[1487] Saddo vipāko saddo na sukhavedaniyo .pe.
Anārammaṇo natthi tassa āvajjanā .pe. Paṇidhīti. Āmantā.
Phasso vipāko phasso na sukhavedaniyo na dukkhavedaniyo .pe.
Anārammaṇo natthi tassa āvajjanā .pe. Paṇidhīti. Na hevaṁ
vattabbe .pe.

[1488] Na vattabbaṁ saddo vipākoti. Āmantā. Nanu
vuttaṁ bhagavatā so tassa kammassa katattā upacitattā ussannattā
vipulattā brahmasaro hoti karavikabhāṇīti 2 attheva suttantoti.
1. Yu. brahmassaro. 2. dī. pā. 183.
Āmantā. Tena hi saddo vipākoti.
Saddo vipākotikathā.
------------
Saḷāyatanakathā

[1489] Cakkhāyatanaṁ vipākoti. Āmantā. Sukhavedaniyaṁ
dukkhavedaniyaṁ .pe. Sārammaṇaṁ atthi tassa āvajjanā .pe.
Paṇidhīti. Na hevaṁ vattabbe .pe. Nanu na sukhavedaniyaṁ .pe.
Anārammaṇaṁ natthi tassa āvajjanā .pe. Paṇidhīti. Āmantā.
Hañci na sukhavedaniyaṁ .pe. Anārammaṇaṁ natthi tassa āvajjanā
.pe. Paṇidhi no vata re vattabbe cakkhāyatanaṁ vipākoti .pe.
Phasso vipāko phasso sukhavedaniyo .pe. Sārammaṇo atthi
tassa āvajjanā .pe. Paṇidhīti. Āmantā. Cakkhāyatanaṁ vipāko
cakkhāyatanaṁ sukhavedaniyaṁ .pe. Sārammaṇaṁ atthi tassa āvajjanā
.pe. Paṇidhīti. Na hevaṁ vattabbe .pe. Cakkhāyatanaṁ vipāko
cakkhāyatanaṁ na sukhavedaniyaṁ .pe. Anārammaṇaṁ natthi tassa āvajjanā
.pe. Paṇidhīti. Āmantā. Phasso vipāko phasso na sukhavedaniyo
.pe. Anārammaṇo natthi tassa āvajjanā .pe.
Paṇidhīti. Na hevaṁ vattabbe .pe. Sotāyatanaṁ .pe. Ghānāyatanaṁ
.pe. Jivhāyatanaṁ .pe.

[1490] Kāyāyatanaṁ vipākoti. Āmantā. Sukhavedaniyaṁ .pe.
Sārammaṇaṁ atthi tassa āvajjanā .pe. Paṇidhīti. Na hevaṁ
vattabbe .pe. Nanu na sukhavedaniyaṁ .pe. Anārammaṇaṁ natthi
tassa āvajjanā .pe. Paṇidhīti. Āmantā. Hañci na sukhavedaniyaṁ
.pe. Anārammaṇaṁ natthi tassa āvajjanā .pe. Paṇidhi
no vata re vattabbe kāyāyatanaṁ vipākoti .pe. Phasso vipāko
phasso sukhavedaniyo .pe. Sārammaṇo atthi tassa āvajjanā
.pe. Paṇidhīti. Āmantā. Kāyāyatanaṁ vipāko kāyāyatanaṁ
sukhavedaniyaṁ .pe. Sārammaṇaṁ atthi tassa āvajjanā .pe.
Paṇidhīti. Na hevaṁ vattabbe .pe. Kāyāyatanaṁ vipāko kāyāyatanaṁ
na sukhavedaniyaṁ .pe. Anārammaṇaṁ natthi tassa āvajjanā .pe.
Paṇidhīti. Āmantā. Phasso vipāko phasso na sukhavedaniyo
.pe. Anārammaṇo natthi tassa āvajjanā .pe. Paṇidhīti.
Na hevaṁ vattabbe .pe.

[1491] Na vattabbaṁ saḷāyatanaṁ vipākoti. Āmantā. Nanu
saḷāyatanaṁ kammassa katattā uppannanti. Āmantā. Hañci
saḷāyatanaṁ kammassa katattā uppannaṁ tena vata re vattabbe
saḷāyatanaṁ vipākoti.
Saḷāyatanakathā
---------
Sattakkhattuṁparamakathā

[1492] Sattakkhattuṁparamo puggalo sattakkhattuṁparamatāniyatoti.
Āmantā. Mātā jīvitā voropitā pitā jīvitā voropito
arahā jīvitā voropito duṭṭhena cittena tathāgatassa lohitaṁ uppāditaṁ
saṅgho bhinnoti. Na hevaṁ vattabbe .pe.

[1493] Sattakkhattuṁparamo puggalo sattakkhattuṁparamatāniyatoti.
Āmantā. Abhabbo antarā dhammaṁ abhisametunti. Na hevaṁ
vattabbe .pe. Abhabbo antarā dhammaṁ abhisametunti. Āmantā.
Mātā jīvitā voropitā pitā jīvitā voropito arahā jīvitā
voropito duṭṭhena cittena tathāgatassa lohitaṁ uppāditaṁ saṅgho
bhinnoti. Na hevaṁ vattabbe .pe.

[1494] Sattakkhattuṁparamo puggalo sattakkhattuṁparamatāniyatoti.
Āmantā. Atthi so niyamo yena niyamena sattakkhattuṁparamo
puggalo sattakkhattuṁparamatāniyatoti. Na hevaṁ vattabbe .pe. Atthi
te satipaṭṭhānā sammappadhānā iddhipādā indriyā balā bojjhaṅgā
yehi bojjhaṅgehi sattakkhattuṁparamo puggalo sattakkhattuṁparamatāniyatoti.
Na hevaṁ vattabbe .pe.

[1495] Natthi so niyamo yena niyamena sattakkhattuṁparamo
puggalo sattakkhattuṁparamatāniyatoti. Āmantā. Hañci natthi
So niyamo yena niyamena sattakkhattuṁparamo puggalo sattakkhattuṁparamatāniyato
no vata re vattabbe sattakkhattuṁparamo puggalo
sattakkhattuṁparamatāniyatoti.

[1496] Natthi te satipaṭṭhānā .pe. Bojjhaṅgā yehi
bojjhaṅgehi sattakkhattuṁparamo puggalo sattakkhattuṁparamatāniyatoti.
Āmantā. Hañci natthi te bojjhaṅgā yehi bojjhaṅgehi sattakkhattuṁparamo
puggalo sattakkhattuṁparamatāniyato no vata re vattabbe
sattakkhattuṁparamo puggalo sattakkhattuṁparamatāniyatoti.