[637] Ākāsānañcāyatanūpagānaṁ devānaṁ cittaṁ muhuttaṁ muhuttaṁ
uppajjati muhuttaṁ muhuttaṁ nirujjhatīti. Āmantā. Ākāsānañcāyatanūpagā
devā muhuttaṁ muhuttaṁ cavanti muhuttaṁ muhuttaṁ
uppajjantīti. Na hevaṁ vattabbe .pe.

[638] Ākāsānañcāyatanūpagānaṁ devānaṁ ekaṁ cittaṁ yāvatāyukaṁ
Tiṭṭhatīti. Āmantā. Ākāsānañcāyatanūpagā devā yeneva cittena
uppajjanti teneva cittena cavantīti. Na hevaṁ vattabbe .pe.
Cittaṭṭhitikathā.
------
Kukkuḷakathā

[639] Sabbe saṅkhārā anodhiṁkatvā kukkuḷāti. Āmantā.
Nanu atthi sukhā vedanā kāyikaṁ sukhaṁ cetasikaṁ sukhaṁ dibbaṁ sukhaṁ mānusakaṁ
sukhaṁ lābhasukhaṁ sakkārasukhaṁ yānasukhaṁ sayanasukhaṁ issariyasukhaṁ ādhipaccasukhaṁ
gihisukhaṁ sāmaññasukhaṁ sāsavaṁ sukhaṁ anāsavaṁ sukhaṁ upadhisukhaṁ nirupadhisukhaṁ
sāmisaṁ sukhaṁ nirāmisaṁ sukhaṁ sappītikaṁ sukhaṁ nippītikaṁ sukhaṁ jhānasukhaṁ
vimuttisukhaṁ kāmasukhaṁ nekkhammasukhaṁ pavivekasukhaṁ upasamasukhaṁ sambodhasukhanti.
Āmantā. Hañci atthi sukhā vedanā .pe. Sambodhasukhaṁ no
vata re vattabbe sabbe saṅkhārā anodhiṁkatvā kukkuḷāti.

[640] Sabbe saṅkhārā anodhiṁkatvā kukkuḷāti. Āmantā.
Sabbe saṅkhārā dukkhā vedanā kāyikaṁ dukkhaṁ cetasikaṁ dukkhaṁ
sokaparidevadukkhadomanassaupāyāsāti. Na hevaṁ vattabbe .pe.

[641] Na vattabbaṁ sabbe saṅkhārā anodhiṁkatvā kukkuḷāti.
Āmantā. Nanu vuttaṁ bhagavatā sabbaṁ bhikkhave ādittaṁ kiñca
bhikkhave sabbaṁ ādittaṁ cakkhuṁ bhikkhave ādittaṁ rūpā ādittā
Cakkhuviññāṇaṁ ādittaṁ cakkhusamphasso āditto yampidaṁ cakkhusamphassapaccayā
uppajjati vedayitaṁ sukhaṁ vā dukkhaṁ vā adukkhamasukhaṁ
vā tampi ādittaṁ kena ādittaṁ ādittaṁ rāgagginā dosagginā
mohagginā ādittaṁ jātiyā jarāmaraṇena sokehi paridevehi dukkhehi
domanassehi upāyāsehi ādittanti vadāmi sotaṁ ādittaṁ saddā
ādittā .pe. Ghānaṁ ādittaṁ gandhā ādittā .pe. Jivhā
ādittā rasā ādittā .pe. Kāyo āditto phoṭṭhabbā
ādittā .pe. Mano āditto dhammā ādittā manoviññāṇaṁ
ādittaṁ manosamphasso āditto yampidaṁ manosamphassapaccayā
uppajjati vedayitaṁ sukhaṁ vā dukkhaṁ vā adukkhamasukhaṁ vā tampi ādittaṁ
kena ādittaṁ ādittaṁ rāgagginā dosagginā mohagginā ādittaṁ
jātiyā jarāmaraṇena sokehi paridevehi dukkhehi domanassehi upāyāsehi
ādittanti vadāmīti 1 attheva suttantoti. Āmantā. Tena hi
sabbe saṅkhārā anodhiṁkatvā kukkuḷāti.

[642] Sabbe saṅkhārā anodhiṁkatvā kukkuḷāti. Āmantā.
Nanu vuttaṁ bhagavatā pañcime bhikkhave kāmaguṇā katame pañca
cakkhuviññeyyā rūpā iṭṭhā kantā manāpā piyarūpā kāmūpasañhitā
rajaniyā sotaviññeyyā saddā .pe. Ghānaviññeyyā gandhā .pe.
Jivhāviññeyyā rasā .pe. Kāyaviññeyyā phoṭṭhabbā iṭṭhā
1 vi. Ma. 1. 65.
Kantā manāpā piyarūpā kāmūpasañhitā rajaniyā ime kho bhikkhave
pañca kāmaguṇāti 1 attheva suttantoti. Āmantā. Tena hi
na vattabbaṁ sabbe saṅkhārā anodhiṁkatvā kukkuḷāti.

[643] Na vattabbaṁ sabbe saṅkhārā anodhiṁkatvā kukkuḷāti.
Āmantā. Nanu vuttaṁ bhagavatā lābhā vo bhikkhave suladdhaṁ
vo bhikkhave khaṇo vo paṭividdho brahmacariyavāsāya diṭṭhā mayā
bhikkhave chaphassāyatanikā nāma nirayā tattha yaṁ kiñci cakkhunā rūpaṁ
passati aniṭṭharūpaññeva passati no iṭṭharūpaṁ akantarūpaññeva
passati no kantarūpaṁ amanāparūpaññeva passati no manāparūpaṁ
yaṁ kiñci sotena saddaṁ suṇāti .pe. Ghānena gandhaṁ ghāyati
.pe. Jivhāya rasaṁ sāyati .pe. Kāyena phoṭṭhabbaṁ phusati .pe.
Manasā dhammaṁ vijānāti aniṭṭharūpaññeva vijānāti no iṭṭharūpaṁ
akantarūpaññeva vijānāti no kantarūpaṁ amanāparūpaññeva vijānāti
no manāparūpanti attheva suttantoti. Āmantā. Tena hi
sabbe saṅkhārā anodhiṁkatvā kukkuḷāti.

[644] Sabbe saṅkhārā anodhiṁkatvā kukkuḷāti. Āmantā.
Nanu vuttaṁ bhagavatā lābhā vo bhikkhave suladdhaṁ vo bhikkhave
khaṇo vo paṭividdho brahmacariyavāsāya diṭṭhā mayā bhikkhave
chaphassāyatanikā nāma saggā tattha yaṁ kiñci cakkhunā rūpaṁ passati
1 saṁ. saḷāyatana. 291. aṁ. navaka. 119. khu. cū. 292.
Iṭṭharūpaññeva passati no aniṭṭharūpaṁ kantarūpaññeva passati no
akantarūpaṁ manāparūpaññeva passati no amanāparūpaṁ yaṁ kiñci
sotena saddaṁ suṇāti .pe. Ghānena gandhaṁ ghāyati .pe. Jivhāya
rasaṁ sāyati .pe. Kāyena phoṭṭhabbaṁ phusati .pe. Manasā dhammaṁ
vijānāti iṭṭharūpaññeva vijānāti no aniṭṭharūpaṁ kantarūpaññeva
vijānāti no akantarūpaṁ manāparūpaññeva vijānāti no amanāparūpanti 1
attheva suttantoti. Āmantā. Tena hi na vattabbaṁ sabbe
saṅkhārā anodhiṁkatvā kukkuḷāti.

[645] Na vattabbaṁ sabbe saṅkhārā anodhiṁkatvā kukkuḷāti.
Āmantā. Nanu yadaniccaṁ taṁ dukkhaṁ vuttaṁ bhagavatā sabbe saṅkhārā
aniccāti. Āmantā. Hañci yadaniccaṁ taṁ dukkhaṁ vuttaṁ bhagavatā
sabbe saṅkhārā aniccā tena vata re vattabbe sabbe saṅkhārā
anodhiṁkatvā kukkuḷāti.

[646] Sabbe saṅkhārā anodhiṁkatvā kukkuḷāti. Āmantā.
Dānaṁ aniṭṭhaphalaṁ akantaphalaṁ amanuññaphalaṁ secanakaphalaṁ dukkhudrayaṁ
dukkhavipākanti. Na hevaṁ vattabbe .pe. Sīlaṁ .pe. Uposatho
.pe. Bhāvanā .pe. Brahmacariyaṁ aniṭṭhaphalaṁ akantaphalaṁ amanuññaphalaṁ
secanakaphalaṁ dukkhudrayaṁ dukkhavipākanti. Na hevaṁ vattabbe .pe.
Nanu dānaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ
1 saṁ. saḷāyatana. 159.
Sukhavipākanti. Āmantā. Hañci dānaṁ iṭṭhaphalaṁ kantaphalaṁ
manuññaphalaṁ asecanakaphalaṁ sukhudrayaṁ sukhavipākaṁ no vata re vattabbe
sabbe saṅkhārā anodhiṁkatvā kukkuḷāti. Nanu sīlaṁ .pe. Uposatho
.pe. Bhāvanā .pe. Brahmacariyaṁ iṭṭhaphalaṁ kantaphalaṁ manuññaphalaṁ
asecanakaphalaṁ sukhudrayaṁ sukhavipākanti. Āmantā. Hañci brahmacariyaṁ
iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākaṁ no
vata re vattabbe sabbe saṅkhārā anodhiṁkatvā kukkuḷāti.