitanirodhasamāpatti asaññasattūpikāti.
Āmantā. Ye keci saññāvedayitanirodhaṁ samāpajjanti sabbe
te asaññasattūpikāti. Na hevaṁ vattabbe .pe.

[1633] Na vattabbaṁ saññāvedayitanirodhasamāpatti asaññasattūpikāti.
Āmantā. Nanu idhāpi asaññī tatrāpi asaññīti.
Āmantā. Hañci idhāpi asaññī tatrāpi asaññī tena vata re
vattabbe saññāvedayitanirodhasamāpatti asaññasattūpikāti.
Asaññasattūpikākathā.
--------
Kammūpacayakathā

[1634] Aññaṁ kammaṁ añño kammūpacayoti. Āmantā.
Añño phasso añño phassūpacayo aññā vedanā añño
vedanūpacayo aññā saññā añño saññūpacayo aññā
cetanā añño cetanūpacayo aññaṁ cittaṁ añño cittūpacayo
aññā saddhā añño saddhūpacayo aññaṁ viriyaṁ añño
viriyūpacayo aññā sati añño satūpacayo añño samādhi
añño samādhūpacayo aññā paññā añño paññūpacayo
añño rāgo añño rāgūpacayo .pe. Aññaṁ anottappaṁ
añño anottappūpacayoti. Na hevaṁ vattabbe .pe.

[1635] Aññaṁ kammaṁ añño kammūpacayoti. Āmantā.
Kammūpacayo kammena saha jātoti. Na hevaṁ vattabbe .pe. Kammūpacayo
kammena saha jātoti. Āmantā. Kusalena kammena saha
jāto kammūpacayo kusaloti. Na hevaṁ vattabbe .pe. Kusalena
kammena saha jāto kammūpacayo kusaloti. Āmantā. Sukhāya
vedanāya sampayuttena kammena saha jāto kammūpacayo sukhāya vedanāya
sampayuttoti. Na hevaṁ vattabbe .pe. Dukkhāya vedanāya .pe.
Adukkhamasukhāya vedanāya sampayuttena kammena saha jāto kammūpacayo
adukkhamasukhāya vedanāya sampayuttoti. Na hevaṁ vattabbe .pe.
Kammūpacayo kammena saha jātoti. Āmantā. Akusalena kammena
saha jāto kammūpacayo akusaloti. Na hevaṁ vattabbe .pe.
Akusalena kammena saha jāto kammūpacayo akusaloti. Āmantā.
Sukhāya vedanāya sampayuttena kammena saha jāto kammūpacayo
sukhāya vedanāya sampayuttoti. Na hevaṁ vattabbe .pe. Dukkhāya
vedanāya .pe. Adukkhamasukhāya vedanāya sampayuttena kammena
saha jāto kammūpacayo adukkhamasukhāya vedanāya sampayuttoti.
Na hevaṁ vattabbe .pe.

[1636] Kammaṁ cittena saha jātaṁ kammaṁ sārammaṇanti.
Āmantā. Kammūpacayo cittena saha jāto kammūpacayo sārammaṇoti.
Na hevaṁ vattabbe .pe. Kammūpacayo cittena saha jāto kammūpacayo
Anārammaṇoti. Āmantā. Kammaṁ cittena saha jātaṁ kammaṁ
anārammaṇanti. Na hevaṁ vattabbe .pe.