[1467] Ekacittakkhaṇiko samādhīti. Āmantā. Cakkhuviññāṇasamaṅgī
samāpannoti. Na hevaṁ vattabbe .pe. Sotaviññāṇasamaṅgī
.pe. Ghānaviññāṇasamaṅgī .pe. Jivhāviññāṇasamaṅgī .pe.
Kāyaviññāṇasamaṅgī .pe. Akusalacittasamaṅgī .pe. Rāgasahagatacittasamaṅgī
.pe. Dosasahagatacittasamaṅgī .pe. Mohasahagatacittasamaṅgī.
.pe. Anottappasahagatacittasamaṅgī samāpannoti. Na hevaṁ
vattabbe .pe.

[1468] Cittasantati samādhīti. Āmantā. Akusalacittasantati
samādhīti. Na hevaṁ vattabbe .pe. Rāgasahagatā .pe. Dosasahagatā
.pe. Mohasahagatā .pe. Anottappasahagatā cittasantati samādhīti.
Na hevaṁ vattabbe .pe.

[1469] Na vattabbaṁ cittasantati samādhīti. Āmantā. Nanu
Vuttaṁ bhagavatā ahaṁ kho āvuso nigaṇṭhā 1 pahomi aniñjamāno
kāyena abhāsamāno vācaṁ sattarattindivāni ekantasukhapaṭisaṁvedī viharitunti
attheva suttantoti. Āmantā. Tena hi cittasantati samādhīti.
Samādhikathā.
---------
Dhammaṭṭhitatākathā

[1470] Dhammaṭṭhitatā parinipphannāti. Āmantā. Tāya
ṭhitatā parinipphannāti. Na hevaṁ vattabbe .pe. Tāya ṭhitatā
parinipphannāti. Āmantā. Tāya tāyeva natthi dukkhassa
antakiriyā natthi vaṭṭūpacchedo natthi anupādāparinibbānanti.
Na hevaṁ vattabbe .pe.

[1471] Rūpassa ṭhitatā parinipphannāti. Āmantā. Tāya
ṭhitatā parinipphannāti. Na hevaṁ vattabbe .pe. Tāya ṭhitatā
parinipphannāti. Āmantā. Tāya tāyeva natthi dukkhassa
antakiriyā natthi vaṭṭūpacchedo natthi anupādāparinibbānanti.
Na hevaṁ vattabbe .pe. Vedanāya ṭhitatā .pe. Saññāya
ṭhitatā .pe. Saṅkhārānaṁ ṭhitatā .pe. Viññāṇassa ṭhitatā
parinipphannāti. Āmantā. Tāya ṭhitatā parinipphannāti. Na
hevaṁ vattabbe .pe. Tāya ṭhitatā parinipphannāti. Āmantā.
1. Yu. nigaṇha. Ma. nigaṇṭha.
Tā tāyeva natthi dukkhassa antakiriyā natthi vaṭṭūpacchedo
natthi anupādāparinibbānanti. Na hevaṁ vattabbe .pe.
Dhammaṭṭhitatākathā.
-------------
Aniccatākathā

[1472] Aniccatā parinipphannāti. Āmantā. Tāya
aniccatāya aniccatā parinipphannāti. Na hevaṁ vattabbe .pe.
Tāya aniccatāya aniccatā parinipphannāti. Āmantā. Tāya
tāyeva natthi dukkhassa antakiriyā natthi vaṭṭūpacchedo natthi
anupādāparinibbānanti. Na hevaṁ vattabbe .pe.

[1473] Jarā parinipphannāti. Āmantā. Tāya jarāya
jarā parinipphannāti. Na hevaṁ vattabbe .pe. Tāya jarāya
jarā parinipphannāti. Āmantā. Tāya tāyeva natthi dukkhassa
antakiriyā natthi vaṭṭūpacchedo natthi anupādāparinibbānanti.
Na hevaṁ vattabbe .pe.

[1474] Maraṇaṁ parinipphannanti. Āmantā. Tassa maraṇassa
maraṇaṁ parinipphannanti. Na hevaṁ vattabbe .pe. Tassa maraṇassa
maraṇaṁ parinipphannanti. Āmantā. Tassa tasseva natthi dukkhassa
antakiriyā natthi vaṭṭūpacchedo natthi anupādāparinibbānanti.
Na hevaṁ vattabbe .pe.

[1475] Rūpaṁ parinipphannaṁ rūpassa aniccatā atthīti.
Āmantā. Aniccatā parinipphannā aniccatāya aniccatā atthīti.
Na hevaṁ vattabbe .pe. Rūpaṁ parinipphannaṁ rūpassa jarā atthīti.
Āmantā. Jarā parinipphannā jarāya jarā atthīti. Na hevaṁ
vattabbe .pe. Rūpaṁ parinipphannaṁ rūpassa bhedo atthi antaradhānaṁ
atthīti. Āmantā. Maraṇaṁ parinipphannaṁ maraṇassa bhedo
atthi antaradhānaṁ atthīti. Na hevaṁ vattabbe .pe. Vedanā
.pe. Saññā .pe. Saṅkhārā .pe. Viññāṇaṁ parinipphannaṁ
viññāṇassa aniccatā atthīti. Āmantā. Aniccatā parinipphannā
aniccatāya aniccatā atthīti. Na hevaṁ vatabbe .pe. Viññāṇaṁ
parinipphannaṁ viññāṇassa jarā atthīti. Āmantā. Jarā
parinipphannā jarāya jarā atthīti. Na hevaṁ vattabbe .pe.
Viññāṇaṁ parinipphannaṁ viññāṇassa bhedo atthi antaradhānaṁ
atthīti. Āmantā. Maraṇaṁ parinipphannaṁ maraṇassa bhedo
atthi antaradhānaṁ atthīti. Na hevaṁ vattabbe .pe.
Aniccatākathā.
Ekādasamo vaggo.
Tassa uddānaṁ
anusayā abyākatā ahetukā cittavippayuttā
Aññāṇe vigate ñāṇī ñāṇaṁ cittavippayuttaṁ
yattha sadde ñāṇaṁ pavattati iddhibalena samannāgato kappaṁ
tiṭṭheyya cittasantati samādhi dhammaṭṭhitatā aniccatāti.
-----------------
Saṁvaro kammantikathā

[1476] Saṁvaro kammanti. Āmantā. Cakkhundriyasaṁvaro
cakkhukammanti. Na hevaṁ vattabbe .pe. Sotindriyasaṁvaro .pe.
Ghānindriyasaṁvaro .pe. Jivhindriyasaṁvaro .pe. Kāyindriyasaṁvaro
kāyakammanti. Na hevaṁ vattabbe .pe. Kāyindriyasaṁvaro
kāyakammanti. Āmantā. Cakkhundriyasaṁvaro cakkhukammanti. Na
hevaṁ vattabbe .pe. Kāyindriyasaṁvaro kāyakammanti. Āmantā.
Sotindriyasaṁvaro .pe. Ghānindriyasaṁvaro .pe. Jivhindriyasaṁvaro
jivhākammanti. Na hevaṁ vattabbe .pe. Manindriyasaṁvaro
manokammanti. Na hevaṁ vattabbe .pe. Manindriyasaṁvaro manokammanti.
Āmantā. Cakkhundriyasaṁvaro cakkhukammanti. Na hevaṁ
vattabbe .pe. Manindriyasaṁvaro manokammanti. Āmantā.
Sotindriyasaṁvaro .pe. Ghānindriyasaṁvaro .pe. Jivhindriyasaṁvaro
.pe. Kāyindriyasaṁvaro kāyakammanti. Na hevaṁ vattabbe .pe.