[530] Katamantaṁ rūpaṁ ākāsadhātu yo ākāso ākāsagataṁ
aghaṁ aghagataṁ vivaro vivaragataṁ asamphuṭṭhaṁ catūhi mahābhūtehi idantaṁ
rūpaṁ ākāsadhātu.

[531] Katamantaṁ rūpaṁ rūpassa lahutā yā rūpassa lahutā lahupariṇāmatā
adandhanatā avitthanatā idantaṁ rūpaṁ rūpassa lahutā.

[532] Katamantaṁ rūpaṁ rūpassa mudutā yā rūpassa mudutā
maddavatā akakkhaḷatā akathinatā idantaṁ rūpaṁ rūpassa mudutā.

[533] Katamantaṁ rūpaṁ rūpassa kammaññatā yā rūpassa
kammaññatā kammaññattaṁ kammaññabhāvo idantaṁ rūpaṁ rūpassa
kammaññatā.

[534] Katamantaṁ rūpaṁ rūpassa upacayo yo āyatanānaṁ ācayo
so rūpassa upacayo idantaṁ rūpaṁ rūpassa upacayo.

[535] Katamantaṁ rūpaṁ rūpassa santati yo rūpassa upacayo
sā rūpassa santati idantaṁ rūpaṁ rūpassa santati.

[536] Katamantaṁ rūpaṁ rūpassa jaratā yā rūpassa jarā jīraṇatā
khaṇḍiccaṁ pāliccaṁ valittacatā āyuno saṁhāni indriyānaṁ paripāko
idantaṁ rūpaṁ rūpassa jaratā.

[537] Katamantaṁ rūpaṁ rūpassa aniccatā yo rūpassa khayo
vayo bhedo paribhedo aniccatā antaradhānaṁ idantaṁ rūpaṁ rūpassa
aniccatā.

[538] Katamantaṁ rūpaṁ kabaḷiṁkāro āhāro odano kummāso
sattu maccho maṁsaṁ khīraṁ dadhi sappi navanītaṁ telaṁ madhu phāṇitaṁ
yaṁ vā panaññampi atthi rūpaṁ yamhi yamhi janapade tesaṁ
Tesaṁ sattānaṁ mukhāsiyaṁ dantavikhādanaṁ galajjhoharaṇīyaṁ kucchivitthambhanaṁ
yāya ojāya sattā yāpenti idantaṁ rūpaṁ kabaḷiṁkāro āhāro.
Idantaṁ rūpaṁ upādā.
Upādābhājanīyaṁ.
Rūpakaṇḍe paṭhamabhāṇavāraṁ 1 .

[539] Katamantaṁ rūpaṁ noupādā phoṭṭhabbāyatanaṁ āpodhātu.