[234] Nagare bandhumatiyā kumbhakāro ahaṁ tadā
bhājanaṁ anupālesiṁ bhikkhusaṅghassa tāvade.
Ekanavutito kappe bhājanaṁ anupālayiṁ
duggatiṁ nābhijānāmi bhājanassa idaṁ phalaṁ.
Tepaññāse ito kappe anantajalināmako
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā bhājanadāyako 1 thero imā gāthāyo
abhāsitthāti.
Bhājanadāyakattherassa apadānaṁ samattaṁ.
Tatiyaṁ sālapupphiyattherāpadānaṁ (233)

[235] Aruṇavatiyā nagare ahosiṁ puviko 2 tadā
mama dvārena gacchantaṁ sikhinaṁ addasaṁ jinaṁ.
Buddhassa pattaṁ paggayha sālapupphaṁ adāsahaṁ
sammaggatassa buddhassa vippasannena cetasā.
1 Ma. bhājanapālako. 2 Ma. pūpiko. Yu. pūviko.
Ekattiṁse ito kappe yaṁ pupphamabhidāsahaṁ
duggatiṁ nābhijānāmi sālapupphassidaṁ phalaṁ.
Ito cuddasakappamhi ahosiṁ amitañjalo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sālapupphiyo thero imā gāthāyo
abhāsitthāti.
Sālapupphiyattherassa apadānaṁ samattaṁ.
Catutthaṁ kilañjadāyakattherāpadānaṁ (234)

[236] Tivarāyaṁ pure ramme naḷakāro ahaṁ tadā
siddhatthe lokapajjote pasannā janatā tahiṁ.
Pūjatthaṁ lokanāthassa kilañjaṁ pariyesati
buddhapūjaṁ karontānaṁ kilañjaṁ adadaṁ 1 ahaṁ.
Catunavute ito kappe yaṁ kammamakariṁ tadā
duggatiṁ nābhijānāmi kilañjassa idaṁ phalaṁ.
Sattasattatikappamhi rājā āsi jalandharo 2
sattaratanasampanno cakkavatti mahabbalo.
1 Ma. adadiṁ. 2 Yu. jutindharo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā kilañjadāyako thero imā gāthāyo
abhāsitthāti.
Kilañjadāyakattherassa apadānaṁ samattaṁ.
Pañcamaṁ vedidāyakattherāpadānaṁ (235)

[237] Vipassino bhagavato bodhiyā pādaputtame
pasannacitto sumano kāresiṁ vedikaṁ ahaṁ.
Ekanavute ito kappe kāresiṁ vedikaṁ ahaṁ
duggatiṁ nābhijānāmi vedikāya idaṁ phalaṁ.
Ito ekādase kappe ahosiṁ sūriyassamo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā vedidāyako thero imā gāthāyo
abhāsitthāti.
Vedidāyakattherassa apadānaṁ samattaṁ.
Chaṭṭhaṁ vaṇṇakārakattherāpadānaṁ (236)

[238] Nagare aruṇavatiyā vaṇṇakāro ahaṁ tadā
cetiye dussabhaṇḍāni nānāvaṇṇaṁ rajemahaṁ 1 .
Ekattiṁse ito kappe yaṁ vaṇṇaṁ rajayiṁ tadā
duggatiṁ nābhijānāmi vaṇṇadānassidaṁ phalaṁ.
Ito tevīsatikappe candasamasanāmako 2
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā vaṇṇakārako thero imā gāthāyo
abhāsitthāti.
Vaṇṇakārakattherassa apadānaṁ samattaṁ.
Sattamaṁ piyālapupphiyattherāpadānaṁ (237)

[239] Migaluddho pure āsiṁ araññe kānane ahaṁ
piyālaṁ pupphitaṁ disvā gatamagge khipiṁ ahaṁ.
Buddhassa pattaṁ paggayha piyālapupphamadāsahaṁ
magge gatassa buddhassa vippasannena cetasā.
1 Ma. Yu. rajesahaṁ. 2 Ma. vaṇṇasamasanāmako. Yu. candūpamasanāmako.
Ekanavute ito kappe yaṁ pupphamabhipūjayiṁ
duggatiṁ nābhijānāmi buddhapūjāyidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā piyālapupphiyo thero imā gāthāyo
abhāsitthāti.
Piyālapupphiyattherassa apadānaṁ samattaṁ.
Aṭṭhamaṁ ambayāgadāyakattherāpadānaṁ (238)

[240] Sake sippe apatthaddho 1 agamaṁ kānanaṁ ahaṁ
sambuddhaṁ yantaṁ 2 disvāna ambayāgaṁ 3 adāsahaṁ.
Ekanavute ito kappe yaṁ dānamadadiṁ tadā
duggatiṁ nābhijānāmi ambayāgassidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ambayāgadāyako thero imā gāthāyo
abhāsitthāti.
Ambayāgadāyakattherassa apadānaṁ samattaṁ.
1 Yu. avatthaddho. 2 Yu. santaṁ. 3 Po. ambayāguṁ.
Navamaṁ jagatikārakattherāpadānaṁ (239)

[241] Nibbute lokanāthamhi atthadassīnaruttame
jagatī kāritā mayhaṁ buddhassa thūpamuttame.
Aṭṭhārase kappasate yaṁ kammamakariṁ tadā
duggatiṁ nābhijānāmi jagatiyā idaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā jagatikārako thero imā gāthāyo
abhāsitthāti.
Jagatikārakattherassa apadānaṁ samattaṁ.
Dasamaṁ vāsidāyakattherāpadānaṁ (240)

[242] Kammārohaṁ pure āsiṁ tivarāyaṁ puruttame
ekā vāsi mayā dinnā sayambhuṁ aparājitaṁ.
Catunavute ito kappe yaṁ vāsimadadiṁ tadā
duggatiṁ nābhijānāmi vāsidānassidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā vāsidāyako thero imā gāthāyo
abhāsitthāti.
Vāsidāyakattherassa apadānaṁ samattaṁ.
Uddānaṁ
udakāsani bhājaniyo sālapupphī kilañjado
vedikā vaṇṇakāro ca piyālāmbayāgado
jagatī vāsidāyī ca gāthā tiṁsa ca aṭṭha cāti.
Udakāsanadāyivaggo catubbīso.
----------
Pañcavīso tuvaradāyivaggo
paṭhamaṁ tuvaraṭṭhidāyakattherāpadānaṁ (241)

[243] Migaluddho pure āsiṁ araññe kānane mahā 1
taṁ disvā rudhiramādāya 2 saṅghassa adadiṁ ahaṁ.
Ekanavute ito kappe yaṁ dānamadadiṁ tadā
duggatiṁ nābhijānāmi tuvaraṭṭhissidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā tuvaraṭṭhidāyako thero imā gāthāyo
abhāsitthāti.
Tuvaraṭṭhidāyakattherassa apadānaṁ samattaṁ.
Dutiyaṁ nāgakesariyattherāpadānaṁ (242)