[374] Vipassī nāma bhagavā sayambhū aggapuggalo
purakkhato sasissehi bandhumaṁ pāvisī jino.
Tīṇi pāṭalipupphāni ucchaṅge ṭhapitāni me
sīsaṁ nhāyitukāmohaṁ 1 nadītīraṁ 2 agacchahaṁ.
Nikkhamma bandhumatiyā addasaṁ lokanāyakaṁ
indīvaraṁva jalitaṁ ādittaṁva hutāsanaṁ.
Byagghūsabhaṁva pavaraṁ abhijātaṁva kesariṁ
gacchantaṁ samaṇānaggaṁ bhikkhusaṅghapurakkhataṁ.
Tasmiṁ pasanno sugate kilesamaladhovane
gahetvā tīṇi pupphāni buddhaseṭṭhaṁ apūjayiṁ.
Ekanavute ito kappe yaṁ pupphamabhipūjayiṁ
duggatiṁ nābhijānāmi buddhapūjāyidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā pāṭalipupphiyo thero imā gāthāyo
abhāsitthāti.
Pāṭalipupphiyattherassa apadānaṁ samattaṁ.
1 Ma. ... nhāyitukāmo va. 2 Ma. Yu. nadītitthaṁ.
Tatiyaṁ tīṇuppalamāliyattherāpadānaṁ (373)

[375] Candabhāgānadītīre ahosiṁ vānaro tadā
addasaṁ virajaṁ buddhaṁ nisinnaṁ pabbatantare.
Obhāsentaṁ disā sabbā sālarājaṁva phullitaṁ
lakkhaṇabyañjanūpetaṁ disvā attamano ahaṁ.
Udaggacitto sumano pītiyā haṭṭhamānaso
tīṇi uppalapupphāni matthake abhiropayiṁ.
Pūjayitvāna pupphāni phussassāpi 1 mahesino
sagāravo bhavitvāna pakkāmiṁ uttarāmukho.
Gacchanto paṭikuṭiko vippasannena cetasā
selantare patitvāna pāpuṇiṁ jīvitakkhayaṁ.
Tena kammena sukatena cetanāpaṇidhīhi ca
jahitvā purimaṁ jātiṁ tāvatiṁsaṁ agacchahaṁ.
Satānaṁ tīṇikkhattuñca devarajjamakārayiṁ
satānaṁ pañcakkhattuṁ ca cakkavatti ahosahaṁ.
Dvenavute ito kappe yaṁ pupphamabhipūjayiṁ
duggatiṁ nābhijānāmi buddhapūjāyidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. phussassāhaṁ. Yu. phussassātha.
Itthaṁ sudaṁ āyasmā tīṇuppalamāliyo thero imā gāthāyo
abhāsitthāti.
Tīṇuppalamāliyattherassa apadānaṁ samattaṁ.
Catutthaṁ pattipupphiyattherāpadānaṁ (374)

[376] Yadā nibbāyi sambuddho mahesī padumuttaro
samāgamma janā sabbe sarīraṁ nīharanti te.
Nīharante sarīramhi vijjamānāsu bherisu
pasannacitto sumano pattipupphamabhipūjayiṁ.
Satasahasse ito kappe yaṁ pupphamabhipūjayiṁ
duggatiṁ nābhijānāmi sarīre pūjite phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā pattipupphiyo thero imā gāthāyo
abhāsitthāti.
Pattipupphiyattherassa apadānaṁ samattaṁ.
Pañcamaṁ sattapaṇṇiyattherāpadānaṁ (375)

[377] Sumano nāma sambuddho uppajji lokanāyako
pasannacitto sumano sattapaṇṇimapūjayiṁ.
Satasahasse ito kappe sattapaṇṇimapūjayiṁ
duggatiṁ nābhijānāmi sattapaṇṇipūjāyidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sattapaṇṇiyo thero imā gāthāyo
abhāsitthāti.
Sattapaṇṇiyattherassa apadānaṁ samattaṁ.
Chaṭṭhaṁ gandhamuṭṭhiyattherāpadānaṁ (376)

[378] Citake kayiramāne nānāgandhe samāgate 1
pasannacitto sumano gandhamuṭṭhiṁ apūjayiṁ.
1 Ma. samāhate.
Satasahasse ito kappe citakaṁ yaṁ apūjayiṁ
duggatiṁ nābhijānāmi citapūjāyidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā gandhamuṭṭhiyo thero imā gāthāyo
abhāsitthāti.
Gandhamuṭṭhiyattherassa apadānaṁ samattaṁ.
Sattamaṁ citakapūjakattherāpadānaṁ (377)

[379] Parinibbute bhagavati jalajuttamanāmake
āropitamhi citake sālapupphaṁ apūjayiṁ.
Satasahasse ito kappe yaṁ pupphaṁ apūjayiṁ 1
duggatiṁ nābhijānāmi citapūjāyidaṁ phalaṁ.
Svāgataṁ vata me āsi mama buddhassa 2 santike
tisso vijjā anuppattā kataṁ buddhassa sāsanaṁ.
1 abhipūjayinti yuttataraṁ. 2 Yu. buddhaseṭṭhassa ....
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā citakapūjako thero imā gāthāyo
abhāsitthāti.
Citakapūjakattherassa apadānaṁ samattaṁ.
Aṭṭhamaṁ sumanatālavaṇṭiyattherāpadānaṁ (378)

[380] Siddhatthassa bhagavato tālavaṇṭaṁ adāsahaṁ
sumenahi paṭicchannaṁ dhārayāmi mahāyasaṁ 1 .
Catunavute ito kappe tālavaṇṭaṁ adāsahaṁ
duggatiṁ nābhijānāmi tālavaṇṭassidaṁ phalaṁ.
Svāgataṁ vata me āsi mama buddhassa santike
tisso vijjā anuppatā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. mahārahaṁ.
Itthaṁ sudaṁ āyasmā sumanatālavaṇṭiyo thero imā gāthāyo
abhāsitthāti.
Sumanatālavaṇṭiyattherassa apadānaṁ samattaṁ.
Navamaṁ sumanadāmiyattherāpadānaṁ (379)

[381] Siddhatthassa bhagavato nhātakassa tapassino
katvāna sumanadāmaṁ dhārayiṁ purato ṭhito.
Catunavute ito kappe yaṁ dāmaṁ abhipūjayiṁ 1
duggatiṁ nābhijānāmi sumanadāmassidaṁ 2 phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sumanadāmiyo thero imā gāthāyo
abhāsitthāti.
Sumanadāmiyattherassa apadānaṁ samattaṁ.
1 Ma. .. dhārayiṁ tadā. 2 Ma. Yu. sumanadhāraṇe phalaṁ.
Dasamaṁ kāsumāriphaladāyakattherāpadānaṁ (380)

[382] Kaṇikāraṁva jotantaṁ nisinnaṁ pabbatantare
addasaṁ virajaṁ buddhaṁ lokajeṭṭhaṁ narāsabhaṁ.
Pasannacitto sumano sire katvāna añjaliṁ
kāsumāriphalaṁ gayha buddhaseṭṭhassadāsahaṁ.
Ekattiṁse ito kappe yaṁ phalaṁ adadiṁ tadā 1
duggatiṁ nābhijānāmi phaladānassidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā kāsumāriphaladāyako thero imā gāthāyo
abhāsitthāti.
Kāsumāriphaladāyakattherassa apadānaṁ samattaṁ.
Uddānaṁ
bodhipāṭaliuppali patti ca sattapaṇṇiyo
1 Ma. Yu. ahaṁ.
Gandhamuṭṭhī ca citako tālaṁ sumanadāmako
kāsumāriphalīpica gāthā ekūnasaṭṭhiyo.
Bodhivandanavaggo aṭṭhattiṁso.
----------
Ekūnacattāḷīso ambaṭaphalavaggo
paṭhamaṁ ambaṭaphaladāyakattherāpadānaṁ (381)

[383] Sataraṁsī nāma bhagavā sayambhū aparājito
vivekakāmo sambuddho gocarāyābhinikkhami.
Phalahattho ahaṁ disvā upagañchiṁ narāsabhaṁ
pasannacitto sumano ambaṭaṁ 1 adadaṁ phalaṁ.
Catunavute ito kappe yaṁ phalaṁ adadaṁ ahaṁ
duggatiṁ nābhijānāmi phaladānassidaṁ phalaṁ.
Svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. avaṭaṁ. Yu. avaṇṭaṁ.
Itthaṁ sudaṁ āyasmā ambaṭaphaladāyako thero imā gāthāyo
abhāsitthāti.
Ambaṭaphaladāyakattherassa apadānaṁ samattaṁ.
Dutiyaṁ labujadāyakattherāpadānaṁ (382)