[1527] Sammukhībhūto saññojanaṁ jahatīti. Āmantā. Nanu
vuttaṁ bhagavatā so evaṁ samāhite citte .pe. Āsavānaṁ
khayañāṇāya cittaṁ abhininnāmetīti attheva suttantoti. Āmantā.
Tena hi na vattabbaṁ sammukhībhūto saññojanaṁ jahatīti.

[1528] Na vattabbaṁ sammukhībhūto saññojanaṁ jahatīti. Āmantā.
Nanu vuttaṁ bhagavatā tassa evaṁ jānato evaṁ passato kāmāsavāpi
cittaṁ vimuccati .pe. Avijjāsavāpi cittaṁ vimuccatīti attheva
suttantoti. Āmantā. Tena hi sammukhībhūto saññojanaṁ jahatīti.
Sammukhībhūtakathā.
-----------
Samāpanno assādetikathā

[1529] Samāpanno assādeti jhānanikanti jhānārammaṇāti.
Āmantā. Taṁ jhānaṁ tassa jhānassa ārammaṇanti. Na hevaṁ
vattabbe .pe. Taṁ jhānaṁ tassa jhānassa ārammaṇanti.
Āmantā. Tena phassena taṁ phassaṁ phusati tāya vedanāya taṁ
vedanaṁ vedeti tāya saññāya taṁ saññaṁ sañjānāti tāya
cetanāya taṁ cetanaṁ ceteti tena cittena taṁ cittaṁ cinteti
tena vitakkena taṁ vitakkaṁ vitakketi tena vicārena taṁ vicāraṁ
Vicāreti tāya pītiyā taṁ pītiṁ piyāyati tāya satiyā taṁ satiṁ
sarati tāya paññāya taṁ paññaṁ pajānātīti. Na hevaṁ vattabbe
.pe. Jhānanikanti cittasampayuttā jhānaṁ cittasampayuttanti.
Āmantā. Dvinnaṁ phassānaṁ .pe. Dvinnaṁ cittānaṁ samodhānaṁ
hotīti. Na hevaṁ vattabbe .pe. Jhānanikanti akusalā jhānaṁ
kusalanti. Āmantā. Kusalākusalā sāvajjānavajjā hīnappaṇītā
kaṇhasukkasappaṭibhāgā dhammā sammukhībhāvaṁ āgacchantīti. Na hevaṁ
vattabbe .pe. Kusalākusalā sāvajjānavajjā hīnappaṇītā kaṇhasukkasappaṭibhāgā
dhammā sammukhībhānaṁ āgacchantīti. Āmantā. Nanu
vuttaṁ bhagavatā cattārīmāni bhikkhave suvidūravidūrāni. Katamāni
cattāri. Nabhañca bhikkhave paṭhavī ca idaṁ paṭhamaṁ suvidūravidūraṁ
.pe. Tasmā sataṁ dhammo asabbhi ārakāti attheva suttantoti.
Āmantā. Tena hi na vattabbaṁ kusalākusalā sāvajjānavajjā
hīnappaṇītā kaṇhasukkasappaṭibhāgā dhammā sammukhībhāvaṁ āgacchantīti.

[1530] Na vattabbaṁ samāpanno assādeti jhānanikanti
jhānārammaṇāti. Āmantā. Nanu vuttaṁ bhagavatā idha
bhikkhave bhikkhu vivicceva kāmehi .pe. Paṭhamaṁ jhānaṁ upasampajja
viharati so tadassādeti taṁ nikāmeti tena ca vittiṁ āpajjati
vitakkavicārānaṁ vūpasamā .pe. Dutiyaṁ jhānaṁ .pe. Tatiyaṁ jhānaṁ
.pe. Catutthaṁ jhānaṁ upasampajja viharati so tadassādeti taṁ
Nikāmeti tena ca vittiṁ āpajjatīti attheva suttantoti. Āmantā.
Tena hi samāpanno assādeti jhānanikanti jhānārammaṇāti.
Samāpanno assādetikathā.
---------------
Asātarāgakathā

[1531] Atthi asātarāgoti. Āmantā. Dukkhābhinandino
sattā atthi keci dukkhaṁ patthenti pihenti esanti gavesanti
pariyesanti dukkhaṁ ajjhosāya tiṭṭhantīti. Na hevaṁ vattabbe
.pe. Nanu sukhābhinandino sattā atthi keci sukhaṁ patthenti
pihenti esanti gavesanti pariyesanti sukhaṁ ajjhosāya tiṭṭhantīti.
Āmantā. Hañci sukhābhinandino sattā atthi keci sukhaṁ patthenti
pihenti esanti gavesanti pariyesanti sukhaṁ ajjhosāya tiṭṭhanti
no vata re vattabbe atthi asātarāgoti.

[1532] Atthi asātarāgoti. Āmantā. Dukkhāya vedanāya
rāgānusayo anuseti sukhāya vedanāya paṭighānusayo anusetīti.
Na hevaṁ vattabbe .pe. Nanu sukhāya vedanāya rāgānusayo
anuseti dukkhāya vedanāya paṭighānusayo anusetīti. Āmantā.
Hañci sukhāya vedanāya rāgānusayo anuseti dukkhāya vedanāya
paṭighānusayo anuseti no vata re vattabbe atthi asātarāgoti.

[1533] Na vattabbaṁ atthi asātarāgoti. Āmantā. Nanu
vuttaṁ bhagavatā so evaṁ anurodhavirodhaṁ samāpanno yaṁ kiñci
vedanaṁ vedayati sukhaṁ vā dukkhaṁ vā adukkhamasukhaṁ vā so taṁ vedanaṁ
abhinandati abhivadati ajjhosāya tiṭṭhatīti 1 attheva suttantoti.
Āmantā. Tena hi atthi asātarāgoti.
Asātarāgakathā.
------------
Dhammataṇhā abyākatātikathā

[1534] Dhammataṇhā abyākatāti. Āmantā. Vipākābyākatā
kiriyābyākatā rūpaṁ nibbānaṁ cakkhāyatanaṁ .pe. Phoṭṭhabbāyatananti.
Na hevaṁ vattabbe .pe.

[1535] Dhammataṇhā abyākatāti. Āmantā. Rūpataṇhā
abyākatāti. Na hevaṁ vattabbe .pe. Dhammataṇhā abyākatāti.
Āmantā. Saddataṇhā .pe. Gandhataṇhā rasataṇhā .pe.
Phoṭṭhabbataṇhā abyākatāti. Na hevaṁ vattabbe .pe.

[1536] Rūpataṇhā akusalāti. Āmantā. Dhammataṇhā
akusalāti. Na hevaṁ vattabbe .pe. Saddataṇhā .pe.
Phoṭṭhabbataṇhā akusalāti. Āmantā. Dhammataṇhā akusalāti.
1 Ma. mū. 467.
Na hevaṁ vattabbe .pe.