[384] Nagare bandhumatiyā āsiṁ ārāmiko tadā
addasaṁ virajaṁ buddhaṁ gacchantaṁ anilañjase.
Labujassa phalaṁ gayha buddhaseṭṭhassadāsahaṁ
ākāse ṭhitako santo paṭiggaṇhi mahāyaso.
Pītisañjananaṁ 1 mayhaṁ diṭṭhadhammasukhāvahaṁ
phalaṁ buddhassa datvāna vippasannena cetasā.
Adhigañchiṁ tadā pītiṁ vipulañca sukhuttamaṁ
uppajjateva ratanaṁ nibbattassa yahiṁ 2 tahiṁ.
Ekanavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
1 Ma. Yu. vittisañjananaṁ .... 2 Ma. tahiṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā labujadāyako thero imā gāthāyo
abhāsitthāti.
Labujadāyakattherassa apadānaṁ samattaṁ.
Tatiyaṁ udumbaraphaladāyakattherāpadānaṁ (383)

[385] Ninnagānadiyā 1 tīre vihāsi purisuttamo
addasaṁ virajaṁ buddhaṁ ekaggaṁ susamāhitaṁ.
Tasmiṁ pasannamānaso kilesamaladhovane
udumbaraphalaṁ gayha buddhaseṭṭhassadāsahaṁ.
Ekanavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. Yu. vinatānadiyā.
Itthaṁ sudaṁ āyasmā udumbaraphaladāyako thero imā gāthāyo
abhāsitthāti.
Udumbaraphaladāyakattherassa apadānaṁ samattaṁ.
Catutthaṁ milakkhuphaladāyakattherāpadānaṁ (384)

[386] Vanantare buddhaṁ disvā atthadassiṁ mahāyasaṁ
pasannacitto sumano milakkhussa 1 phalaṁ adaṁ.
Aṭṭhārase kappasate yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā milakkhuphaladāyako thero imā gāthāyo
abhāsitthāti.
Milakkhuphaladāyakattherassa apadānaṁ samattaṁ.
1 Ma. Yu. pilakkhassādadiṁ phalaṁ.
Pañcamaṁ phārusaphaladāyakattherāpadānaṁ (385)

[387] Suvaṇṇavaṇṇaṁ sambuddhaṁ āhutīnaṁ paṭiggahaṁ
rathiyaṁ paṭipajjantaṁ phārusaphalaṁ adāsahaṁ.
Ekanavute ito kappe yaṁ phalaṁ adadaṁ ahaṁ
duggatiṁ nābhijānāmi phaladānassidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā phārusaphaladāyako thero imā gāthāyo
abhāsitthāti.
Phārusaphaladāyakattherassa apadānaṁ samattaṁ.
Chaṭṭhaṁ valliphaladāyakattherāpadānaṁ (386)

[388] Sabbe janā samāgamma āgamiṁsu vanaṁ tadā
phalamanvesamānā te alabhiṁsu phalaṁ tadā.
Tatthaddasāsiṁ sambuddhaṁ sayambhuṁ aparājitaṁ
pasannacitto sumano valliphalamadāsahaṁ.
Ekattiṁse ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā valliphaladāyako thero imā gāthāyo
abhāsitthāti.
Valliphaladāyakattherassa apadānaṁ samattaṁ.
Sattamaṁ kadaliphaladāyakattherāpadānaṁ (387)

[389] Kaṇikāraṁva jalitaṁ puṇṇamāyeva candimaṁ
jalantaṁ dīparukkhaṁva addasaṁ lokanāyakaṁ.
Kadaliyā 1 phalaṁ gayha adāsiṁ satthuno ahaṁ
pasannacitto sumano vanditvāna apakkamiṁ.
1 Ma. Yu. kadaliphalaṁ paggayha.
Ekattiṁse ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā kadaliphaladāyako thero imā gāthāyo
abhāsitthāti.
Kadaliphaladāyakattherassa apadānaṁ samattaṁ.
Aṭṭhamaṁ panasaphaladāyakattherāpadānaṁ (388)

[390] Ajjuno nāma sambuddho himavante vasī tadā
caraṇena ca sampanno samādhikusalo muni.
Kumbhamattaṁ gahetvāna panasaṁ jīvajīvakaṁ
chattapaṇṇe ṭhapetvāna adāsiṁ satthuno ahaṁ.
Ekanavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā panasaphaladāyako thero imā gāthāyo
abhāsitthāti.
Panasaphaladāyakattherassa apadānaṁ samattaṁ.
Navamaṁ soṇakoṭivisattherāpadānaṁ (389)

[391] Vipassino pāvacane ekaṁ leṇaṁ mayā kataṁ
cātuddisassa saṅghassa bandhumārājadhāniyā.
Dussehi bhūmiṁ leṇassa santharitvā pariccajiṁ
udaggacitto sumano akāsiṁ paṇidhiṁ tadā.
Ārādheyyaṁ sambuddhaṁ pabbajjañca labheyyahaṁ
anuttarañca nibbānaṁ phuseyyaṁ santimuttamaṁ.
Teneva sukkamūlena kappe navuti saṁsariṁ
devabhūto manusso ca katapuñño virocahaṁ.
Tato kammāvasesena idha pacchimake bhave
campāyaṁ aggaseṭṭhissa jātomhi ekaputtako.
Jātamattassa me sutvā pituchando ayaṁ ahu
dadāmahaṁ kumārassa vīsakoṭī anūnakā.
Caturaṅgulā ca me lomā jātā pādatale ubho
sukhumā mudusamphassā tulāpicusamā subhā.
Atītā navuti kappā ayaṁ eko ca uttariṁ
nābhijānāmi nikkhitte pāde bhumme 1 asanthate.
Ārādhito me sambuddho pabbajiṁ anagāriyaṁ
arahattañca me pattaṁ sītibhūtomhi nibbuto.
Aggāraddhaviriyānaṁ niddiṭṭho sabbadassinā
khīṇāsavo 2 ca arahā chaḷabhiñño mahiddhiko.
Ekanavute ito kappe yaṁ dānamadadiṁ tadā
duggatiṁ nābhijānāmi leṇadānassidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsanaṁ.
1 Ma. bhumyā. 2 Ma. khīṇāsavomhi arahā.
Thero 1 koṭiviso soṇo bhikkhusaṅghassa aggato
pañhaṁ puṭṭho viyākāsi anotattamahāsareti.
Itthaṁ sudaṁ āyasmā soṇo koṭiviso thero imā gāthāyo
abhāsitthāti.
Soṇakoṭivisattherassa apadānaṁ samattaṁ.
Dasamaṁ pubbakammapiloti nāma buddhāpadānaṁ (390)

[392] Anotattasarāsanne ramaṇīye silātale
nānāratanapajjote nānāgandhavanantare.
Mahatā bhikkhusaṅghena pareto lokanāyako
āsīno byākari tattha pubbakammāni attano.
Suṇātha bhikkhave mayhaṁ yaṁ kammaṁ pakataṁ mayā
ekaṁ araññikaṁ bhikkhuṁ disvā dinnaṁ pilotikaṁ.
Patthitaṁ paṭhamaṁ buddhaṁ buddhattāya mayā tadā
pilotiyassa kammassa buddhattepi vipaccati.
Gopālako pure āsiṁ gāviṁ pājeti gocaraṁ
pivantiṁ udakaṁ āvilaṁ gāviṁ disvā nivārayiṁ.
Tena kammavipākena idha pacchimake bhave
pipāsito yathicchakaṁ na hi pātuṁ labhāmahaṁ.
1 Yu. koṭivisoti so soṇo.
Punāli nāmahaṁ dhutto pubbe aññāsu jātisu
paccekabuddhaṁ surabhiṁ abbhācikkhiṁ adūsakaṁ.
Tena kammavipākena niraye saṁsariṁ ciraṁ
bahū vassasahassāni dukkhaṁ vedesi vedanaṁ.
Tena kammāvasesena idha pacchimake bhave
abbhakkhānaṁ mayā laddhaṁ sundarikāya kāraṇā.
Sabbābhibhussa buddhassa nando nāmāsi sāvako
taṁ abbhācikkhāya 1 niraye ciraṁ saṁsaritaṁ mayā.
Dasavassasahassāni niraye saṁsariṁ ciraṁ
manussalābhaṁ 2 laddhāhaṁ abbhakkhānaṁ bahuṁ labhiṁ.
Tena kammāvasesena ciñcamānavikā mamaṁ
abbhācikkhi abhūtena janakāyassa āgatā 3 .
Brāhmaṇo sutavā āsiṁ ahaṁ sakkatapūjito
mahāvane pañcasate mante vācemi māṇave.
Tatthāgato isībhimo 4 pañcābhiñño mahiddhiko
tañcāhaṁ āgataṁ disvā abbhācikkhiṁ adūsakaṁ.
Tatohaṁ avacaṁ sisse kāmabhogī ayaṁ isi
mayhaṁpi bhāsamānassa anumodiṁsu māṇavā.
Tato māṇavakā sabbe bhikkhamānā kule kule
mahājanassa āhaṁsu kāmabhogī ayaṁ isi.
1 Ma. yu ... abbhakkhāya .... 2 Ma. Yu. manussabhāvaṁ. 3 Ma. Yu. aggato.
4 Ma. isibhimo. Yu. isigaṇo.
Tena kammavipākena pañcabhikkhusatā ime
abbhakkhānaṁ labhuṁ sabbe sundarikāya kāraṇā.
Vemātu 1 bhātaraṁ pubbe dhanahetu haniṁ ahaṁ
pakkhipiṁ gariduggesu silāya ca apiṁsayiṁ.
Tena kammavipākena devadatto silaṁ khipi
aṅguṭṭhaṁ piṁsayi pāde mama pāsāṇasakkharā.
Purehaṁ dārako hutvā kīḷamāno mahāpathe
paccekabuddhaṁ disvāna magge sakalikaṁ dahiṁ 2 .
Tena kammavipākena idha pacchimake bhave
vadhatthaṁ maṁ devadatto atimāre payojayi.
Hatthāroho pure āsiṁ paccekamunimuttamaṁ
piṇḍāya vicarantaṁpi 3 āsādesiṁ gajenahaṁ.
Tena kammavipākena bhanto nāḷāgirī gajo
giribbaje puravare dāruṇo samupāgami.
Rājāhaṁ pattiko 4 āsiṁ sattiyā purise 5 haniṁ
tena kammavipākena niraye paccisaṁ bhusaṁ.
Kammuno tassa sesena so 6 dāni sakalaṁ mama
pāde chaviṁ pakappesi na hi kammaṁ vinassati.
Ahaṁ kevaṭṭagāmasmiṁ ahu kevaṭṭadārako
macchopaghātake 7 disvā janayiṁ somanassakaṁ.
1 Yu. dve mātā bhātaro pubbe. 2 Ma. khapiṁ. 3 Ma. Yu. vicarantaṁ taṁ.
4 Ma. Yu. patthivo. 5 Ma. Yu. purisaṁ. 6 Ma. idāni ... Yu. cādiṇṇaṁ ....
7 Ma. Yu. macchakoghātite disvā.
Tena kammavipākena sīsadukkhaṁ ahu mama
sakkesu haññamānesu yadā hani viṭaṭubho 1 .
Phussassāhaṁ pāvacane sāvake paribhāsayiṁ
yavaṁ khādatha bhuñjatha mā ca bhuñjatha sāliyo.
Tena kammavipākena temāsaṁ khāditaṁ yavaṁ
nimantito brāhmaṇena verañjāyaṁ vasiṁ tadā.
Nibbuddhe vattamānamhi mallaputtaṁ nisedhayiṁ 2
tena kammavipākena piṭṭhidukkhaṁ ahu mama.
Tikicchako ahaṁ āsiṁ seṭṭhiputtaṁ virecayiṁ
tena kammavipākena hoti pakkhandikaṁ mama.
Avacāhaṁ jotipālo sugataṁ kassapaṁ tadā
kuto nu bodhimaṇḍassa bodhi paramadullabhā.
Tena kammavipākena acariṁ dukkaraṁ bahuṁ
chabbassānuruvelāyaṁ tato bodhiṁ apāpuṇiṁ.
Nāhaṁ etena maggena pāpuṇiṁ bodhimuttamaṁ
kumaggena gavesissaṁ pubbakammena codito 3 .
Puññapāpaparikkhīṇo sabbasantāpavajjito
asoko anupāyāso nibbāyissaṁ anāsavo.
Evaṁ jino viyākāsi bhikkhusaṅghassa atthato 4
sabbābhiññābalappatto anotatte mahāsareti.
1 Po. Ma. viṭṭubho. Yu. viḍūḍabho. 2 Ma. viheṭhayiṁ. 3 Ma. vārito.
Yu. kārito. 4 Ma. Yu. aggato.
Itthaṁ sudaṁ bhagavā attano pubbacaritaṁ pubbakammapilotiṁ 1 nāma
buddhāpadānaṁ dhammapariyāyaṁ abhāsitthāti.
Pubbakammapiloti nāma buddhāpadānaṁ samattaṁ.
Uddānaṁ
ambaṭaṁ abujañceva udumbaramilakkhu ca
phāruvallī ca kadali panaso koṭivisako.
Pubbakammapiloti ca apadānaṁ mahesino
gāthāyo ekanavuti gaṇitāyo vibhāvihi.
Ambaṭaphalavaggo ekūnacattāḷīso.
Cuddasamaṁ bhāṇavāraṁ.
----------
1 Ma. Yu. kammapilotikaṁ nāma.
Cattāḷīso pilindavaggo
paṭhamaṁ pilindavacchattherāpadānaṁ (391)

[393] Nagare haṁsavatiyā āsiṁ dovāriko ahaṁ
akkhobbhaṁ 1 amitaṁ bhogaṁ ghare sannicitaṁ mama.
Rahogato nisīditvā pahaṁsitvāna mānasaṁ
nisajja pāsādavare evaṁ cintesahaṁ tadā.
Bahū meva 2 gatā bhogā phītaṁ antepuraṁ mama
rājāpi maṁ nimantesi 3 ānando paṭhavissaro.
Ayañca buddho uppanno adhiccuppattiko muni
saṁvijjanti ca me bhogā dānaṁ dassāmi satthuno.
Padumena 4 rājaputtena dinnaṁ dānavaraṁ jine
hatthināge ca pallaṅke apassenaṁ canappakaṁ.
Ahaṁpi dānaṁ dassāmi saṅghe gaṇavaruttame 5
adinnapubbaṁ dānavaraṁ 6 bhavissaṁ ādikammiko.
Cintetvāhaṁ bahuvidhaṁ yāge yassa sukhaṁ phalaṁ
parikkhāradānamaddakkhiṁ mama saṅkappapūraṇaṁ.
Parikkhārāni dassāmi saṅghe gaṇavaruttame 7
adinnapubbamaññesaṁ bhavissaṁ ādikammiko.
1 Ma. Yu. akkhobhaṁ. 2 Ma. Yu. bahūmedhigatā. 3 Ma. Yu. rājāpi sannimantesi.
4 Yu. padume. 5-7 Po. Yu. guṇavaruttame. 6 Ma. Yu. adinnapubbamaññesaṁ.
Naḷakāre upāgamma chattaṁ kāresi tāvade
chattasatasahassāni ekato sannipātayiṁ.
Dussasatahassāni ekato sannipātayiṁ
pattasatasahassāni ekato sannipātayiṁ.
Vāsiyo satthake cāpi sūciyo nakhachedane
heṭṭhā chatte ṭhapāpesiṁ kāretvā tadanucchave.
Vidhūpane tālapaṇṇe 1 morahatthe ca cāmare
parissāvane teladhāre kārayiṁ tadanucchave.
Sūcighare aṁsavaddhe athopi kāyabandhane
ādhārake ca sukate kārayiṁ tadanucchave.
Paribhogabhājane ca athopi lohathālake
bhesajje 2 pūrayitvāna heṭṭhāchatte ṭhapesahaṁ.
Vacaṁ usīraṁ laṭṭhimadhuṁ pipphalimaricāni ca
harītakiṁ siṅgiveraṁ sabbe pūresi bhājane.
Upāhanā pādukāyo atho udakapuñchane
kattaradaṇḍe sukate kārayiṁ tadanucchave.
Osathaṁ añjanāpica 3 salākā dhammakuttarā
kuñcikā pañcavaṇṇehi sibbite kuñcikāghare.
Āyoge dhūmanette ca athopi dīpadhārake
tumbake ca karaṇḍe ca kārayiṁ tadanucchave.
1 Ma. Yu. tālavaṇṭe. 2 Yu. bhesajjaṁ. 3 Ma. Yu. osadhañjananāḷī ca.
Saṇḍāse pipphale ceva athopi malahārino 1
bhesajjathavike ceva kārayiṁ tadanucchave.
Āsandiyo pīṭhake ca pallaṅke caturomaye
tadanucchave kāretvā heṭṭhāchatte ṭhapesahaṁ.
Uṇṇābhisiṁ 2 tulabhisiṁ athopi pīṭhakābhisiṁ
bibbohane ca sukate kārayiṁ tadanucchave.
Kuruvinde madhusitthe telahatthapatāpakaṁ
siveṭiphalakaṁ 4 suciṁ mañcaṁ attharaṇena ca.
Senāsane pādapuñche sayanāsanaḍaṇḍake
dantapoṇe ca kathaliṁ 5 sīsalepanagandhake 6 .
Araṇiṁ 7 phalapīṭhe ca pattapidhānathālake
udakassa kaṭacchuñca 8 cuṇṇakaṁ rajanambaṇaṁ.
Sammuñjanaṁ 9 udavatthaṁ tathā vassikasāṭakaṁ
nisīdanaṁ kaṇḍucchādiṁ atha antaravāsakaṁ.
Uttarāsaṅgasaṅghāṭiṁ natthukaṁ mukhasodhanaṁ
bilaṅgaloṇabhūtañca 10 madhuṁ ca dadhipānakaṁ.
Pupphasitthaṁ pilotiñca mukhapuñchanasuttakaṁ
dātabbaṁ nāma yaṁ atthi yañca kappati satthuno.
Sabbametaṁ samānetvā ānandaṁ upasaṅkamiṁ
upasaṅkamma rājānaṁ janetāraṁ mahāyasaṁ 11 .
1 Ma. Yu. malahārake. 2 Ma. Yu. ūṇṇābhisī ... piṭhakābhisī. 3 Ma. Yu. bimbohane.
4 Ma. Yu. sipāṭiphalake sucī. 5 Ma. āṭlī. 6 Ma. Yu. sīsālepanagandhake.
7 Ma. Yu. araṇī. 8 Ma. kaṭacchū ca. 9 Ma. sammajjanaṁ. 10 Ma. bilaṅgaloṇaṁ pahūtaṁ ca.
11 Ma. mahesino.
Sirasā abhivādetvā idaṁ vacanamabraviṁ
ekato jātisaṁvaḍḍhā ubhinnaṁ ekato yaso 1 .
Sādhāraṇā sukhe dukkhe ubho ca anuvattakā
atthi cetasikaṁ dukkhaṁ tavādheyyaṁ 2 arindama.
Yadi sakkosi taṁ dukkhaṁ vinodeyyāsi khattiya
tava dukkhaṁ mama dukkhaṁ abhinnaṁ ekato manaṁ 3 .
Niṭṭhitanti vijānāsi 4 taṁ moceyya sace tuvaṁ
jānāhi kho mahārāja dukkhaṁ me dubbinodayaṁ.
Bahuṁ samāno gajjassu etante duccajaṁ dhanaṁ 5
yāvatā vijite 6 atthi yāvatā mama jīvitaṁ.
Etehi yadi te attho dassāmi avikampito
gajjitaṁ kho tayā deva micchā taṁ bahugajjitaṁ.
Jānissāmi tuvaṁ ajja sabbadhamme patiṭṭhitaṁ
atibāḷhaṁ nipīḷesi dadamānassa me sato.
Kinte 7 sallapitenattho patthitaṁ te kathehi me
icchāmahaṁ mahārāja buddhaseṭṭhaṁ anuttaraṁ.
Bhojayissāmi sambuddhaṁ vajjaṁ me māhu jīvitaṁ
aññaṁ tehaṁ varaṁ dammi ayācito 8 tathāgato.
Adeyyo kassaci buddho maṇi jotiraso yathā
nanu te gajjitaṁ deva yāva 9 jīvitamatthikaṁ.
1 Ma. manaṁ. Yu. yasaṁ. 2 Po. vinodetuṁ. 3 Ma. mano. 4 Ma. Yu. vijānāhi.
5 Ma. varaṁ. 6 Yu. vijitaṁ. 7 Ma. kiṁ te me piḷitenattho. 8 Ma. māyācittho
8 Ma. māyācittho tathāgataṁ. 9 Ma. yāva jīvitamattano.
Jīvitaṁ dadamānena yuttaṁ dātuṁ tathāgataṁ
ṭhapanīyo mahāvīro adeyyo kassaci jino.
Na me paṭissuto buddho varassu amitaṁ dhanaṁ
vinicchayaṁ pāpuṇāmi 1 pucchissāmi 2 vinicchaye.
Yathā saṇhaṁ kathessanti paṭipucchāma taṁ tathā
rañño hatthe gahetvāna agamāsiṁ vinicchayaṁ.
Purato akkhadassānaṁ idaṁ vacanamabraviṁ
suṇantu me akkhadassā rājā varaṁ adāsi me.
Na kiñci ṭhapayitvāna jīvitaṁpi pavārayiṁ 3
tassa me varadinnassa buddhaseṭṭhaṁ variṁ ahaṁ.
Sudinno hoti me buddho chindatha 4 saṁsayaṁ mama
sussāma tava vacanaṁ bhūmipālassa rājino.
Ubhinnaṁ vacanaṁ sutvā chindissāmettha saṁsayaṁ
sabbaṁ deva tayā dinnaṁ imassa sabbagāhitaṁ 5 .
Na kiñci ṭhapayitvāna jīvitaṁpi pavārayiṁ
kicchappattova hutvāna yāvajīvamanuttaraṁ 6 .
Imaṁ sudukkhitaṁ ñatvā adāsiṁ sabbagāhitaṁ 7
parājayo tuvaṁ deva assa deyyo tathāgato.
Ubhinnaṁ saṁsayo chinno yathā saṇṭhamhi tiṭṭhatha
rājā tattheva ṭhatvāna akkhadassetadabravi.
1 Ma. Yu. pāpuṇāma. 2 Ma. Yu. pucchissāma. 3 Po. Ma. Yu. pavārayi.
4 Yu. athavā. 5-7 Ma. Yu. sabbagāhikaṁ. 6 Ma. Yu. yācīvaramanuttaraṁ.
Sammā mayhaṁpi deyyātha puna buddhaṁ labhāmahaṁ
pūretvā tava saṅkappaṁ bhojayitvā tathāgataṁ.
Puna deyyāsi sambuddhaṁ ānandassa yasassino
akkhadassebhivādetvā ānandamapi 1 khattiyaṁ.
Tuṭṭho pamudito hutvā sambuddhaṁ upasaṅkamiṁ
upasaṅkamma sambuddhaṁ oghatiṇṇaṁ anāsavaṁ.
Sirasā abhivādetvā idaṁ vacanamabraviṁ
vasīsatasahassehi adhivāsehi cakkhumā.
Hāsayanto mama cittaṁ nivesanamupehi me
padumuttaro lokavidū āhutīnaṁ paṭiggaho.
Mama saṅkappamaññāya adhivāsesi cakkhumā
adhivāsanamaññāya abhivādiya satthuno.
Haṭṭho udaggacittohaṁ nivesanamupāgamiṁ
mittāmacce samānetvā idaṁ vacanamabraviṁ.
Sudullabho mayā laddho maṇi jotiraso yathā
kena taṁ pūjayissāmi 2 appameyyo anūpamo.
Atulo asamo dhīro 3 jino appaṭipuggalo
tathāsamasamo ceva adutiyo narāsabho.
Dukkaraṁ adhikāraṁ hi buddhānucchavikaṁ mayā 4
nānāpupphe samānetvā karoma pupphamaṇḍapaṁ.
1 Ma. Yu. ānandañcāpi. 2 Ma. Yu. pūjayissāma. 3 Yu. vīro. 4 Yu. tayā.
Buddhānucchavikaṁ etaṁ sabbapūjā bhavissati
uppalaṁ padumaṁ vāpi vassikaṁ adhimuttakaṁ.
Campakaṁ nāgapupphañca maṇḍapaṁ kārayiṁ ahaṁ
satāsanasahassāni chattachāyāya paññapiṁ.
Pacchimaṁ āsanaṁ mayhaṁ adhikaṁ satamagghati
satāsanasahassāni chattachāyāya paññapiṁ.
Paṭiyādetvā annapānaṁ kālaṁ ārocayiṁ ahaṁ
ārocitamhi kālamhi padumuttaro mahāmuni.
Vasīsatasahassehi nivesanamupesi me
dhārentaṁ uparicchattaṁ suphullapupphamaṇḍape.
Vasīsatasahassehi nisīdi purisuttamo
chattasatasahassāni satasahassamāsanaṁ.
Kappiyaṁ anavajjañca paṭiggaṇhāhi cakkhumā
padumuttaro lokavidū āhutīnaṁ paṭiggaho.
Mamaṁ tāretukāmo so sampaṭicchi mahāmuni
bhikkhuno ekamekassa paccekaṁ pattadāsahaṁ.
Jahiṁsu sambhataṁ 1 pattaṁ lohapattaṁ adhārayuṁ
sattarattindivaṁ buddho nisīdi pupphamaṇḍape.
Bodhayanto bahū satte dhammacakkaṁ pavattayi
dhammacakkaṁ pavattento heṭṭhato pupphamaṇḍape.
1 Ma. sumbhakaṁ. Yu. pupphakaṁ.
Cullāsītisahassānaṁ dhammābhisamayo ahu
sattame divase patte padumuttaro mahāmuni.
Chattachāyāya nisinno imā gāthā abhāsatha
anūnakaṁ dānavaraṁ yo me pādāsi māṇavo.
Tamahaṁ kittayissāmi suṇātha mama bhāsato
hatthī assā rathā pattī senā ca caturaṅginī.
Parivāressanti taṁ 1 niccaṁ sabbadānassidaṁ phalaṁ
hatthiyānaṁ assayānaṁ sivikaṁ 2 sandamānikaṁ.
Upaṭṭhissanti taṁ niccaṁ sabbadānassidaṁ phalaṁ
saṭṭhī rathasahassāni sabbālaṅkārabhūsitā.
Parivāressanti taṁ niccaṁ sabbadānassidaṁ phalaṁ
saṭṭhī turiyasahassāni bheriyo samalaṅkatā.
Vajjayissanti taṁ niccaṁ sabbadānassidaṁ phalaṁ
chaḷāsītisahassāni nāriyo samalaṅkatā.
Vicittavatthābharaṇā āmuttamaṇikuṇḍalā
āḷāramukhā 3 hasulā susaññā tanumajjhimā.
Parivāressanti taṁ niccaṁ sabbadānassidaṁ phalaṁ
tiṁsakappasahassāni devaloke ramissati.
Sahassakkhattuṁ devindo devarajjaṁ karissati
sahassakkhattuṁ rājā ca cakkavatti bhavissati.
1 Ma. Yu. sabbattha maṁ. 2 Ma. sivikā sandamānikā. 3 Ma. āḷārapamhā.
Padesarajjaṁ vipulaṁ gaṇanāto asaṅkhayaṁ
devaloke vasantassa puññakammasamaṅgino.
Devalokānupariyante 1 ratanachattaṁ dharissati
icchissati yadā vāyaṁ 2 chadanaṁ dussapupphajaṁ.
Imassa cittamaññāya nivaddhaṁ chādayissati
devalokā cavitvāna sukkamūlena codito.
Puññakammena saṁyutto brahmabandhu bhavissati
kappasatasahassamhi okkākakulasambhavo.
Gotamo nāma nāmena satthā loke bhavissati
sabbametaṁ abhiññāya gotamo sakyapuṅgavo.
Bhikkhusaṅghe nisīditvā etadagge ṭhapessati
pilindavaccho nāmena hessati satthusāvako.
Devānaṁ asurānañca gandhabbānañca sakkato
bhikkhūnaṁ bhikkhunīnañca gihīnañca tatheva so.
Piyo hutvāna sabbesaṁ viharissatināsavo
satasahasse kataṁ kammaṁ phalaṁ dassesi me idha.
Sumutto saravegova kilese jhāpayiṁ 3 ahaṁ
aho me sukataṁ kammaṁ puññakkhette anuttare.
Yattha kāraṁ karitvāna pattosmi acalaṁ padaṁ
anūnakaṁ dānavaraṁ adāsi yo hi māṇavo.
1 Ma. devalokapariyantaṁ. 2 Ma. chāyaṁ. Yu. cāyaṁ. 3 Ma. jhāpayī mama. Yu. jhāpayissati.
Ādipubbaṅgamo āsi tassa dānassidaṁ phalaṁ
chatte 1 sugate datvāna saṅghe gaṇavaruttame 2 .
Aṭṭhānisaṁse anubhomi kammānucchavike mama
sītaṁ uṇhaṁ na jānāmi rajojallaṁ na limpati.
Anupaddavo anīti ca homi apacito sadā
sukhumacchaviko homi visadaṁ homi mānasaṁ.
Chattasatasahassāni bhave saṁsarato mama
sabbālaṅkārayuttāni tassa kammassa vāhasā.
Imaṁ 3 jātiṁ ṭhapetvāna matthake dhārayanti me
tasmā 4 imāya jātiyā natthi me chattadhāraṇā.
Mama sabbaṁ kataṁ kammaṁ vimuttichattapattiyā
dussāni sugate datvā saṅghe gaṇavaruttame.
Aṭṭhānisaṁse anubhomi kammānucchavike mama
suvaṇṇavaṇṇo virajo sappabhāso patāpavā.
Siniddhaṁ hoti me gattaṁ bhave saṁsarato mama
dussasatasahassāni setā pītā ca lohitā.
Dhārenti matthake mayhaṁ dussadānassidaṁ phalaṁ
koseyyakambaliyāni khomakappāsikāni ca.
Sabbattha paṭilabhāmi tesaṁ nissandato ahaṁ
patte ca sugate datvā saṅghe gaṇavaruttame.
1 Ma. chatte ca sukate datvā. 2 Po. Ma. Yu. guṇavaruttame. ito paraṁ īdisameva.
3 Yu. idaṁ. 4 Ma. kasmā.
Dasānisaṁse anubhomi kammānucchavike mama
suvaṇṇathāle maṇithāle rajatepica thālake.
Lohitaṅkamaye thāle paribhuñjāmi sabbadā
anupaddavo anīti ca homi apacito sadā.
Lābhī annassa pānassa vatthassa sayanassa ca
na vinassanti me bhogā ṭhitacitto bhavāmahaṁ.
Dhammakāmo sadā homi appakleso anāsavo
devaloke manusse vā anubandhā ime guṇā.
Chāyā yathāpi rūpassa 1 sabbattha na jahanti maṁ
cittabandhanasambaddhā sukatā vāsiyo bahū.
Datvāna buddhaseṭṭhassa saṅghassa ca tathevahaṁ
aṭṭhānisaṁse anubhomi kammānucchavike mama.
Sūro 2 homi 3 visārī ca vesārajjesu pāramī
dhitiviriyavā homi paggahitamano sadā.
Kilesacchedanaṁ ñāṇaṁ sukhumaṁ atulaṁ suciṁ
sabbattha paṭilabhāmi tassa nissandato mama.
Akakkase apharuse adhote satthake bahū
pasannacitto datvāna buddhe saṅghe tatheva ca.
Pañcānisaṁse anubhomi kammānucchavike mama
kalyāṇamittaṁ viriyaṁ khantiñca mettisatthakaṁ.
1 Ma. Yu. rukkhassa. 2 Po. sīho. 3 Ma. homa.
Taṇhāsallassa chinnattā paññāsatthaṁ anuttaraṁ
vajirena samaṁ ñāṇaṁ tesaṁ nissandato labhe.
Sūciyo sugate datvā saṅghe gaṇavaruttame
pañcānisaṁse anubhomi kammānucchavike mama.
Namassiyo kaṅkhacchedo abhirūpo ca bhogavā
tikkhapañño sadā homi saṁsaranto bhavābhave.
Gambhīraṁ nipuṇaṁ ṭhānaṁ atthaṁ ñāṇena passayiṁ
vajiraggasamaṁ ñāṇaṁ hoti me tamaghātanaṁ.
Nakhacchedane sugate datvā saṅghe gaṇavaruttame
pañcānisaṁse anubhomi kammānucchavike mama.
Dāsadāsī gavasse ca bhaṭake nāṭake 1 bahū
nhāpite bhattake sūde sabbattheva labhāmahaṁ.
Vidhūpane sugate datvā tālapaṇṇe ca sobhane
aṭṭhānisaṁse anubhomi kammānucchavike mama.
Sītaṁ uṇhaṁ na jānāmi pariḷāho na vijjati
darathaṁ nābhijānāmi cittasantāpanaṁ mama.
Rāgaggi dosamohaggi mānaggi diṭṭhiaggi ca
sabbaggi nibbuto mayhaṁ tassa nissandato mama.
Morahatthe cāmariyo datvā saṅghe gaṇuttame
upasantakilesohaṁ viharāmi anaṅgaṇo.
1 Yu. ārakkhe.
Parissāvane sugate datvā sugate 1 dhammakuttare
pañcānisaṁse anubhomi kammānucchavike mama.
Sabbesaṁ samatikkamma dibbaṁ āyuṁ labhāmahaṁ
appasayho sadā homi corapaccatthikehi vā.
Satthena vā visena vā vihesaṁpi na kubbate
antarāmaraṇaṁ natthi tesaṁ nissandato mama.
Teladhāre sugate datvā saṅghe gaṇavaruttame
pañcānisaṁse anubhomi kammānucchavike mama.
Sucārurūpo subhaddo 2 susamuggatamānaso
avikkhepamano homi sabbārakkhehi rakkhito.
Sūcighare sugate datvā saṅghe gaṇavaruttame
tīṇānisaṁse anubhomi kammānucchavike mama.
Cetosukhaṁ kāyasukhaṁ iriyāpathajaṁ sukhaṁ
ime guṇe paṭilabhāmi 3 tassa nissandato ahaṁ.
Aṁsavaddhe jine datvā saṅghe gaṇavaruttame
tīṇānisaṁse anubhomi kammānucchavike mama.
Saddhamme gāḷhaṁ 4 vindāmi sarāmi dutiyaṁ bhavaṁ
sabbattha succhavi homi tassa nissandato ahaṁ.
Kāyabandhe jine 5 datvā saṅghe gaṇavaruttame
chānisaṁse anubhomi kammānucchavike mama.
1 Yu. saṅghe gaṇuttame. Ma. dhammakaruttame. 2 Yu. sugato. 3 Ma. paṭilabhe.
4 Po. bandhāmi. Ma. Yu. gādhaṁ. 5 Yu. sugate.
Samādhīsu na kampāmi vasī homi samādhisu
abhejjapariso homi ādeyyavacano sadā.
Upaṭṭhitassati homi tāso mayhaṁ na vijjati
devaloke manusse vā anubandhā ime guṇā.
Ādhārake jine datvā saṅghe gaṇavaruttame
pañcavaṇṇe 1 bhayābhāvo acalo homi kenaci.
Yekeci me sutā dhammā satiñāṇappabodhanā
dhatā 2 me na vinassanti bhavanti suvinicchitā.
Bhājane paribhoge ca datvā buddhe gaṇuttame
tīṇānisaṁse anubhomi kammānucchavike mama.
Sovaṇṇamaye maṇimaye athopi phalikāmaye
lohitaṅkamaye ceva labhāmi bhājane ahaṁ.
Bhariyā dāsadāsī ca hatthissarathapattike
itthī patibbatā ceva paribhogāni sabbadā.
Vijjā mantapade ceva vividhe āgame bahū
sabbasippaṁ nisāmemi paribhogāni sabbadā.
Thālake sugate datvā saṅghe guṇavaruttame
tīṇānisaṁse anubhomi kammānucchavike mama.
Sovaṇṇamaye maṇimaye athopi phalikāmaye
lohitaṅkamaye ceva labhāmi thālake ahaṁ.
1 Ma. Yu. pañcavaṇṇehi dāyādo. 2 Yu. vatā.
Assaṭṭhake phalamaye atho pokkharapattake
madhupānakasaṅkhe ca labhāmi thālake ahaṁ.
Vatte guṇe paṭipattiṁ 1 ācārakiriyāsu ca
ime guṇe paṭilabhe tassa nissandato ahaṁ.
Bhesajjaṁ sugate datvā saṅghe gaṇavaruttame
dasānisaṁse anubhomi kammānucchavike mama.
Āyuvā balavā dhīro vaṇṇavā yasavā sukhī
anupaddavo anīti ca homi 2 apacito sadā
na me piyaviyogatthi tassa nissandato mama.
Upāhane jine datvā saṅghe gaṇavaruttame
tīṇānisaṁse anubhomi kammānucchavike mama.
Hatthiyānaṁ assayānaṁ sivikaṁ sandamānikaṁ
saṭṭhī rathasahassāni parivārenti maṁ sadā.
Maṇimayā tambamayā 3 soṇṇarajatapādukā
nibbattanti paduddhāre bhave saṁsarato mama.
Niyāmaṁ paṭidhāvanti 4 ācāraguṇasodhanaṁ 5
ime guṇe paṭilabhe tassa nissandato ahaṁ.
Pāduke sugate datvā saṅghe guṇavaruttame
iddhipādukamāruyha viharāmi yathicchakaṁ.
1 Ma. paṭipatti. Yu. paṭilabhe. 2 Yu. bhomi cāpacito sadā. 3 Yu. maṇḍalakā.
4 Ma. sati dhāvanti. 5 Ma. āguācārasodhanaṁ.
Mukhapuñchanaṁ 1 sugate datvā saṅghe gaṇavaruttame
pañcānisaṁse anubhomi kammānucchavike mama.
Suvaṇṇavaṇṇo virajo sappabhāso patāpavā
siniddhaṁ hoti me gattaṁ rajojallaṁ na limpati.
Ime guṇe paṭilabhe tassa nissandato ahaṁ
kattaradaṇḍe sugate datvā saṅghe gaṇavaruttame 2 .
Pañcānisaṁse 3 anubhomi kammānucchavike mama
puttā mayhaṁ bahū honti tāso mayhaṁ na vijjati.
Appasayho sadā homi sabbārakkhehi rakkhito
khalitampi 4 na jānāmi abhantaṁ mānasaṁ mama.
Osathaṁ añjanaṁ datvā saṅghe 5 gaṇavaruttame
aṭṭhānisaṁse anubhomi kammānucchavike mama.
Visālanayano homi setapito ca lohito
anāvilapasannakkho sabbarogavivajjito.
Labhāmi dibbanayanaṁ paññācakkhuṁ anuttaraṁ
ime guṇe paṭilabhe tassa nissandato ahaṁ.
Kuñcike sugate datvā saṅghe gaṇavaruttame
dhammadvāravivaraṇaṁ labhāmi ñāṇakuñcikaṁ.
Kuñcikānaṁ ghare datvā saṅghe 6 gaṇavaruttame
dvānisaṁse anubhomi kammānucchavike mama.
1 Ma. Yu. mukhapuñchanacole datvā buddhe gaṇuttame. 2 Ma. gaṇuttame.
3 Ma. Yu. chānisaṁse. 4 Yu. jalitaṁ maṁ na jānāmi. 5-6 Ma. Yu. buddhe saṅghe gaṇuttame.
Appakodho anupāyāso saṁsaranto bhave ahaṁ
āyoge sugate datvā saṅghe gaṇavaruttame.
Pañcānisaṁse anubhomi kammānucchavike mama
samādhīsu na kampāmi vasī homi samādhisu.
Abhejjapariso homi ādeyyavacano sadā
jāyati 1 bhogasampatti bhave saṁsarato mama.
Dhūmanette jine datvā saṅghe gaṇavaruttame
tīṇānisaṁse anubhomi kammānucchavike mama.
Sati me ujukā hoti susambandhā ca nhāruyo 2
labhāmi dibbasayanaṁ 3 tassa nissandato ahaṁ.
Dīpadāne 4 jine datvā saṅghe gaṇavaruttame
tīṇānisaṁse anubhomi kammānucchavike mama.
Jātimā aṅgasampanno paññavā buddhasammato
ime guṇe paṭilabhe tassa nissandato mama 5 .
Tumbake ca karaṇḍe ca datvā buddhe gaṇuttame
dasānisaṁse anubhomi kammānucchavike mama.
Tadā 6 gutto 7 sukhasamaṅgī mahāyasavā tathā gati
vibhattigatto 8 sukhumālo sabbītiparivajjito.
Vipule ca guṇe lābhī sammānacalanā 9 mama
suvivajjitaubbego tumbake ca karaṇḍake.
1 Yu. jāticca. 2 Ma. nahāravo. 3 Ma. Yu. dibbanayanaṁ. 4 Ma. Yu. dīpadhāre.
5 Ma. Yu. ahaṁ. 6 Yu. sadā. 7 Ma. sugutto. 8 Ma. vipattivigato. Yu. bhattikato.
9 Ma. samāvacalanā.
Labhāmi caturo vaṇṇe hatthissaratanāni ca
tāni me na vinassanti tumbakāre 1 idaṁ phalaṁ.
Hatthalīlaṅgake 2 datvā buddhe saṅghe gaṇuttame
pañcānisaṁse anubhomi kammānucchavike mama.
Sabbalakkhaṇasampanno āyupaññāsamāhito
sabbāyāsavinimutto kāyo me hoti sabbadā.
Tanudhāre sunisite saṅghe datvāna pipphale
kilesakantanaṁ ñāṇaṁ labhāmi atulaṁ suciṁ.
Saṇḍāse sugate datvā saṅghe gaṇavaruttame
kilesaluñcanaṁ 3 ñāṇaṁ labhāmi atulaṁ suciṁ.
Natthuke sugate datvā saṅghe gaṇavaruttame
aṭṭhānisaṁse anubhomi kammānucchavike mama.
Saddhā sīlaṁ hiriñcāpi atha ottappiyaṁ guṇaṁ
sutaṁ cāgañca khantī 4 ca paññā me aṭṭhamaṁ guṇaṁ.
Pīṭhake sugate datvā saṅghe gaṇavaruttame
pañcānisaṁse anubhomi kammānucchavike mama.
Ucce kule pajāyāmi mahābhogo bhavāmahaṁ
sabbe maṁ apacāyanti kitti abbhuggatā mama.
Kappasatasahassāni pallaṅkā caturassakā
parivārenti maṁ niccaṁ saṁvibhāgarato ahaṁ.
1 Ma. Yu. tumbadāne. 2 Ma. malaharaṇiyo. 3 Ma. kilesabhañjanaṁ. 4 Ma. Yu. khantiñca.
Bhisiyo sugate datvā saṅghe gaṇavaruttame
chānisaṁse anubhomi kammānucchavike mama.
Samasugattopacito 1 muduko cārudassano
labhāmi ñāṇapavaraṁ 2 bhisidānassidaṁ phalaṁ.
Tūlikā vikatikāyo kaṭissā cittakā bahū
varapotthake kambale ca labhāmi vividhe ahaṁ.
Pāvārake ca muduke mudukājinaveṇiyo
labhāmi vividhaṭṭhāne 3 bhisidānassidaṁ phalaṁ.
Yato sarāmi attānaṁ yato pattosmi viññutaṁ
atuccho jhānamañcomhi bhisidānassidaṁ phalaṁ.
Bibbohane jine datvā saṅghe gaṇavaruttame
chānisaṁse anubhomi kammānucchavike mama.
Uṇṇike padumake ca atho lohitacandane
bibbohane upātemi 4 uttamaṅgaṁ sadā mama.
Aṭṭhaṅgike maggavare sāmaññe caturo phale
tesu ñāṇaṁ uppādetvā 5 vihare niccakālikaṁ.
Dāne dame saññame ca appamaññāsu rūpisu
tesu ñāṇaṁ uppādetvā vihare sabbakālikaṁ.
Vatte guṇe ca 6 paṭime ācārakiriyāsu ca
tesu ñāṇaṁ uppādetvā vihare sabbadā ahaṁ.
1 Yu. samaṁ sambhattopacito. 2 Ma. Yu. ñāṇaparivāraṁ. 3 Ma. Yu. vividhatthāre.
4 Ma. upādhemi. Yu. upādemi. 5 Yu. sabbattha upānetvā.
6 Ma. paṭipatti. Yu. pañcame.
Caṅkame vā padhāne vā viriye bodhipakkhike 1
tesu ñāṇaṁ uppādetvā viharāmi yathicchakaṁ.
Sīlaṁ samādhi paññā ca vimutti ca anuttarā
tesu ñāṇaṁ uppādetvā viharāmi sukhaṁ ahaṁ.
Phalapīṭhe jine datvā saṅghe gaṇavaruttame
dvānisaṁse 2 anubhomi kammānucchavike mama.
Soṇṇamaye maṇimaye dantasāramaye bahū
pallaṅkaseṭṭhe vindāmi phalapīṭhassidaṁ phalaṁ.
Pādapīṭhe jine datvā saṅghe gaṇavaruttame
dvānisaṁse anubhomi kammānucchavike mama.
Labhāmi bahuke yāne pādapīṭhassidaṁ phalaṁ
dāsī dāsā ca bhariyā ye caññe anujīvino.
Sammā paricaranteva 3 pādapīṭhassidaṁ phalaṁ
telābbhañjane datvā saṅghe gaṇavaruttame.
Pañcānisaṁse anubhomi kammānucchavike mama
abyādhitā rūpavatā khippaṁ dhammanisandhitā 4 .
Lābhitā annapānassa āyuṁ pañcamakaṁ mama
sappitelañca datvāna saṅghe gaṇavaruttame.
Pañcānisaṁse anubhomi kammānucchavike mama
thāmavā rūpasampanno pahaṭṭhatanujo sadā.
1 Ma. bodhipakkhiye. 2 Yu. caturānisaṁse. 3 Ma. Yu. paricarante maṁ.
4 Ma. Yu. dhammanisantitā.
Abyādhi 1 ca sadā homi sappitelassidaṁ phalaṁ
mukhadhovanaṁ datvāna saṅghe gaṇavaruttame.
Pañcānisaṁse anubhomi kammānucchavike mama
visuddhakaṇṭho madhussaro kāsasāsavivajjito.
Uppalagandho mukhato upavāyati me sadā
dadhiṁ datvāna sampannaṁ buddhe saṅghe gaṇuttame.
Bhuñjāmi amataṁ bhattaṁ 2 varaṁ kāyagatāsatiṁ
vaṇṇagandharasopetaṁ madhuṁ datvā jine gaṇe.
Anūpamaṁ anaññampi 3 labhāmi vimuttirasaṁ
yathābhūtaṁ rasaṁ datvā buddhe saṅghe gaṇuttame.
Caturo phale anubhomi kammānucchavike mama
annapānañca datvāna buddhe saṅghe gaṇuttame.
Dasānisaṁse anubhomi kammānucchavike mama
āyuvā balavā dhīro vaṇṇavā yasavā sukhī.
Lābhī annassa pānassa sūro paññāṇavā tathā 4
ime guṇe paṭilabhe saṁsaranto bhave ahaṁ.
Dhūpaṁ datvāna sugate saṅghe gaṇavaruttame
dasānisaṁse anubhomi kammānucchavike mama.
Sugandhadeho yasavā sīghapañño ca kittimā
tikkhapañño bhūripañño hāsagambhīrapaññavā.
1 Ma. abyādhi visado homi. Yu. ... visajī .... 2 Yu. cittaṁ.
3 Ma. Yu. atuliyaṁ pive muttirasaṁ ahaṁ. 4 Ma. sadā.
Vepullajavanasappañño 1 saṁsaranto bhavābhave
tasseva vāhasā dāni patto santisukhaṁ sivaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā pilindavaccho thero imā gāthāyo
abhāsitthāti.
Pilindavacchattherassa apadānaṁ samattaṁ.
Dutiyaṁ selattherāpadānaṁ (392)