[627] Ekaṁ cittaṁ divasaṁ tiṭṭhatīti. Āmantā. Atthaññe
dhammā ekāhaṁ bahumpi uppajjitvā nirujjhantīti. Āmantā.
Te dhammā cittena lahuparivattāti. Na hevaṁ vattabbe .pe.

[628] Te dhammā cittena lahuparivattāti. Āmantā. Nanu
vuttaṁ bhagavatā nāhaṁ bhikkhave aññaṁ ekaṁ dhammampi samanupassāmi
yaṁ evaṁ lahuparivattaṁ yathayidaṁ bhikkhave cittaṁ yāvañcidaṁ bhikkhave
upamāpi na sukarā yāva lahuparivattaṁ cittanti 1 attheva suttantoti.
Āmantā. Tena hi na vattabbaṁ te dhammā cittena lahuparivattāti.

[629] Te dhammā cittena lahuparivattāti. Āmantā. Nanu
vuttaṁ bhagavatā seyyathāpi bhikkhave makkaṭo araññe pavane caramāno
sākhaṁ gaṇhāti taṁ muñcitvā aññaṁ gaṇhāti taṁ muñcitvā aññaṁ
gaṇhāti evameva kho bhikkhave yadidaṁ vuccati cittaṁ itipi mano
itipi viññāṇaṁ itipi taṁ rattiyā ca divasassa ca aññadeva
1 aṁ. eka. 10.
Uppajjati aññaṁ nirujjhatīti 1 attheva suttantoti. Āmantā.
Tena hi na vattabbaṁ te dhammā cittena lahuparivattāti.

[630] Ekaṁ cittaṁ divasaṁ tiṭṭhatīti. Āmantā. Cakkhuviññāṇaṁ
divasaṁ tiṭṭhatīti. Na hevaṁ vattabbe .pe. Sotaviññāṇaṁ .pe.
Ghānaviññāṇaṁ jivhāviññāṇaṁ kāyaviññāṇaṁ akusalaṁ cittaṁ rāgasahagataṁ
dosasahagataṁ mohasahagataṁ mānasahagataṁ diṭṭhisahagataṁ vicikicchāsahagataṁ
thīnasahagataṁ uddhaccasahagataṁ ahirikasahagataṁ anottappasahagataṁ cittaṁ divasaṁ
tiṭṭhatīti. Na hevaṁ vattabbe .pe.

[631] Ekaṁ cittaṁ divasaṁ tiṭṭhatīti. Āmantā. Yeneva cittena
cakkhunā rūpaṁ passati teneva cittena sotena saddaṁ suṇāti .pe.
Ghānena gandhaṁ ghāyati jivhāya rasaṁ sāyati kāyena phoṭṭhabbaṁ
phusati .pe. Manasā dhammaṁ vijānāti .pe. Yeneva cittena manasā
dhammaṁ vijānāti teneva cittena cakkhunā rūpaṁ passati .pe. Sotena
saddaṁ suṇāti ghānena gandhaṁ ghāyati jivhāya rasaṁ sāyati .pe.
Kāyena phoṭṭhabbaṁ phusatīti. Na hevaṁ vattabbe .pe.

[632] Ekaṁ cittaṁ divasaṁ tiṭṭhatīti. Āmantā. Yeneva
cittena abhikkamati teneva cittena paṭikkamati yeneva cittena
paṭikkamati teneva cittena abhikkamati yeneva cittena āloketi
teneva cittena viloketi yeneva cittena viloketi teneva cittena
1 saṁ. ni. 88.
Āloketi yeneva cittena sammiñjeti teneva cittena pasāreti
yeneva cittena pasāreti teneva cittena sammiñjetīti. Na hevaṁ
vattabbe .pe.

[633] Ākāsānañcāyatanūpagānaṁ devānaṁ ekaṁ cittaṁ yāvatāyukaṁ
tiṭṭhatīti. Āmantā. Manussānaṁ ekaṁ cittaṁ yāvatāyukaṁ tiṭṭhatīti.
Na hevaṁ vattabbe .pe.

[634] Ākāsānañcāyatanūpagānaṁ devānaṁ ekaṁ cittaṁ yāvatāyukaṁ
tiṭṭhatīti. Āmantā. Cātummahārājikānaṁ devānaṁ .pe. Tāvatiṁsānaṁ
devānaṁ ... Yāmānaṁ devānaṁ ... Tusitānaṁ devānaṁ ... Nimmānaratīnaṁ
devānaṁ ... Paranimmitavasavattīnaṁ devānaṁ ... Brahmapārisajjānaṁ devānaṁ
... Brahmapurohitānaṁ devānaṁ ... Mahābrahmānaṁ devānaṁ ... Parittābhānaṁ
devānaṁ ... Appamāṇābhānaṁ devānaṁ ... Ābhassarānaṁ devānaṁ ...
Parittasubhānaṁ devānaṁ ... Appamāṇasubhānaṁ devānaṁ ... Subhakiṇhānaṁ devānaṁ
... Vehapphalānaṁ devānaṁ ... Avihānaṁ devānaṁ ... Atappānaṁ devānaṁ ...
Sudassānaṁ devānaṁ ... Sudassīnaṁ devānaṁ .pe. Akaniṭṭhānaṁ devānaṁ ekaṁ
cittaṁ yāvatāyukaṁ tiṭṭhatīti. Na hevaṁ vattabbe .pe.

[635] Ākāsānañcāyatanūpagānaṁ devānaṁ vīsati kappasahassāni
āyuppamāṇaṁ ākāsānañcāyatanūpagānaṁ devānaṁ ekaṁ cittaṁ vīsati
kappasahassāni tiṭṭhatīti. Āmantā. Manussānaṁ vassasataṁ āyuppamāṇaṁ
manussānaṁ ekaṁ cittaṁ vassasataṁ tiṭṭhatīti. Na hevaṁ vattabbe .pe.

[636] Ākāsānañcāyatanūpagānaṁ devānaṁ vīsati kappasahassāni
āyuppamāṇaṁ ākāsānañcāyatanūpagānaṁ devānaṁ ekaṁ cittaṁ vīsati
kappasahassāni tiṭṭhatīti. Āmantā. Cātummahārājikānaṁ devānaṁ
pañca vassasatāni āyuppamāṇaṁ cātummahārājikānaṁ devānaṁ ekaṁ
cittaṁ pañca vassasatāni tiṭṭhati .pe. Vassasahassaṁ tiṭṭhati dve
vassasahassāni tiṭṭhati cattāri vassasahassāni tiṭṭhati aṭṭha
vassasahassāni tiṭṭhati soḷasa vassasahassāni tiṭṭhati kappassa
tatiyabhāgaṁ tiṭṭhati upaḍḍhakappaṁ tiṭṭhati ekaṁ kappaṁ tiṭṭhati
dve kappe tiṭṭhati cattāro kappe tiṭṭhati aṭṭha kappe
tiṭṭhati soḷasa kappe tiṭṭhati battiṁsa kappe tiṭṭhati catusaṭṭhī
kappe tiṭṭhati pañca kappasatāni tiṭṭhati kappasahassaṁ tiṭṭhati
dve kappasahassāni tiṭṭhati cattāri kappasahassāni tiṭṭhati aṭṭha
kappasahassāni tiṭṭhati .pe. Akaniṭṭhānaṁ devānaṁ soḷasa kappasahassāni
āyuppamāṇaṁ akaniṭṭhānaṁ devānaṁ ekaṁ cittaṁ soḷasa kappasahassāni
tiṭṭhatīti. Na hevaṁ vattabbe .pe.