[51] Parinibbute bhagavati jalajuttamanāmake
āropitamhi citake sālapupphaṁ apūjayiṁ.
Satasahasse ito kappe yaṁ pupphamabhipūjayiṁ
duggatiṁ nābhijānāmi citapūjāyidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sālakusumiyo thero imā gāthāyo abhāsitthāti.
Sālakusumiyattherassa apadānaṁ samattaṁ.
Dutiyaṁ citakapūjakattherāpadānaṁ (462)

[52] Jhāyamānassa bhagavato sikhino lokabandhuno
aṭṭha campakapupphāni citakaṁ abhiropayiṁ.
Ekatiṁse ito kappe yaṁ pupphaṁ abhiropayiṁ
Duggatiṁ nābhijānāmi buddhapūjāyidaṁ 1 phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā citakapūjako thero imā gāthāyo abhāsitthāti.
Citakapūjakattherassa apadānaṁ samattaṁ.
Tatiyaṁ citakanibbāpakattherāpadānaṁ (463)

[53] Ḍayhamāne sarīramhi vessabhussa mahesino
gandhodakaṁ gahetvāna citaṁ nibbāpayiṁ ahaṁ.
Ekattiṁse ito kappe citaṁ nibbāpayiṁ ahaṁ
duggatiṁ nābhijānāmi gandhodakassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
1 Ma. Yu. citapūjāyidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā citakanibbāpako thero imā gāthāyo abhāsitthāti.
Citakanibbāpakattherassa apadānaṁ samattaṁ.
Catutthaṁ setudāyakattherāpadānaṁ (464)

[54] Vipassino bhagavato caṅkamantassa sammukhā
pasannacitto sumano setuṁ kārāpayiṁ ahaṁ.
Ekanavute ito kappe yaṁ setuṁ kārayiṁ ahaṁ
duggatiṁ nābhijānāmi setudānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā setudāyako thero imā gāthāyo abhāsitthāti.
Setudāyakattherassa apadānaṁ samattaṁ.
Pañcamaṁ sumanatālavaṇṭiyattherāpadānaṁ (465)

[55] Siddhatthassa bhagavato tālavaṇṭaṁ adāsahaṁ
sumanehi paṭicchannaṁ dhārayāmi mahāyasaṁ.
Catunavute ito kappe tālavaṇṭaṁ adāsahaṁ
duggatiṁ nābhijānāmi tālavaṇṭassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sumanatālavaṇṭiyo thero imā gāthāyo abhāsitthāti.
Sumanatālavaṇṭiyattherassa apadānaṁ samattaṁ.
Chaṭṭhaṁ avaṭaphaliyattherāpadānaṁ (466)

[56] Sataraṁsī nāma bhagavā sayambhū aparājito
vivekakāmo sambuddho gocarāyābhinikkhami.
Phalahattho ahaṁ disvā upagañchiṁ narāsabhaṁ
pasannacitto sumano adāsiṁ avaṭaṁ phalaṁ.
Catunavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā avaṭaphaliyo thero imā gāthāyo abhāsitthāti.
Avaṭaphaliyattherassa apadānaṁ samattaṁ.
Sattamaṁ labujaphaladāyakattherāpadānaṁ (467)

[57] Nagare bandhumatiyā ārāmiko ahaṁ tadā
addasaṁ virajaṁ buddhaṁ gacchantaṁ anilañjase.
Labujaphalamādāya buddhaseṭṭhassadāsahaṁ
ākāseva ṭhito santo paṭiggaṇhi mahāyaso.
Vittisañjanano 1 mayhaṁ diṭṭhadhamme sukhāvaho
phalaṁ buddhassa datvāna vippasannena cetasā.
Adhiggañchiṁ tadā pītiṁ vipulaṁ sukhamuttamaṁ
uppajjate me ratanaṁ nibbattassa tahiṁ tahiṁ.
1 Yu. vittaṁ sañjanano.
Ekanavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā labujaphaladāyako thero imā gāthāyo abhāsitthāti.
Labujaphaladāyakattherassa apadānaṁ samattaṁ.
Aṭṭhamaṁ milakkhuphaladāyakattherāpadāna 1 (468)

[58] Vanantare 2 buddhaṁ disvā atthadassiṁ mahāyasaṁ
pasannacitto sumano milakkhussa phalaṁ adaṁ.
Aṭṭhārase kappasate yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
1 Ma. pilakkhaphala.... Yu. pilakkhuphala.... 2 Yu. vanante.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā milakkhuphaladāyako thero imā gāthāyo abhāsitthāti.
Milakkhuphaladāyakattherassa apadānaṁ samattaṁ.
Navamaṁ sayampaṭibhāṇiyattherāpadānaṁ (469)

[59] Kakudhaṁ vilasantaṁva devadevaṁ narāsabhaṁ
rathiyaṁ paṭipajjantaṁ ko disvā nappasīdati.
Tamandhakāraṁ nāsetvā santāretvā bahuṁ janaṁ
ñāṇālokena jotantaṁ ko disvā nappasīdati.
Vasīsatasahassehi niyyantaṁ lokanāyakaṁ
uddharantaṁ ḷahū satte ko disvā nappasīdati.
Āhanitvā dhammabheriṁ maddantaṁ titthiye gaṇe
sīhanādaṁ va nadantaṁ ko disvā nappasīdati.
Yāvatā brahmalokamhā āgantvāna sabrahmakā
pucchanti nipuṇe pañhe ko disvā nappasīdati.
Yassañjaliṁ karitvāna ādhāvanti 1 sadevakā
tena puññaṁ anubhonti ko disvā nappasīdati.
Sabbe janā samāgantvā sampavārenti cakkhumaṁ
na vikampati ajjhiṭṭho ko disvā nappasīdati.
1 Ma. Yu. āyācanti.
Nagaraṁ pavīsato yassa nadanti 1 bheriyo bahū
vinadanti gajā 2 mattā ko disvā nappasīdati.
Vīthiyā gacchato yassa pabhā 3 vā jotate sadā
abbhunnatā samā honti ko disvā nappasīdati.
Byāharantassa buddhassa cakkavāḷamhi *- suyyati
sabbe satte viññāpeti ko disvā nappasīdati.
Satasahasse ito kappe yaṁ buddhamabhikittayiṁ
duggatiṁ nābhijānāmi kittanāya idaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sayampaṭibhāṇiyo thero imā gāthāyo abhāsitthāti.
Sayampaṭibhāṇiyattherassa apadānaṁ samattaṁ.
Dasamaṁ nimittabyākaraṇiyattherāpadānaṁ (470)

[60] Ajjhogahetvā himavantaṁ mante vācemahantadā
catupaññāsasahassāni sissā mayhaṁ upaṭṭhahuṁ.
1 Ma. ravanti. Yu. ravante. 2 Yu. anugajjā. 3 Ma. Yu. sabbābhā.
* mīkārkkhag cakvāḷamhi peḌna cakkavāḷamhi
Adhitā vedagū sabbe chaḷaṅge pāramiṁ gatā
sakavijjāhupatthaddhā himavante vasanti te.
Cavitvā tusitā kāyā devaputto mahāyaso
uppajji mātukucchismiṁ sampajāno paṭissato.
Sambuddhe upapajjante dasasahassi kampatha
andhā cakkhuṁ alabhiṁsu uppajjantamhi nāyake.
Chappakāramakampittha 1 kevalā vasudhā ayaṁ
nigghosasaddaṁ sutvāna vimhayiṁsu 2 mahājanā.
Sabbe janā samāgamma agañchuṁ mama santike
vasudhāyaṁ pakampittha kiṁvipāko bhavissati.
Vidassāmi 3 tadā tesaṁ mā bhāyittha natthi vo bhayaṁ
vissaṭṭhā hotha sabbepi uppādoyaṁ sukhatthiko 4 .
Aṭṭhahetūhi samphassā vasudhāyaṁ pakampati
tathā nimittā dissanti obhāso vipulo mahā.
Asaṁsayaṁ buddhaseṭṭho uppajjissati cakkhumā
saññāpetvāna janataṁ pañca sīle kathesahaṁ.
Sutvāna pañca sīlāni buddhuppādañca dullabhaṁ
ubbeṅgajātā sumanā tuṭṭhahaṭṭhā ahesu te.
Dvenavute ito kappe yaṁ nimittaṁ viyākariṁ
duggatiṁ nābhijānāmi byākaraṇassidaṁ phalaṁ.
1 Ma. sabbākāraṁ pakampittha. Yu. chabbikāraṁ .... 2 Ma. Yu. ubbijjiṁsu.
3 Ma. avacāsiṁ tadā tesaṁ. Yu. avacāsi .... 4 Ma. suvatthiko.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā nimittabyākaraṇiyo thero imā gāthāyo abhāsitthāti.
Nimittabyākaraṇiyattherassa apadānaṁ samattaṁ.
Uddānaṁ
sālakusumiyo thero pūjā nibbāpakopica
setudo tālavaṇṭi ca avaṭaṁ labujampado
milakkhu paṭibhāṇī ca veyyākaraṇiyo dijā
dvesattati ca gāthāyo gaṇitāyo vibhāvibhi.
Sālapupphivaggo sattacattāḷīso.
-----------------------
Aṭṭhacattāḷīso naḷamālivaggo
paṭhamaṁ naḷamāliyattherāpadānaṁ (471)