[11] Vipassino bhagavato pāṭaliṁ bodhimuttamaṁ
disvāva taṁ pādapaggaṁ tattha cittaṁ pasādayiṁ.
Sammajjaniṁ gahetvāna bodhiṁ sammajji tāvade
sammajjitvāna taṁ bodhiṁ avandiṁ pāṭaliṁ ahaṁ.
Tattha cittaṁ pasādetvā sire katvāna añjaliṁ
namassamāno taṁ bodhiṁ gañchiṁ paṭikuṭiṁ ahaṁ.
Cārimaggena 1 gacchāmi saranto bodhimuttamaṁ
ajagaro maṁ pīḷeti ghorarūpo mahabbalo.
Āsanne me kataṁ kammaṁ phalena tosayī mamaṁ
kalevaraṁ me gilati devaloke ramāmahaṁ.
Anāvilaṁ mama cittaṁ visuddhaṁ paṇḍaraṁ sadā
sokasallaṁ na jānāmi cittasantāpanaṁ mama.
Kuṭṭhaṁ gaṇḍo kilāso ca apamāro vitacchikā
daddu kaṇḍu ca me natthi phalaṁ sammajjanāyidaṁ.
Soko ca pariḷāho ca hadaye me na vijjati
abhantaṁ 2 ujukaṁ cittaṁ phalaṁ sammajjanāyidaṁ.
1 Ma. tādimaggena. Yu. cārimamaggena. 2 Yu. asattaṁ.
Samādhiṁ 1 puna pajjāmi visuddhaṁ 2 hoti mānasaṁ
yaṁ yaṁ samādhiṁ icchāmi so so sampajjate mama.
Rajanīye na rajjāmi atho dosaniyesu ca
mohanīye na muyhāmi phalaṁ sammajjanāyidaṁ.
Ekanavute ito kappe yaṁ kammamakariṁ tadā
duggatiṁ nābhijānāmi phalaṁ sammajjanāyidaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sakiṁsammajjako thero imā gāthāyo abhāsitthāti.
Sakiṁsammajjakattherassa apadānaṁ samattaṁ.
Dutiyaṁ ekadussadāyakattherāpadānaṁ (422)

[12] Nagare haṁsavatiyā ahosiṁ tiṇahārako
tiṇahārena jīvāmi tena posemi dārake.
Padumuttaro nāma jino sabbadhammāna pāragū
tamandhakāraṁ nāsetvā uppajji lokanāyako.
1 Ma. samādhīsu na majjāmi. Yu. na sajjāmi. 2 Ma. visadaṁ.
Sake ghare nisīditvā evaṁ cintesi tāvade
buddho loke samuppanno deyyadhammo na vijjati.
Idaṁ me sāṭakaṁ ekaṁ natthi me koci dāyako
dukkho nirayasamphasso ropayissāmi dakkhiṇaṁ.
Evāhaṁ cintayitvāna sakaṁ cittaṁ pasādayiṁ
ekaṁ dussaṁ gahetvāna buddhaseṭṭhassadāsahaṁ.
Ekaṁ dussaṁ daditvāna ukkuṭṭhiṁ sampavattayiṁ
yadi buddho tuvaṁ vīra tārehi maṁ mahāmuni.
Padumuttaro lokavidū āhutīnaṁ paṭiggaho
mamaṁ dānaṁ pakittento akā me anumodanaṁ.
Iminā ekadussena cetanāpaṇidhīhi ca
kappasatasahassāni vinipātaṁ na gacchati.
Chattiṁsakkhattuṁ devindo devarajjaṁ karissati
tettiṁsakkhattuṁ rājā ca cakkavatti bhavissati.
Padesarajjaṁ vipulaṁ gaṇanāto asaṅkhayaṁ
devaloke manusase vā saṁsaranto tuvaṁ bhave.
Rūpavā guṇasampanno anuvattantadehavā
akkhobhaṁ amitaṁ dussaṁ labhissati yathicchakaṁ.
Idaṁ vatvāna sambuddho jalajuttamanāmako 1
nabhaṁ abbhuggami dhīro haṁsarājāva ambare.
1 Yu. jalajuttamanāyako.
Yaṁ yaṁ yonūpapajjāmi devattaṁ atha mānusaṁ
bhoge me ūnatā natthi ekadussassidaṁ phalaṁ.
Paduddhāre paduddhāre dussaṁ nibbattate mama
heṭṭhā dussamhi tiṭṭhāhi uparicchadanaṁ mama.
Cakkavāḷaṁ upādāya sakānanaṁ sapabbataṁ
icchamāno ahaṁ ajja dussenacchādayeyya taṁ.
Teneva ekadussena saṁsaranto bhavābhave
suvaṇṇavaṇṇo hutvāna saṁsarāmi bhavābhave.
Vipākaṁ ekadussassa ajjhagaṁ 1 tattha bhikkhutaṁ
ayaṁpi 2 pacchimā jāti vipaccati idhāpi me.
Satasahasse ito kappe yaṁ dussamadadiṁ tadā
duggatiṁ nābhijānāmi ekadussassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ekadussadāyako thero imā gāthāyo abhāsitthāti.
Ekadussadāyakattherassa apadānaṁ samattaṁ.
1 Ma. Yu. nājjhagaṁ kattha cikkhayaṁ. 2 Ma. ayaṁ me antimā jāti.
Tatiyaṁ ekāsanadāyakattherāpadānaṁ (423)

[13] Himavantassa avidūre kasiko 1 nāma pabbato
assamo sukato mayhaṁ paṇṇasālā sumāpitā.
Nārado nāma nāmena kassapo iti maṁ vidū
suddhimaggaṁ gavesanto vasāmi kasike tadā.
Padumuttaro nāma jino sabbadhammāna pāragū
vivekakāmo sambuddho āgañchi anilañjasā.
Vanagge gacchamānassa disvā raṁsiṁ mahesino
kaṭṭhamañcaṁ paññāpetvā ajinañca apatthariṁ.
Āsanaṁ paññāpetvāna sīse katvāna añjaliṁ
somanassaṁ pavedetvā idaṁ vacanamabraviṁ.
Sallakatto tuvaṁ dhīra āturānaṁ tikicchako
mama rāgaparetassa 2 tikicchaṁ dehi nāyaka.
Puññatthikā 3 ye passanti buddhaseṭṭhaṁ tuvaṁ muni
dhuvatthasiddhiṁ papponti etesaṁ ajaro bhave.
Na me deyyaṁ 4 tava atthi pavattaphalabhojahaṁ
idaṁ me āsanaṁ atthi nisīda kaṭṭhamañcake.
Nisīdi tattha bhagavā achambhitova kesarī
muhuttaṁ vītināmetvā idaṁ vacanamabravi.
1 Ma. gosito. Yu. kosiko. 2 Ma. Yu. rogaparetassa. 3 Ma. Yu.
kallatthikā. 4 Ma. deyyadhammo atthi.
Vissaṭṭho hohi mā bhāyi laddho jotiraso tayā
yaṁ tuyhaṁ patthitaṁ sabbaṁ paripūressatāsanaṁ 1 .
Na 2 thokaṁ sukataṁ puññaṁ puññakkhette anuttare
sakkā uddharituṁ attā yassa cittaṁ sunīhitaṁ 3 .
Iminā āsanadānena cetanāpaṇidhīhi ca
kappasatasahassāni vinipātaṁ na gacchati.
Paññāsakkhattuṁ devindo devarajjaṁ karissati
asītikkhattuṁ rājā ca cakkavatti bhavissati.
Padesarajjaṁ vipulaṁ gaṇanāto asaṅkhayaṁ
sabbattha sukhito hutvā saṁsāre saṁsarissati.
Idaṁ vatvāna sambuddho jalajuttamanāmako
nabhaṁ abbhuggami dhīro haṁsarājāva ambare.
Hatthiyānaṁ assayānaṁ sarathaṁ sandamānikaṁ
labhāmi sabbamevetaṁ ekāsanassidaṁ phalaṁ.
Kānanaṁ pavisitvāna yadā icchāmi āsanaṁ
mama saṅkappamaññāya pallaṅko upatiṭṭhati.
Vārimajjhagato santo yadā icchāmi āsanaṁ
mama saṅkappamaññāya pallaṅko upatiṭṭhati.
Yaṁ yaṁ yonūpapajjāmi devattaṁ atha mānusaṁ
pallaṅkasatasahassāni parivārenti maṁ sadā.
1 Ma. Yu. paripūrissatināgate. 2 Ma. na moghaṁ taṁ kataṁ tuyhaṁ. Yu. na thokaṁ taṁ
kataṁ tuyhaṁ. 3 Ma. Yu. paṇīhitaṁ.
Duve bhave saṁsarāmi devatte atha mānuse
duve kule ca jāyāmi khattiye cāpi brāhmaṇe.
Ekāsanaṁ daditvāna puññakkhette anuttare
dhammapallaṅkamaññāya 1 viharāmi anāsavo.
Satasahasse ito kappe yaṁ dānamadadiṁ tadā
duggatiṁ nābhijānāmi ekāsanassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ekāsanadāyako thero imā gāthāyo abhāsitthāti.
Ekāsanadāyakattherassa apadānaṁ samattaṁ.
Catutthaṁ sattakadambapupphiyattherāpadānaṁ (424)

[14] Himavantassa avidūre kadambo 2 nāma pabbato
tasmiṁ pabbatapassamhi 3 satta buddhā vasiṁsu te.
Kadambapupphaṁ 4 disvāna paggahetvāna añjaliṁ
satta mālāni gahetvā puṇṇacittena 5 okiriṁ.
1 Ma. Yu. ..ṃādāya. 2 Ma. kukkuṭo .... 3 Ma. ...pādamhi.
4 Ma. Yu. kadambaṁ pupphitaṁ .... 5 Ma. Yu. puññacittena.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agañchahaṁ.
Catunavute ito kappe yaṁ kammamakariṁ tadā
duggatiṁ nābhijānāmi buddhapūjāyidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sattakadambapupphiyo thero imā gāthāyo abhāsitthāti.
Sattakadambapupphiyattherassa apadānaṁ samattaṁ.
Pañcamaṁ koraṇḍapupphiyattherāpadānaṁ (425)

[15] Vanakammiko pure āsiṁ pitupetāmahenahaṁ 1
pasumārena 2 jīvāmi kusalaṁ me na vijjati.
Mama āsayasāmantā tisso lokagganāyako
padāni tīṇi dassesi anukampāya cakkhumā.
Akkante ca pade disvā tissanāmassa satthuno
haṭṭho haṭṭhena cittena pade cittaṁ pasādayiṁ.
1 pitumātumatenahaṁ. 2 Yu. pararuhirena.
Koraṇḍaṁ pupphitaṁ disvā pādapaṁ dharaṇīruhaṁ
sakoṭikaṁ 1 gahetvāna padaseṭṭhaṁ apūjayiṁ.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agañchahaṁ.
Yaṁ yaṁ yonūpapajjāmi devattaṁ atha mānusaṁ
koraṇḍavaṇṇakoyeva sappabhāso 2 bhavāmahaṁ.
Dvenavute ito kappe yaṁ kammamakariṁ tadā
duggatiṁ nābhijānāmi padapūjāyidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchakatā kataṁ buddhassa sāsananti.
Itthaṁ sudaṁ āyasmā koraṇḍapupphiyo thero imā gāthāyo abhāsitthāti.
Koraṇḍapupphiyattherassa apadānaṁ samattaṁ.
Chaṭṭhaṁ ghaṭamaṇḍadāyakattherāpadānaṁ (426)

[16] Sucintitaṁ bhagavantaṁ lokajeṭṭhaṁ narāsabhaṁ
upaviṭṭhaṁ mahāraññaṁ vātābādhena pīḷitaṁ.
1 Ma. sakosakaṁ. Yu. sakoṭakaṁ. 2 Ma. suppabhāso.
Disvā cittaṁ pasādetvāna ghaṭamaṇḍaṁ upānayiṁ
katattā apacitattā 1 ca gaṅgā bhāgīrasī 2 ayaṁ.
Mahāsamuddā cattāro ghaṭaṁ sampajjare mama
ayañca paṭhavī ghorā appamāṇā asaṅkhayā.
Mama saṅkappamaññāya bhavate madhusakkharā
catuddisā 3 ime rukkhā pādapā dharaṇīruhā.
Mama saṅkappamaññāya kapparukkhā bhavanti te
paññāsakkhattuṁ devindo devarajjamakārayiṁ.
Ekapaññāsakkhattuñca cakkavatti ahosahaṁ
padesarajjaṁ vipulaṁ gaṇanāto asaṅkhayaṁ.
Catunavute ito kappe yaṁ dānamadadiṁ tadā
duggatiṁ nābhijānāmi ghaṭamaṇḍassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ghaṭamaṇḍadāyako thero imā gāthāyo abhāsitthāti.
Ghaṭamaṇḍadāyakattherassa apadānaṁ samattaṁ.
1 Ma. Yu. ācitattā ca. 2 Ma. bhāgīrathī. 3 Ma. Yu. cātuddīpā.
Sattamaṁ ekadhammasavaniyattherāpadānaṁ (427)

[17] Padumuttaro nāma jino sabbadhammāna pāragū
catusaccaṁ pakāsento santāresi bahuṁ janaṁ.
Ahaṁ tena samayena jaṭilo uggatāpano
dhunanto vākacīrāni gacchāmi ambare tadā.
Buddhaseṭṭhassa upari gantuṁ na visahāmahaṁ
pakkhīva selamāsajja gamanaṁ na labhāmahaṁ.
Udake dhopayitvāna 1 evaṁ gacchāmi ambare
na me idaṁ bhūtapubbaṁ iriyāpathavikopanaṁ.
Handa me taṁ gavesissaṁ appevatthaṁ labheyyahaṁ
orohanto antalikkhā saddamassosi satthuno.
Sarena rajanīyena savanīyena vattunā 2
aniccataṁ kathentassa taññeva uggahiṁ tadā.
Aniccasaññamuggayha agamāsiṁ mamassamaṁ
yāvatāyuṁ vasitvāna tattha kālaṁ kato ahaṁ.
Carime vattamānamhi saddhammassavanaṁ sariṁ
tena kammena sukatena cetanāpaṇidhīhi ca.
Jahitvā mānusaṁ dehaṁ tāvatiṁsaṁ agañchahaṁ
tiṁsakappasahassāni devaloke ramiṁ ahaṁ.
1 Ma. vokkamitvāna. Yu. vomisitvāna. 2 Ma. Yu. vaggunā.
Ekapaññāsakkhattuñca devarajjamakārayiṁ
ekatiṁsatikkhattuñca 1 cakkavatti ahosahaṁ.
Padesarajjaṁ vipulaṁ gaṇanāto asaṅkhayaṁ
anubhomi sakaṁ puññaṁ sukhitohaṁ bhavābhave.
Anussarāmi taṁ saññaṁ saṁsaranto bhavābhave
na kenacihaṁ 2 vijjhāmi nibbānaṁ accutaṁ padaṁ.
Pitu gehe nisīditvā samaṇo bhāvitindriyo
kathaṁ so paridīpento aniccaṁ 3 tatthudāhari.
Aniccā vata saṅkhārā uppādavayadhammino
uppajjitvā nirujjhanti tesaṁ vūpasamo sukho.
Saha gāthaṁ suṇitvāna sabbasaññaṁ 4 anussariṁ
ekāsane nisīditvā arahattamapāpuṇiṁ.
Jātiyā sattavassena arahattaṁ apāpuṇiṁ
upasampādayi buddho dhammassavanassidaṁ phalaṁ.
Satasahasse ito kappe yaṁ dhammaṁ asuṇiṁ tadā
duggatiṁ nābhijānāmi dhammassavanassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
1 Ma. Yu. ekavīsatikkhattuñca. 2 Ma. Yu. na koṭiṁ paṭivijjhāmi 3 Ma. anicacatamudāhari.
Yu. aniccaṁ vatthudāhariṁ. 4 Po. Ma. Yu. pubbasaññamanussariṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Atthaṁ sudaṁ āyasmā ekadhammasavaniyo thero imā gāthāyo abhāsitthāti.
Ekadhammasavaniyattherassa apadānaṁ samattaṁ.
Aṭṭhamaṁ sucintitattherāpadānaṁ (428)

[18] Nagare haṁsavatiyā ahosiṁ kasako tadā
kasikammena jīvāmi tena posemi dārake.
Susampannaṁ tadā khettaṁ dhaññaṁ me phalinaṁ ahu
pākakāleva sampatte evaṁ cintesahaṁ tadā.
Na 1 mecchannaṁ na paṭirūpaṁ jānantassa guṇāguṇaṁ
yohaṁ saṅghe adatvāna aggaṁ bhuñjeyyamattanā 2 .
Sambuddho asamo loke dvattiṁsavaralakkhaṇo
tato ca bhāvito saṅgho puññakkhettaṁ 3 anuttaraṁ.
Tattha dassāmihaṁ dānaṁ navasassaṁ pure pure
evāhaṁ cintayitvāna haṭṭho pītikamānaso 4 .
Khettato dhaññamāharitvā sambuddhaṁ upasaṅkamiṁ
upasaṅkamma sambuddhaṁ lokajeṭṭhaṁ narāsabhaṁ.
Vanditvā satthuno pāde idaṁ vacanamabraviṁ
navasassañca sampannaṁ idha hosi ca tvaṁ 5 mune.
1 Ma. Yu. nacchannaṁ. 2 Ma. bhuñjeyya ce tadā. Yu. bhuñjeyya maṁ tadā.
3 Ma. Yu. puññakkhetato anuttaro. 4 Ma. Yu. piṇitamānaso. 5 Ma. āyāgosi
gosi ca tuvaṁ mune. Yu. āyāyopi ....
Anukampaṁ upādāya adhivāsehi cakkhuma
padumuttaro lokavidū āhutīnaṁ paṭiggaho.
Mama saṅkappamaññāya idaṁ vacanamabravi
cattāro ca paṭipannā cattāro ca phale ṭhitā.
Esa saṅgho ujubhūto paññāsīlasamāhito
yajantānaṁ manussānaṁ puññapekkhāna pāṇinaṁ.
Karotaṁ upacikaṁ 1 puññaṁ saṅghe dinnaṁ mahapphalaṁ
tasmiṁ saṅghe ca dātabbaṁ tava sassaṁ tathetaraṁ.
Saṅghato uddisitvāna bhikkhū netvā sakaṁ gharaṁ
paṭiyattaṁ ghare santaṁ bhikkhusaṅghassa dehi tvaṁ.
Saṅghato uddisitvāna bhikkhū netvānahaṁ gharaṁ
yaṁ ghare paṭiyattaṁ me bhikkhusaṅghassadāsahaṁ
tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agañchahaṁ.
Tattha me sukataṁ byamhaṁ sovaṇṇaṁ supabhassaraṁ
saṭṭhiyojanamubbedhaṁ tiṁsayojanavitthataṁ.
Ekūnavīsatimaṁ bhāṇavāraṁ.
Ākiṇṇaṁ bhavanaṁ mayhaṁ nārīgaṇasamākulaṁ
tattha bhutvā pivitvā ca vasāmi tidase ahaṁ.
1 Ma. karoto padhikaṁ. Yu. karontaṁ opadhikaṁ.
Satānaṁ tiṁsakkhattuṁ 1 ca devarajjamakārayiṁ
satānaṁ pañcakkhattuñca devarajjamakārayiṁ.
Satānaṁ pañcakkhattuñca cakkavatti ahosahaṁ
padesarajjaṁ vipulaṁ gaṇanāto asaṅkhayaṁ.
Bhavābhave saṁsaranto labhāmi amitaṁ dhanaṁ
bhoge me ūnatā natthi navasassassidaṁ phalaṁ.
Hatthiyānaṁ assayānaṁ sivikaṁ sandamānikaṁ
labhāmi sabbamevetaṁ navasassassidaṁ phalaṁ.
Navavatthaṁ navaphalaṁ navaggarasabhojanaṁ
labhāmi sabbamevetaṁ navasassassidaṁ phalaṁ.
Koseyyaṁ kambaliyāni khomakappāsikāni ca
labhāmi sabbamevetaṁ navasassassidaṁ phalaṁ.
Dāsīgaṇaṁ dāsagaṇaṁ nāriyo samalaṅkatā
labhāmi sabbamevetaṁ navasassassidaṁ phalaṁ.
Na maṁ sītaṁ va uṇhaṁ vā pariḷāho na vijjati
atho cetasikaṁ dukkhaṁ hadaye me na vijjati.
Imaṁ khāda imaṁ bhuñja imamhi sayane saya
labhāmi sabbamevetaṁ navasassassidaṁ phalaṁ.
Ayaṁ pacchimako dāni carimo vattate bhavo
ajjāpi deyyadhammo 2 me mamaṁ 3 toseti sabbadā.
1 Ma. Yu. tīṇikkhattuñca. 2 Yu. deyyadhamme. 3 Ma. Yu. phalaṁ.
Navasassaṁ daditvāna saṅghe gaṇavaruttame
aṭṭhānisaṁse anubhomi kammānucchavike mama.
Vaṇṇavā yasavā homi mahābhogo anītiko
mahābhakkho 1 sadā homi abhejjapariso sadā.
Sabbe maṁ apacāyanti yekeci paṭhavissitā
deyyadhammo ca yokoci pure pure labhāmihaṁ.
Bhikkhusaṅghassa vā majjhe buddhaseṭṭhassa sammukhā
sabbepi samatikkamma denti mameva dāyakā.
Paṭhamaṁ navasassañhi datvā saṅghe gaṇuttame
imānisaṁse anubhomi navasassassidaṁ phalaṁ.
Satasahasse ito kappe yaṁ dānamadadiṁ tadā
duggatiṁ nābhijānāmi navasassassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sucintito thero imā gāthāyo abhāsitthāti.
Sucintitattherassa apadānaṁ samattaṁ.
1 Ma. Yu. mahāpakkho.
Navamaṁ soṇṇakiṁkaṇiyattherāpadānaṁ 1 (429)

[19] Saddhāya abhinikkhamma pabbajiṁ anagāriyaṁ
vākacīradharo āsiṁ tapokammamapassito.
Atthadassī tu bhagavā lokajeṭṭho narāsabho
uppajji tamhi samaye tārayanto mahājanaṁ.
Balañca vata me khīṇaṁ byādhinā paramenahaṁ 2
buddhaseṭṭhaṁ saritvāna puḷine thūpamuttamaṁ.
Karitvā haṭṭhacittohaṁ sahasena 3 samokiriṁ
soṇṇakiṁkaṇipupphāni udaggamanaso ahaṁ.
Sammukhā viya sambuddhaṁ thūpaṁ paricariṁ ahaṁ
tena cetopasādena atthadassissa tādino.
Devalokaṁ gato santo labhāmi vipulaṁ sukhaṁ
suvaṇṇavaṇṇo tatthāsi buddhapūjāyidaṁ phalaṁ.
Asītikoṭiyo mayhaṁ nāriyo samalaṅkatā
sadā mayhaṁ upaṭṭhanti buddhapūjāyidaṁ phalaṁ.
Saṭṭhī turiyasahassāni bheriyo paṇavāpica
saṅkhā ca deṇḍimā tattha vaggū vajjanti dundubhi.
Cullāsītisahassāni hatthiyo samalaṅkatā
tidhappabhinnā mātaṅgā kuñjarā saṭṭhihāyanā.
1 Ma. Yu. sovaṇṇa.... 2 Ma. paramena taṁ. 3 Ma. sahatthena.
Hemajālābhisañchannā upaṭṭhānaṁ karonti me
balakāye bhave 1 ceva ūnatā me na vijjati.
Soṇṇakiṁkaṇipupphānaṁ vipākaṁ anubhomihaṁ
aṭṭhapaññāsakkhattuṁ ca devarajjamakārayiṁ.
Ekasattatikkhattuñca cakkavatti ahosahaṁ
paṭhabyā rajjaṁ ekasataṁ mahiyā kārayiṁ ahaṁ.
So dāni patto amataṁ gambhīraṁ 2 duddasaṁ padaṁ
saṁyojanā parikkhīṇā natthi dāni punabbhavo.
Aṭṭhārase kappasate yaṁ pupphamabhiropayiṁ
duggatiṁ nābhijānāmi buddhapūjāyidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā soṇṇakiṁkaṇiyo thero imā gāthāyo abhāsitthāti.
Soṇṇakiṁkaṇiyattherassa apadānaṁ samattaṁ.
1 Ma. Yu. gaje. 2 Ma. Yu. asaṅkhataṁ sududdasaṁ.
Dasamaṁ sovaṇṇakontarikattherāpadānaṁ 1 (430)

[20] Manobhāvaniyaṁ buddhaṁ attadantaṁ samāhitaṁ
iriyamānaṁ brahmapathe cittavūpasame rataṁ.
Nitiṇṇaogha sambuddhaṁ jhāyiṁ jhānarataṁ muniṁ
upaviṭṭhaṁ 2 samāpattiṁ indriyasaṁvarappahaṁ 3 .
Alāvunodakaṁ gayha buddhaseṭṭhaṁ upāgamiṁ
buddhapāde dhovitvāna alāvukamadāsahaṁ.
Āṇāpesi ca sambuddho padumuttaranāmako
imimodakamāhatvā pādamūle ṭhapehi me.
Sādhūtihaṁ paṭissutvā satthu gāravatāyava 4
udakaṁ lāvunāhatvā buddhaseṭṭhaṁ upānayiṁ 5 .
Anumodi mahāvīro cittaṁ nibbāpayaṁ mama
iminā lāvudānena saṅkappo te samijjhatu.
Paṇṇarase ito kappe devaloke ramiṁ ahaṁ
tettiṁsakkhattuṁ rājā ca cakkavatti ahosahaṁ.
Divā vā yadivā rattiṁ caṅkamantassa tiṭṭhato
sovaṇṇaṁ kontaraṁ gayha tiṭṭhanti 6 purato mama.
Buddhassa datvāna lāvuṁ labhāmi soṇṇakontaraṁ
appakaṁpi karaṁ kāraṁ vipulaṁ hoti tādisu 7
1 Ma. soṇṇakontarikat.... Yu. suvaṇṇakattarikat.... 2 Ma. upatitthaṁ
samāpannaṁ. 3 Ma. Yu. indivaradalappabhaṁ. 4 Ma. Yu. ... ca. 5 Ma. upāgamiṁ.
6 Ma. tiṭṭhate. Yu. tiṭṭhati. 7 Yu. tādisaṁ.
Satasahasse ito kappe yaṁ lāvumadadiṁ tadā
duggatiṁ nābhijānāmi alāvussa idaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sovaṇṇakontariko thero imā gāthāyo abhāsitthāti.
Sovaṇṇakontarikattherassa apadānaṁ samattaṁ.
Uddānaṁ
sakiṁsammajjako thero ekadussāsanappadā
kadamba koraṇḍakadā ghaṭasavanikopica
sucintito kiṁkaṇiko soṇṇakontarikopica
ekagāthāsatañcettha ekasattatimeva ca.
Sakiṁsammajjakavaggo tecattāḷīso.
-----------------------
Catucattāḷīso ekavihārivaggo
paṭhamaṁ ekavihāriyattherāpadānaṁ (431)