[61] Suvaṇṇavaṇṇaṁ sambuddhaṁ āhutīnaṁ paṭiggahaṁ
pavanaggena gacchantaṁ addasaṁ lokanāyakaṁ.
Naḷamālaṁ gahetvāna nikkhamanto ca tāvade
tatthaddasāsi sambuddhaṁ oghatiṇṇamanāsavaṁ.
Pasannacitto sumano naḷamālaṁ apūjayiṁ
dakkhiṇeyyaṁ mahāvīraṁ sabbalokānukampakaṁ.
Ekattiṁse ito kappe yaṁ pupphaṁ 1 abhiropayiṁ
duggatiṁ nābhijānāmi buddhapūjāyidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā naḷamāliyo thero imā gāthāyo abhāsitthāti.
Naḷamāliyattherassa apadānaṁ samattaṁ.
1 Ma. ..ṃālamabhiropayiṁ.
Dutiyaṁ maṇipūjakattherāpadānaṁ (472)

[62] Padumuttaro nāma jino sabbadhammāna pāragū
vivekakāmo sambuddho gacchate anilañjase.
Avidūre himavantassa mahājātassaro ahu
tattha me bhavanaṁ āsi puññakammena saṁyutaṁ.
Bhavanā nikkhamitvāna 1 addasaṁ lokanāyakaṁ
indīvaraṁva jalitaṁ ādittaṁva hutāsanaṁ.
Vijanaṁ 2 addasaṁ pupphaṁ pūjayissanti nāyakaṁ
sakaṁ cittaṁ pasādetvā avandiṁ satthuno ahaṁ.
Mamaṁ sīsamaṇiṁ gayha pūjayiṁ lokanāyakaṁ
imāya maṇipūjāya vipāko hotu bhaddako.
Padumuttaro lokavidū āhutīnaṁ paṭiggaho
antalikkhe ṭhito satthā imaṁ gāthaṁ 3 abhāsatha.
So te ijjhatu saṅkappo labhatu vipulaṁ sukhaṁ
imāya maṇipūjāya anubhohi mahāyasaṁ.
Idaṁ vatvāna sambuddho 4 jalajuttamanāmako
agamāsi buddhaseṭṭho yassa cittaṁ paṇīhitaṁ.
Saṭṭhikappāni devindo devarajjamakārayiṁ
anekasatakkhattuñca cakkavatti ahosahaṁ.
1 Ma. Yu. abhinikkhamma. 2 Ma. vijinaṁ naddasaṁ pupphaṁ. Yu. ... nāddasaṁ pupphaṁ.
3 Po. Yu. imā gāthā. 4 Ma. Yu. bhagavā.
Pubbakammaṁ sarantassa devabhūtassa me sato
maṇi nibbattate mayhaṁ ālokakaraṇo mama.
Chaḷāsītisahassāni nāriyo me pariggahā
vicittavatthābharaṇā āmuttamaṇikuṇḍalā 1 .
Āḷāramukhā hasulā susaññā tanumajjhimā
parivārenti maṁ niccaṁ maṇipūjāyidaṁ phalaṁ.
Soṇṇamayā maṇimayā lohitaṅkamayā tathā
bhaṇḍā 2 me sukatā honti yadicchasi 3 pilandhanā.
Kūṭāgārā guhā rammā sayanañca mahārahaṁ
mama saṅkappamaññāya nibbattanti yathicchikaṁ 4 .
Lābhā tesaṁ suladdhañca ye labhanti upassutiṁ
puññakkhettaṁ manussānaṁ osathaṁ 5 sabbapāṇinaṁ.
Mayhaṁpi sukataṁ kammaṁ yohaṁ adakkhi nāyakaṁ
vinipātā sumuttomhi pattomhi acalaṁ padaṁ.
Yaṁ yaṁ yonūpapajjāmi devattaṁ atha mānusaṁ
divasañceva 6 rattiñca āloko hoti me sadā.
Tāyeva maṇipūjāya anubhotvāna sampadā
ñāṇāloko mayā diṭṭho pattomhi acalaṁ padaṁ.
Satasahasse ito kappe yaṁ maṇimabhipūjayiṁ
duggatiṁ nābhijānāmi maṇipūjāyidaṁ phalaṁ.
1 Ma. āmukka.... 2 Po. Yu. bhaṇḍā katākatā honti. 3 Yu. yadicchāya.
Po. yadicchassa. 4 Po. Ma. Yu. yadicchakaṁ. 5 Ma. osadhaṁ. 6 Yu. samantā
sattaranatā.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā maṇipūjako thero imā gāthāyo abhāsitthāti.
Maṇipūjakattherassa apadānaṁ samattaṁ.
Tatiyaṁ ukkāsatikattherāpadānaṁ (473)

[63] Kosiko nāma bhagavā cittakūṭe vasī tadā
jhāyī jhānarato buddho vivekābhirato muni.
Ajjhogahetvā 1 himavantaṁ nārīgaṇapurakkhato
addasaṁ kosikaṁ buddhaṁ puṇṇamāyeva candimaṁ.
Ukkāsate gahetvāna parivāresahantadā
sattarattindivaṁ buddhaṁ 2 aṭṭhamena agacchahaṁ.
Vuṭṭhitaṁ kosikaṁ buddhaṁ sayambhuṁ aparājitaṁ
pasannacitto vanditvā ekaṁ bhikkhaṁ adāsahaṁ.
Tena kammena dipadinda lokajeṭṭha narāsabha
uppajjiṁ tusite kāye ekabhikkhāyidaṁ phalaṁ.
1 Ma. ajjhogāhetvā. 2 Ma. Yu. ṭhatvā.
Divasañceva rattiñca āloko hoti me sadā
samantā yojanasataṁ obhāsena pharāmahaṁ.
Pañcapaññāsakappamhi cakkavatti ahosahaṁ
cāturanto vijitāvī jambūmaṇḍassa issaro.
Tadā me nagaraṁ āsi iddhaṁ phītaṁ sunimmitaṁ
tiṁsayojanāayāmaṁ vitthārena ca vīsati.
Sobhanaṁ nāma nagaraṁ visukammena māpitaṁ
dasasaddā vivittantaṁ sammatāḷasamāhitaṁ.
Na tasmiṁ nagare atthi vallī kaṭṭhañca mattikā
sabbasoṇṇamayaṁyeva jotate niccakālikaṁ.
Catupākāraparikkhittaṁ tayo āsuṁ maṇimayā
vemajjhe tālapanti 1 ca visukammena māpitā.
Dasasahassapokkharaṇī 2 padumuppalachāditā
puṇḍarīkādisañchannā 3 nānāgandhasameritā 4 .
Catunavute ito kappe yaṁ ukkaṁ dhārayiṁ ahaṁ
duggatiṁ nābhijānāmi ukkādhārassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
1 tālapantī. Yu. tālapattī. 2 Ma. Yu. dasasahassā pokkharañño.
3 Ma. Yu. puṇḍarikehi sañchannā. 4 Ma. nānāgandhasamīritā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ukkāsatiko thero imā gāthāyo abhāsitthāti.
Ukkāsatikattherassa apadānaṁ samattaṁ.
Catutthaṁ sumanavījaniyattherāpadānaṁ (474)

[64] Vipassino bhagavato bodhiyā pādaputtame
sumano bījaniṁ gayha avījiṁ bodhimuttamaṁ.
Ekanavute ito kappe avījiṁ bodhimuttamaṁ
duggatiṁ nābhijānāmi bījanāya idaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sumanavījaniyo thero imā gāthāyo abhāsitthāti.
Sumanavījaniyattherassa apadānaṁ samattaṁ.
Pañcamaṁ kummāsadāyakattherāpadānaṁ (475)

[65] Esanāya carantassa vipassino mahesino
rittakaṁ pattaṁ disvāna kummāsaṁ pūrayiṁ ahaṁ.
Ekanavute ito kappe yaṁ bhikkhaṁ adadiṁ tadā
duggatiṁ nābhijānāmi kummāsassa idaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā kummāsadāyako thero imā gāthāyo abhāsitthāti.
Kummāsadāyakattherassa apadānaṁ samattaṁ.
Chaṭṭhaṁ kusaṭṭhakadāyakattherāpadānaṁ (476)

[66] Kassapassa bhagavato brāhmaṇassa vusīmato
pasannacitto sumano kusaṭṭhakamadāsahaṁ.
Imasmiṁyeva kappasmiṁ kusaṭṭhakamadāsahaṁ
duggatiṁ nābhijānāmi kusaṭṭhakassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā kusaṭṭhakadāyako thero imā gāthāyo abhāsitthāti.
Kusaṭṭhakadāyakattherassa apadānaṁ samattaṁ.
Sattamaṁ giripunnāgiyattherāpadānaṁ (477)

[67] Sobhito nāma sambuddho cittakūṭe vasī tadā
gahetvā giripunnāgaṁ sayambhuṁ abhipūjayiṁ.
Catunavute ito kappe sambuddhamabhipūjayiṁ 1
duggatiṁ nābhijānāmi buddhapūjāyidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. Yu. yaṁ buddhamabhipūjayiṁ. ito paraṁ īdisameva.
Itthaṁ sudaṁ āyasmā giripunnāgiyo thero imā gāthāyo abhāsitthāti.
Giripunnāgiyattherassa apadānaṁ samattaṁ.
Aṭṭhamaṁ vallikāraphaladāyakattherāpadānaṁ (478)

[68] Sumano nāma sambuddho takkarāyaṁ vasī tadā
vallikāraphalaṁ gayha sayambhussa adāsahaṁ.
Ekattiṁse ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā vallikāraphaladāyako thero imā gāthāyo abhāsitthāti.
Vallikāraphaladāyakattherassa apadānaṁ samattaṁ.
Navamaṁ pānadhidāyakattherāpadānaṁ (479)

[69] Anomadassī bhagavā lokajeṭṭho narāsabho
divāvihārā nikkhamma vīthimāruyhi cakkhumā.
Pānadhiṁ sukataṁ gayha addhānaṁ paṭipajjahaṁ
tatthaddasāsiṁ sambuddhaṁ pattikaṁ cārudassanaṁ.
Sakaṁ cittaṁ pasādetvā nīharitvāna pānadhiṁ
pādamūle ṭhapetvāna idaṁ vacanamabraviṁ.
Abhirūha mahāvīra sugatinda vināyaka
ito phalaṁ labhissāmi so me attho samijjhatu.
Anomadassī bhagavā lokajeṭṭho narāsabho
pānadhiṁ abhirūhitvā idaṁ vacanamabravi.
Yo pānadhiṁ me adāsi 1 pasanno sehi pāṇibhi
tamahaṁ kittayissāmi suṇātha mama bhāsato.
Buddhassa giramaññāya sabbe devā samāgatā
udaggacittā sumanā vedajātā katañjalī.
Pānadhimeva 2 dānena sukhitoyaṁ bhavissati
pañcapaññāsakkhattuñca devarajjaṁ karissati.
Sahassakkhattuṁ rājā ca cakkavatti bhavissati
padesarajjaṁ vipulaṁ gaṇanāto asaṅkhayaṁ.
Aparimeyye ito kappe okkākakulasambhavo
gotamo nāma nāmena satthā loke bhavissati.
Tassa dhammesu dāyādo oraso dhammanimmito
sabbāsave pariññāya nibbāyissatināsavo.
1 Yu. adadā. 2 Ma. Yu. pānadhīnaṁ padānena.
Devaloke manusse vā nibbattissati paññavā
devayānapaṭibhāgaṁ yānaṁ paṭilabhissati.
Pāsādā sivikā mayhaṁ hatthino samalaṅkatā
rathā vājaññasaṁyuttā sadā pātubhavanti me.
Agārā nikkhamantopi rathena nikkhamiṁ ahaṁ
kesesu chijjamānesu arahattaṁ apāpuṇiṁ.
Lābhā mayhaṁ suladdhaṁ me vāṇijaṁ suppayojitaṁ
datvāna pānadhiṁ ekaṁ pattomhi acalaṁ padaṁ.
Aparimeyye ito kappe yaṁ pānadhimadāsahaṁ
duggatiṁ nābhijānāmi pānadhissa idaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā pānadhidāyako thero imā gāthāyo abhāsitthāti.
Pānadhidāyakattherassa apadānaṁ samattaṁ.
1 Yu. nikkhamāmahaṁ.
Dasamaṁ puḷinacaṅkamiyattherāpadānaṁ (480)

[70] Migaluddho 1 pure āsiṁ araññe kānane ahaṁ
vātamigaṁ gavesanto caṅkamaṁ addasaṁ ahaṁ.
Ucchaṅgena puḷinaṁ gayha caṅkame okiriṁ ahaṁ
pasannacitto sumano sugatassa sirīmato.
Ekattiṁse ito kappe puḷinaṁ okiriṁ ahaṁ
duggatiṁ nābhijānāmi puḷinassa idaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā puḷinacaṅkamiyo thero imā gāthāyo abhāsitthāti.
Puḷinacaṅkamiyattherassa apadānaṁ samattaṁ.
Uddānaṁ
naḷamāli maṇidado ukkāsatikavījani
kummāsañca kusaṭṭhañca giripunnāgiyopica
1 Ma. Yu. sabbattha migaluddo.
Vallikāro pānadhido atho puḷinacaṅkamo
gāthāyo pañcanavuti gaṇitāyo vibhāvibhi.
Naḷamālivaggo aṭṭhacattāḷīso.
----------------------
Ekūnapaññāsamo paṁsukūlavaggo
paṭhamaṁ paṁsukūlasaññakattherāpadānaṁ (481)