[1547] Rūpataṇhā lobho dukkhasamudayoti. Āmantā.
Dhammataṇhā lobho dukkhasamudayoti. Na hevaṁ vattabbe .pe.
Saddataṇhā .pe. Phoṭṭhabbataṇhā lobho dukkhasamudayoti. Āmantā.
Dhammataṇhā lobho dukkhasamudayoti. Na hevaṁ vattabbe .pe.

[1548] Dhammataṇhā na dukkhasamudayoti. Āmantā. Nanu
vuttaṁ bhagavatā yāyaṁ taṇhā ponobbhavikā nandirāgasahagatā
tatratatrābhinandinī seyyathīdaṁ kāmataṇhā bhavataṇhā vibhavataṇhāti
attheva suttantoti. Āmantā. Tena hi na vattabbaṁ dhammataṇhā
na dukkhasamudayoti.

[1549] Na vattabbaṁ dhammataṇhā na dukkhasamudayoti. Āmantā.
Nanu sā dhammataṇhāti. Āmantā. Hañci sā dhammataṇhā
no vata re vattabbe dhammataṇhā na dukkhasamudayoti.
Dhammataṇhā na dukkhasamudayotikathā.
Terasamo vaggo.
Tassa uddānaṁ
kappaṭṭho kappaṁ tiṭṭheyya kappaṭṭho kusalaṁ cittaṁ
na paṭilabheyya anantarāpayutto puggalo sammattaniyāmaṁ
okkameyya niyato niyāmaṁ okkamati nīvuto nīvaraṇaṁ jahati
sammukhībhūto saññojanaṁ jahati jhānanikanti asātarāgo
dhammataṇhā abyākatā dhammataṇhā na dukkhasamudayoti.
-------------
Kusalākusalapaṭisandahanakathā

[1550] Akusalamūlaṁ paṭisandahati kusalamūlanti. Āmantā. Yā
akusalassa uppādāya āvajjanā .pe. Paṇidhi sāva kusalassa
uppādāya āvajjanā .pe. Paṇidhīti. Na hevaṁ vattabbe .pe.
Akusalamūlaṁ paṭisandahati kusalamūlaṁ na vattabbaṁ yā akusalassa
uppādāya āvajjanā .pe. Paṇidhi sāva kusalassa uppādāya
āvajjanā .pe. Paṇidhīti. Āmantā. Kusalaṁ anāvajjantassa
Uppajjati .pe. Apaṇidahantassa uppajjatīti. Na hevaṁ vattabbe
.pe. Kusalaṁ āvajjantassa uppajjati .pe. Paṇidahantassa
uppajjatīti. Āmantā. Hañci kusalaṁ āvajjantassa uppajjati
.pe. Paṇidahantassa uppajjati no vata re vattabbe akusalamūlaṁ
paṭisandahati kusalamūlanti.

[1551] Akusalamūlaṁ paṭisandahati kusalamūlanti. Āmantā.
Akusalaṁ ayoniso manasikaroto uppajjatīti. Āmantā. Kusalaṁ
ayoniso manasikaroto uppajjatīti. Na hevaṁ vattabbe .pe.
Nanu kusalaṁ yoniso manasikaroto uppajjatīti. Āmantā. Hañci
kusalaṁ yoniso manasikaroto uppajjati no vata re vattabbe
akusalamūlaṁ paṭisandahati kusalamūlanti.

[1552] Akusalamūlaṁ paṭisandahati kusalamūlanti. Āmantā.
Kāmasaññāya anantarā nekkhammasaññā uppajjati byāpādasaññāya
anantarā abyāpādasaññā uppajjati vihiṁsāsaññāya anantarā
avihiṁsāsaññā uppajjati byāpādassa anantarā mettā uppajjati
vihiṁsāya anantarā karuṇā uppajjati aratiyā anantarā muditā
uppajjati paṭighassa anantarā upekkhā uppajjatīti. Na hevaṁ
vattabbe .pe.

[1553] Kusalamūlaṁ paṭisandahati akusalamūlanti. Āmantā.
Yā kusalassa uppādāya āvajjanā .pe. Paṇidhi sāva akusalassa
Uppādāya āvajjanā .pe. Paṇidhīti. Na hevaṁ vattabbe .pe.
Kusalamūlaṁ paṭisandahati akusalamūlaṁ na vattabbaṁ yā kusalassa uppādāya
āvajjanā .pe. Paṇidhi sāva akusalassa uppādāya
āvajjanā .pe. Paṇidhīti. Āmantā. Akusalaṁ anāvajjantassa
uppajjati .pe. Apaṇidahantassa uppajjatīti. Na hevaṁ vattabbe
.pe. Nanu akusalaṁ āvajjantassa uppajjati .pe. Paṇidahantassa
uppajjatīti. Āmantā. Hañci akusalaṁ āvajjantassa
uppajjati .pe. Paṇidahantassa uppajjati no vata re vattabbe
kusalamūlaṁ paṭisandahati akusalamūlanti.

[1554] Kusalamūlaṁ paṭisandahati akusalamūlanti. Āmantā.
Kusalaṁ yoniso manasikaroto uppajjatīti. Āmantā. Akusalaṁ
yoniso manasikaroto uppajjatīti. Na hevaṁ vattabbe .pe. Nanu
akusalaṁ ayoniso manasikaroto uppajjatīti. Āmantā. Hañci
akusalaṁ ayoniso manasikaroto uppajjati no vata re vattabbe
kusalamūlaṁ paṭisandahati akusalamūlanti.

[1555] Kusalamūlaṁ paṭisandahati akusalamūlanti. Āmantā.
Nekkhammasaññāya anantarā kāmasaññā uppajjati abyāpādasaññāya
anantarā byāpādasaññā uppajjati avihiṁsāsaññāya
anantarā vihiṁsāsaññā uppajjati mettāya anantarā byāpādo
uppajjati karuṇāya anantarā vihiṁsā uppajjati muditāya anantarā
Arati uppajjati upekkhāya anantarā paṭighaṁ uppajjatīti. Na
hevaṁ vattabbe .pe.

[1556] Na vattabbaṁ akusalamūlaṁ paṭisandahati kusalamūlaṁ kusalamūlaṁ
paṭisandahati akusalamūlanti. Āmantā. Nanu yasmiṁyeva vatthusmiṁ
rajjati tasmiṁyeva vatthusmiṁ virajjati yasmiṁyeva vatthusmiṁ virajjati
tasmiṁyeva vatthusmiṁ rajjatīti. Āmantā. Hañci yasmiṁyeva vatthusmiṁ
rajjati tasmiṁyeva vatthusmiṁ virajjati yasmiṁyeva vatthusmiṁ virajjati
tasmiṁyeva vatthusmiṁ rajjati tena vata re vattabbe akusalamūlaṁ
paṭisandahati kusalamūlaṁ kusalamūlaṁ paṭisandahati akusalamūlanti.
Kusalākusalapaṭisandahanakathā.
------------------
Saḷāyatanuppattikathā