[204] Suvaṇṇavaṇṇo bhagavā sataraṁsī pabhāvaro 3
caṅkamanaṁ samārūḷho mettacitto sikhi 4 sato.
Pasannacitto sumano thometvā 5 ñāṇamuttamaṁ
minelapupphaṁ paggayha buddhassa abhiropayiṁ.
1 Ma. aruṇapālīti. 2 Yu. vinela .... 3 Ma. Yu. patāpavā. 4 Yu. sikhī sito.
5 Ma. Yu. vanditvā.
Ekattiṁse ito kappe yaṁ pupphamabhipūjayiṁ
duggatiṁ nābhijānāmi buddhapūjāyidaṁ phalaṁ.
Ekūnatiṁse kappamhi sumeghaghananāmako
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā minelapupphiyo thero imā gāthāyo
abhāsitthāti.
Minelapupphiyattherassa apadānaṁ samattaṁ.
Tatiyaṁ kiṁkaṇikapupphiyattherāpadānaṁ (203)

[205] Kañcanagghiyasaṅkāso sabbaññū lokanāyako
odakaṁ dahamoggayha sināyi lokanāyako.
Paggayha kiṁkaṇipupphaṁ vipassissābhiropayiṁ
udaggacitto sumano dipadindassa tādino.
Ekanavute ito kappe yaṁ pupphamabhiropayiṁ
duggatiṁ nābhijānāmi buddhapūjāyidaṁ phalaṁ.
Sattavīsatikappamhi rājā bhimaratho ahu
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā kiṁkaṇikapupphiyo thero imā gāthāyo
abhāsitthāti.
Kiṁkaṇikapupphiyattherassa apadānaṁ samattaṁ.
Catutthaṁ taraṇiyattherāpadānaṁ (204)

[206] Atthadassī tu bhagavā dipadindo narāsabho
purakkhato sāvakehi gaṅgātīraṁ upāgami.
Samatitti kākapeyyā gaṅgā āsi duruttarā
uttārayiṁ bhikkhusaṅghaṁ buddhañca dipaduttamaṁ.
Aṭṭhārase kappasate yaṁ kammamakariṁ tadā
duggatiṁ nābhijānāmi taraṇāya idaṁ phalaṁ.
Terasito kappasate pañca sabbobhavā ahuṁ
sattaratanasampannā [1]- cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā taraṇiyo thero imā gāthāyo
abhāsitthāti.
Taraṇiyattherassa apadānaṁ samattaṁ.
1 Ma. pacchime ca bhave asmiṁ jhātohaṁ brāhmaṇe kule
saddhiṁ tīhi sahāyehi pabbajiṁ satathusāsane.
Pañcamaṁ nigguṇḍipupphiyattherāpadānaṁ (205)

[207] Vipassissa bhagavato āsiṁ ārāmiko ahaṁ
nigguṇḍipupphaṁ paggayha buddhassa abhiropayiṁ.
Ekanavute ito kappe yaṁ pupphamabhiropayiṁ.
Duggatiṁ nābhijānāmi buddhapūjāyidaṁ phalaṁ.
Pañcattiṁse 1 ito kappe eko āsiṁ janādhipo
mahāpatāpo nāmena cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā nigguṇḍipupphiyo thero imā gāthāyo
abhāsitthāti.
Nigguṇḍipupphiyattherassa apadānaṁ samattaṁ.
Chaṭṭhaṁ udakadāyakattherāpadānaṁ [206]

[208] Bhuñjantaṁ samaṇaṁ disvā vippasannamanāvilaṁ
ghaṭenodakamādāya siddhatthassa adāsahaṁ.
Nimmalo homahaṁ ajja vimalo khīṇasaṁsayo
bhave nibbattamānamhi phalaṁ nibbattate mama.
1 Ma. pañcavīse.
Catunavute ito kappe udakaṁ 1 adadiṁ tadā
duggatiṁ nābhijānāmi udakadānassidaṁ phalaṁ.
Ekasaṭṭhimhito kappe ekova vimalo ahu
sattaratanasampanno cakkavatti mahabbalo
paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā udakadāyako thero imā gāthāyo
abhāsitthāti.
Udakadāyakattherassa apadānaṁ samattaṁ.
Sattamaṁ salaḷamāliyattherāpadānaṁ (207)

[209] Kaṇikāraṁva jotantaṁ nisinnaṁ pabbatantare
obhāsentaṁ disā sabbā siddhatthaṁ narasārathiṁ.
Dhanuṁ abejjhaṁ 2 katvāna usuṁ sandhāyahaṁ 3 tadā
pupphaṁ savaṇṭaṁ chetvāna buddhassa abhiropayiṁ.
Catunavute ito kappe yaṁ pupphamabhiropayiṁ
duggatiṁ nābhijānāmi buddhapūjāyidaṁ phalaṁ.
Ekapaññāsito kappe eko āsi jutindharo
sattaratanasampanno cakkavatti mahabbalo.
1 Ma. udakaṁ yamadāsahaṁ. Yu. udakaṁ yaṁ tadā ahaṁ. 2 Ma. advejjhaṁ. Yu. adejjhaṁ.
3 Ma. sannayhahaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā salaḷamāliyo thero imā gāthāyo
abhāsitthāti.
Salaḷamāliyattherassa apadānaṁ samattaṁ.
Aṭṭhamaṁ koraṇḍapupphiyattherāpadānaṁ (208)

[210] Akkantañca padaṁ disvā cakkālaṅkārabhūsitaṁ
padenānupadaṁ yanto vipassissa mahesino.
Koraṇḍaṁ pupphitaṁ disvā samūlaṁ pūjitaṁ mayā
haṭṭho haṭṭhena cittena avandiṁ padamuttamaṁ.
Ekanavute ito kappe yaṁ pupphamabhipūjayiṁ
duggatiṁ nābhijānāmi buddhapūjāyidaṁ 1 phalaṁ.
Sattapaññāsakappamhi eko vītamalo ahu
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā koraṇḍapupphiyo thero imā gāthāyo
abhāsitthāti.
Koraṇḍapupphiyattherassa apadānaṁ samattaṁ.
1 Yu. padapūjāyidaṁ phalaṁ.
Navamaṁ ādhāradāyakattherāpadānaṁ (209)

[211] Ādhārakaṁ mayā dinnaṁ sikhino lokabandhuno
dhāremi paṭhaviṁ sabbaṁ kevalaṁ vasudhaṁ imaṁ.
Kilesā jhāpitā mayhaṁ bhavā sabbe samūhatā
dhāremi antimaṁ dehaṁ sammāsambuddhasāsane.
Sattavīse ito kappe ahesuṁ caturo janā
samantavaruṇā 1 nāma cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ādhāradāyako thero imā gāthāyo
abhāsitthāti.
Ādhāradāyakattherassa apadānaṁ samattaṁ.
Dasamaṁ pāpanivāriyattherāpadānaṁ 2 (210)

[212] Tissassa 3 hi 4 bhagavato devadevassa tādino.
Ekacchattaṁ mayā dinnaṁ vippasannena cetasā.
Nivutaṁ hoti me pāpaṁ kusalassūpasampadā
ākāse chattaṁ dhārenti pubbakammassidaṁ phalaṁ.
1 Ma. samantavaraṇā nāma. 2 Yu. vātātapanivāriya .... 3 Yu. tissassāhaṁ.
4 Ma. tu.
Carimaṁ vattate mayhaṁ bhavā sabbe samūhatā
dhāremi antimaṁ dehaṁ sammāsambuddhasāsane.
Dvenavute ito kappe yaṁ chattamadadiṁ tadā
duggatiṁ nābhijānāmi chattadānassidaṁ phalaṁ.
Dvesattati ito kappe aṭṭhāsiṁsu janādhipā
mahānidānanāmena rājāno cakkavattino.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā pāpanivāriyo thero imā gāthāyo
abhāsitthāti.
Pāpanivāriyattherassa apadānaṁ samattaṁ.
Uddānaṁ
kaṇikāro minelañca kiṁkaṇi tāraṇena ca
nigguṇḍipupphaṁ dakado salaḷo ca kuraṇḍako
ādhāradānaṁ pāpañca aṭṭhatāḷīsa gāthakā.
Kaṇikārapupphiyavaggo ekavīsatimo.
-----------------
Bāvīsatimo hatthivaggo
paṭhamaṁ hatthidāyakattherāpadānaṁ (211)

[213] Siddhatthassa bhagavato dipadindassa tādino
nāgaseṭṭho mayā dinno īsādanto urūḷhavo.
Uttamatthaṁ anubhomi santipadamanuttaraṁ
nāgadānaṁ mayā dinnaṁ sabbalokahitesino.
Catunavute ito kappe yaṁ nāgamadadiṁ tadā
duggatiṁ nābhijānāmi nāgadānassidaṁ phalaṁ.
Aṭṭhasattatikappamhi soḷasāsiṁsu khattiyā
samantapāsādikā nāma cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā hatthidāyako thero imā gāthāyo
abhāsitthāti.
Hatthidāyakattherassa apadānaṁ samattaṁ.
Dutiyaṁ pānadhidāyakattherāpadānaṁ (212)