[1517] Kappaṭṭho kusalaṁ cittaṁ paṭilabheyyāti. Āmantā.
Tato vuṭṭhānaṁ kusalaṁ cittaṁ paṭilabheyyāti. Āmantā. Rūpāvacaraṁ
.pe. Arūpāvacaraṁ .pe. Lokuttaraṁ kusalaṁ cittaṁ paṭilabheyyāti.
Na hevaṁ vattabbe .pe.
Kusalacittapaṭilābhakathā
--------------
anantarāpayuttakathā

[1518] Anantarāpayutto puggalo sammattaniyāmaṁ okkameyyāti.
Āmantā. Micchattaniyāmañca sammattaniyāmañca ubho okkameyyāti.
Na hevaṁ vattabbe .pe. Anantarāpayutto puggalo sammattaniyāmaṁ
okkameyyāti. Āmantā. Nanu taṁ kammaṁ payuttaṁ kukkuccaṁ
upadahitaṁ 1 vippaṭisāriyaṁ janitanti. Āmantā. Hañci taṁ kammaṁ
payuttaṁ kukkuccaṁ upadahitaṁ vippaṭisāriyaṁ janitaṁ no vata re vattabbe
anantarāpayutto puggalo sammattaniyāmaṁ okkameyyāti.

[1519] Anantarāpayutto puggalo abhabbo sammattaniyāmaṁ
okkamitunti. Āmantā. Mātā jīvitā voropitā pitā jīvitā
voropito arahā jīvitā voropito duṭṭhena cittena tathāgatassa
lohitaṁ uppāditaṁ saṅgho bhinnoti. Na hevaṁ vattabbe .pe.
Anantarāpayutto puggalo taṁ kammaṁ paṭisaṁharitvā kukkuccaṁ paṭivinodetvā
1. Yu. Ma. uppāditaṁ.
Vippaṭisāriyaṁ paṭivinetvā 1 abhabbo sammattaniyāmaṁ okkamitunti.
Āmantā. Mātā jīvitā voropitā pitā jīvitā voropito
.pe. Saṅgho bhinnoti. Na hevaṁ vattabbe .pe. Anantarāpayutto
puggalo taṁ kammaṁ paṭisaṁharitvā kukkuccaṁ paṭivinodetvā vippaṭisāriyaṁ
paṭivinetvā 2 abhabbo sammattaniyāmaṁ okkamitunti. Āmantā.
Nanu taṁ kammaṁ paṭisaṁhaṭaṁ kukkuccaṁ paṭivinoditaṁ vippaṭisāriyaṁ
paṭivinītanti. Āmantā. Hañci taṁ kammaṁ paṭisaṁhaṭaṁ kukkuccaṁ
paṭivinoditaṁ vippaṭisāriyaṁ paṭivinītaṁ no vata re vattabbe anantarāpayutto
puggalo taṁ kammaṁ paṭisaṁharitvā kukkuccaṁ paṭivinodetvā
vippaṭisāriyaṁ paṭivinetvā abhabbo sammattaniyāmaṁ okkamitunti.

[1520] Anantarāpayutto puggalo sammattaniyāmaṁ okkameyyāti.
Āmantā. Nanu taṁ kammaṁ payutto āsīti. Āmantā. Hañci taṁ
kammaṁ payutto āsi no vata re vattabbe anantarāpayutto puggalo
sammattaniyāmaṁ okkameyyāti.
Anantarāpayuttakathā.
----------
Niyatassa niyāmakathā

[1521] Niyato niyāmaṁ okkamatīti. Āmantā. Micchattaniyato
sammattaniyāmaṁ okkamati sammattaniyato micchattaniyāmaṁ okkamatīti.
1, 2. Yu. Ma. paṭivinodetvā
Na hevaṁ vattabbe .pe. Niyato niyāmaṁ okkamatīti. Āmantā.
Pubbe maggaṁ bhāvetvā pacchā niyāmaṁ okkamatīti. Na hevaṁ vattabbe
.pe. Pubbe sotāpattimaggaṁ bhāvetvā pacchā sotāpattiniyāmaṁ
okkamatīti. Na hevaṁ vattabbe .pe. Pubbe sakadāgāmimaggaṁ
.pe. Anāgāmimaggaṁ .pe. Arahattamaggaṁ bhāvetvā pacchā arahattaniyāmaṁ
okkamatīti. Na hevaṁ vattabbe .pe. Pubbe satipaṭṭhānaṁ
.pe. Sammappadhānaṁ .pe. Iddhipādaṁ .pe. Indriyaṁ .pe.
Balaṁ .pe. Bojjhaṅgaṁ bhāvetvā pacchā niyāmaṁ okkamatīti.
Na hevaṁ vattabbe .pe.

[1522] Na vattabbaṁ niyato niyāmaṁ okkamatīti. Āmantā.
Bhabbo bodhisatto tāya jātiyā dhammaṁ nābhisametunti. Na hevaṁ
vattabbe. Tena hi niyato niyāmaṁ okkamatīti.
Niyatassa niyāmakathā.
---------------
Nīvutakathā

[1523] Nīvuto nīvaraṇaṁ jahatīti. Āmantā. Ratto rāgaṁ
jahati duṭṭho dosaṁ jahati mūḷho mohaṁ jahati kiliṭṭho
kilese jahatīti. Na hevaṁ vattabbe .pe. Rāgena rāgaṁ jahati
dosena dosaṁ jahati mohena mohaṁ jahati kilesehi kilese
Jahatīti. Na hevaṁ vattabbe .pe. Rāgo cittasampayutto
maggo cittasampayuttoti. Āmantā. Dvinnaṁ phassānaṁ .pe.
Dvinnaṁ cittānaṁ samodhānaṁ hotīti. Na hevaṁ vattabbe .pe.
Rāgo akusalo maggo kusaloti. Āmantā. Kusalākusalā
sāvajjānavajjā hīnappaṇītā kaṇhasukkasappaṭibhāgā dhammā sammukhībhāvaṁ
āgacchantīti. Na hevaṁ vattabbe .pe. Kusalākusalā
sāvajjānavajjā hīnappaṇītā kaṇhasukkasappaṭibhāgā dhammā sammukhībhāvaṁ
āgacchantīti. Āmantā. Nanu vuttaṁ bhagavatā cattārīmāni
bhikkhave suvidūravidūrāni. Katamāni cattāri. Nabhañca bhikkhave paṭhavī
ca idaṁ paṭhamaṁ suvidūravidūraṁ .pe. Tasmā sataṁ dhammo asabbhi
ārakāti attheva suttantoti. Āmantā. Tena hi na
vattabbaṁ kusalākusalā .pe. Sammukhībhāvaṁ āgacchantīti.

[1524] Nīvuto nīvaraṇaṁ jahatīti. Āmantā. Nanu vuttaṁ
bhagavatā so evaṁ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte āsavānaṁ
khayañāṇāya cittaṁ abhininnāmetīti attheva suttantoti. Āmantā.
Tena hi na vattabbaṁ nīvuto nīvaraṇaṁ jahatīti.

[1525] Na vattabbaṁ nīvuto nīvaraṇaṁ jahatīti. Āmantā.
Nanu vuttaṁ bhagavatā tassa evaṁ jānato evaṁ passato kāmāsavāpi
cittaṁ vimuccati .pe. Avijjāsavāpi cittaṁ vimuccatīti attheva
Suttantoti. Āmantā. Tena hi nīvuto nīvaraṇaṁ jahatīti.
Nīvutakathā.
--------
Sammukhībhūtakathā

[1526] Sammukhībhūto saññojanaṁ jahatīti. Āmantā. Ratto
rāgaṁ jahati duṭṭho dosaṁ jahati mūḷho mohaṁ jahati kiliṭṭho
kilese jahatīti. Na hevaṁ vattabbe .pe. Rāgena rāgaṁ jahati
dosena dosaṁ jahati mohena mohaṁ jahati kilesehi kilese
jahatīti. Na hevaṁ vattabbe .pe. Rāgo cittasampayutto maggo
cittasampayuttoti. Āmantā. Dvinnaṁ phassānaṁ .pe. Dvinnaṁ
cittānaṁ samodhānaṁ hotīti. Na hevaṁ vattabbe .pe. Rāgo
akusalo maggo kusaloti. Āmantā. Kusalākusalā sāvajjānavajjā
hīnappaṇītā kaṇhasukkasappaṭibhāgā dhammā sammukhībhāvaṁ
āgacchantīti. Na hevaṁ vattabbe .pe. Kusalākusalā sāvajjānavajjā
hīnappaṇītā kaṇhasukkasappaṭibhāgā dhammā sammukhībhāvaṁ āgacchantīti.
Āmantā. Nanu vuttaṁ bhagavatā cattārīmāni bhikkhave suvidūravidūrāni.
Katamāni cattāri. Nabhañca bhikkhave paṭhavī ca idaṁ paṭhamaṁ suvidūravidūraṁ
.pe. Tasmā sataṁ dhammo asabbhi ārakāti attheva suttantoti.
Āmantā. Tena hi na vattabbaṁ kusalākusalā .pe.
Sammukhībhāvaṁ āgacchantīti.