[1647] Paro parassa cittaṁ paggaṇhātīti. Āmantā.
Paro parassa alobhaṁ kusalamūlaṁ janeti adosaṁ kusalamūlaṁ janeti
amohaṁ kusalamūlaṁ janeti saddhaṁ janeti viriyaṁ janeti satiṁ janeti
samādhiṁ janeti paññaṁ janetīti. Na hevaṁ vattabbe .pe.

[1648] Paro parassa cittaṁ paggaṇhātīti. Āmantā.
Paro parassa uppanno phasso mā nirujjhīti paggaṇhātīti. Na
hevaṁ vattabbe .pe. Paro parassa uppannā vedanā .pe.
Uppannā paññā mā nirujjhīti paggaṇhātīti. Na hevaṁ
vattabbe .pe.

[1649] Paro parassa cittaṁ paggaṇhātīti. Āmantā.
Paro parassa atthāya rāgaṁ pajahati dosaṁ pajahati mohaṁ pajahati
.pe. Anottappaṁ pajahatīti. Na hevaṁ vattabbe .pe.

[1650] Paro parassa cittaṁ paggaṇhātīti. Āmantā. Paro
parassa atthāya maggaṁ bhāveti satipaṭṭhānaṁ bhāveti .pe. Bojjhaṅgaṁ
bhāvetīti. Na hevaṁ vattabbe .pe.

[1651] Paro parassa cittaṁ paggaṇhātīti. Āmantā.
Paro parassa atthāya dukkhaṁ parijānāti .pe. Maggaṁ bhāvetīti.
Na hevaṁ vattabbe .pe.

[1652] Paro parassa cittaṁ paggaṇhātīti. Āmantā.
Añño aññassa kārako parakataṁ sukhadukkhaṁ añño karoti
añño paṭisaṁvedetīti. Na hevaṁ vattabbe .pe. Paro parassa
cittaṁ paggaṇhātīti. Āmantā. Nanu vuttaṁ bhagavatā attanāva
kataṁ pāpaṁ .pe. Nāñño aññaṁ visodhayeti attheva suttantoti.
Āmantā. Tena hi na vattabbaṁ paro parassa cittaṁ paggaṇhātīti.

[1653] Na vattabbaṁ paro parassa cittaṁ paggaṇhātīti.
Āmantā. Nanu atthi balappattā atthi vasībhūtāti. Āmantā.
Hañci atthi balappattā atthi vasībhūtā tena vata re vattabbe
paro parassa cittaṁ paggaṇhātīti.
Paggahakathā.
---------
Sukhānuppadānakathā

[1654] Paro parassa sukhaṁ anuppadetīti. Āmantā. Paro
parassa dukkhaṁ anuppadetīti. Na hevaṁ vattabbe .pe. Paro
parassa dukkhaṁ na anuppadetīti. Āmantā. Paro parassa sukhaṁ
Na anuppadetīti. Na hevaṁ vattabbe .pe. Paro parassa sukhaṁ
anuppadetīti. Āmantā. Paro parassa attano sukhaṁ anuppadeti
aññesaṁ sukhaṁ anuppadeti tassa sukhaṁ anuppadetīti. Na hevaṁ
vattabbe .pe. Paro parassa neva attano na aññesaṁ na
tassa sukhaṁ anuppadetīti. Āmantā. Hañci paro parassa neva
attano na aññesaṁ na tassa sukhaṁ anuppadeti no vata re
vattabbe paro parassa sukhaṁ anuppadetīti.

[1655] Paro parassa sukhaṁ anuppadetīti. Āmantā.
Añño aññassa kārako parakataṁ sukhadukkhaṁ añño karoti
añño paṭisaṁvedetīti. Na hevaṁ vattabbe .pe.

[1656] Na vattabbaṁ paro parassa sukhaṁ anuppadetīti.
Āmantā. Nanu āyasmā udāyī etadavoca bahunnaṁ vata no
bhagavā dukkhadhammānaṁ apahattā bahunnaṁ vata no bhagavā sukhadhammānaṁ
upahattā bahunnaṁ vata no bhagavā akusalānaṁ dhammānaṁ apahattā
bahunnaṁ vata no bhagavā kusalānaṁ dhammānaṁ upahattāti 1 attheva
suttantoti. Āmantā. Tena hi paro parassa sukhaṁ anuppadetīti.
Sukhānuppadānakathā.
1 Ma. Ma. 185.
Adhiggayhamanasikārakathā