[617] Paṭhamaṁ jhānaṁ samāpannassa vācā niruddhā hotīti attheva
suttantoti atthi tassa vacībhedoti. Āmantā. Dutiyaṁ jhānaṁ
samāpannassa vitakkavicārā niruddhā hontīti attheva suttantoti
atthi tassa vitakkavicārāti. Na hevaṁ vattabbe .pe.

[618] Paṭhamaṁ jhānaṁ samāpannassa vācā niruddhā hotīti attheva
suttantoti atthi tassa vacībhedoti. Āmantā. Tatiyaṁ jhānaṁ
samāpannassa pīti niruddhā hoti .pe. Catutthaṁ jhānaṁ samāpannassa
assāsapassāsā niruddhā honti ākāsānañcāyatanaṁ samāpannassa
rūpasaññā niruddhā hoti viññāṇañcāyatanaṁ samāpannassa ākāsānañcāyatana-
saññā niruddhā hoti ākiñcaññāyatanaṁ samāpannassa
viññāṇañcāyatanasaññā niruddhā hoti .pe. Nevasaññānāsaññāyatanaṁ
samāpannassa ākiñcaññāyatanasaññā niruddhā hoti
saññāvedayitanirodhaṁ samāpannassa saññā ca vedanā ca niruddhā
hontīti 1 attheva suttantoti atthi tassa saññā ca vedanā
cāti. Na hevaṁ vattabbe .pe.

[619] Na vattabbaṁ samāpannassa atthi vacībhedoti. Āmantā.
Nanu paṭhamassa jhānassa saddo kaṇṭako vutto bhagavatāti. Āmantā.
1 saṁ. saḷāyata. 268.
Hañci paṭhamassa jhānassa saddo kaṇṭako vutto bhagavatā tena
vata re vattabbe samāpannassa atthi vacībhedoti.

[620] Paṭhamassa jhānassa saddo kaṇṭako vutto bhagavatāti
samāpannassa atthi vacībhedoti. Āmantā. Dutiyassa jhānassa vitakkavicārā
kaṇṭako vuttā bhagavatā .pe. Tatiyassa jhānassa pīti kaṇṭako
vuttā bhagavatā catutthassa jhānassa assāsapassāsā kaṇṭako
vuttā bhagavatā ākāsānañcāyatanaṁ samāpannassa rūpasaññā kaṇṭako
vuttā bhagavatā viññāṇañcāyatanaṁ samāpannassa ākāsānañcāyatanasaññā
kaṇṭako vuttā bhagavatā ākiñcaññāyatanaṁ samāpannassa
viññāṇañcāyatanasaññā kaṇṭako vuttā bhagavatā nevasaññānāsaññāyatanaṁ
samāpannassa ākiñcaññāyatanasaññā kaṇṭako
vuttā bhagavatā .pe. Saññāvedayitanirodhaṁ samāpannassa saññā
ca vedanā ca kaṇṭako vuttā bhagavatā atthi tassa saññā ca
vedanā cāti. Na hevaṁ vattabbe .pe.

[621] Na vattabbaṁ samāpannassa atthi vacībhedoti. Āmantā.
Nanu vuttaṁ bhagavatā sikhissa ānanda bhagavato arahato sammāsambuddhassa
abhibhū nāma sāvako brahmaloke ṭhito sahassīlokadhātuṁ 2
sarena viññāpesi
ārabbhatha nikkamatha yuñjatha buddhasāsane
dhunātha maccuno senaṁ naḷāgāraṁva kuñjaro
1. Ma. vutto. ito paraṁ sabbattha vuttoti pāṭho 2. Ma. dasassahassi.
Yo imasmiṁ dhammavinaye appamatto vihessati 1
pahāya jātisaṁsāraṁ dukkhassantaṁ karissatīti 2
attheva suttantoti. Āmantā. Tena hi samāpannassa atthi
vacībhedoti.
Vacībhedakathā.
-----
Dukkhāhārakathā

[622] Dukkhāhāro maggaṅgaṁ maggapariyāpannanti. Āmantā.
Ye keci dukkhanti vācaṁ bhāsanti sabbe te maggaṁ bhāventīti.
Na hevaṁ vattabbe .pe.

[623] Ye keci dukkhanti vācaṁ bhāsanti sabbe te maggaṁ
bhāventīti. Āmantā. Bālaputhujjanā dukkhanti vācaṁ bhāsanti
bālaputhujjanā maggaṁ bhāventīti. Na hevaṁ vattabbe .pe.
Mātughātako .pe. Pitughātako arahantaghātako ruhiruppādako .pe.
Saṅghabhedako dukkhanti vācaṁ bhāsati saṅghabhedako 3 maggaṁ bhāvetīti.
Na hevaṁ vattabbe .pe.
Dukkhāhārakathā.
1. Ma. viharissati. 2 saṁ. sagātha. 210. 3. Ma. lohituppādako.
Cittaṭṭhitikathā

[624] Ekaṁ cittaṁ divasaṁ tiṭṭhatīti. Āmantā. Upaḍḍhadivaso
uppādakkhaṇo upaḍḍhadivaso vayakkhaṇoti. Na hevaṁ vattabbe .pe.

[625] Ekaṁ cittaṁ dve divase tiṭṭhatīti. Āmantā. Divaso
uppādakkhaṇo divaso vayakkhaṇoti. Na hevaṁ vattabbe .pe.

[626] Ekaṁ cittaṁ cattāro divase tiṭṭhati .pe. Aṭṭha divase
tiṭṭhati dasa divase tiṭṭhati vīsati divase tiṭṭhati māsaṁ tiṭṭhati
dve māse tiṭṭhati cattāro māse tiṭṭhati aṭṭha māse tiṭṭhati
dasa māse tiṭṭhati saṁvaccharaṁ tiṭṭhati dve vassāni tiṭṭhati
cattāri vassāni tiṭṭhati aṭṭhati vassāni tiṭṭhati dasa vassāni
tiṭṭhati vīsati vassāni tiṭṭhati tiṁsa vassāni tiṭṭhati cattālīsa
vassāni tiṭṭhati paññāsa vassāni tiṭṭhati vassasataṁ tiṭṭhati
dve vassasatāni tiṭṭhati cattāri vassasatāni tiṭṭhati pañca
vassasatāni tiṭṭhati vassasahassaṁ tiṭṭhati dve vassasahassāni tiṭṭhati
cattāri vassasahassāni tiṭṭhati aṭṭha vassasahassāni tiṭṭhati soḷasa
vassasahassāni tiṭṭhati kappaṁ tiṭṭhati dve kappe tiṭṭhati cattāro
kappe tiṭṭhati aṭṭha kappe tiṭṭhati soḷasa kappe tiṭṭhati battiṁsa
kappe tiṭṭhati catusaṭṭhī kappe tiṭṭhati pañca kappasatāni tiṭṭhati
kappasahassaṁ tiṭṭhati dve kappasahassāni tiṭṭhati cattāri kappasahassāni
Tiṭṭhati aṭṭha kappasahassāni tiṭṭhati soḷasa kappasahassāni
tiṭṭhati vīsati kappasahassāni tiṭṭhati cattālīsa kappasahassāni
tiṭṭhati saṭṭhī kappasahassāni tiṭṭhati .pe. Caturāsīti
kappasahassāni tiṭṭhatīti. Āmantā. Dve cattālīsa kappasahassāni
uppādakkhaṇo dve cattālīsa kappasahassāni vayakkhaṇoti. Na
hevaṁ vattabbe .pe.