[91] Sumedho nāma sambuddho dvattiṁsavaralakkhaṇo
vivekakāmo sambuddho himavantaṁ upāgami.
Ajjhogahetvā himavantaṁ aggo kāruṇiko muni
pallaṅkaṁ ābhujitvāna nisīdi purisuttamo.
Vijjādharo tadā āsiṁ antalikkhacaro ahaṁ
tisulaṁ sukataṁ gayha gacchāmi ambare tadā.
Pabbatagge yathā aggi puṇṇamāyeva candimā
vane obhāsate buddho sālarājāva phullito.
Vanato 1 nikkhamitvāna buddharaṁsābhidhāvare
naḷaggivaṇṇasaṅkāsā disvā cittaṁ pasādayiṁ.
Vicinaṁ addasaṁ pupphaṁ kaṇikāraṁ devagandhikaṁ
tīṇi pupphāni ādāya buddhaseṭṭhaṁ apūjayiṁ.
Buddhassa ānubhāvena tīṇi pupphāni me tadā
uddhaṁvaṇṭā adhopattā chāyaṁ kubbanti satthuno.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agacchahaṁ.
1 Yu. vanaggā.
Tattha me sukataṁ byamhaṁ kaṇikārīti ñāyati
saṭṭhiyojanamubbiddhaṁ tiṁsayojanavitthataṁ.
Sahassakaṇḍaṁ 1 sattageṇḍu 2 dhajālu haritāmayo
satasahassaniyyūhā byamhe pātubhaviṁsu me.
Soṇṇamayā maṇimayā lohitaṅkamayāpica
phalikāpica pallaṅkā yenicchakā yathicchakaṁ.
Mahārahañca sayanaṁ tulikaṁ 3 vikatissakaṁ
uddhalomikaekantaṁ bibbohanasamāyutaṁ.
Bhavanā nikkhamitvāna caranto devacārikaṁ
yadā icchāmi gamanaṁ devasaṅghapurakkhato.
Pupphassa heṭṭhā tiṭṭhāmi upari chadanaṁ mama
samantā yojanasataṁ kaṇikārehi chāditaṁ.
Saṭṭhī turiyasahassāni sāyaṁ pātaṁ upaṭṭhahuṁ
parivārenti maṁ niccaṁ rattindivamatanditā.
Tattha naccehi gītehi tāḷehi vāditehi ca
ramāmi khiḍḍāratiyā modāmi kāmakāmihaṁ.
Tattha bhutvā pivitvā ca modāmi tidase tadā
nārīgaṇehi sahito modāmi byamhamuttame.
Satānaṁ pañcakkhattuñca devarajjamakārayiṁ
satānaṁ tīṇikkhattuñca cakkavatti ahosahaṁ.
1 Yu. sahassakaṇḍo. 2 Ma. satabheṇḍu. 3 Ma. Yu. tūlikā vikatīyutaṁ.
Padesarajjaṁ vipulaṁ gaṇanāto saṅkhayaṁ
bhavābhave saṁsaranto mahābhogaṁ 1 labhāmahaṁ.
Bhoge me ūnatā natthi buddhapūjāyidaṁ phalaṁ
duve bhave saṁsarāmi devatte atha mānuse.
Aññaṁ gatiṁ na jānāmi buddhapūjāyidaṁ phalaṁ
duve kule pajāyāmi khattiye cāpi brāhmaṇe.
Nīce kule na jāyāmi 2 buddhapūjāyidaṁ phalaṁ
hatthiyānaṁ assayānaṁ sivikaṁ sandamānikaṁ.
Labhāmi sabbamevetaṁ buddhapūjāyidaṁ phalaṁ
dāsīgaṇaṁ dāsagaṇaṁ nāriyo samalaṅkatā.
Labhāmi sabbamevetaṁ buddhapūjāyidaṁ phalaṁ
koseyyakambaliyāni khomakappāsikāni ca.
Labhāmi sabbamevetaṁ buddhapūjāyidaṁ phalaṁ
navavatthaṁ navaphalaṁ navaggarasabhojanaṁ.
Labhāmi sabbamevetaṁ buddhapūjāyidaṁ phalaṁ
ime 3 khāda ime 3 bhuñja imamhi sayane saya.
Labhāmi sabbamevetaṁ buddhapūjāyidaṁ phalaṁ
sabbattha pūjito homi yaso accuggato 4 mama.
Mahesakkho 5 sadā homi abhejjapariso sadā
ñātīnaṁ uttamo homi buddhapūjāyidaṁ phalaṁ.
1 Yu. mahābhoge. 2 Yu. jānāmi. 3 Ma. imaṁ. 4 Ma. abbhuggato.
5 Ma. Yu. mahāpakkho.
Sītaṁ uṇhaṁ na jānāmi pariḷāho na vijjati
atho cetasikaṁ dukkhaṁ hadaye me na vijjati.
Suvaṇṇavaṇṇo hutvāna saṁsarāmi bhavābhave
vevaṇṇiyaṁ 1 na jānāmi buddhapūjāyidaṁ phalaṁ.
Devalokā cavitvāna sukkamūlena codito
sāvatthiyaṁ pure jāto mahāsāle suaddhake.
Pañcakāmaguṇe hitvā pabbajiṁ anagāriyaṁ
jātiyā sattavassohaṁ arahattaṁ apāpuṇiṁ.
Upasampādayi buddho guṇamaññāya cakkhumā
taruṇo pūjanīyohaṁ buddhapūjāyidaṁ phalaṁ.
Dibbacakkhuṁ visuddhaṁ me samādhikusalo ahaṁ
abhiññāpāramippatto buddhapūjāyidaṁ phalaṁ.
Paṭisambhidā anuppatto iddhipādesu kovido
saddhamme 2 pāramippatto buddhapūjāyidaṁ phalaṁ.
Tiṁsakappasahassamhi yaṁ buddhamabhipūjayiṁ
duggatiṁ nābhijānāmi buddhapūjāyidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
1 Yu. duvaṇṇikaṁ. 2 Ma. dhammesu.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā tīṇikaṇikārapupphiyo thero imā gāthāyo abhāsitthāti.
Tīṇikaṇikārapupphiyattherassa apadānaṁ samattaṁ.
Dutiyaṁ ekapattadāyakattherāpadānaṁ (502)

[92] Nagare haṁsavatiyā kumbhakāro ahosahaṁ
addasaṁ virajaṁ buddhaṁ oghatiṇṇamanāsavaṁ.
Sukataṁ mattikāpattaṁ buddhaseṭṭhassadāsahaṁ
pattaṁ datvā bhagavato ujubhūtassa tādino.
Bhave nibbattamānohaṁ soṇṇathāle labhāmahaṁ
rūpimaye ca sovaṇṇe taṭṭike 1 ca maṇīmaye.
Pāṭiyā 2 paribhuñjāmi puññakammassidaṁ phalaṁ
yasasāva 3 janānañca aggabhūto 4 ca homahaṁ.
Yathāpi bhaddake khette vījaṁ appampi ropitaṁ
sammā dhāraṁ pavassante 5 phalaṁ toseti kassakaṁ.
Tathevidaṁ pattadānaṁ buddhakhettamhi ropitaṁ
pītidhāre pavassante phalaṁ me 6 tosayissati.
Yāvatā khettā vijjanti saṅghāpica gaṇāpica
buddhakhettasamo natthi sukhado 7 sabbapāṇinaṁ.
1 Po. Yu. taṭṭake. 2 Ma. Yu. pātiyo. 3 Ma. Yu. yasānañaca dhanānañca.
4 Yu. pattabhūto. 5 Ma. Yu. pavacchante. Yu. sammā dhāre pavecchante. 6 Ma. maṁ.
7 Po. sukhado tattha pāṇinaṁ. Yu. sukhadānatthapāṇinaṁ.
Namo te purisājañña namo te purisuttama
ekapattaṁ daditvāna pattomhi acalaṁ padaṁ.
Ekanavute ito kappe yaṁ pattamadadiṁ tadā
duggatiṁ nābhijānāmi pattadānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santake
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ekapattadāyako thero imā gāthāyo abhāsitthāti.
Ekapattadāyakattherassa apadānaṁ samattaṁ.
Tatiyaṁ kāsumārikaphaladāyakattherāpadānaṁ (503)

[93] Kaṇikāraṁva jotantaṁ nisinnaṁ pabbatantare
addasaṁ virajaṁ buddhaṁ lokajeṭṭhaṁ narāsabhaṁ
pasannacitto sumano sire katvāna añjaliṁ
kāsumārikamādāya buddhaseṭṭhassadāsahaṁ.
Ekattiṁse ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā kāsumārikaphaladāyako thero imā gāthāyo abhāsitthāti.
Kāsumārikaphaladāyakattherassa apadānaṁ samattaṁ.
Catutthaṁ avaṭaphaliyattherāpadānaṁ (504)

[94] Sahassaraṁsī bhagavā sayambhū aparājito
vivekā vuṭṭhahitvāna gocarāyābhinikkhami.
Phalahattho ahaṁ disvā upagañchiṁ narāsabhaṁ
pasannacitto sumano avaṭaṁ adadiṁ phalaṁ.
Catunavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā avaṭaphaliyo thero imā gāthāyo abhāsitthāti.
Avaṭaphaliyattherassa apadānaṁ samattaṁ.
Pañcamaṁ cāraphaliyattherāpadānaṁ 1 (505)

[95] Suvaṇṇavaṇṇaṁ sambuddhaṁ āhutīnaṁ paṭiggahaṁ
rathiyaṁ paṭipajjantaṁ cāraphalamadāsahaṁ.
Ekanavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā cāraphaliyo thero imā gāthāyo abhāsitthāti.
Cāraphaliyattherassa apadānaṁ samattaṁ.
1 Ma. pādaphaliyatthera.... Yu. pāraphaliyatthera....
Chaṭṭhaṁ mātuluṅgaphaladāyakattherāpadānaṁ (506)

[96] Kaṇikāraṁva jalitaṁ puṇṇamāyeva candimaṁ
jalantaṁ dīparukkhaṁva addasaṁ lokanāyakaṁ.
Mātuluṅgaphalaṁ gayha adāsiṁ satthuno ahaṁ
dakkhiṇeyyassa vīrassa pasanno sehi pāṇibhi.
Ekattiṁse ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā mātuluṅgaphaladāyako thero imā gāthāyo abhāsitthāti.
Mātuluṅgaphaladāyakattherassa apadānaṁ samattaṁ.
Sattamaṁ ajjelaphaladāyakattherāpadānaṁ (507)

[97] Ajino 1 nāma sambuddho himavante vasi tadā
caraṇena ca sampanno samādhikusalo muni.
1 Ma. Yu. ajjuno.
Kumbhamattaṁ gahetvāna añjaliṁ 1 jīvajīvakaṁ
chattapaṇṇaṁ gahetvāna adāsiṁ satthuno ahaṁ.
Catunavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ajjelaphaladāyako thero imā gāthāyo abhāsitthāti.
Ajjelaphaladāyakattherassa apadānaṁ samattaṁ.
Aṭṭhamaṁ amoraphaliyattherāpadānaṁ 2 (508)

[98] Suvaṇṇavaṇṇaṁ sambuddhaṁ āhutīnaṁ paṭiggahaṁ
rathiyaṁ paṭipajjantaṁ amoraṁ 3 adadiṁ phalaṁ.
Ekanavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
1 Ma. Yu. ajelaṁ. 2 Ma. amoda.... 3 Ma. amodamadadiṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā amoraphaliyo thero imā gāthāyo abhāsitthāti.
Amoraphaliyattherassa apadānaṁ samattaṁ.
Navamaṁ tālaphaliyattherāpadānaṁ (509)

[99] Sataraṁsī nāma bhagavā sayambhū aparājito
vivekā vuṭṭhahitvāna gocarāyābhinikkhami.
Phalahattho ahaṁ disvā upagañchiṁ narāsabhaṁ
pasannacitto sumano tālaphalamadāsahaṁ.
Catunavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā tālaphaliyo thero imā gāthāyo abhāsitthāti.
Tālaphaliyattherassa apadānaṁ samattaṁ.
Dasamaṁ nālikeraphaladāyakattherāpadānaṁ (510)

[100] Nagare bandhumatiyā ārāmiko ahaṁ tadā
addasaṁ virajaṁ buddhaṁ gacchantaṁ anilañjase.
Nālikeraphalaṁ gayha buddhaseṭṭhassadāsahaṁ
ākāse ṭhitako santo paṭiggaṇhi mahāyaso.
Pītisañjanano 1 mayhaṁ diṭṭhadhammasukhāvaho
phalaṁ buddhassa datvāna vippasannena cetasā.
Adhigañchiṁ tadā pītiṁ vipulañca sukhuttamaṁ
uppajjateva ratanaṁ nibbattassa tahiṁ 2 tahiṁ.
Ekanavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Dibbacakkhuṁ visuddhaṁ me samādhikusalo ahaṁ
abhiññāpāramippatto phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
1 Ma. Yu. sabbattha vittasañjanano. 2 Yu. yahiṁ.
Tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā nālikeraphaladāyako thero imā gāthāyo abhāsitthāti.
Nālikeraphaladāyakattherassa apadānaṁ samattaṁ.
Uddānaṁ
kaṇikārañca patto ca kāsumāri tathāvaṭo
cāraphali mātuluṅgo ajjelāmorameva ca.
Tālaṁ tathā nālikeraṁ gāthāyo gaṇitāpiha
ekaṁ gāthāsataṁ hoti ūnādhikavivajjitaṁ.
Kaṇikāravaggo ekapaññāso.
---------------------
Dvepaññāso phaladāyakavaggo
paṭhamaṁ kurañjiyaphaladāyakattherāpadānaṁ (511)