[1557] Saḷāyatanaṁ apubbaṁ acarimaṁ mātukucchismiṁ saṇṭhātīti.
Āmantā. Sabbaṅgapaccaṅgī ahīnindriyo mātukucchismiṁ okkamatīti.
Na hevaṁ vattabbe .pe.

[1558] Upapattesiyena cittena cakkhāyatanaṁ saṇṭhātīti.
Āmantā. Upapattesiyena cittena hatthā saṇṭhanti pādā
saṇṭhanti sīsaṁ saṇṭhāti kaṇṇo saṇṭhāti nāsikā saṇṭhāti
mukhaṁ saṇṭhāti dantā saṇṭhantīti. Na hevaṁ vattabbe .pe.
Upapattesiyena cittena sotāyatanaṁ .pe. Ghānāyatanaṁ .pe. Jivhāyatanaṁ
saṇṭhātīti. Āmantā. Upapattesiyena cittena hatthā saṇṭhanti
pādā saṇṭhanti sīsaṁ saṇṭhāti kaṇṇo saṇṭhāti nāsikā
saṇṭhāti mukhaṁ saṇṭhāti dantā saṇṭhantīti. Na hevaṁ vattabbe .pe.

[1559] Mātukucchigatassa pacchā cakkhāyatanaṁ uppajjatīti.
Āmantā. Mātukucchismiṁ cakkhupaṭilābhāya kammaṁ karotīti. Na
hevaṁ vattabbe .pe. Mātukucchigatassa pacchā sotāyatanaṁ .pe.
Ghānāyatanaṁ .pe. Jivhāyatanaṁ uppajjatīti. Āmantā. Mātukucchismiṁ
jivhāpaṭilābhāya kammaṁ karotīti. Na hevaṁ vattabbe .pe.
Mātukucchigatassa pacchā kesā lomā nakhā dantā aṭṭhī uppajjantīti.
Āmantā. Mātukucchismiṁ aṭṭhipaṭilābhāya kammaṁ
karotīti. Na hevaṁ vattabbe .pe.

[1560] Na vattabbaṁ mātukucchigatassa pacchā kesā lomā nakhā
dantā aṭṭhī uppajjantīti. Āmantā. Nanu vuttaṁ bhagavatā
paṭhamaṁ kalalaṁ hoti kalalā hoti ambudaṁ
ambudā jāyate pesī pesī nibbattatī ghano
ghanā pasākhā jāyanti kesā lomā nakhāpi ca
yañcassa bhuñjati mātā annaṁ pānañca bhojanaṁ
tena so tattha yāpeti mātukucchigato naroti 1
1 saṁ sagātha. 266.
Attheva suttantoti. Āmantā. Tena hi mātukucchigatassa pacchā
kesā lomā nakhā dantā aṭṭhī uppajjantīti.
Saḷāyatanuppattikathā.
---------------
Anantarapaccayakathā

[1561] Cakkhuviññāṇassa anantarā sotaviññāṇaṁ uppajjatīti.
Āmantā. Yā cakkhuviññāṇassa uppādāya āvajjanā .pe.
Paṇidhi sāva sotaviññāṇassa uppādāya āvajjanā .pe.
Paṇidhīti. Na hevaṁ vattabbe .pe. Cakkhuviññāṇassa anantarā
sotaviññāṇaṁ uppajjatīti. Na vattabbaṁ yā cakkhuviññāṇassa uppādāya
āvajjanā .pe. Paṇidhi sāva sotaviññāṇassa uppādāya
āvajjanā .pe. Paṇidhīti. Āmantā. Sotaviññāṇaṁ anāvajjantassa
uppajjati .pe. Apaṇidahantassa uppajjatīti. Na
hevaṁ vattabbe .pe. Nanu sotaviññāṇaṁ āvajjantassa uppajjati
.pe. Paṇidahantassa uppajjatīti. Āmantā. Hañci sotaviññāṇaṁ
āvajjantassa uppajjati .pe. Paṇidahantassa uppajjati no vata re
vattabbe cakkhuviññāṇassa anantarā sotaviññāṇaṁ uppajjatīti.

[1562] Cakkhuviññāṇassa anantarā sotaviññāṇaṁ uppajjatīti.
Āmantā. Cakkhuviññāṇaṁ rūpanimittaṁ manasikaroto
Uppajjatīti. Āmantā. Sotaviññāṇaṁ rūpanimittaṁ manasikaroto
uppajjatīti. Na hevaṁ vattabbe .pe.

[1563] Cakkhuviññāṇaṁ rūpārammaṇaññeva na aññārammaṇanti.
Āmantā. Sotaviññāṇaṁ rūpārammaṇaññeva na aññārammaṇanti.
Na hevaṁ vattabbe .pe. Cakkhuñca paṭicca rūpe ca uppajjati
cakkhuviññāṇanti. Āmantā. Cakkhuñca paṭicca rūpe ca uppajjati
sotaviññāṇanti. Na hevaṁ vattabbe .pe. Cakkhuñca paṭicca
rūpe ca uppajjati sotaviññāṇanti. Āmantā. Cakkhuñca
paṭicca rūpe ca uppajjati sotaviññāṇanti attheva suttantoti.
Natthi. Cakkhuñca paṭicca rūpe ca uppajjati cakkhuviññāṇanti
attheva suttantoti. Āmantā. Hañci cakkhuñca paṭicca rūpe ca
uppajjati cakkhuviññāṇanti attheva suttanto no vata re vattabbe
cakkhuñca paṭicca rūpe ca uppajjati sotaviññāṇanti. Cakkhuviññāṇassa
anantarā sotaviññāṇaṁ uppajjatīti. Āmantā.
Taññeva cakkhuviññāṇaṁ taṁ sotaviññāṇanti. Na hevaṁ vattabbe .pe.

[1564] Sotaviññāṇassa anantarā ghānaviññāṇaṁ uppajjati
.pe. Ghānaviññāṇassa anantarā jivhāviññāṇaṁ uppajjati .pe.

[1565] Jivhāviññāṇassa anantarā kāyaviññāṇaṁ uppajjatīti.
Āmantā. Yā jivhāviññāṇassa uppādāya āvajjanā
.pe. Paṇidhi sāva kāyaviññāṇassa uppādāya āvajjanā .pe.
Paṇidhīti. Na hevaṁ vattabbe .pe. Jivhāviññāṇassa anantarā
kāyaviññāṇaṁ uppajjatīti. Na vattabbaṁ yā jivhāviññāṇassa
uppādāya āvajjanā .pe. Paṇidhi sāva kāyaviññāṇassa
uppādāya āvajjanā .pe. Paṇidhīti. Āmantā. Kāyaviññāṇaṁ
anāvajjantassa uppajjati .pe. Apaṇidahantassa uppajjatīti.
Na hevaṁ vattabbe .pe. Nanu kāyaviññāṇaṁ āvajjantassa uppajjati
.pe. Paṇidahantassa uppajjatīti. Āmantā. Hañci kāyaviññāṇaṁ
āvajjantassa uppajjati .pe. Paṇidahantassa uppajjati
no vata re vattabbe jivhāviññāṇassa anantarā kāyaviññāṇaṁ
uppajjatīti.

[1566] Jivhāviññāṇassa anantarā kāyaviññāṇaṁ uppajjatīti.
Āmantā. Jivhāviññāṇaṁ rasanimittaṁ manasikaroto uppajjatīti.
Āmantā. Kāyaviññāṇaṁ rasanimittaṁ manasikaroto uppajjatīti.
Na hevaṁ vattabbe .pe. Jivhāviññāṇaṁ rasārammaṇaññeva na
aññārammaṇanti. Āmantā. Kāyaviññāṇaṁ rasārammaṇaññeva
na aññārammaṇanti. Na hevaṁ vattabbe .pe. Jivhañca paṭicca
rase ca uppajjati jivhāviññāṇanti. Āmantā. Jivhañca
paṭicca rase ca uppajjati kāyaviññāṇanti. Na hevaṁ vattabbe
.pe. Jivhañca paṭicca rase ca uppajjati kāyaviññāṇanti.
Āmantā. Jivhañca paṭicca rase ca uppajjati kāyaviññāṇanti
Attheva suttantoti. Natthi. Jivhañca paṭicca rase ca uppajjati
jivhāviññāṇanti attheva suttantoti. Āmantā. Hañci jivhañca
paṭicca rase ca uppajjati jivhāviññāṇanti attheva suttanto
no vata re vattabbe jivhañca paṭicca rase ca uppajjati kāyaviññāṇanti.
Jivhāviññāṇassa anantarā kāyaviññāṇaṁ uppajjatīti.
Āmantā. Taññeva jivhāviññāṇaṁ taṁ kāyaviññāṇanti.
Na hevaṁ vattabbe .pe.