[214] Araññikassa jhāyino mettacittatapassino 1
dhammassa 2 bhāvitattassa adāsiṁ pānadhiṁ ahaṁ.
1 Ma. Yu. araññikassa isino cirarattatapassino. 2 Ma. vuddhassa. Yu. vaddhassa.
Tena kammena dipadinda lokajeṭṭha narāsabha
dibbayānaṁ anubhomi pubbakammassidaṁ phalaṁ.
Catunavute 1 ito kappe yaṁ kammamakariṁ tadā
duggatiṁ nābhijānāmi pānadhissa idaṁ phalaṁ.
Sattasattatimhito kappe aṭṭha āsiṁsu khattiyā
suyānā nāma nāmena cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā pānadhidāyako thero imā gāthāyo
abhāsitthāti.
Pānadhidāyakattherassa apadānaṁ samattaṁ.
Tatiyaṁ saccasaññakattherāpadānaṁ (213)

[215] Vessabhū nāma bhagavā 2 bhikkhusaṅghapurakkhato
deseti ariyasaccāni nibbāpento mahājanaṁ.
Paramakāruññapattomhi samitiṁ agamāsahaṁ
sohaṁ nisinnako santo dhammaṁ assosi satthuno
tassāhaṁ dhammaṁ sutvāna devalokaṁ agacchahaṁ
tiṁsa kappāni devesu avasiṁ tatthahaṁ pure.
1 Yu. ekūnavute. 2 Ma. Yu. vessabhū tamhi samaye.
Ekattiṁse ito kappe yaṁ saññamalabhiṁ tadā
duggatiṁ nābhijānāmi saccasaññāyidaṁ phalaṁ.
Chabbīsamhi ito kappe eko āsiṁ janādhipo
ekaphussitanāmova cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā saccasaññako thero imā gāthāyo
abhāsitthāti.
Saccasaññakattherassa apadānaṁ samattaṁ.
Catutthaṁ ekasaññakattherāpadānaṁ (214)

[216] Dumagge paṁsukūlikaṁ laggaṁ disvāna satthuno
añjaliṁ paggahetvāna paṁsukūlaṁ avandihaṁ.
Ekattiṁse ito kappe yaṁ saññamalabhiṁ tadā
duggatiṁ nābhijānāmi buddhapūjāyidaṁ phalaṁ.
Pañcavīse ito kappe eko āsiṁ janādhipo
amitābhoti nāmena cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ekasaññako thero imā gāthāyo
abhāsitthāti.
Ekasaññakattherassa apadānaṁ samattaṁ.
Pañcamaṁ raṁsisaññakattherāpadānaṁ (215)

[217] Udentaṁ sataraṁsīva pītaraṁsīva 1 bhāṇumaṁ
byagghusabhaṁva pavaraṁ sujātaṁ pabbatantare.
Buddhassa ānubhāvo so jalate pabbatantare
raṁse cittaṁ pasādetvā kappaṁ saggamhi modahaṁ.
Avasesesu kappesu kusalaṁ karitaṁ 2 mayā
tena cittappasādena buddhānussatiyāpica.
Tiṁsakappasahasseto yaṁ saññamalabhiṁ tadā
duggatiṁ nābhijānāmi buddhasaññāyidaṁ phalaṁ.
Sattapaññāsakappamhi eko āsiṁ janādhipo
sujāto nāma nāmena cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā raṁsisaññako thero imā gāthāyo
abhāsitthāti.
Raṁsisaññakattherassa apadānaṁ samattaṁ.
1 Yu. vītaraṁsīva. 2 Ma. caritaṁ. Yu. tīritaṁ.
Chaṭṭhaṁ sandhitattherāpadānaṁ (216)

[218] Assatthe haritobhāse saṁvirūḷhamhi pādape
ekaṁ buddhagataṁ saññaṁ alabhitthaṁ 1 paṭissato.
Ekattiṁse ito kappe yaṁ saññamalabhiṁ tadā [2]-
tassā saññāya vāhasā patto me āsavakkhayo.
Ito terasakappamhi vaniddho 3 nāma khattiyo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sandhito thero imā gāthāyo
abhāsitthāti.
Sandhitattherassa apadānaṁ samattaṁ.
Sattamaṁ tālavaṇṭadāyakattherāpadānaṁ (217)

[219] Tālavaṇṭaṁ mayā dinnaṁ tissassa dibbacakkhuno 4
gimhaṁ nibbāpanatthāya pariḷāhopasantiyā.
Sannibbāpemi rāgaggiṁ dosaggiñca taduttariṁ
nibbāpemi ca mohaggiṁ tālavaṇṭassidaṁ phalaṁ.
1 Ma. alabhiṁhaṁ. 2 Yu. duggatiṁ nābhijānāmi buddhasaññāyidaṁ phalaṁ.
3 Ma. Yu. dhaniṭṭho. 4 Po. Ma. Yu. tissassādiccabandhuno.
Kilesā jhāpitā mayhaṁ bhavā sabbe samūhatā
dhāremi antimaṁ dehaṁ sammāsambuddhasāsane.
Dvenavute ito kappe yaṁ kammamakariṁ tadā
duggatiṁ nābhijānāmi tālavaṇṭassidaṁ phalaṁ.
Tesaṭṭhimhi ito kappe mahārāmasanāmako 1
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā tālavaṇṭadāyako thero imā gāthāyo
abhāsitthāti.
Tālavaṇṭadāyakattherassa apadānaṁ samattaṁ.
Aṭṭhamaṁ akkantasaññakattherāpadānaṁ (218)

[220] Kusāṭakaṁ gahetvāna upajjhāyassa pārupe 2
mantañca anusikkhāmi gaṇḍabhedassa 3 pattiyā.
Addasaṁ virajaṁ buddhaṁ āhutīnaṁ paṭiggahaṁ
usabhaṁ pavaraṁ aggaṁ tissaṁ buddhaṁ gajuttamaṁ 4 .
Kusāṭakaṁ pattharitaṁ akkamantaṁ naruttamaṁ
samuggataṁ mahāvīraṁ lokajeṭṭhaṁ narāsabhaṁ.
1 Yu. mahārāmāsunāmakā. 2 Ma. Yu. upajjhāyassahaṁ pure. ... mahabbalā
3 Ma. ganthādosassa. 4 Ma. gaṇuttamaṁ.
Disvā taṁ lokapajjotaṁ vimalaṁ candasannibhaṁ
avandiṁ satthuno pāde vippasannena cetasā.
Catunavute ito kappe yaṁ adāsiṁ kusāṭakaṁ
duggatiṁ nābhijānāmi kusāṭakassidaṁ phalaṁ.
Sattatiṁse ito kappe eko āsiṁ janādhipo
sunando nāma nāmena cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā akkantasaññako thero imā gāthāyo
abhāsitthāti.
Akkantasaññakattherassa apadānaṁ samattaṁ.
Navamaṁ sappidāyakattherāpadānaṁ (219)

[221] Nisinno pāsādavare nārīgaṇapurakkhato
byādhitaṁ samaṇaṁ disvā atināmesahaṁ gharaṁ.
Upaviṭṭhaṁ mahāvīraṁ devadevaṁ narāsabhaṁ
sappitelaṁ mayā dinnaṁ siddhatthassa mahesino.
Passaddhadarathaṁ disvā vippasannamukhindriyaṁ
vanditvā satthuno pāde anusaṁsāvayiṁ pure.
Disvā maṁ supasannantaṁ iddhiyā pāramiṁ gato
nabhaṁ abbhuggami vīro haṁsarājāva ambare.
Catunavute ito kappe yaṁ dānamadadiṁ tadā
duggatiṁ nābhijānāmi sappitelassidaṁ phalaṁ.
Ito sattarase kappe dutidevasanāmako
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sappidāyako thero imā gāthāyo
abhāsitthāti.
Sappidāyakattherassa apadānaṁ samattaṁ.
Dasamaṁ pāpanivāriyattherāpadānaṁ (220)

[222] Piyadassissa bhagavato caṅkamaṁ sodhitaṁ mayā
naḷakehi paṭicchannaṁ vātātapanivāraṇaṁ.
Pāpaṁ vivajjanatthāya kusalassūpasampadā
kilesānaṁ pahānāya padahiṁ satthusāsane.
Ito ekādase kappe aggitejoti 1 vissuto
sattaratanasampanno cakkavatti mahabbalo.
1 Ma. Yu. aggidevoti.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā pāpanivāriyo thero imā gāthāyo
abhāsitthāti.
Pāpanivāriyattherassa apadānaṁ samattaṁ.
Uddānaṁ
hatthi pānadhi saccañca ekasaññi ca raṁsiyo
sandhito tālavaṇṭi ca tathā akkantasaññako
sappi pāpanivārī ca catupaññāsa gāthakāti.
Hatthivaggo bāvīsatimo.
---------
Tevīsatimo ālambanadāyakavaggo
paṭhamaṁ ālambanadāyakattherāpadānaṁ (221)

[223] Atthadassissa bhagavato lokajeṭṭhassa tādino
ālambanaṁ mayā dinnaṁ dipadindassa tādino.
Dharaṇiṁ paṭipajjāmi vipulaṁ sāgarapparaṁ 1
pāṇesu ca issariyaṁ vattemi vasudhāya ca.
Kilesā jhāpitā mayhaṁ bhavā sabbe samūhatā
tisso vijjā anuppattā kataṁ buddhassa sāsanaṁ.
Ito dvesaṭṭhikappamhi tayo āsiṁsu khattiyā
ekādassitanāmā 2 te cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ālambanadāyako thero imā gāthāyo
abhāsitthāti.
Ālambanadāyakattherassa apadānaṁ samattaṁ.
Dutiyaṁ ajinadāyakattherāpadānaṁ (222)