[81] Kaṇikāraṁva jotantaṁ nisinnaṁ pabbatantare
addasaṁ virajaṁ buddhaṁ vipassiṁ lokanāyakaṁ.
Tīṇikiṁkaṇipupphāni paggayha abhiropayiṁ
sambuddhaṁ abhipūjetvā gacchāmi dakkhiṇāmukho.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agañchahaṁ.
Ekanavute ito kappe yaṁ buddhamabhipūjayiṁ
duggatiṁ nābhijānāmi buddhapūjāyidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā tīṇikiṁkaṇipupphiyo thero imā gāthāyo abhāsitthāti.
Tīṇikiṁkaṇipupphiyattherassa apadānaṁ samattaṁ.
Dutiyaṁ paṁsukūlapūjakattherāpadānaṁ (492)

[82] Himavantassa avidūre udabbalo 1 nāma pabbato
tatthaddasaṁ paṁsukūlaṁ dumaggamhi vilambitaṁ.
Tīṇi kiṁkaṇipupphāni ocinitvānahaṁ tadā
haṭṭho haṭṭhena cittena paṁsukūlaṁ apūjayiṁ.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agañchahaṁ.
Ekanavute ito kappe yaṁ kammamakariṁ tadā
duggatiṁ nābhijānāmi pūjetvā arahaddhajaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā paṁsukūlapūjako thero imā gāthāyo abhāsitthāti.
Paṁsukūlapūjakattherassa apadānaṁ samattaṁ.
1 Ma. udaṅgaṇo. Yu. udako.
Tatiyaṁ koraṇḍapupphiyattherāpadānaṁ (493)

[83] Vanakammiko pure āsiṁ pitupitāmahenahaṁ 1
pasumārena jīvāmi kusalaṁ me na vijjati.
Mama āsayasāmantā tisso lokagganāyako
tīṇi padāni dassesi anukampāya cakkhumā.
Akkamante 2 pade disvā tissassa nāma satthuno
haṭṭho haṭṭhena cittena pade cittaṁ pasādayiṁ.
Koraṇḍaṁ pupphitaṁ disvā pādapaṁ dharaṇīruhaṁ
caṅkoṭakaṁ 3 gahetvāna padaseṭṭhaṁ apūjayiṁ.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agañchahaṁ.
Yaṁ yaṁ yonūpapajjāmi devattaṁ atha mānusaṁ
koraṇḍakachavi homi sappabhāso 4 bhavāmahaṁ.
Dvenavute ito kappe yaṁ kammamakariṁ tadā
duggatiṁ nābhijānāmi padapūjāyidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ
1 Ma. pitumātumatenahaṁ. 2 Ma. Yu. akkante ca .... 3 Ma. sakosakaṁ. 4 Ma.
suppabhāso.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā koraṇḍapupphiyo thero imā gāthāyo abhāsitthāti.
Koraṇḍapupphiyattherassa apadānaṁ samattaṁ.
Catutthaṁ kiṁsukapupphiyattherāpadānaṁ (494)

[84] Kiṁsukaṁ pupphitaṁ disvā paggahetvāna añjaliṁ
buddhaseṭṭhaṁ saritvāna ākāse abhipūjayiṁ.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agañchahaṁ.
Ekattiṁse ito kappe yaṁ kammamakariṁ tadā
duggatiṁ nābhijānāmi buddhapūjāyidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti
itthaṁ sudaṁ āyasmā kiṁsukapupphiyo thero imā gāthāyo abhāsitthāti.
Kiṁsukapupphiyattherassa apadānaṁ samattaṁ.
Pañcamaṁ upaḍḍhadussadāyakattherāpadānaṁ (495)

[85] Padumuttarabhagavato sujāto nāma sāvako
paṁsukūlaṁ gavesanto saṅkāre rathiyā 1 tadā.
Nagare haṁsavatiyā paresaṁ bhatiko 2 ahaṁ
upaḍḍhadussaṁ datvāna sirasā abhivādayiṁ.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agañchahaṁ.
Tettiṁsakkhattuṁ devindo devarajjamakārayiṁ
sattasattatikhattuñca cakkavatti ahosahaṁ.
Padesarajjaṁ vipulaṁ gaṇanāto asaṅkhayaṁ
upaḍḍhadussadānena modāmi akutobhayo.
Icchamāno ahaṁ 3 ajja sakānanaṁ sapabbataṁ
khomadussehi chādeyyaṁ aḍḍhadussassidaṁ phalaṁ.
Satasahasse ito kappe yaṁ dānamadadiṁ tadā
duggatiṁ nābhijānāmi aḍḍhadussassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
1 Ma. carate. Yu. carate sadā. 2 Ma. Yu. bhatako. 3 Po. Ma. Yu. cahaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā upaḍḍhadussadāyako thero imā gāthāyo abhāsitthāti.
Upaḍḍhadussadāyakattherassa apadānaṁ samattaṁ.
Chaṭṭhaṁ ghatamaṇḍadāyakattherāpadānaṁ (496)

[86] Sucintitaṁ bhagavantaṁ lokajeṭṭhaṁ narāsabhaṁ
upaviṭṭhaṁ mahāraññaṁ vātābādhena pīḷitaṁ.
Disvā cittaṁ pasādetvā ghatamaṇḍaṁ upānayiṁ
katattā upacitattā 1 ca gaṅgā bhāgīrasī ayaṁ.
Mahāsamuddā cattāro ghataṁ sampajjare mama
ayañca paṭhavī ghorā appamāṇā asaṅkhayā.
Mama saṅkappamaññāya bhavanti 2 te madhusakkharā
catuddisā 3 ime rukkhā pādapā dharaṇīruhā.
Mama saṅkappamaññāya kapparukkhā bhavanti te
paññāsakkhattuṁ devindo devarajjamakārayiṁ.
Ekapaññāsakkhattuñca cakkavatti ahosahaṁ
padesarajjaṁ vipulaṁ gaṇanāto asaṅkhayaṁ.
Catunavute ito kappe yaṁ dānamadadiṁ tadā
duggatiṁ nābhijānāmi ghatamaṇḍassidaṁ phalaṁ.
1 Ma. Yu. ācitattā. 2 Ma. Yu. bhavate madhusakkharā. 3 Ma. Yu. cātuddīpā.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ghatamaṇḍadāyako thero imā gāthāyo abhāsitthāti.
Ghatamaṇḍadāyakattherassa apadānaṁ samattaṁ.
Sattamaṁ udakadāyakattherāpadānaṁ (497)

[87] Padumuttarabuddhassa bhikkhusaṅghe anuttare
pasannacitto sumano pānighaṭaṁ 1 apūrayiṁ.
Pabbatagge dumagge vā ākāse vātha bhūmiyaṁ
yadā pānīyamicchāmi khippaṁ nibbattate mamaṁ.
Satasahasse ito kappe yaṁ dānamadadiṁ tadā
duggatiṁ nābhijānāmi udakadānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anupattā kataṁ buddhassa sāsanaṁ.
1 Po. Yu. pānīyaghaṭaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā udakadāyako thero imā gāthāyo abhāsitthāti.
Udakadāyakattherassa apadānaṁ samattaṁ.
Aṭṭhamaṁ puḷinathūpiyattherāpadānaṁ (498)

[88] Himavantassavidūre yamako 1 nāma pabbato
assamo sukato mayhaṁ paṇṇasālā sumāpitā.
Nārado nāma nāmena jaṭilo uggatāpano
catuddasasahassāni sissā paricaranti maṁ.
Paṭisallīnako santo evaṁ cintesahantadā
mahājanā 2 maṁ pūjenti nāhaṁ pūjemi kiñcanaṁ.
Na me ovādako atthi vattā koci na vijjati
anācariyupajjhāyo vane vāsaṁ upemahaṁ.
Upāsamāno yamakaṁ 3 garucittaṁ upaṭṭhahe
so me ācariyo natthi vanavāso niratthako.
Āyāgaṁ me gavesiyaṁ 4 garubhāvaniyaṁ tathā
sāsassayo 5 vasissāmi na koci garahissati.
Uttānakūlā nadikā supatitthā manoramā
susuddhapuḷinākiṇṇā avidūre mamassamaṁ.
1 Po. Yu. samaṅgo. 2 Ma. sabbo jano maṁ pūjeti. Yu. sabbajano. 3 Po.
Ma. Yu. yamahaṁ. 4 Ma. Yu. gavesissaṁ. 5 Ma. Yu. sāvassayo.
Nadiṁ amarikaṁ nāma upagantvā 1 ahantadā
saṅkaḍḍhitvāna 2 puḷinaṁ akaṁ puḷinacetiyaṁ.
Ye te ahesuṁ sambuddhā bhavantakaraṇā munī
tesaṁ etādiso thūpo taṁ nimittaṁ karomahaṁ.
Karitvā puḷine 3 thūpaṁ sovaṇṇaṁ māpayiṁ ahaṁ
soṇṇakiṁkaṇipupphāni sahasse tīṇi pūjayiṁ.
Sāyaṁ pātaṁ namassāmi pītijāto 4 katañjalī
sammukhā viya sambuddhaṁ vandiṁ puḷinacetiyaṁ.
Yadā kilesā jāyanti vitakkā gehanissitā
sarāmi sukataṁ thūpaṁ paccavekkhāmi tāvade.
Upanissāya vihariṁ 5 satthavāhaṁ vināyakaṁ
kilese saṁvareyyāsi 6 na yuttaṁ tava mārisa.
Saha āvajjite thūpe gāravaṁ hoti me tadā
kuvitakke vinodesiṁ nāgo tuttaṭṭito 7 yathā.
Evaṁ viharamānaṁ maṁ maccurājābhimaddatha
tattha kālaṁ kato santo brahmalokaṁ agacchahaṁ.
Yāvatāyuṁ vasitvāna tidive 8 upapajjahaṁ
asītikkhattuṁ devindo devarajjamakārayiṁ.
Satānaṁ tīṇikhattuñca cakkavatti ahosahaṁ
padesarajjaṁ vipulaṁ gaṇanāto asaṅkhayaṁ.
1 Ma. upagantavānahantadā. 2 Ma. Yu. saṁvaḍḍhayitvā. 3 Ma. puḷinaṁ.
4 Ma. vedajāto. Yu. vittijāto. 5 Ma. viharaṁ. 6 Ma. Yu. saṁvaseyyāsi.
7 Po. tuṇṇaṭṭito. Yu. tuttaddito. 8 Yu. tidase.
Tesaṁ kiṁkaṇipupphānaṁ vipākaṁ anubhomahaṁ
bāvīsatisahassāni parivārenti maṁ bhave.
Thūpassa pariciṇṇattā rajojallaṁ na limpati
gatte sedā na muñcanti sappabhāso bhavāmahaṁ.
Aho me sukato thūpo sudiṭṭhāmarikā nadī
thūpaṁ katvāna puḷinaṁ 1 pattomhi acalaṁ padaṁ.
Kusalaṁ kattukāmena jantunā sāragāhinā 2
natthi khettaṁ akhettaṁ vā paṭipattiva sārakā 3 .
Yathāpi balavā poso aṇṇavaṁ taritussaho 4
parittaṁ kaṭṭhamādāya pakkhandeyya mahāsaraṁ.
Imāhaṁ kiṭṭhaṁ 5 nissāya tarissāmi mahodadhiṁ
ussāhena viriyena tareyya udadhiṁ naro.
Tatheva me kataṁ kammaṁ parittaṁ thokakañca 6 yaṁ
taṁ 7 kammaṁ upanissāya saṁsāraṁ samatikkamiṁ.
Pacchime bhavasampatte sukkamūlena codito
sāvatthiyaṁ pure jāto mahāsāle suaddhake.
Saddhā mātāpitā mayhaṁ buddhassa saraṇaṁ gatā
ubho diṭṭhasutā 8 ete anuvattanti sāsanaṁ.
Bodhipappaṭikaṁ gayha soṇṇathūpaṁ akārayuṁ
sāyaṁ pātaṁ namassanti sakyaputtassa sammukhā.
1 Yu. pubine. 2 Po. Yu. pāragāminā. 3 Ma. sādhakā. Yu. sādhikā. 4 Ma. Yu.
taritussahe. 5 Po. Ma. Yu. kaṭṭhaṁ. 6 Po. Yu. thokakañcanaṁ. 7 Yu. kataṁ.
8 Ma. Yu. diṭṭhapadā.
Uposathamhi divase soṇṇathūpaṁ vinīharuṁ
buddhassa vaṇṇaṁ kittentā tiyāmaṁ vītināmayuṁ.
Samā 1 disvānahaṁ thūpaṁ sariṁ puḷinacetiyaṁ
ekāsane nisīditvā arahattaṁ apāpuṇiṁ.
Bāvīsatimaṁ bhāṇavāraṁ.
Gavesamāno taṁ dhīraṁ dhammasenāpatiddasaṁ
agārā nikkhamitvāna pabbajiṁ tassa santike.
Jātiyā sattavassena arahattaṁ apāpuṇiṁ
upasampādayi buddho guṇamaññāya cakkhumā.
Dārakeneva santena kiriyaṁ niṭṭhitaṁ mayā
kataṁ me karaṇīyajja sakyaputtassa sāsane.
Sabbaverabhayātīto sabbasaṅgātigo isi
sāvako te mahāvīra soṇṇathūpassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. Yu. saha.
Itthaṁ sudaṁ āyasmā puḷinathūpiyo thero imā gāthāyo abhāsitthāti.
Puḷinathūpiyattherassa apadānaṁ samattaṁ.
Navamaṁ naḷakuṭikadāyakattherāpadānaṁ (499)

[89] Himavantassavidūre hāriko 1 nāma pabbato
sayambhū nārado nāma rukkhamūle vasi tadā.
Naḷāgāraṁ karitvāna tiṇena chādayiṁ ahaṁ
caṅkamaṁ sodhayitvāna sayambhussa adāsahaṁ.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agacchahaṁ.
Tattha me sukataṁ byamhaṁ naḷakuṭikāya nimmitaṁ
saṭṭhiyojanamubbiddhaṁ 2 tiṁsayojanavitthataṁ.
Catuddasesu kappesu devaloke ramiṁ ahaṁ
ekasattatikkhattuñca devarajjaṁ akārayiṁ.
Catuttiṁsatikkhattuñca 3 cakkavatti ahosahaṁ
padesarajjaṁ vipulaṁ gaṇanāto asaṅkhayaṁ.
Dhammapāsādamāruyha suññāgāravarūpagaṁ
yathicchakāhaṁ vihare sakyaputtassa sāsane.
Ekattiṁse ito kappe yaṁ kammamakariṁ tadā
duggatiṁ nābhijānāmi naḷakuṭikāyidaṁ phalaṁ.
1 Ma. hārito. Yu. bhāriko. 2 Ma. sabbattha ..ṃubbedhaṁ. 3 Po. Yu.
catuttiṁsakkhattuñceva. 4 Ma. Yu. sabbākāravarūpamaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ
paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā naḷakuṭikadāyako thero imā gāthāyo abhāsitthāti.
Naḷakuṭikadāyakattherassa apadānaṁ samattaṁ.
Dasamaṁ piyālaphaladāyakattherāpadānaṁ (500)

[90] Migaluddho pure āsiṁ vivane 1 vicaraṁ tadā
addasaṁ virajaṁ buddhaṁ sabbadhammāna pāraguṁ.
Piyālaphalamādāya buddhaseṭṭhassadāsahaṁ
puññakhettassa vīrassa pasanno sehi pāṇibhi.
Ekattiṁse ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
1 Yu. vicine. ito paraṁ īdisameva.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā piyālaphaladāyako thero imā gāthāyo abhāsitthāti.
Piyālaphaladāyakattherassa apadānaṁ samattaṁ.
Uddānaṁ
kiṁkaṇi paṁsukūlañca varakoraṇḍakiṁsukaṁ
upaḍḍhadussi ghatado udakaṁ thūpakārako.
Naḷāgāri ca navamo piyālaphaladāyako
satamekañca gāthānaṁ navakañca taduttari.
Kiṁkaṇipupphavaggo paññāsamo.
Atha vagguddānaṁ
metteyyavaggo bhaddāli sakiṁsammajjakopica
ekavihārī vibhedako jagati sālapupphiyo.
Naḷamāli paṁsukūlaṁ kīkaṇipupphiko tathā
asīti dve ca gāthāyo catuddasā satāni ca.
Metteyyavaggadasakaṁ pañcamaṁ satakaṁ samattaṁ.
-----------------------
Ekapaññāso kaṇikāravaggo
paṭhamaṁ tīṇikaṇikārapupphiyattherāpadānaṁ (501)