[1477] Asaṁvaro kammanti. Āmantā. Cakkhundriyāsaṁvaro
Cakkhukammanti. Na hevaṁ vattabbe .pe. Sotindriyāsaṁvaro
.pe. Ghānindriyāsaṁvaro .pe. Jivhindriyāsaṁvaro .pe. Kāyindriyāsaṁvaro
kāyakammanti. Na hevaṁ vattabbe .pe. Kāyindriyāsaṁvaro
kāyakammanti. Āmantā. Cakkhundriyāsaṁvaro
cakkhukammanti. Na hevaṁ vattabbe .pe. Kāyindriyāsaṁvaro
kāyakammanti. Āmantā. Sotindriyāsaṁvaro .pe. Ghānindriyāsaṁvaro
.pe. Jivhindriyāsaṁvaro jivhākammanti. Na hevaṁ vattabbe
.pe. Manindriyāsaṁvaro manokammanti. Na hevaṁ vattabbe .pe.
Manindriyāsaṁvaro manokammanti. Āmantā. Cakkhundriyāsaṁvaro
cakkhukammanti. Na hevaṁ vattabbe .pe. Manindriyāsaṁvaro
manokammanti. Āmantā. Sotindriyāsaṁvaro .pe. Ghānindriyāsaṁvaro
.pe. Jivhindriyāsaṁvaro .pe. Kāyindriyāsaṁvaro kāyakammanti.
Na hevaṁ vattabbe .pe.

[1478] Na vattabbaṁ saṁvaropi asaṁvaropi kammanti. Āmantā.
Nanu vuttaṁ bhagavatā idha bhikkhave bhikkhu cakkhunā rūpaṁ disvā
nimittaggāhī hoti .pe. Na nimittaggāhī hoti sotena saddaṁ
sutvā .pe. Manasā dhammaṁ viññāya nimittaggāhī hoti .pe.
Na nimittaggāhī hotīti attheva suttantoti. Āmantā.
Tena hi saṁvaro asaṁvaropi kammanti.
Saṁvaro kammantikathā.
---------------
Kammakathā

[1479] Sabbaṁ kammaṁ savipākanti. Āmantā. Sabbā
cetanā savipākāti. Na hevaṁ vattabbe .pe. Sabbā cetanā
savipākāti. Āmantā. Vipākābyākatā cetanā savipākāti.
Na hevaṁ vattabbe .pe. Sabbā cetanā savipākāti. Āmantā.
Kiriyābyākatā cetanā savipākāti. Na hevaṁ vattabbe .pe.
Sabbā cetanā savipākāti. Āmantā. Kāmāvacarā vipākābyākatā
cetanā savipākāti. Na hevaṁ vattabbe .pe. Sabbā cetanā
savipākāti. Āmantā. Rūpāvacarā arūpāvacarā apariyāpannā
vipākābyākatā cetanā savipākāti. Na hevaṁ vattabbe .pe.
Sabbā cetanā savipākāti. Āmantā. Kāmāvacarā kiriyābyākatā
cetanā savipākāti. Na hevaṁ vattabbe .pe. Sabbā cetanā
savipākāti. Āmantā. Rūpāvacarā arūpāvacarā kiriyābyākatā
cetanā savipākāti. Na hevaṁ vattabbe .pe.

[1480] Vipākābyākatā cetanā avipākāti. Āmantā.
Hañci vipākābyākatā cetanā avipākā no vata re vattabbe
sabbā cetanā savipākāti

[1481] Kiriyābyākatā cetanā avipākāti. Āmantā.
Hañci kiriyābyākatā cetanā avipākā no vata re vattabbe
Sabbā cetanā savipākāti.

[1482] Kāmāvacarā rūpāvacarā arūpāvacarā apariyāpannā
vipākābyākatā cetanā avipākāti. Āmantā. Hañci apariyāpannā
vipākābyākatā cetanā avipākā no vata re vattabbe
sabbā cetanā savipākāti.

[1483] Kāmāvacarā rūpāvacarā arūpāvacarā kiriyābyākatā
cetanā avipākāti. Āmantā. Hañci arūpāvacarā kiriyābyākatā
cetanā avipākā no vata re vattabbe sabbā cetanā savipākāti.

[1484] Na vattabbaṁ sabbaṁ kammaṁ savipākanti. Āmantā.
Nanu vuttaṁ bhagavatā nāhaṁ bhikkhave sañcetanikānaṁ kammānaṁ katānaṁ
upacitānaṁ appaṭisaṁviditvā byantībhāvaṁ vadāmi tañca kho diṭṭheva
dhamme upapajje vā apare vā pariyāyeti 1 attheva suttantoti.
Āmantā. Tena hi sabbaṁ kammaṁ savipākanti.
Kammakathā.
---------
Saddo vipākotikathā

[1485] Saddo vipākoti. Āmantā. Sukhavedaniyo dukkhavedaniyo
adukkhamasukhavedaniyo sukhāya vedanāya sampayutto dukkhāya vedanāya
1. aṁ. dasaka. 260.
Sampayutto adukkhamasukhāya vedanāya sampayutto phassena sampayutto
vedanāya sampayutto saññāya sampayutto cetanāya sampayutto
cittena sampayutto sārammaṇo atthi tassa āvajjanā ābhogo
samannāhāro manasikāro cetanā patthanā paṇidhīti. Na hevaṁ
vattabbe .pe. Nanu na sukhavedaniyo na dukkhavedaniyo .pe.
Anārammaṇo natthi tassa āvajjanā .pe. Paṇidhīti. Āmantā.
Hañci na sukhavedaniyo .pe. Anārammaṇo natthi tassa āvajjanā
.pe. Paṇidhi no vata re vattabbe saddo vipākoti.

[1486] Phasso vipāko phasso sukhavedaniyo .pe. Sārammaṇo
atthi tassa āvajjanā .pe. Paṇidhīti. Āmantā. Saddo
vipāko saddo sukhavedaniyo .pe. Sārammaṇo atthi tassa
āvajjanā .pe. Paṇidhīti. Na hevaṁ vattabbe .pe.