[1507] Diṭṭhisampannassa puggalassa pahīnā duggatīti. Āmantā.
Diṭṭhisampanno puggalo āpāyike rūpe rajjeyyāti. Āmantā.
Hañci diṭṭhisampanno puggalo āpāyike rūpe rajjeyya no vata
re vattabbe diṭṭhisampannassa puggalassa pahīnā duggatīti.

[1508] Diṭṭhisampannassa puggalassa pahīnā duggatīti. Āmantā.
Diṭṭhisampanno puggalo āpāyike sadde .pe. Gandhe .pe.
Rase .pe. Phoṭṭhabbe .pe. Amanussitthiyā tiracchānagatitthiyā
nāgakaññāya methunaṁ dhammaṁ paṭiseveyya ajeḷakaṁ paṭiggaṇheyya
kukkuṭasūkaraṁ paṭiggaṇheyya hatthigavassavaḷavaṁ paṭiggaṇheyya .pe.
Tittiravaṭṭakamorakapiñjalaṁ 1 paṭiggaṇheyyāti. Āmantā. Hañci
diṭṭhisampanno puggalo tittiravaṭṭakamorakapiñjalaṁ paṭiggaṇheyya
no vata re vattabbe diṭṭhisampannassa puggalassa pahīnā duggatīti.

[1509] Diṭṭhisampannassa puggalassa pahīnā duggati diṭṭhisampanno
puggalo āpāyike rūpe rajjeyyāti. Āmantā.
Arahato pahīnā duggati arahā āpāyike rūpe rajjeyyāti.
Na hevaṁ vattabbe .pe. Diṭṭhisampannassa puggalassa pahīnā duggati
diṭṭhisampanno puggalo āpāyike sadde .pe. Gandhe .pe. Rase
.pe. Phoṭṭhabbe .pe. Tittiravaṭṭakamorakapiñjalaṁ paṭiggaṇheyyāti.
1. Ma. piñcaraṁ
Āmantā. Arahato pahīnā duggati arahā tittiravaṭṭakamorakapiñjalaṁ
paṭiggaṇheyyāti. Na hevaṁ vattabbe .pe.

[1510] Arahato pahīnā duggati na ca arahā āpāyike rūpe
rajjeyyāti. Āmantā. Diṭṭhisampannassa puggalassa pahīnā duggati
na ca diṭṭhisampanno puggalo āpāyike rūpe rajjeyyāti. Na hevaṁ
vattabbe .pe. Arahato pahīnā duggati na ca arahā āpāyike
sadde .pe. Gandhe .pe. Rase .pe. Phoṭṭhabbe .pe.
Amanussitthiyā tiracchānagatitthiyā nāgakaññāya methunaṁ dhammaṁ paṭiseveyya
ajeḷakaṁ paṭiggaṇheyya kukkuṭasūkaraṁ paṭiggaṇheyya hatthigavassavaḷavaṁ
paṭiggaṇheyya .pe. Tittiravaṭṭakamorakapiñjalaṁ paṭiggaṇheyyāti.
Āmantā. Diṭṭhisampannassa puggalassa pahīnā duggati na ca
diṭṭhisampanno puggalo tittiravaṭṭakamorakapiñjalaṁ paṭiggaṇheyyāti.
Na hevaṁ vattabbe .pe.

[1511] Na vattabbaṁ diṭṭhisampannassa puggalassa pahīnā duggatīti.
Āmantā. Diṭṭhisampanno puggalo nirayaṁ upapajjeyya .pe.
Tiracchānayoniṁ upapajjeyya .pe. Pittivisayaṁ upapajjeyyāti. Na hevaṁ
vattabbe .pe. Tena hi diṭṭhisampannassa puggalassa pahīnā duggatīti.
Duggatikathā.
---------
Sattamabhavikakathā

[1512] Na vattabbaṁ sattamabhavikassa puggalassa pahīnā duggatīti.
Āmantā. Sattamabhaviko puggalo nirayaṁ upapajjeyya tiracchānayoniṁ
upapajjeyya pittivisayaṁ upapajjeyyāti. Na hevaṁ vattabbe .pe.
Tena hi sattamabhavikassa puggalassa pahīnā duggatīti.
Sattamabhavikakathā.
Dvādasamo vaggo.
Tassa uddānaṁ
saṁvaro kammaṁ tatheva asaṁvaro sabbaṁ kammaṁ
savipākaṁ saddo vipāko saḷāyatanaṁ vipāko
sattakkhattuṁparamo puggalo sattakkhattuṁparamatāniyato
kolaṁkolo puggalo kolaṁkolatāniyato ekavījī
puggalo ekavījitāniyato diṭṭhisampanno puggalo
sañcicca pāṇaṁ jīvitā voropeyya diṭṭhisampannassa
puggalassa pahīnā duggati tatheva sattamabhavikassāti.
----------------
Kappaṭṭhakathā

[1513] Kappaṭṭho kappaṁ tiṭṭheyyāti. Āmantā. Kappo
ca saṇṭhāti buddho ca loke uppajjatīti. Na hevaṁ vattabbe
.pe. Kappaṭṭho kappaṁ tiṭṭheyyāti. Āmantā. Kappo ca saṇṭhāti
saṅgho ca bhijjatīti. Na hevaṁ vattabbe .pe. Kappaṭṭho kappaṁ
tiṭṭheyyāti. Āmantā. Kappo ca saṇṭhāti kappaṭṭho ca
kappaṭṭhiyaṁ kammaṁ karotīti. Na hevaṁ vattabbe .pe. Kappaṭṭho
kappaṁ tiṭṭheyyāti. Āmantā. Kappo ca saṇṭhāti kappaṭṭho ca
puggalo kālaṁ karotīti. Na hevaṁ vattabbe .pe. Kappaṭṭho kappaṁ
tiṭṭheyyāti. Āmantā. Atītaṁ kappaṁ tiṭṭheyya anāgataṁ kappaṁ
tiṭṭheyyāti. Na hevaṁ vattabbe .pe. Kappaṭṭho kappaṁ tiṭṭheyyāti.
Āmantā. Dve kappe tiṭṭheyya tayo kappe tiṭṭheyya cattāro
kappe tiṭṭheyyāti. Na hevaṁ vattabbe .pe. Kappaṭṭho kappaṁ
tiṭṭheyyāti. Āmantā. Kappaṭṭho kappe ḍayhante kattha
gacchatīti. Aññaṁ lokadhātuṁ gacchatīti. Mato gacchati vehāsaṁ
gacchatīti. Mato gacchatīti. Kappaṭṭhiyaṁ kammaṁ aparāpariyavepakkanti.
Na hevaṁ vattabbe .pe. Vehāsaṁ gacchatīti. Āmantā. Kappaṭṭho
iddhimāti. Na hevaṁ vattabbe .pe. Kappaṭṭho iddhimāti.
Āmantā. Kappaṭṭhena chandiddhipādo bhāvito viriyiddhipādo
bhāvito cittiddhipādo bhāvito vīmaṁsiddhipādo bhāvitoti. Na hevaṁ
vattabbe .pe.

[1514] Na vattabbaṁ kappaṭṭho kappaṁ tiṭṭheyyāti. Āmantā.
Nanu vuttaṁ bhagavatā
Āpāyiko nerayiko kappaṭṭho saṅghabhedako
vaggarato adhammaṭṭho yogakkhemā padhaṁsati
saṅghaṁ samaggaṁ bhetvāna kappaṁ nirayamhi paccatīti 1
attheva suttantoti. Āmantā. Tena hi kappaṭṭho kappaṁ tiṭṭheyyāti.
Kappaṭṭhakathā.
----------
Kusalacittapaṭilābhakathā

[1515] Kappaṭṭho kusalaṁ cittaṁ na paṭilabheyyāti. Āmantā.
Kappaṭṭho dānaṁ dadeyyāti. Āmantā. Hañci kappaṭṭho dānaṁ
dadeyya no vata re vattabbe kappaṭṭho kusalaṁ cittaṁ na paṭilabheyyāti.

[1516] Kappaṭṭho kusalaṁ cittaṁ na paṭilabheyyāti. Āmantā.
Kappaṭṭho cīvaraṁ dadeyya .pe. Piṇḍapātaṁ dadeyya .pe. Senāsanaṁ
dadeyya .pe. Gilānapaccayabhesajjaparikkhāraṁ dadeyya khādanīyaṁ dadeyya
bhojanīyaṁ dadeyya pānīyaṁ dadeyya cetiyaṁ vandeyya cetiye mālaṁ
āropeyya gandhaṁ āropeyya vilepanaṁ āropeyya .pe. Cetiyaṁ
abhidakkhiṇaṁ kareyyāti. Āmantā. Hañci kappaṭṭho cetiyaṁ
abhidakkhiṇaṁ kareyya no vata re vattabbe kappaṭṭho kusalaṁ cittaṁ
na paṭilabheyyāti .pe.
1 vi. cu. 2 190.