[404] Pabbhārakūṭaṁ nissāya sayambhū aparājito
ābādhiko ca 1 so buddho vasati pabbatantare.
Mama assamasāmantā panādo āsi tāvade
buddhe nibbāyamānamhi āloko 2 āsi tāvade.
Yāvatā vanasaṇḍasmiṁ acchakokataracchayo
bālā 3 ca kesarī sabbe abhikujjiṁsu 4 tāvade.
Uppādaṁ 5 tamahaṁ disvā pabbhāraṁ agamāsahaṁ
tatthaddasāsiṁ sambuddhaṁ nibbutaṁ aparājitaṁ.
Suphullaṁ sālarājaṁva sataraṁsīva uggataṁ
vītaccitaṁva aṅgāraṁ nibbutaṁ aparājitaṁ.
Tiṇaṁ kaṭṭhañca pūretvā citakaṁ tatthakāsahaṁ
citakaṁ sukataṁ katvā sarīraṁ jhāpayiṁ ahaṁ.
Sarīraṁ jhāpayitvāna gandhatoyaṁ samokiriṁ
antalikkhe ṭhito yakkho nāmaṁ aggahi tāvade.
1 Yu. ... va yo .... 2 Ma. āloko udapajjatha. 3 Ma. Yu. vāḷā.
4 Ma. Yu. abhigajjiṁsu. 5 Ma. uppātaṁ.
Taṁ 1 pūritaṁ tayā kiccaṁ sayambhussa mahesino
puṇṇako nāma nāmena yadā 2 hosi tuvaṁ mune.
Tamhā kāyā cavitvāna devalokaṁ agañchahaṁ
tattha dibbamayo gandho antalikkhā 3 pavassati.
Tatrāpi nāmadheyyaṁ me puṇṇakoti ahu tadā
devabhūto manusso vā saṅkappaṁ pūrayāmahaṁ.
Idaṁ pacchimakaṁ mayhaṁ carimo vattatī 4 bhavo
idhāpi puṇṇako nāma nāmadheyyaṁ pakāsati 5 .
Tosayitvāna sambuddhaṁ gotamaṁ sakyapuṅgavaṁ
sabbāsave pariññāya viharāmi anāsavo.
Ekanavute ito kappe yaṁ kammamakariṁ tadā
duggatiṁ nābhijānāmi tanukiccassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā puṇṇako thero imā gāthāyo
abhāsitthāti.
Puṇṇakattherassa apadānaṁ samattaṁ.
1 Ma. yaṁ.. 2 Ma. Yu. sadā hohi. 3 Yu. antalikkhe. 4 Ma. Yu. vattate.
5 Yu. paññāyati.
Tatiyaṁ mettaguttherāpadānaṁ (403)

[405] Himavantassa avidūre asoko nāma pabbato
tatthāpi assamo mayhaṁ visukammena 1 māpito.
Sumedho nāma sambuddho aggo kāruṇiko muni
nivāsayitvā pubbaṇhe piṇḍāya me upāgami.
Upāgataṁ mahāvīraṁ sumedhaṁ lokanāyakaṁ
paggayha sugatapattaṁ 2 sappitelaṁ apūrayiṁ.
Datvānāhaṁ buddhaseṭṭhe sumedhe lokanāyake
añjaliṁ paggahetvāna bhiyyo hāsaṁ janesahaṁ.
Iminā sappidānena cetanāpaṇidhīhi ca
devabhūto manusso vā labhāmi vipulaṁ sukhaṁ.
Vinipātaṁ vivajjetvā saṁsarāmi bhavābhave
tattha cittaṁ paṇidhitvā labhāmi acalaṁ padaṁ.
Lābhā tuyhaṁ suladdhante yaṁ maṁ addakkhi brāhmaṇa 3
mama dassanamāgamma arahattaṁ gamissati 4 .
Vissaṭṭho hohi mā bhāyi adhigantvā mahāyasaṁ
mamaṁ hi sappiṁ datvāna parimokkhāsi jātiyā.
Iminā sappidānena cetanāpaṇidhīhi ca
devabhūto manusso vā labhāmi vipulaṁ sukhaṁ.
1 Ma. visakammena. 2 Yu. subhakaṁ pattaṁ. 3 Yu. brāhmaṇo.
4 Ma. bhavissati. Yu. bhavissasi.
Iminā adhikārena 1 mettacittavatāya ca
aṭṭhārase kappasate devaloke ramissati 2 .
Aṭṭhārasa ca tikkhattuṁ devarājā bhavissati 3
padesarajjaṁ vipulaṁ gaṇanāto asaṅkhayaṁ.
Ekapaññāsakkhattuñca cakkavatti bhavissati
cāturanto vijitāvī jambūmaṇḍassa issaro.
Mahāsamuddo vakkhobbho buddharo paṭhavī yathā
evameva ca me bhogā appameyyā bhavissare
saṭṭhikoṭiṁ hiraññassa datvāna 4 pabbajiṁ ahaṁ.
Kiṁ kusalaṁ gavesanto bāvariṁ upasaṅkamiṁ.
Tattha mante adhiyāmi chaḷaṅgaṁ nāma lakkhaṇaṁ
tamandhakāraṁ vidhamaṁ uppajji tvaṁ mahāmuni.
Tava dassanakāmohaṁ āgatomhi mahāmuni
tava dhammaṁ suṇitvāna pattomhi acalaṁ padaṁ.
Tiṁsakappasahassamhi sappiṁ buddhassadāsahaṁ
etthantare nābhijāne sappi viññāpitaṁ mayā.
Mama saṅkappamaññāya uppajjati yathicchakaṁ
cittamaññāya nibbattaṁ sabbe santappayāmahaṁ.
Aho buddhā aho dhammā aho no satthusampadā
thokañhi sappiṁ datvāna appameyyaṁ labhāmahaṁ.
1 Ma. sappidānena. 2 Ma. Yu. ramissasi. 3 Ma. Yu. bhavissasi. ito paraṁ īdisameva.
4 Ma. cajitvā.
Mahāsamudde udakaṁ yāvatā nerupassato
mama sappiṁ upādāya kalabhāgaṁ na hissati.
Yāvatā cakkavāḷassa kārayantassa rāsito
mama nibbattavatthānaṁ okāso so na sammati.
Pabbatarājā himavā pavaropi siluccayo
mamānulittagandhassa upanidhaṁ 1 na hissati.
Vatthaṁ gandhañca sappiñca aññaṁ vā diṭṭhadhammikaṁ
asaṅkhatañca nibbānaṁ sappidānassidaṁ phalaṁ.
Satipaṭṭhānasayano samādhijhānagocaro
bojjhaṅgajanano 2 ajja sappidānassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā mettagū thero imā gāthāyo
abhāsitthāti.
Mettaguttherassa apadānaṁ samattaṁ.
1 Ma. upanidhiṁ. Yu. upaniyaṁ. 2 Ma. Yu. bojjhaṅgabhojano.
Catutthaṁ dhotakattherāpadānaṁ (404)

[406] Gaṅgā bhāgīrasī 1 nāma himavantā pabhāvitā
haṁsavatiyā dvārena anusandati tāvade.
Sobhito nāma ārāmo gaṅgākūle sumāpito
tattha padumuttaro buddho vasate lokanāyako.
Tidasehi yathā indo manujehi purakkhato
nisīdi tattha bhagavā asambhītova kesarī.
Nagare haṁsavatiyā ahosiṁ 2 brāhmaṇo ahaṁ
chaḷaṅgo nāma nāmena evaṁ nāmo mahāmuni.
Aṭṭhārasa sissasatā parivārenti maṁ tadā
tehi sissehi samito gaṅgātīraṁ upāgamiṁ.
Tatthaddasāsiṁ samaṇe nikkuhe dhotapāpake
bhāgīrasintarantohaṁ 3 evaṁ cintesi tāvade.
Sāyaṁ pātaṁ tarantāme buddhaputtā mahāyasā
vihesayanti attānaṁ tesaṁ attā vihaññati.
Sadevakassa lokassa buddho aggo pavuccati
natthi me dakkhiṇe kāraṁ gatimaggavisodhanaṁ.
Yannūna buddhaseṭṭhassa setuṁ gaṅgāya kāraye
kārāpetvā imaṁ setuṁ 4 santarāmi imaṁ bhavaṁ.
1 Ma. bhāgīrathī. 2 Ma. Yu. vasāmi. 3 Ma. bhāgīrathiṁ tarantehaṁ. 4 Ma. Yu. kammaṁ.
Sataṁ sahassaṁ datvāna setuṁ kārāpayiṁ ahaṁ
saddahanto kataṁ kāraṁ vipulaṁ me bhavissati.
Kārāpetvāna taṁ 1 setuṁ upesiṁ lokanāyakaṁ
sirasi añjaliṁ katvā imaṁ vacanamabraviṁ.
Sataṁ sahassaṁ savayaṁ 2 datvā 3 kārāpito mayā
tavatthāya mahāsetuṁ paṭiggaṇha mahāmune.
Padumuttaro lokavidū āhutīnaṁ paṭiggaho
bhikkhusaṅghe nisīditvā imā gāthā abhāsatha.
Yo me setuṁ akāresi pasanno sehi pāṇibhi
tamahaṁ kittayissāmi suṇātha mama bhāsato.
Darito pabbatato vā rukkhato patitopiyaṁ
cutopi lacchatiṭṭhānaṁ setudānassidaṁ phalaṁ.
Virūḷhamūlasantānaṁ nigrodhamiva māluto
amittā nappasahanti 4 setudānassidaṁ phalaṁ.
Nāssa corā pasahanti 5 nātimaññanti khattiyā
sabbe tarissatāmitte 6 setudānassidaṁ phalaṁ.
Abbhokāsagataṁ santaṁ kaṭhinātapatāpitaṁ
puññakammena saṁyuttaṁ na bhavissati vedanā.
Devaloke manusse vā hatthiyānaṁ sunimmitaṁ
tassa saṅkappamaññāya nibbattissati tāvade.
1 Yu. haṁ. 2 Ma. Yu. satasahassassa vayaṁ. 3 Yu. katvā. 4 Yu. na sahissanti.
5 Yu. sahissanti. 6 Yu. atikkammāmitte.
Sahassassā vātajavā sindhavā sīghabāhanā
sayaṁ pātaṁ upessanti setudānassidaṁ phalaṁ.
Āgantvāna manussattaṁ sukhitoyaṁ bhavissati
ihāpi 1 manujasseva hatthiyānaṁ bhavissati.
Kappasatasahassamhi okkākakulasambhavo
gotamo nāma nāmena satthā loke bhavissati.
Tassa dhammesu dāyādo oraso dhammanimmito
sabbāsave pariññāya nibbāyissatināsavo.
Aho me sukataṁ kammaṁ jalajuttamanāmake
tattha kāraṁ karitvāna pattohaṁ āsavakkhayaṁ.
Padhānaṁ pahitattomhi upasanto nirūpadhi
nāgova bandhanaṁ chetvā viharāmi anāsavo.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā dhotako thero imā gāthāyo
abhāsitthāti.
Dhotakattherassa apadānaṁ samattaṁ.
1 Ma. vehāsaṁ.
Pañcamaṁ upasīvattherāpadānaṁ (405)

[407] Himavantassa avidūre anomo nāma pabbato
assamo sukato mayhaṁ paṇṇasālā sumāpitā.
Nadī ca sandati tattha supatitthā manoramā
anūpatitthe jāyanti padumuppalakā bahū.
Pāṭhīnā pāvusā macchā balajā 1 muñjarohitā
macchakacchapasañchannā nadikā sandate tadā.
Timirā pupphitā tattha asokā khuddamālakā
puṇṇā vā giripuṇṇā vā sampavanti mamassamaṁ.
Kuṭajā pupphitā tattha tiṇasūlavanāni ca
sālā ca salaḷā tattha campakā pupphitā bahū.
Ajjunā adhimuttā 2 ca mahānāmā ca pupphitā
asanā madhugandhī ca pupphitā te mamassame.
Uddālakā pāṭalikā yūthikā ca piyaṅgukā
bimbijālakasañchannā samantā aḍḍhayojanaṁ.
Mātakarā 3 sattaliyo pāṭalī sindhuvāritā
aṅkolakā bahū tattha tālakuṭā 4 ca pupphitā.
Seleyyakā bahū tattha pupphitā mama assame
etesu pupphajātesu sobhanti pādapā bahū.
1 Yu. jalājā. 2 Ma. Yu. atimuttā. 3 Ma. mātaggārā. Yu. mātaṅgā vā
4 Ma. tālakuṭṭhi. Yu. tālakuṭṭhā.
Samantā tena gandhena vāyate mama assame
harītakā āmalakā ambajambū vibhedakā 1 .
Kolā bhallātakā bellā phārusakaphalāni ca
tindukā ca piyālā ca madhukā kāsamāriyo 2 .
Labujā panasā tattha kadalī candarīphalā 3
ambāṭakā bahū tattha vallikāraphalāni ca.
Cirasaṁrasapākā ca 4 phalitā mama assame
āḷakā isimuggā ca tato soraphalā 5 bahū.
Avaṭā pakkabharitā milakkhudumbarāni ca
pipphalī maricā tattha nigrodhā ca kapiṭṭhanā.
Udumbarakā bahavo kaṇḍapakkā ca pāriyo 6
ete caññe ca bahavo phalitā assame mama.
Puppharukkhāpi bahavo pupphitā mama assame
āluvā ca kadambā ca biḷālitakkalāni ca.
Ālakā tālakā ceva vijjanti mama assame
assamassāvidūre me mahājātassaro ahu.
Acchodako sītajalo supatittho manoramo
padumuppalā bahū tattha puṇḍarikasamāyutā.
Mandālakehi sañchannā nānāgandhasamīritā
gabbhaṁ gaṇhanti padumā aññe pupphanti kesarī.
1 Ma. Yu. vibhītakā. 2 Ma. kāsumārayo. 3 Ma. badarīphalā. 4 Ma. bījapūrasapāriyo.
Yu. viṭapā ca sapākā ca. 5 Ma. modaphalā. Yu. coraphalā. 6 Ma. kaṇḍupaṇṇā
ca hariyo.
Opupphapattā tiṭṭhanti padumā kaṇṇikā bahū
madhu bhisamhā savati khīrasappi muḷālibhi.
Samantā tena gandhena nānāgandhasamohitā
kumudā ambagandhī ca nayitā dissare bahū.
Jātassarassānukūlaṁ ketakā pupphitā bahū
suphullā bandhujīvā ca setavārī sugandhikā.
Kumbhīlā suṁsumārā 1 ca gahakā tattha jāyare
uggāhakā ajagarā tattha jātassare bahū.
Pāṭhīnā pāvusā macchā balajā muñjarohitā
macchakacchapasañchannā atho sapaṭakehi 2 ca.
Pārevatā ravihaṁsā kukkutthakā 3 nadīcarā
dindibhā 4 cakkavākā ca cappakā jīvajīvakā.
Kalandakā ukkusā ca senakā uddharā bahū
kotthakā sukapotā ca kuḷīrā 5 camarā bahū.
Kāseniyā 6 ca tilakā upajīvanti taṁ saraṁ
sīhā byagghā ca dīpī ca acchakokataracchayo.
Vānarā kinnarā ceva dissanti mama assame
tāni gandhāni ghāyanto bhakkhayanto phalānahaṁ.
Gandhodakaṁ pivanto ca vasāmi mama assame
eṇimigā varāhā ca pasadā khuddarūpakā.
1 Ma. susumārā. 2 Ma. Yu. papaṭakāhi. 3 Ma. kukkutthā ca. 4 Yu. tiṭībhā.
5 Ma. tuliyā. 6 Ma. kāreniyo. Yu. kāreriyo.
Aggikā jotikā ceva vasanti mama assame
haṁsā koñcā mayūrā ca sahitāpica 1 kokilā.
Mañjarikā 2 bahū tattha kosikā potthasīsakā 3
pisācā dānavā ceva kumbhaṇḍā rakkhasā bahū.
Garuḷā pannagā ceva vasanti mama assame
mahānubhāvā isayo santacittā samāhitā.
Kamaṇḍaludharā sabbe ajinuttaravāsino
jaṭābhārabharitā ca 4 vasanti mama assame.
Yugamattañca pekkhantā nipakā santavuttino
lābhālābhena santuṭṭhā vasanti mama assame.
Vākacīraṁ dhunantā te poṭhentā 5 jinacammakaṁ
sabalehi upatthaddhā gacchanti ambare tadā.
Navodakaṁ āharanti kaṭṭhaṁ vā aggidārukaṁ
sayañca upasampannā sappāṭihirassidaṁ phalaṁ.
Lohadoṇiṁ gahetvāna vanamajjhe vasanti te
kuñjarāva mahānāgā achambhitāva 6 kesarī.
Aññe gacchanti goyānaṁ aññe pubbavidehanaṁ 7
aññe ca uttarakuruṁ sakambalamapassitā 8 .
Tato piṇḍaṁ āharitvā paribhuñjanti ekato
sabbesaṁ pakkamantānaṁ uggatejāna tādinaṁ.
1 Ma. sālikāpica. 2 Ma. Yu. majjārikā. 3 Yu. potthasīsikā. 4 Ma. va.
Yu. te jaṭābhārabharitā. 5 Ma. phoṭentā. 6 Ma. Yu. asambhītāva. 7 Ma.
pubbavidehakaṁ. 8 Ma. sakaṁ balamavassitā.
Ajinacammasaddena vanaṁ saddāyate tadā.
Edisā te mahāvīra sissā uggatapā mama
parivuto ahaṁ tehi vasāmi mama assame.
Tositā sakakammena vinītāpi samāgatā
ārādhayiṁsu maṁ ete sakakammābhilāsino 1 .
Sīlavanto ca nipakā appamaññāsu kovidā
padumuttaro lokavidū āhutīnaṁ paṭiggaho.
Samayaṁ saṁviditvāna upagañchi vināyako
upagantvāna sambuddho ātāpī nipako muni.
Pattaṁ paggayha sambuddho bhikkhāya samupāgami 2
upāgataṁ mahāvīraṁ jalajuttamanāmakaṁ 3 .
Tiṇattharaṁ 4 paññāpetvā sālapupphehi okiriṁ
nisīditvāna 5 sambuddhaṁ haṭṭho saṁviggamānaso.
Khippaṁ pabbatamāruyha agaḷuṁ aggahiṁ ahaṁ
kumbhamattaṁ gahetvāna panasaṁ devagandhikaṁ.
Khandhe āropayitvāna upagañchiṁ vināyakaṁ
phalaṁ buddhassa datvāna agaḷuṁ anulimpahaṁ.
Pasannacitto sumano buddhaseṭṭhaṁ avandihaṁ
padumuttaro lokavidū āhutīnaṁ paṭiggaho.
1 Yu. sakakammābhilābhino. 2 Ma. Yu. mamupāgami. 3 Ma. Yu. jalajuttamanāyakaṁ.
4 Ma. tiṇasantharaṁ. 5 Ma. nisādetvāna.
Isimajjhe nisīditvā imā gāthā abhāsatha
yo ca me phalamagaḷuṁ 1 āsanañca adāsi me.
Tamahaṁ kittayissāmi suṇātha mama bhāsato
gāme vā yadivāraññe pabbhāresu guhāsu vā.
Imassa cittamaññāya nibbattissati bhojanaṁ
devaloke manusse vā upapanno ayaṁ naro.
Bhojanehi ca vatthehi parisantappayissati
upapajjati yaṁ yoniṁ devattaṁ atha mānusaṁ.
Akkhobbhabhogo hutvāna saṁsarissatiyaṁ naro
tiṁsakappasahassāni devaloke ramissati.
Sahassakkhattuṁ rājā ca cakkavatti bhavissati
ekasattatikkhattuñca devarajjaṁ karissati.
Padesarajjaṁ vipulaṁ gaṇanāto asaṅkhayaṁ
kappasatasahassamhi okkākakulasambhavo.
Gotamo nāma nāmena satthā loke bhavissati
tassa dhammesu dāyādo oraso dhammanimmito.
Upasīvo nāma nāmena hessati satthusāvako
sabbāsave pariññāya viharissatināsavo.
Suladdhalābho laddho me yohaṁ addakkhi nāyakaṁ
tisso vijjā anuppattā kataṁ buddhassa sāsanaṁ.
1 Ma. yo me phalañca agaruṁ. Yu. yo me phalañcāgaruñca.
Gāme vā yadivāraññe pabbhāresu guhāsu vā
mama saṅkappamaññāya bhojanaṁ hoti me sadā.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā upasīvo thero imā gāthāyo
abhāsitthāti.
Upasīvattherassa apadānaṁ samattaṁ.
Chaṭṭhaṁ nandakattherāpadānaṁ (406)

[408] Migaluddho pure āsiṁ araññe kānane ahaṁ
pasadaṁ migamesanto sayambhuṁ addasaṁ ahaṁ.
Anuruddho nāma sambuddho sayambhū aparājito
vivekakāmo so dhīro vanaṁ ajjhogahi tadā.
Catudaṇḍe gahetvāna catuṭṭhāne ṭhapesahaṁ
maṇḍapaṁ sukataṁ katvā padumapupphehi chādayi 1 .
1 Ma. Yu. chādayiṁ.
Maṇḍapaṁ chādayitvāna sayambhuṁ abhivādayiṁ
dhanuṁ tattheva nikkhippa pabbajiṁ anagāriyaṁ.
Na ciraṁ pabbajitassa byādhi me upapajjatha
pubbakammaṁ saritvāna tattha kālaṁ kato ahaṁ.
Pubbakammena saṁyutto tusitaṁ agamāsahaṁ
tattha soṇṇamayaṁ byamhaṁ nibbattati yathicchakaṁ.
Sahassayuttaṁ hayavāhiṁ dibbayānamadhiṭṭhito
ārohitvāna taṁ yānaṁ gacchāmahaṁ yathicchakaṁ.
Tato me nīyamānassa devabhūtassa me sato
samantā yojanasataṁ maṇḍapo me dharīyati.
Sayane so 1 tuvaṭṭāmi acchanne pupphasanthate
antalikkhā ca padumā vassante niccakālikaṁ.
Marīcike phandamāne tappamāne ca ātape
na maṁ tapati 2 ātappo maṇḍapassa idaṁ phalaṁ.
Duggatiṁ samatikkanto apāyā pihitā mama
maṇḍape rukkhamūle vā santāpo me na vijjati.
Mahisaññaṁ adhiṭṭhāya loṇatoyaṁ tarāmahaṁ
tassa me sukataṁ kammaṁ buddhapūjāyidaṁ phalaṁ.
Abbhamhi 3 pathaṁ katvāna gacchāmi anilañjase
aho me sukataṁ kammaṁ buddhapūjāyidaṁ phalaṁ.
1 Ma. haṁ. 2 Ma. tāpeti. 3 Ma. Yu. apathampi.
Pubbenivāsaṁ jānāmi dibbacakkhuṁ visodhitaṁ
āsavā me parikkhīṇā buddhapūjāyidaṁ phalaṁ.
Jahitā purimā jāti buddhassa oraso ahaṁ
dāyādomhi ca saddhamme buddhapūjāyidaṁ phalaṁ.
Ārādhitomhi sugataṁ gotamaṁ sakyapuṅgavaṁ
dhammadharo 1 dhammadāyādo buddhapūjāyidaṁ phalaṁ.
Upaṭṭhitvāna sambuddhaṁ gotamaṁ sakyapuṅgavaṁ
pāraṁ gamaniyaṁ maggaṁ apucchiṁ lokanāyakaṁ.
Ajjhiṭṭho kathayi buddho gambhīraṁ nipuṇaṁ padaṁ
tassāhaṁ dhammaṁ sutvāna pattomhi āsavakkhayaṁ.
Aho me sukataṁ kammaṁ parimuttomhi jātiyā
sabbāsavaparikkhīṇo natthi dāni punabbhavo.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā nandako thero imā gāthāyo
abhāsitthāti.
Nandakattherassa apadānaṁ samattaṁ.
1 Ma. Yu. dhammaddhajo.
Sattamaṁ hemakattherāpadānaṁ (407)

[409] Pabbhārakūṭaṁ nissāya anomo nāma tāpaso
assamaṁ sukataṁ katvā paṇṇasāle vasiṁ tadā.
Siddhaṁ tassa tapokammaṁ siddhipatto sake bale
sakaṁsāmaññavikkanto ātāpī nipako muni.
Visārado sasamaye paravāde ca kovido
paṭṭho bhūmantalikkhasmiṁ uppādamhi ca kovido.
Vītasoko nirārambho appāhāro alolupo
lābhālābhena santuṭṭho jhāyī jhānarato muni.
Piyadassī nāma sambuddho aggo kāruṇiko muni
satte tāretukāmo so karuṇāya phari tadā.
Bodhaneyyaṁ janaṁ disvā piyadassī mahāmuni
cakkavāḷasahassamhi gantvā ovādako 1 muni.
Mamuddharitukāmo so mamassamamupāgami
na diṭṭho me jino pubbe na sutopi ca kassaci.
Uppādā 2 supinā mayhaṁ lakkhaṇā suppakāsitā
paṭṭho bhūmantalikkhasmiṁ nakkhattapadakovido.
Sohaṁ buddhassa sutvāna tattha cittaṁ pasādayiṁ
tiṭṭhanto 3 vā nisinno vā sarāmi niccakālikaṁ.
1 Ma. Yu. ovadate. 2 Ma. uppātā. 3 Yu. bhuñjanto.
Mama evaṁ sarantassa 1 bhagavāpi anussari
buddhaṁ anussarantassa pīti me hoti tāvade.
Kālañca punarāgamma maṁ upesi mahāmuni
sampattepi 2 na jānāmi ayaṁ buddho mahāmuni.
Anukampako kāruṇiko piyadassī mahāmuni
sañjānāpesi attānaṁ ahaṁ buddho sadevake.
Sañjānitvāna sambuddhaṁ piyadassiṁ mahāmuniṁ
sakaṁ cittaṁ pasādetvā idaṁ vacanamabraviṁ.
Sabbe 3 pīṭhe ca pallaṅke āsandīsu nisīdare
tuvaṁpi sabbadayāvī 4 nisīda rucirāsane 5 .
Sabbaratanamayaṁ pīṭhaṁ nimminitvāna tāvade
piyadassissa munino āsanaṁ iddhinimmitaṁ.
Rataneva 6 nisinnassa pīṭhake iddhinimmite
kumbhamattaṁ jambuphalaṁ adāsiṁ tāvade ahaṁ.
Mama hāsaṁ janetvāna paribhuñji mahāmuni
tadā cittaṁ pasādetvā satthāraṁ abhivādayiṁ.
Piyadassī tu bhagavā lokajeṭṭho narāsabho
ratanāsanamāsinno imā gāthā abhāsatha.
Yo me ratanamayaṁ pīṭhaṁ amatañca phalaṁ adā
tamahaṁ kittayissāmi suṇātha mama bhāsato.
1 Ma. Yu. sarantamhi. 2 Yu. sampattopi. 3 Ma. Yu. aññe. 4 Ma. tuvampi
sabbadassāvī. Yu. tuvaṁsi .... 5 Ma. Yu. ratanāsane. 6 Ma. Yu. ratane ca.
Sattasattati kappāni devaloke ramissati
pañcasattatikkhattuñca cakkavatti bhavissati.
Dvattiṁsakkhattuṁ devindo devarajjaṁ karissati
padesarajjaṁ vipulaṁ gaṇanāto asaṅkhayaṁ.
Sovaṇṇamayaṁ rucimayaṁ 1 pallaṅkaṁ sukataṁ bahuṁ
lohitaṅkamayañceva lacchati ratanāmayaṁ.
Caṅkamantaṁpi manuññaṁ 2 puññakammasamaṅginaṁ
pallaṅkāni anekāni parivārissare sadā.
Kūṭāgārā ca pāsādā sayanañca mahārahaṁ
imassa cittamaññāya nibbattissanti tāvade.
Saṭṭhī nāgasahassāni sabbālaṅkārabhūsitā
suvaṇṇakacchā mātaṅgā hemakappanivāsasā 3
āruḷhā gāmaṇīyebhi tomaraṁkusapāṇibhi
tepimaṁ paricarissanti ratanapīṭhassidaṁ phalaṁ.
Saṭṭhī assasahassāni sabbālaṅkārabhūsitā
ājāniyā ca jātiyā sindhavā sīghabāhanā.
Āruḷhā gāmaṇīyebhi cāpahatthehi cammibhi 4
tepimaṁ paricarissanti ratanapīṭhassidaṁ phalaṁ.
Saṭṭhī rathasahassāni sabbālaṅkārabhūsitā
dīpā athopi veyyagghā sannaddhā ussitaddhajā.
1 Ma. Yu. rūpimayaṁ. 2 Ma. Yu. manujaṁ. 3 Ma. Yu. hemakappanavāsasā. 4 Ma. illiyā
cāpadhāribhi. Yu. cāpahatthehi vammibhi.
Āruḷhā gāmaṇīyebhi cāpahatthehi cammibhi 1
parivāressantimaṁ niccaṁ ratanapīṭhassidaṁ phalaṁ.
Saṭṭhī dhenusahassāni gāvī supuṅgavūsabhā 2
vacchake janayissanti ratanapīṭhassidaṁ phalaṁ.
Soḷasitthīsahassāni sabbālaṅkārabhūsitā
vicittavatthābharaṇā āmuttamaṇikuṇḍalā.
Āḷāramukhā 3 hasulā susaññā tanumajjhimā
parivāressantimaṁ niccaṁ ratanapīṭhassidaṁ phalaṁ.
Aṭṭhārase kappasate gotamo nāma cakkhumā
tamandhakāraṁ vidhaṁsetvā 4 buddho loke bhavissati.
Tassa dassanamāgamma pabbajissatikiñcano
tosayitvāna satthāraṁ sāsanebhiramissati.
Tassa dhammaṁ suṇitvāna kilese jhāpayissati 5
sabbāsave pariññāya nibbāyissatināsavo.
Viriyaṁ me dhuradhorayhaṁ yogakkhemādhivāhanaṁ
uttamatthaṁ paṭṭhayāno sāsane viharāmahaṁ.
Idaṁ pacchimakaṁ mayhaṁ carimo vattate bhavo
sabbāsavaparikkhīṇo 6 natthi dāni punabbhavo.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
1 Ma. Yu. vammibhi. 2 Ma. dohaññā puṅgavūsabhe. Yu. rohaññā puṅgavūsabhā.
3 Ma. Yu. āḷārapamhā. 4 Ma. Yu. vidhametvā. 5 Ma. ghātayissati.
6 Ma. sabbāsavā parikkhīṇā.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā hemako thero imā gāthāyo
abhāsitthāti.
Hemakattherassa apadānaṁ samattaṁ.
Aṭṭhārasamaṁ bhāṇavāraṁ.
Aṭṭhamaṁ todeyyattherāpadānaṁ (408)

[410] Rājā vijitajayo 1 nāma ketumatipuruttame
sūro vikkamasampanno puramajjhāvasī tadā.
Tassa rañño pamattassa raṭṭhavisā 2 samuṭṭhahuṁ
uttarā 3 tuṇḍikā ceva raṭṭhaṁ viddhaṁsayuṁ tadā.
Paccante kuppite khippaṁ sannipātesirindamo
bhaṭe ceva balatthe ca ariṁ niggāhayi tadā.
Hatthārohā anīkatthā sūrā ca vammayodhino 4
dhanuggahā ca rathikā 5 sabbe sannipatuṁ tadā.
Āḷārakā kappakā ca nhāpakā mālakārakā
sūrā vijitasaṅgāmā sabbe sannipatuṁ tadā.
1 Ma. ajitañjayo. Yu. jitañjayo. 2 Ma. Yu. aṭaviyo. 3 Ma. otārā. Yu. ocarā.
4 Ma. Yu. cammayodhino. 5 Ma. Yu. uggā ca.
Khaggahatthā ca purisā cāpahatthā ca cammino 1
luddhā vijitasaṅgāmā sabbe sannipatuṁ tadā.
Tidhappabhinnā mātaṅgā kuñjarā saṭṭhihāyanā
suvaṇṇakacchālaṅkārā sabbe sannipatuṁ tadā.
Khamā sītassa uṇhassa ukkāruharaṇassa ca
yodhājīvā katakammā sabbe sannipatuṁ tadā.
Saṅkhasaddaṁ bherisaddaṁ atho uddaṭasaddakaṁ 2
etehi te hāsayantā sabbe sannipatuṁ tadā.
Tisūlakontimantehi dhanūhi tomarehi ca 3
koṭṭayantā 4 nivattentā sabbe sannipatuṁ tadā.
Kavacāni nivāsetvā 5 sarājā ajitañjino
saṭṭhipāṇasahassāni sūle uttāsayiṁ tadā.
Saddaṁ mānusakākaṁsu aho rājā adhammiko
niraye paccamānassa kadā anto bhavissati.
Sayanehaṁ tuvaṭṭento passāmi 6 niraye tadā
na supāmi divārattiṁ sūlena tajjayanti maṁ.
Kiṁ pamādena rajjena bāhanena balena ca
na te pahonti dhāretuṁ tāsayanti 7 mamaṁ sadā.
Kiṁ me puttehi dārehi rajjena sakalena ca
yannūna pabbajeyyāhaṁ gatimaggaṁ visodhaye.
1 Ma. Yu. vammino. 2 Ma. utujasaddakaṁ. Yu. uddhavasaddakaṁ. 3 Ma. Yu.
kavacatomarehi ca. 4 Ma. Yu. koṭṭantānaṁ nipātentā. yu .. nivattantā.
5 Ma. kimevāti nisāmetvā sarājā ajitañjayo. 6 Yu. vasāmi. 7 Ma. tāpayanti.
Saṭṭhināgasahassāni sabbālaṅkārabhūsite
suvaṇṇakacche mātaṅge hemakappanivāsase.
Āruḷhe gāmaṇīyebhi tomaraṅkusapāṇibhi
saṅgāmāvacare ṭhāne 1 anapekkho vihāyahaṁ.
Sakakammena santatto nikkhamiṁ anagāriyaṁ
saṭṭhiassasahassāni sabbālaṅkārabhūsite.
Ājāniye ca 2 jātiyā sindhavā 3 sīghabāhane
āruḷhe gāmaṇīyebhi cāpahatthehi cammibhi.
Chaḍḍayitvāna sabbete 4 nikkhamiṁ anagāriyaṁ
saṭṭhirathasahassāni sabbālaṅkārabhūsite.
Dīpe athopi veyyagghe sannaddhe ussitaddhaje
sabbete parivajjetvā 5 pabbajiṁ anagāriyaṁ.
Saṭṭhidhenusahassāni sabbā kaṁsupadhāraṇā
gāviyo 6 chaḍḍayitvāna pabbajiṁ anagāriyaṁ.
Saṭṭhiitthīsahassāni sabbālaṅkārabhūsitā
vicittavatthābharaṇā āmuttamaṇikuṇḍalā.
Āḷāramukhā hasulā susaññā tanumajjhimā
tā hitvā kandamānāyo pabbajiṁ anagāriyaṁ.
Saṭṭhigāmasahassāni paripuṇṇāni sabbaso
chaḍḍayitvāna taṁ rajjaṁ pabbajiṁ anagāriyaṁ.
1 Yu. saṅgāmāvacareheva. 2 Ma. Yu. va. 3 Ma. Yu. sindhave sīghavāhane.
4 Ma. pahāretvāna te sabbe. Yu. pahāyitvāna .... 5 Ma. parihāretvā.
Yu. parihāyitvā. 6 Ma. Yu. tāyopi.
Nagarā nikkhamitvāna himavantaṁ upāgamiṁ
bhāgīrasīnadītīre assamaṁ māpayiṁ ahaṁ.
Paṇṇasālaṁ karitvāna agyāgāraṁ akāsahaṁ.
Āraddhaviriyo pahitatto vasāmi assame ahaṁ
maṇḍape rukkhamūle vā suññāgāre va jhāyato
na tu 1 vijjati tāso me na passe bhayabheravaṁ.
Sumedho nāma sambuddho aggo kāruṇiko muni
ñāṇālokena jotento loke uppajji tāvade.
Mama assamasāmantā yakkho āsi mahiddhiko
buddhaseṭṭhamhi uppanne ārocesi mamaṁ tadā.
Buddho loke samuppanno sumedho nāma cakkhumā
tāresi janataṁ sabbaṁ tampi so tārayissati.
Yakkhassa vacanaṁ sutvā saṁviggo āsi tāvade
buddho buddhoti cintento assamaṁ paṭisāmayiṁ.
Aggidāruñca chaḍḍetvā saṁsāmetvāna santhataṁ
assamaṁ abhivanditvā nikkhamiṁ pavanā 2 ahaṁ.
Tato candanamādāya gāmā gāmaṁ purā puraṁ
devadevaṁ gavesanto upagañchiṁ vināyakaṁ.
Bhagavā tamhi samaye sumedho lokanāyako
catusaccaṁ pakāsento bodheti janataṁ bahuṁ 3 .
1 Yu. na upapajjatha. 2 Ma. vipinā. 3 Yu. tadā.
Añjaliṁ paggahetvāna sīse katvāna vandanaṁ 1
sambuddhaṁ abhivādetvā imā gāthā abhāsatha 2 .
Vassike pupphamānasmiṁ santike upavāyati
tvaṁ vīra guṇagandhena disā sabbā pavāyasi.
Campake nāgamalike 3 adhimuttakaketake
sālesu pupphamānesu anuvātaṁ pavāyati.
Tava gandhaṁ ghāyitvāna 4 himavantā idhāgamiṁ
pūjemi taṁ mahāvīra lokajeṭṭha mahāyasa.
Varacandanenānulimpiṁ sumedhaṁ lokanāyakaṁ
sakaṁ cittaṁ pasādetvā tuṇhī aṭṭhāsi tāvade.
Sumedho nāma bhagavā lokajeṭṭho narāsabho
bhikkhusaṅghe nisīditvā imā gāthā abhāsatha.
Yo me guṇaṁ 5 pakittesi candanañca apūjayi
tamahaṁ kittayissāmi suṇātha mama bhāsato.
Ādeyyavākyavacano brahmā uju patāpavā
pañcavīsatikappāni sappabhāso bhavissati.
Chabbīsatikappasate devaloke ramissati
sahassakkhattuṁ rājā ca cakkavatti bhavissati.
Tettiṁsakkhattuṁ devindo devarajjaṁ karissati
padesarajjaṁ vipulaṁ gaṇanāto asaṅkhayaṁ.
1 Ma. Yu. candanaṁ. 2 Ma. abhāsahaṁ. 3 Ma. Yu. nāgavanike.
4 Ma. Yu. suṇitvāna. 5 Ma. Yu. guṇe.
Tato cutoyaṁ manujo manussattaṁ gamissati
puññakammena saṁyutto brahmabandhu bhavissati.
Ajjhāyako mantadharo tiṇṇaṁ vedāna pāragū
tīṇilakkhaṇasampanno bāvarī nāma brāhmaṇo.
Tassa sisso bhavitvāna hessati mantapāragū
upagantvāna sambuddhaṁ gotamaṁ sakyapuṅgavaṁ.
Pucchitvā nipuṇe pañhe hāsayitvāna 1 mānasaṁ
sabbāsave pariññāya viharāmi 2 anāsavo.
Tividhaggi nibbutā mayhaṁ bhavā sabbe samūhatā
sabbāsave pariññāya viharāmi anāsavo.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā todeyyo thero imā gāthāyo
abhāsitthāti.
Todeyyattherassa apadānaṁ samattaṁ.
1 Ma. Yu. bhāvayitvāna añjasaṁ. 2 Ma. viharissatināsavo.
Navamaṁ jatukaṇṇikattherāpadānaṁ (409)

[411] Nagare haṁsavatiyā seṭṭhiputto ahosahaṁ
samappito kāmaguṇehi 1 parivāremahaṁ tadā.
Tato pāsādamāruyha mahābhoge valañjako
tattha naccehi gītehi parivāremahaṁ tadā.
Turiyā āhatā mayhaṁ sammatālasamāhitā
rañjantī 2 itthiyo sabbā harantiyeva me mano.
Celāvakā vāmanikā 3 kuñjavā sīhimajjhitā 4
laṅghikā sokajjhāyī ca parivārenti maṁ sadā.
Vetāḷino kumbhathūni naṭā ca naccakā bahū
naṭakā nāṭakā ceva parivārenti maṁ sadā.
Kappakā nhāpakā sūdā mālākārā supāsakā 5
jallā mallā ca te sabbe parivārenti maṁ sadā.
Etesu kīḷamānesu sikkhite katupāsane
rattindivaṁ na jānāmi indova tidase pure 6 .
Addhikā kapaṇā 7 sabbe yācakā carakā bahū
upagacchanti te niccaṁ bhikkhayantā mamaṁ gharaṁ.
Samaṇā brāhmaṇā ceva puññakkhettā anuttarā
vaḍḍhayantā mamaṁ puññaṁ āgacchanti mamaṁ gharaṁ.
Paṭakā 8 laṭukā sabbe niganthā pupphasāṭakā
1 Ma. Yu. kāmaguṇe. 2 Ma. Yu. naccantā. 3 Ma. celāpikā lāmaṇikā. Yu.
velāmikā vāmanikā. 4 Ma. kuñjavāsī timajjhikā. 5 Yu. sumāsakā.
6 Ma. Yu. tidasaṅgaṇe. 7 Ma. Yu. pathikā. 8 Ma. paṭagā. Yu. padakā.
Tedaṇḍikā ekasikhā āgacchanti mamaṁ gharaṁ.
Ājīvikā viluttāvī gotamā 1 devadhammikā
rajojalladharā ete āgacchanti mamaṁ gharaṁ.
Parivattakā siddhipattā 2 kodhapugganikā 3 bahū
tapasī vanacārī ca āgacchanti mamaṁ gharaṁ.
Andhakā 4 damilā ceva sākuḷā malayāḷakā 5
savarā yonakā ceva āgacchanti mamaṁ gharaṁ.
Gandhakā 6 muṇḍakā sabbe kuṭṭhalā sānuvindakā 7
ārāva cīnaraṭṭhā ca āgacchanti mamaṁ gharaṁ.
Alasandakā pallavakā pabbatānaggamāruhā 8
bāhikā 9 cetaputtā ca āgacchanti mamaṁ gharaṁ.
Madhurakā kosalakā kāsikā 10 hatthiporikā
isindā makkalā 11 ceva āgacchanti mamaṁ gharaṁ.
Celāvakā ārambā ca 12 obhāsā meghalā bahū
khuddakā suddakā ceva āgacchanti mamaṁ gharaṁ.
Rohakā 13 sindhavā ceva cittakā 14 ekakaṇṇikā
suraṭṭhā aparantā ca āgacchanti mamaṁ gharaṁ.
Suppārakā kumārā 15 ca malayā 16 soṇṇabhūmikā
vajjihārā 17 ca te sabbe āgacchanti mamaṁ gharaṁ.
1 Ma. godhammā. 2 Ma. parittakā santipattā. 3 Yu. koṇḍapuggalikā bahū.
4 Ma. Yu. oḍḍakā. 5 Ma. malavāḷakā. 6 Ma. Yu. andhakā. 7 Ma. koṭalā
hanuvindakā. Yu. kolakā .... 8 Ma. dhammarāniggamānusā. Yu. pabbarābhaggakārusā.
9 Ma. gehitā. 10 Ma. kaliṅgā. 11 Yu. matthalā. 12 Ma. ārabbhā ca oghuṭaṭhā. Yu.
velāvakā arammā okkalā mekalā. 13 Ma. Yu. rohanā. 14 Yu. cittāva.
15 Yu. suppārikā kikumārā ca. 16 Ma. mallasovaṇṇabhūmikā. 17 Ma. vajjītaṅgā.
Naḷakārā pesakārā cammakārā ca tacchakā
kammakārā 1 kumbhakārā āgacchanti mamaṁ gharaṁ.
Maṇikārā lohakārā soṇṇakārā ca dussikā
tipukārā ca te sabbe āgacchanti mamaṁ gharaṁ.
Usukārā 2 bhamakārā pesakārā ca gandhikā
rajakā tunnavāyā ca āgacchanti mamaṁ gharaṁ.
Telikā kaṭṭhahārā ca udahārā ca pesikā
supikā saradakkhā ca 3 āgacchanti mamaṁ gharaṁ.
Dovārikā anīkatthā ganthikā 4 pupphachaḍḍakā
hatthārohā hatthipālā āgacchanti mamaṁ gharaṁ.
Ānandassa nāma rañño samaggassa 5 adāsahaṁ
sattavaṇṇena ratanena ūnattaṁ pūrayāmahaṁ.
Ye mayā kittitā sabbe nānāvaṇṇā bahū janā
tesāhaṁ cittamaññāya tappayiṁ ratanenapi 6 .
Vaggūsu bhāsamānesu vajjamānāsu bherisu
saṅkhesu dhamayantesu sakagehe ramāmahaṁ.
Bhagavā tamhi samaye padumuttaranāmako 7
saha 8 satasahassehi parikkhīṇāsavehi so.
Bhikkhūhi sahito vīthiṁ paṭipajjittha cakkhumā
obhāsento disā sabbā dīparukkhova jotati.
1 Ma. Yu. kammārā. 2 Yu. cāpakārā. 3 Ma. sūpikā sūparakkhā ca. Yu. ...
rūdasakkā ca. 4 Ma. bandhikā. Yu. santhikā. 5 Ma. mamattassa .... Yu.
pamattassa. 6 Ma. Yu. ratanenahaṁ. 7 Ma. Yu. ... nāyako. 8 Ma. vasī.
Vajjanti bheriyo sabbā gacchante lokanāyake
pabhā niddhāvate tassa sataraṁsīva uggato.
Kavāṭantarikāyāpi paviṭṭhena ca rasminā
antogharesu vipulo āloko āsi tāvade.
Pabhaṁ disvāna buddhassa pārisajje avocahaṁ
nissaṁsayaṁ buddhaseṭṭho imaṁ vīthimupāgato.
Khippaṁ oruyha pāsādā agamiṁ antarāpathaṁ 1
sambuddhaṁ abhivādento 2 idaṁ vacanamabraviṁ.
Anukampatu me buddho jalajuttamanāmako 3
vasīsatasahassehi adhivāsesi so muni.
Nimantayitvāna sambuddhaṁ abhinesiṁ sakaṁ gharaṁ
tattha annena pānena santappesiṁ mahāmuniṁ.
Bhuttāvīkālamaññāya buddhaseṭṭhassa tādino
saṅgītena 4 turiyena buddhaseṭṭhaṁ upaṭṭhahiṁ.
Padumuttaro lokavidū āhutīnaṁ paṭiggaho
antoghare nisīditvā imā gāthā abhāsatha.
Yo maṁ turiyenupaṭṭhāsi annapānañcadāsi me
tamahaṁ kittayissāmi suṇātha mama bhāsato.
Pahūtabhakkho hutvāna sahirañño sabhojano
catuddīpe ekarajjaṁ kārayissatiyaṁ naro.
1 Ma. Yu. antarāpaṇaṁ. 2 Ma. abhivādetvā. 3 Ma. Yu. ... nāyako.
4 Ma. Yu. sataṅgikena.
Pañcasīle samādāya dasakammapathe rato 1
samādāya pavattanto parisaṁ sikkhapessati.
Turiyasatasahassāni nāriyo 2 samalaṅkatā
vajjayissantimaṁ niccaṁ upaṭṭhānassidaṁ phalaṁ.
Tiṁsakappasahassāni devaloke ramissati
catusaṭṭhikhattuṁ devindo devarajjaṁ karissati.
Catusattatikkhattuṁ 3 ca cakkavatti bhavissati
padesarajjaṁ vipulaṁ gaṇanāto asaṅkhayaṁ.
Kappasatasahassamhi okkākakulasambhavo
gotamo nāma nāmena satthā loke bhavissati.
Upapajjati yaṁ yoniṁ devattaṁ atha mānusaṁ
anūnabhogo hutvāna manussattaṁ gamissati.
Ajjhāyako bhavitvāna tiṇṇaṁ vedāna pāragū
uttamatthaṁ gavesanto carissati mahiṁ tadā 4 .
So ca pacchā pabbajitvā sukkamūlena codito
gotamassa bhagavato sāsanebhiramissati.
Ārādhayitvāna sambuddhaṁ gotamaṁ sakyapuṅgavaṁ
kilese jhāpayitvāna arahāyaṁ bhavissati.
Pavane byaggharājāva migarājāva kesarī
abhīto viharāmajja sakyaputtassa sāsane.
1 Ma. Yu. tato. 2 Ma. bheriyo. 3 Ma. catusaṭṭhikkhattuṁ. 4 Ma. Yu. imaṁ.
Devaloke manusse vā dalidde duggatimhi vā
nibbattiṁ me na passāmi upaṭṭhānassidaṁ phalaṁ.
Vivekamanuyuttomhi upasanto nirūpadhi
nāgova bandhanaṁ chetvā viharāmi anāsavo.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā jatukaṇṇiko thero imā gāthāyo
abhāsitthāti.
Jatukaṇṇikattherassa apadānaṁ samattaṁ.
Dasamaṁ udenattherāpadānaṁ (410)

[412] Himavantassa avidūre padumo nāma pabbato
assamo sukato mayhaṁ paṇṇasālā sumāpitā.
Nadiyo sandare 1 tattha supatitthā manoramā
acchodakā sītajalā sandare 2 nadiyo sadā.
1-2 Yu. sundarī.
Pāṭhīnā pāvusā macchā valajā 1 muñjarohitā
sobhanti nadiyo ete vasanti nadiyā tadā.
Ambajambūhi sañchannā kareritilakā tathā
uddālakā pāṭaliyo sobhanti mama assamaṁ.
Aṅkolakā 2 bimbijālā māyāharā 3 ca pupphitā
gandhena upavāyantā 4 sobhanti mama assamaṁ.
Adhimuttā sattalikā nāgā sālā ca pupphitā
dibbā gandhā 5 sampavantā sobhanti mama assamaṁ.
Kosumbhā salaḷā nīpā hatthapātā 6 ca pupphitā
dibbā gandhā sampavantā sobhanti mama assamaṁ.
Harītakā āmalakā ambā jambū vibhedakā
kolā bhallātakā bellā phalāni bahu assame.
Kalambā kadalī tattha pupphanti mama assame
dibbā gandhā sampavantā sobhanti mama assamaṁ.
Asokapiṇḍī ca varī 7 nimbarukkhā 8 ca pupphitā
dibbā gandhā sampavantā sobhanti mama assamaṁ.
Puṇṇāvā giripuṇṇāvā 9 timirā tattha pupphitā
dibbā gandhā sampavantā sobhanti mama assamaṁ.
Nigguṇḍī sirinigguṇḍī camparukkhettha pupphitā
dibbā gandhā sampavantā sobhanti mama assamaṁ.
1 Yu. jalajā. 2 Yu. ākolakā. 3 Ma. māyākārī. Yu. māyācārā.
4-5 Yu. dibbagandhasamāpannā. ito paraṁ īdisameva. 6 Ma. aṭṭhaṅgāpi. Yu. kaṭṭhaṅgā ca supupphitā. 7 Ma. asokāpiṇḍivārī ca. 8 Yu. nīparukkhā.
9 Ma. Yu. punnāgā giripunnāgā.
Avidūre pokkharaṇī cakkavākupakujjitā
mandālakehi sañchannā padumuppalakehi ca.
Acchodakā sītajalā supatitthā manoramā
acchā phalikasamānā sobhanti mama assamaṁ.
Padumā pupphare tattha puṇḍarīkā ca uppalā
mandālakehi sañchannā sobhanti mama assamaṁ.
Pāṭhīnā pāvusā macchā balajā muñjarohitā
vicarantāva te tattha sobhanti mama assamaṁ.
Kumbhīlā suṁsumārā ca kacchapā ca gahā bahū
ogahā 1 ajagarā ca sobhanti mama assamaṁ.
Pārevatā ravihaṁsā cakkavākā nadīcarā
dindibhā 2 sālikā ceva sobhanti mama assamaṁ.
Nayitā ambagandhī ca ketakā tattha pupphitā
dibbā gandhā sampavantā sobhanti mama assamaṁ.
Sīhā byagghā ca dīpī ca acchakokataracchayo
anusañcarantā pavane sobhanti mama assamaṁ.
Jaṭābhārena bharitā ajinuttaravāsino
anusañcarantā pavane sobhanti mama assamaṁ.
Ajināni dharā eke 3 nipakā santavuttino
appāhārā ca te sabbe sobhanti mama assamaṁ.
1 Yu. oguhā. 2 Ma. candibhā. 3 Ma. Yu. ete.
Khārikājaṁ 1 gahetvāna ajjhogayha vanaṁ tadā
mūlaphalāni bhuñjantā vasanti assame tadā.
Na te dāruṁ āharanti udakaṁ pādadhovanaṁ
sabbesaṁ ānubhāvena sayamevāharīyati.
Cullāsītisahassāni isayo tattha samāgatā
sabbeva jhāyino ete uttamatthaṁ gavesino.
Tapassino brahmacārī codento appanāva te
ambarāvacarā sabbe vasanti assame tadā.
Pañcāhaṁ sannipatanti ekaggā santavuttino
aññamaññaṁ 2 abhivādetvā pakkamanti disāmukhā.
Padumuttaro nāma jino sabbadhammāna pāragū
tamandhakāraṁ vidhamaṁ uppajji tāvade jino.
Mama assamasāmantā yakkho āsi mahiddhiko
so me saṁsittha sambuddhaṁ jalajuttamanāmakaṁ 3 .
Esa buddho samuppanno padumuttaro mahāmuni
khippaṁ gantvāna sambuddhaṁ payirupāsassu 4 mārisa 5 .
Yakkhassa vacanaṁ sutvā vippasannena cetasā
assamaṁ saṁsāmetvāna nikkhamiṁ pavanā tadā.
Celeva ḍayhamānamhi nikkhamitvāna assamā
ekarattiṁ nivāsitvā upagañchiṁ vināyakaṁ.
1 Ma. Yu. khāribhāraṁ. 2 Ma. Yu. aññoññaṁ. 3 Ma. Yu. ... nāyakaṁ.
4 Ma. payirupāsa. 5 Yu. payirupāsassu taṁ muni.
Padumuttaro lokavidū āhutīnaṁ paṭiggaho
catusaccaṁ pakāsento desesi amataṁ padaṁ.
Suphullaṁ padumaṁ gayha upagantvā mahesino
pasannacitto sumano buddhassa abhivādayiṁ 1 .
Pūjayitvāna sambuddhaṁ jalajuttamanāyakaṁ
ekaṁsaṁ ajinaṁ katvā santhaviṁ lokanāyakaṁ.
Yena ñāṇena sambuddho vasatīha anāsavo
taṁ ñāṇaṁ kittayissāmi suṇātha mama bhāsato.
Saṁsārasotaṁ chinditvā tāresi sabbapāṇinaṁ
tava dhammaṁ suṇitvāna taṇhāsotaṁ taranti te.
Tuvaṁ satthā ca ketuva 2 dhajo yūpova 3 pāṇinaṁ
parāyano patiṭṭhāsi dīpo ca dipaduttamo 4 .
Yāvatā gaṇino loke satthavāhā pavuccare
tuvaṁ aggosi sappañño tava antogadhāva te.
Tava ñāṇena sappañño 5 tāresi janataṁ bahuṁ
tava dassanamāgamma dukkhassantaṁ karissare.
Yekecime gandhajātā loke vāyanti cakkhuma
tava gandhasamo natthi puññakkhette mahāmuni.
Tiracchānayoniṁ nirayaṁ parimocehi 6 cakkhumā
asaṅkhataṁ padaṁ santaṁ desesi tvaṁ mahāmuni.
1 Ma. Yu. abhiropayiṁ. 2-3 Ma. Yu. ca. 4 Ma. Yu. dipaduttama.
5 Ma. tuvaṁ aggosi sabbaññū. Yu. tuvaṁ aggosi sappañño. 6 Ma. Yu. parimocesi.
Padumuttaro lokavidū āhutīnaṁ paṭiggaho
bhikkhusaṅghe nisīditvā imā gāthā abhāsatha.
Yo me ñāṇaṁ apūjesi pasanno sehi pāṇihi
tamahaṁ kittayissāmi suṇātha mama bhāsato.
Tiṁsa kappasahassāni devaloke ramissati
sahassakkhattuṁ rājā ca cakkavatti bhavissati.
Suladdhalābho 1 laddhomhi tosayitvāna subbataṁ
sabbāsave pariññāya viharāmi anāsavo.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā udeno thero imā gāthāyo
abhāsitthāti.
Udenattherassa apadānaṁ samattaṁ.
Uddānaṁ
metteyyo puṇṇako thero mettagū dhotakopica
1 Ma. Yu. suladdhalābhaṁ.
Upasīvo ca nando ca hemako sattamo tahiṁ.
Todeyyo jatukaṇṇī ca udeno ca mahāyaso
tīṇi gāthāsatānettha asīti tīṇi cuttariṁ.
Metteyyavaggo ekacattāḷīsamo.

Suttantapiṭake khuddakanikāyassa
apadānaṁ
--------------
namo tassa bhagavato arahato sammāsambuddhassa.
Dvācattāḷīsamo bhaddālivaggo
paṭhamaṁ bhaddālittherāpadānaṁ (411)