[344] Candabhāgānadītīre ahosiṁ vānaro tadā
addasaṁ virajaṁ buddhaṁ nisinnaṁ pabbatantare.
Obhāsentaṁ disā sabbā sālarājaṁva phullitaṁ
lakkhaṇabyañjanūpetaṁ disvā attamano ahu.
Udaggacitto sumano pītiyā haṭṭhamānaso
tīṇi uppalapupphāni matthake abhiropayiṁ.
Pupphāni abhiropetvā vipassissa mahesino
sagāravo bhavitvāna 1 pakkāmiṁ uttarāmukho.
Gacchanto paṭikuṭiko vippasannena cetasā
selantare papatitvā 2 pāpuṇiṁ jīvitakkhayaṁ.
1 Yu. gamitvāna. 2 Ma. Yu. patitvāna.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agacchahaṁ.
Satānaṁ tīṇikkhattuñca devarajjamakārayiṁ
satānaṁ pañcakkhattuñca cakkavatti ahosahaṁ.
Ekanavute ito kappe yaṁ pupphamabhipūjayiṁ
duggatiṁ nābhijānāmi buddhapūjāyidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā tīṇuppalamāliyo thero imā gāthāyo
abhāsitthāti.
Tīṇuppalamāliyattherassa apadānaṁ samattaṁ.
Tatiyaṁ dhajadāyakattherāpadānaṁ (343)

[345] Tisso nāma ahu satthā lokajeṭṭho narāsabho
tayopadhikkhaye 1 disvā dhajaṁ āropitaṁ mayā.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agacchahaṁ.
Satānaṁ tīṇikkhattuñca devarajjamakārayiṁ
satānaṁ pañcakkhattuñca cakkavatti ahosahaṁ.
1 Yu. parikkhayo.
Padesarajjaṁ vipulaṁ gaṇanāto asaṅkhayaṁ
anubhomi sakaṁ kammaṁ pubbe sukatamattano.
Dvenavute ito kappe yaṁ kammamakariṁ tadā
duggatiṁ nābhijānāmi dhajadānassidaṁ phalaṁ.
Icchamāno cahaṁ ajja sakānanaṁ sapabbataṁ
khomadussena chādeyyaṁ tadā mayhaṁ kate phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā dhajadāyako thero imā gāthāyo
abhāsitthāti.
Dhajadāyakattherassa apadānaṁ samattaṁ.
Catutthaṁ tīṇikiṅkaṇipūjakattherāpadānaṁ (344)

[346] Himavantassavidūre 1 bhūtagaṇo nāma pabbato
tatthaddasaṁ paṁsukūlaṁ dumaggamhi vilaggitaṁ.
Tīṇi kiṅkaṇipupphāni ocinitvānahaṁ tadā
haṭṭho haṭṭhena cittena paṁsukūlaṁ apūjayiṁ.
Ekattiṁse ito kappe yaṁ kammamakariṁ tadā
duggatiṁ nābhijānāmi tiṇṇaṁ pupphānidaṁ phalaṁ.
1 Po. Yu. --- avidūre. ito paraṁ īdisameva.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā tīṇikiṅkaṇipūjako thero imā gāthāyo
abhāsitthāti.
Tīṇikiṅkaṇipūjakattherassa apadānaṁ samattaṁ.
Pañcamaṁ naḷāgārikattherāpadānaṁ (345)

[347] Himavantassavidūre hāriko nāma pabbato
sayambhū 1 nāma nāmena rukkhamūle vasī tadā.
Naḷāgāraṁ karitvāna tiṇena chādayiṁ ahaṁ
caṅkamaṁ sodhayitvāna sayambhussa adāsahaṁ.
Catuddasesu kappesu devaloke ramiṁ ahaṁ
catusattatikkhattuñca devarajjamakārayiṁ.
Sattasattatikkhattuñca cakkavatti ahosahaṁ
padesarajjaṁ vipulaṁ gaṇanāto asaṅkhayaṁ.
Ubbiddhaṁ bhavanaṁ mayhaṁ indalaṭṭhīva uggataṁ
sahassathambhaṁ atulaṁ vimānaṁ sappabhassaraṁ.
Dvesampattiṁ anubhotvāna sukkamūlena codito
gotamassa bhagavato sāsane pabbajiṁ ahaṁ.
1 Ma. Yu. sayambhū nārado nāma.
Padhānaṁ pahitattomhi upasanto nirūpadhi
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā naḷāgāriko thero imā gāthāyo
abhāsitthāti.
Naḷāgārikattherassa apadānaṁ samattaṁ.
Chaṭṭhaṁ campakapupphiyattherāpadānaṁ (346)

[348] Himavantassavidūre chāpalo 1 nāma pabbato
buddho sudassano nāma vihāsi pabbatantare.
Pupphaṁ hemavaṇṇaṁ 2 gayha gacchaṁ vehāyasenahaṁ 3
addasaṁ virajaṁ buddhaṁ oghatiṇṇamanāsavaṁ.
Sattacampakapupphāni sīse katvānahaṁ tadā
buddhassa abhiropesiṁ sayambhussa mahesino.
Ekattiṁse ito kappe yaṁ pupphamabhipūjayiṁ
duggatiṁ nābhijānāmi buddhapūjāyidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. jāpalo nāma. Yu. cāvalo nāma. 2 Ma. hemavantaṁ. Yu. hemavataṁ.
3 Yu. vehāsayenahaṁ.
Itthaṁ sudaṁ āyasmā campakapupphiyo thero imā gāthāyo
abhāsitthāti.
Campakapupphiyattherassa apadānaṁ samattaṁ.
Sattamaṁ padumapūjakattherāpadānaṁ (347)

[349] Himavantassavidūre romaso nāma pabbato
buddho ca 1 sobhito nāma abbhokāse vasī tadā.
Bhavanā nikkhamitvāna padumaṁ dhārayiṁ ahaṁ
ekāhaṁ dhārayitvāna punabbhavaṁ upāgamiṁ.
Ekanavute ito kappe yaṁ pupphaṁ abhipūjayiṁ
duggatiṁ nābhijānāmi buddhapūjāyidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā padumapūjako thero imā gāthāyo
abhāsitthāti.
Padumapūjakattherassa apadānaṁ samattaṁ.
Terasamaṁ bhāṇavāraṁ.
Aṭṭhamaṁ tiṇamuṭṭhidāyakattherāpadānaṁ (348)

[350] Himavantassavidūre lambako nāma pabbato
upatisso nāma sambuddho abbhokāsamhi caṅkami.
1 Ma. Yu. buddhopi sambhavo nāma.
Migaluddho pure āsiṁ araññe kānane ahaṁ
disvāna taṁ devadevaṁ sayambhuṁ aparājitaṁ.
Vippasannena cittena tadā tassa mahesino
nisīdanatthaṁ buddhassa tiṇamuṭṭhimadāsahaṁ.
Datvāna devadevassa bhiyyo cittaṁ pasādayiṁ
sambuddhaṁ abhivādetvā pakkāmi 1 uttarāmukho.
Aciraṁ gatamattaṁ maṁ migarājā aheṭhayi 2
sīhena pātito 3 santo tattha kālaṁ kato ahaṁ.
Āsanne me kataṁ kammaṁ buddhaseṭṭhe anāsave
sumutto saravegova devalokaṁ agacchahaṁ.
Yūpo tattha subho āsi puññakammābhinimmito
sahassakaṇḍo sattageṇḍu dhajālu haritāmayo.
Pabhā niddhāvate tassa sataraṁsīva uggato
ākiṇṇo devakaññāhi āmodiṁ kāmakāmihaṁ.
Devalokā cavitvāna sukkamūlena codito
āgantvāna manussattaṁ pattomhi āsavakkhayaṁ.
Catunavute ito kappe nisīdanamadāsahaṁ
duggatiṁ nābhijānāmi tiṇamuṭṭhiyidaṁ 4 phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. Yu. pakkāmiṁ. 2 Ma. apoṭhayi. 3 Ma. pothito. 4 Yu. tiṇamuṭṭhe idaṁ phalaṁ.
Itthaṁ sudaṁ āyasmā tiṇamuṭṭhidāyako thero imā gāthāyo
abhāsitthāti.
Tiṇamuṭṭhidāyakattherassa apadānaṁ samattaṁ.
Navamaṁ tindukaphaladāyakattherāpadānaṁ (349)

[351] Kaṇikāraṁva jotantaṁ nisinnaṁ pabbatantare
addasaṁ virajaṁ buddhaṁ oghatiṇṇamanāsavaṁ.
Tindukaṁ saphalaṁ disvā bhinditvāna sakoṭikaṁ 1
pasannacitto sumano vessabhussa 2 adāsahaṁ.
Ekanavute ito kappe yaṁ phalaṁ adadiṁ tadā
duggatiṁ nābhijānāmi phaladānassidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā tindukaphaladāyako thero imā gāthāyo
abhāsitthāti.
Tindukaphaladāyakattherassa apadānaṁ samattaṁ.
Dasamaṁ ekañjaliyattherāpadānaṁ (350)

[352] Revato 3 nāma sambuddho nadīkūle vasī tadā
addasaṁ virajaṁ buddhaṁ pītaraṁsīva bhāṇumaṁ.
1 Ma. sakosakaṁ. Po. Yu. sakoṭakaṁ. 2 Ma. sayambhussa madāsahaṁ.
3 Ma. Yu. romaso nāma.
Ukkāmukhaṁ pahaṭṭhaṁva khadiraṅgārasannibhaṁ
osadhī viya rocantaṁ ekañjalimakāsahaṁ.
Catunavute ito kappe yaṁ añjalimakāsahaṁ
duggatiṁ nābhijānāmi añjaliyā idaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ekañjaliyo thero imā gāthāyo
abhāsitthāti.
Ekañjaliyattherassa apadānaṁ samattaṁ.
Uddānaṁ
padumī uppalamālī dhajo kiṅkaṇikaṁ naḷaṁ
campako padumamuṭṭhi tindukekañjalī tathā
cha ca saṭṭhi ca gāthāyo gaṇitāyo vibhāvihi.
Ekapadumavaggo pañcattiṁso.
--------
Chattiṁso saddasaññikavaggo
paṭhamaṁ saddasaññikattherāpadānaṁ (351)

[353] Migaluddho pure āsiṁ araññe kānane ahaṁ
tatthaddasāsiṁ sambuddhaṁ dvesaṅghapurakkhataṁ.
Catusaccaṁ pakāsentaṁ uddharantaṁ mahājanaṁ
assosiṁ madhuraṁ vācaṁ karavikarudopamaṁ.
Brahmasarassa munino sikhino lokabandhuno
ghose cittaṁ pasādetvā pattomhi āsavakkhayaṁ.
Ekattiṁse ito kappe yaṁ kammamakariṁ tadā
duggatiṁ nābhijānāmi pasādassa idaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā saddasaññiko thero imā gāthāyo
abhāsitthāti.
Saddasaññikattherassa apadānaṁ samattaṁ.
Dutiyaṁ yavakalāpiyattherāpadānaṁ (352)