[334] Suvaṇṇavaṇṇaṁ sambuddhaṁ gacchantaṁ anilañjase
ghatāsanaṁva jalitaṁ ādittaṁva hutāsanaṁ.
Pāṇinā udakaṁ gayha ākāse ukkhipiṁ ahaṁ
sampaṭicchi mahāvīro buddho kāruṇiko isi.
Antalikkhe ṭhito satthā padumuttaranāmako
mama saṅkappamaññāya imaṁ gāthaṁ abhāsatha.
Iminā dakadānena pītiuppādanena ca
kappasatasahassaṁpi duggatiṁ nūpapajjasi.
Tena kammena dipadinda lokajeṭṭha narāsabha
pattomhi acalaṁ ṭhānaṁ hitvā jayaparājayaṁ.
Sahassarājanāmena tayo ca cakkavattino
pañcasaṭṭhikappasate cāturanto janādhipā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā udakapūjako thero imā gāthāyo
abhāsitthāti.
Udakapūjakattherassa apadānaṁ samattaṁ.
Tatiyaṁ punnāgapupphiyattherāpadānaṁ (333)

[335] Kānanaṁ vanamoggayha vasāmi luddako ahaṁ
punnāgaṁ pupphitaṁ disvā buddhaseṭṭhaṁ anussariṁ.
Taṁ pupphaṁ ocinitvāna sugandhaṁ gandhitaṁ subhaṁ
thūpaṁ katvāna puḷine buddhassa abhiropayiṁ.
Dvenavute ito kappe yaṁ pupphamabhipūjayiṁ
duggatiṁ nābhijānāmi buddhapūjāyidaṁ phalaṁ.
Ekamhi navute kappe eko āsi tamonudo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā punnāgapupphiyo thero imā gāthāyo
abhāsitthāti.
Punnāgapupphittherassa apadānaṁ samattaṁ.
Catutthaṁ ekadussadāyakattherāpadānaṁ (334)

[336] Nagare haṁsavatiyā ahosiṁ tiṇahārako
tiṇahārena jīvāmi tena posemi dārake.
Padumuttaro nāma jino sabbadhammāna pāragū
tamandhakāraṁ nāsetvā uppajji lokanāyako.
Sake ghare nisīditvā evaṁ cintesahaṁ tadā
buddho loke samuppanno deyyadhammo ca natthi me.
Idaṁ me sāṭakaṁ ekaṁ natthi me koci dāyako
dukkho nirayasamphasso ropayissāmi dakkhiṇaṁ.
Evāhaṁ cintayitvāna sakaṁ cittaṁ pasādayiṁ
ekaṁ dussaṁ gahetvāna buddhaseṭṭhassadāsahaṁ.
Ekaṁ dussaṁ daditvāna ukkuṭṭhiṁ sampavattayiṁ
yadi buddho tuvaṁ vīra tārehi maṁ mahāmuni.
Padumuttaro lokavidū āhutīnaṁ paṭiggaho
mama dānaṁ pakittento akā me anumodanaṁ.
Iminā ekadussena cetanāpaṇidhīhi ca
kappasatasahassāni vinipātaṁ na gacchati.
Chattiṁsakkhattu devindo devarajjaṁ karissati
tettiṁsakkhattu rājā ca cakkavatti bhavissati.
Padesarajjaṁ vipulaṁ gaṇanāto asaṅkhayaṁ
devaloke manusse vā saṁsaranto tuvaṁ bhave.
Rūpavā guṇasampanno anavakkantadehavā
akkhobhaṁ amitaṁ dussaṁ bhavissati 1 yathicchakaṁ.
1 Ma. labhissasi.
Idaṁ vatvāna sambuddho jalajuttamanāmako
nabhaṁ abbhuggami dhīro haṁsarājāva ambare.
Yaṁ yaṁ yonūpapajjāmi devattaṁ atha mānusaṁ
bhoge me ūnatā natthi ekadussassidaṁ phalaṁ.
Paduddhāre paduddhāre dussaṁ nibbattate mamaṁ
heṭṭhā dussamhi tiṭṭhāmi upari chadanaṁ mama.
Cakkavāḷamupādāya sakānanaṁ sapabbataṁ
icchamāno cahaṁ ajja dussehacchādayeyyahaṁ.
Teneva ekadussena saṁsaranto bhavābhave
suvaṇṇavaṇṇo hutvāna saṁsarāmi bhavābhave.
Vipākaṁ ekadussassa najjhagaṁ katthacikkhayaṁ
ayaṁ me antimā jāti vipaccati idhāpi me.
Satasahassito kappe yaṁ dussamadadiṁ tadā
duggatiṁ nābhijānāmi ekadussassidaṁ phalaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ekadussadāyako thero imā gāthāyo
abhāsitthāti.
Ekadussadāyakattherassa apadānaṁ samattaṁ.
Pañcamaṁ phussitakammiyattherāpadānaṁ (335)

[337] Vipassī nāma sambuddho lokajeṭṭho narāsabho
khīṇāsavehi sahito saṅghārāme vasī tadā.
Ārāmadvārā nikkhamma vipassī lokanāyako
saha satasahassehi aṭṭhakhīṇāsavehi so.
Ajinena nivatthohaṁ vākacīradharopi ca
kusumbhodakamādāya 1 sambuddhaṁ upasaṅkamiṁ.
Sakaṁ cittaṁ pasādetvā vedajāto katañjalī
kusumbhodakamādāya 2 buddhamabbhukiriṁ 3 ahaṁ.
Tena kammena sambuddho jalajuttamanāmako
mama kammaṁ pakittetvā agamā yena patthitaṁ.
Phussitā pañcasahassā yehi pūjesahaṁ jinaṁ
aḍḍhateyyasahassehi devarajjamakārayiṁ.
Aḍḍhateyyasahassehi cakkavatti ahosahaṁ
avasesena kammena arahattaṁ apāpuṇiṁ.
Devarājā yadāhosiṁ 4 manujādhipati tadā 5
taṁyeva nāmadheyyaṁ me phussito nāmahosahaṁ 6 .
Devabhūtassa santassa athāpi mānusassa vā
samantā byāmato mayhaṁ phussitaṁpi 7 pavassati.
1-2 Ma. kusumodakamādāya. 3 Ma. Yu. buddhamabbhukkiriṁ. 4 Ma. Yu. yathā homi.
5 Ma. yadā. Yu. yathā. 6 Ma. Yu. nāmahomahaṁ. 7 Ma. Yu. phussitaṁva.
Bhavā ugghāṭitā mayhaṁ kilesā jhāpitā mama
sabbāsavaparikkhīṇo phussitassa idaṁ phalaṁ.
Candanasseva me vasso 1 tathā gandho pavāyati
sārīrako 2 mama gandho aḍḍhakose pavāyati.
Dibbagandhaṁ sampavantaṁ puññakammasamaṅginaṁ
gandhaṁ ghatvāna jānanti phussito āgato idha.
Sākhā palāsakaṭṭhāni tiṇānipica sabbaso
mama saṅkappamaññāya gandho sampajjate khaṇe.
Satasahasse ito kappe candanaṁ abhipūjayiṁ
duggatiṁ nābhijānāmi phussitadassidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā phussitakammiyo thero imā gāthāyo
abhāsitthāti.
Phussitakammiyattherassa apadānaṁ samattaṁ.
Chaṭṭhaṁ pabhaṅkarattherāpadānaṁ (336)

[338] Padumuttarabhagavato lokajeṭṭhassa tādino
pavane 3 cetiyaṁ āsi vāḷamigasamākule.
1 Ma. kāyā. 2 Ma. sarīrato. Yu. sārīriko. 3 Ma. sabbattha vipine.
Na koci visahi gantuṁ cetiyaṁ abhivandituṁ
tiṇakaṭṭhalatonaddhaṁ paluggaṁ āsi cetiyaṁ.
Vanakammiko tadā āsiṁ pitāpetāmahenahaṁ 1
addasaṁ pavane thūpaṁ luggaṁ tiṇalatākulaṁ.
Disvānāhaṁ buddhathūpaṁ garucittaṁ upaṭṭhahiṁ
buddhaseṭṭhassa thūpoyaṁ paluggo acchati vane.
Nacchannaṁ nappaṭirūpaṁ jānantassa guṇāguṇaṁ
buddhathūpaṁ asodhetvā aññaṁ kammaṁ payojaye.
Tiṇakaṭṭhañca valliñca sodhayitvāna cetiye
vanditvā aṭṭha vārāni paṭikuṭiko agacchahaṁ.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agañchahaṁ.
Tattha me sukataṁ byamhaṁ sovaṇṇaṁ sappabhassaraṁ
saṭṭhiyojanamubbiddhaṁ tiṁsayojanavitthataṁ.
Tisatāni ca vārāni devarajjamakārayiṁ
pañcavīsatikkhattuñca cakkavatti ahosahaṁ.
Bhavābhave saṁsaranto mahābhogaṁ labhāmahaṁ
bhoge me ūnatā natthi sodhanāya idaṁ phalaṁ.
Siviyā 2 hatthikhandhena pavane gacchato mama 3
yaṁ yaṁ disāhaṁ gacchāmi saraṇaṁ sampajjate 4 vanaṁ.
1 Ma. pitumātumatenahaṁ. Yu. pitupetāmahenahaṁ. 2 Ma. sivikā. 3 Yu. mamaṁ.
4 Ma. sampate.
Khāṇuṁ vā kaṇṭakaṁ vāpi nāhaṁ passāmi cakkhunā
puññakammena saṁyutto sayamevāpanīyare.
Kuṭṭhaṁ gaṇḍo kilāso ca apamāro vitacchikā
daddu kaṇḍu ca me natthi sodhanāya idaṁ phalaṁ.
Aññaṁpi me acchariyaṁ buddhathūpamhi 1 sodhite
nābhijānāmi me kāye jātaṁ piḷakabindukaṁ.
Aññaṁpi me acchariyaṁ buddhathūpamhi sodhite
duve bhave saṁsarāmi devatte atha mānuse.
Aññaṁpi me acchariyaṁ buddhathūpamhi sodhite
suvaṇṇavaṇṇo sabbattha sappabhāso bhavāmahaṁ.
Aññaṁpi me acchariyaṁ buddhathūpamhi sodhite
amanāpaṁ vivajjeti manāpaṁ upatiṭṭhati.
Aññaṁpi me acchariyaṁ buddhathūpamhi sodhite
visuddhaṁ hoti me cittaṁ ekaggaṁ susamāhitaṁ.
Aññaṁpi me acchariyaṁ buddhathūpamhi sodhite
ekāsane nisīditvā arahattaṁ apāpuṇiṁ.
Satasahasse ito kappe yaṁ kammamakariṁ tadā
duggatiṁ nābhijānāmi sodhanāya idaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. Yu. buddhathūpassa sodhane.
Itthaṁ sudaṁ āyasmā pabhaṅkaro thero imā gāthāyo
abhāsitthāti.
Pabhaṅkarattherassa apadānaṁ samattaṁ.
Sattamaṁ tiṇakuṭidāyakattherāpadānaṁ (337)

[339] Nagare bandhumatiyā ahosiṁ parakammiko
parakammāyane yutto parabhattaṁ apassito.
Rahogato nisīditvā evaṁ cintesahaṁ 1 tadā
buddho loke samuppanno adhikāro ca natthi me.
Kālo gatiṁ me sodhetuṁ khaṇo me paṭipādito
dukkho nirayasamphasso apuññānaṁ hi pāṇinaṁ.
Evāhaṁ cintayitvāna kammasāmiṁ upāgamiṁ
ekāhaṁ kammaṁ yācitvā pavanaṁ pāvisiṁ ahaṁ.
Tiṇakaṭṭhañca valliñca āharitvānahantadā
tidaṇḍake ṭhapetvāna akaṁ tiṇakuṭiṁ ahaṁ.
Saṅghassatthāya kuṭikaṁ niyyādetvāna taṁ ahaṁ
tadaheyeva āgantvā kammāsāmiṁ upāgamiṁ.
Tena kammena sukatena tāvatiṁsaṁ agañchahaṁ
tattha me sukataṁ byamhaṁ tiṇakuṭikāya 2 nimmitaṁ.
1 Yu. --- cintesi tāvade. 2 Ma. kuṭikāya sunimmitaṁ.
Sahassakaṇḍo satageṇḍu dhajālu haritāmayo
satasahassaniyyūhā byamhe pātubhaviṁsu me.
Yaṁ yaṁ yonūpapajjāmi devattaṁ atha mānusaṁ
mama saṅkappamaññāya pāsādo upatiṭṭhati.
Bhayaṁ vā chambhitattaṁ vā lomahaṁso na vijjati
tāsaṁ mama na jānāmi tiṇakuṭikāyidaṁ phalaṁ
sīhā byagghā ca dīpi ca acchakokataracchayo 1
sabbe maṁ parivajjanti tiṇakuṭikāyidaṁ phalaṁ.
Siriṁsapā ca bhūtā ca ahikumbhaṇḍarakkhasā
tepi maṁ parivajjanti tiṇakuṭikāyidaṁ phalaṁ.
Na pāpasupinassāhaṁ sarāmi dassanaṁ mama
upaṭṭhitā sati mayhaṁ tiṇakuṭikāyidaṁ phalaṁ.
Tāyeva tiṇakuṭikāya anubhotvāna sampadā
gotamassa bhagavato dhammaṁ sacchikariṁ ahaṁ.
Ekanavute ito kappe yaṁ kammamakariṁ tadā
duggatiṁ nābhijānāmi tiṇakuṭikāyidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. acchakokataracchakā.
Itthaṁ sudaṁ āyasmā tiṇakuṭidāyako thero imā gāthāyo
abhāsitthāti.
Tiṇakuṭidāyakattherassa apadānaṁ samattaṁ.
Aṭṭhamaṁ uttareyyadāyakattherāpadānaṁ (338)

[340] Nagare haṁsavatiyā ahosiṁ brāhmaṇo tadā
ajjhāyiko mantadharo tiṇṇaṁ vedāna pāragū.
Purakkhato sasissehi jātimo 1 ca susikkhito
toyābhisecanatthāya nagarā nikkhamiṁ tadā.
Padumuttaro 2 lokavidū sabbadhammāna pāragū
khīṇāsavasahassehi nagaraṁ pāvisī jino.
Sucārurūpaṁ disvāna aneñjaṁ kāritaṁ viya
parivutaṁ arahantehi disvā cittaṁ pasādayiṁ.
Sirasi añjaliṁ katvā namassitvāna subbataṁ
pasannacitto sumano uttariyamadāsahaṁ.
Ubhohatthehi paggayha sāṭakaṁ ukkhipiṁ ahaṁ
yāvatā buddhaparisā tāva chādesi sāṭakaṁ.
Piṇḍacāraṁ carantassa mahābhikkhugaṇādino 3
chādaṁ karonto aṭṭhāsi hāsayanto mamaṁ tadā.
1 Ma. jātimā. 2 Ma. Yu. padumuttaro nāma jino. 3 Yu. mahābhikkhugaṇādinaṁ.
Gharato nikkhamantassa sayambhū aggapuggalo
vīthiyaṁ 1 ṭhitako satthā akāsi anumodanaṁ.
Pasannacitto sumano yo me pādāsi 2 sāṭakaṁ
tamahaṁ kittayissāmi suṇātha mama bhāsato.
Tiṁsakappasahassāni devaloke ramissati
paññāsakkhattuṁ devindo devarajjaṁ karissati.
Devaloke vasantassa puññakammasamaṅgino
samantā yojanasataṁ dussacchannaṁ bhavissati.
Chattiṁsakkhattuṁ rājā ca cakkavatti bhavissati
padesarajjaṁ vipulaṁ gaṇanāto asaṅkhayaṁ.
Bhave saṁsaramānassa puññakammasamaṅgino
manasā patthitaṁ sabbaṁ nibbattissati tāvade.
Koseyyakambalāni 3 ca khomakappāsikāni ca
mahagghāni ca dussāni paṭilacchatiyaṁ naro.
Manasā patthitaṁ sabbaṁ paṭilacchatiyaṁ naro
ekadussassa vipākaṁ anubhossati sabbadā.
So pacchā pabbajitvāna sukkamūlena codito
gotamassa bhagavato dhammaṁ sacchikarissati.
Aho me sukataṁ kammaṁ sambuddhassa 4 mahesino
ekāhaṁ sāṭakaṁ datvā pattomhi amataṁ padaṁ.
1 Ma. Yu. vithiyaṁva ṭhito satthā akāme anumodanaṁ. 2 Ma. adāsi.
3 Ma. koseyyakambaliyāni. 4 Ma. Yu. sabbaññussa.
Maṇḍape rukkhamūle vā vasato suññake ghare
dhāreti dussachadanaṁ samantā byāmato mama.
Aviññattaṁ 1 nivāsemi cīvaraṁ paccayañcahaṁ
lābhimhi 2 annapānassa uttareyyassidaṁ phalaṁ.
Satasahasse ito kappe yaṁ kammamakariṁ tadā
duggatiṁ nābhijānāmi vatthadānassidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā uttareyyadāyako thero imā gāthāyo
abhāsitthāti.
Uttareyyadāyakattherassa apadānaṁ samattaṁ.
Navamaṁ dhammassavaniyattherāpadānaṁ (339)

[341] Padumuttaro nāma jino sabbadhammāna pāragū
catusaccaṁ pakāsento santāreti 3 bahujjanaṁ.
Ahaṁ tena samayena jaṭilo uggatāpano
dhunanto vākacīrāni gacchāmi ambare tadā.
Buddhaseṭṭhassa upari gantuṁ na visahāmahaṁ
pakkhīva selamāpajja 4 gamanaṁ na labhintadā 5 .
1 Yu. aviññatti nisevāmi. 2 Ma. lābhī. Yu. lābhīhi. 3 Ma. santāresi bahuṁ janaṁ.
4 Ma. Yu. selamāsajja. 5 Ma. na labhāmahaṁ. Yu. na labhe tadā.
Na me idaṁ bhūtapubbaṁ iriyassa vikopanaṁ
dake yathā ummilitvā evaṁ gacchāmi ambare.
Uḷārabhūto manujo ca heṭṭhāsīno bhavissati
handa metaṁ gavesissaṁ api atthaṁ labheyyahaṁ.
Orohanto antalikkhā saddamassosi satthuno
aniccataṁ kathentassa tamahaṁ uggahiṁ tadā.
Aniccasaññamuggayha agamāsiṁ mamassamaṁ
yāvatāyuṁ vasitvāna tattha kālaṁ kato ahaṁ.
Carime vattamānamhi taṁ dhammassavanaṁ sariṁ
tena kammena sukatena tāvatiṁsaṁ agacchahaṁ.
Tiṁsakappasahassāni devaloke ramiṁ ahaṁ
ekapaññāsakkhattuñca devarajjamakārayiṁ.
Ekasattatikkhattuñca cakkavatti ahosahaṁ
padesarajjaṁ vipulaṁ gaṇanāto asaṅkhayaṁ.
Pitughare nisīditvā samaṇo bhāvitindriyo
gāthāya paridīpento aniccavatthudāhari 1 .
Anussarāmi taṁ saññaṁ saṁsaranto bhavābhave
na koṭiṁ paṭivijjhāmi nibbānaṁ accutaṁ padaṁ.
Aniccā vata saṅkhārā uppādavayadhammino
uppajjitvā nirujjhanti tesaṁ vūpasamo sukho.
1 Ma. aniccatamudāhari.
Saha gāthaṁ suṇitvāna pubbakammaṁ anussariṁ
ekāsane nisīditvā arahattaṁ apāpuṇiṁ.
Jātiyā sattavassohaṁ arahattaṁ apāpuṇiṁ
upasampādayi buddho guṇamaññāya cakkhumā.
Dārakova ahaṁ santo karaṇīyaṁ samāpayiṁ
kiṁ me karaṇīyaṁ ajja sakyaputtassa sāsane.
Satasahasse ito kappe yaṁ kammamakariṁ tadā
duggatiṁ nābhijānāmi saddhammassavane phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā dhammassavaniyo thero imā gāthāyo
abhāsitthāti.
Dhammassavaniyattherassa apadānaṁ samattaṁ.
Dasamaṁ ukkhittapadumiyattherāpadānaṁ (340)

[342] Nagare haṁsavatiyā ahosiṁ māliko tadā
ogāhetvā padumasaraṁ sattapatte 1 ocināmahaṁ.
Padumuttaro nāma jino sabbadhammāna pāragū
saha satasahassehi santacittehi tādibhi.
1 Ma. sabbattha satapattanti dissati.
Khīṇāsavehi suddhehi chaḷabhiññehi jhāyibhi
mama vuḍḍhiṁ samanvesaṁ āgañchi purisuttamo 1 .
Disvānahaṁ devadevaṁ sayambhuṁ lokanāyakaṁ
vaṇṭe chetvā sattapattaṁ ukkhipiṁ ambare tadā.
Yadi buddho tuvaṁ dhīra lokajeṭṭho narāsabho
sayaṁ gantvā sattapatto matthake dhārayantu te.
Adhiṭṭhahi mahāvīro lokajeṭṭho narāsabho
buddhassa ānubhāvena matthake dhārayiṁsu te.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agacchahaṁ.
Tattha me sukataṁ byamhaṁ sattapattanti vuccati
saṭṭhiyojanamubbiddhaṁ tiṁsayojanavitthataṁ.
Sahassakkhattuṁ devindo devarajjamakārayiṁ
pañcasattatikkhattuñca cakkavatti ahosahaṁ.
Padesarajjaṁ vipulaṁ gaṇanāto asaṅkhayaṁ
anubhomi sakaṁ kammaṁ pubbe sukatamattano.
Tenevekapadumena anubhotvāna sampadā
gotamassa bhagavato dhammaṁ sacchikariṁ ahaṁ.
Kilesā jhāpitā mayhaṁ bhavā sabbe samūhatā
nāgova bandhanaṁ chetvā viharāmi anāsavo.
1 Ma. -- mama santikaṁ.
Satasahasse ito kappe yaṁ pupphamabhipūjayiṁ
duggatiṁ nābhijānāmi ekapadumassidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ukkhittapadumiyo thero imā gāthāyo
abhāsitthāti.
Ukkhittapadumiyattherassa apadānaṁ samattaṁ.
Uddānaṁ
gandhodakaṁ pūjanī ca punnāgaṁ ekadussikā
phussito ca pabhaṅkaro kuṭido uttarīyako.
Savanaṁ ekapadumi gāthāyo sabbapiṇḍitā
ekagāthāsatañceva catutāḷīsameva ca.
Gandhodakavaggo catuttiṁso.
---------
Pañcattiṁso ekapadumavaggo
paṭhamaṁ ekapadumiyattherāpadānaṁ (341)

[343] Padumuttaro nāma jino sabbadhammāna pāragū
bhavābhave vibhāvento tāreti 1 janataṁ bahuṁ.
Haṁsarājā tadā homi dijānaṁ pavaro ahaṁ
jātassaraṁ samogayha kīḷāmi haṁsakīḷitaṁ.
Padumuttaro lokavidū āhutīnaṁ paṭiggaho
jātassarassa upari āgacchi tāvade jino.
Disvānahaṁ devadevaṁ sayambhuṁ lokanāyakaṁ
vaṇṭe chetvāna padumaṁ sattapattaṁ manoramaṁ.
Mukhatuṇḍena paggayha vippasannena 2 cetasā
ukkhipitvāna gagane buddhaseṭṭhaṁ apūjayiṁ.
Padumuttaro lokavidū āhutīnaṁ paṭiggaho
antalikkhe ṭhito satthā akāsi 3 anumodanaṁ.
Iminā ekapadumena cetanāpaṇidhīhi ca
kappānaṁ satasahassaṁ vinipātaṁ na gacchasi.
Idaṁ vatvāna sambuddho jalajuttamanāmako
mama kammaṁ pakittetvā agamā yena patthitaṁ.
1 Ma. tāresi. 2 Ma. Yu. pasanno lokanāyake. 3 Ma. Yu. akāme.
Satasahasse ito kappe yaṁ kammamakariṁ tadā
duggatiṁ nābhijānāmi buddhapūjāyidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ekapadumiyo thero imā gāthāyo
abhāsitthāti.
Ekapadumiyattherassa apadānaṁ samattaṁ.
Dutiyaṁ tīṇuppalamāliyattherāpadānaṁ (342)