[124] Himavantassa avidūre kukkuro nāma pabbato
vemajjhe tassa vasati brāhmaṇo mantapāragū.
Pañca sissasahassāni parivārenti maṁ sadā
pubbuṭṭhāyī ca te āsuṁ mantesu ca visāradā.
Buddho loke samuppanno taṁ vijānātha no bhavaṁ
asīti byañjanānassa battiṁsa varalakkhaṇā.
Byāmappabho jinavaro ādiccova virocati
sissānaṁ vacanaṁ sutvā brāhmaṇo mantapāragū.
Assamā abhinikkhamma disaṁ pucchati brāhmaṇo 2
yamhi dese mahāvīro vasati lokanāyako.
Tāhaṁ disvā 3 namassissaṁ jinaṁ appaṭipuggalaṁ
udaggacitto sumano pūjesiṁ taṁ tathāgataṁ.
1 Ma. vītamalā sanāmā ca. Yu. cīnamālā sanāmā ca. 2 Ma. sissako.
3 Ma. disaṁ. Yu. na hi disvāna passissaṁ.
Etha sissā gamissāma dakkhissāma tathāgataṁ
vanditvā satthuno pāde sossāma jinasāsanaṁ.
Ekāhaṁ abhinikkhamma byādhiṁ paṭilabhiṁ ahaṁ
byādhinā pīḷito santo sālanto sayituṁ gamiṁ 1 .
Sabbe sisse samānetvā apucchiṁ te tathāgataṁ
kīdisaṁ lokanāthassa guṇaṁ paramabuddhino.
Te me puṭṭhā byākariṁsu yathā dassāvino tathā
sakkaccaṁ buddhaseṭṭhaṁ taṁ dassesuṁ mama sammukhā.
Tesāhaṁ vacanaṁ sutvā sakaṁ cittaṁ pasādayiṁ
pupphehi thūpaṁ karitvāna tattha kālaṁ kato ahaṁ.
Te me sarīraṁ jhāpetvā agamuṁ buddhasantike 2
añjaliṁ paggahitvāna satthāraṁ abhivādayuṁ.
Pupphehi thūpaṁ karitvāna sugatassa mahesino
kappānaṁ satasahassaṁ duggatiṁ nūpapajjahaṁ.
Cattāḷīsasahassamhi kappe soḷasa khattiyā
nāmenaggisamā nāma cakkavattī mahabbalā.
Vīsakappasahassamhi rājāno cakkavattino
ghaṭāsanasamā nāma aṭṭhattiṁsa mahīpatī
paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. sālaṁ vāsayituṁ gamiṁ. Yu. sālaṁ vesayituṁ gamiṁ. 2 Ma. buddhasantikaṁ.
Itthaṁ sudaṁ āyasmā pupphathūpiyo thero imā gāthāyo
abhāsitthāti.
Pupphathūpiyattherassa apadānaṁ samattaṁ.
Tatiyaṁ pāyāsadāyakattherāpadānaṁ (123)

[125] Suvaṇṇavaṇṇaṁ sambuddhaṁ battiṁsavaralakkhaṇaṁ 1
pavanā abhinikkhantaṁ bhikkhusaṅghapurakkhataṁ.
Sahatthā 2 kaṁsapāṭiyā vaḍḍhetvā pāyāsaṁ ahaṁ
āhutiṁ yiṭṭhukāmo so agamiṁ sambaliṁ ahaṁ 3 .
Bhagavā tamhi samaye lokajeṭṭho narāsabho
caṅkamaṁ susamāruḷho ambare anilāyane.
Tañca acchariyaṁ disvā abbhūtaṁ lomahaṁsanaṁ
ṭhapayitvā kaṁsapāṭiṁ vipassī abhivādayiṁ.
Tuvaṁ buddhosi 4 sabbaññū sadevake samānuse
anukampaṁ upādāya paṭiggaṇha mahāmuni.
Paṭiggaṇhāsi bhagavā sabbaññū lokanāyako
mama saṅkappamaññāya satthā loke anuttaro 5 .
Ekanavute ito kappe yaṁ dānamadadiṁ tadā
duggatiṁ nābhijānāmi pāyāsassa idaṁ phalaṁ.
Ekatāḷīsito kappe buddho nāmāsi khattiyo
sattaratanasampanno cakkavatti mahabbalo.
1 Ma. suvaṇṇavaṇṇo sambuddho .pe. bhikkhu saṅghapurakkhato. 2 Ma. mahaccā.
3 Ma. upanesiṁ baliṁ ahaṁ. 4 Ma. Yu. devosi. 5 Ma. Yu. mahāmuni.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā pāyāsadāyako thero imā gāthāyo
abhāsitthāti.
Pāyāsadāyakattherassa apadānaṁ samattaṁ.
Catutthaṁ gandhodakiyattherāpadānaṁ (124)

[126] Nisajja pāsādavare vipassiṁ addasaṁ jinaṁ
kakudhaṁ vilasantaṁva sabbaññuttamanāsakaṁ 1 .
Pāsādassāvidūre ca gacchati lokanāyako
pabhā niddhāvate tassa sataraṁsimhi nibbute 2 .
Gandhodakaṁ ca paggayha buddhaseṭṭhaṁ samokiriṁ
tena cittappasādena tattha kālaṁ kato ahaṁ.
Ekanavute ito kappe yaṁ gandhodakamokiriṁ
duggatiṁ nābhijānāmi buddhapūjāyidaṁ phalaṁ.
Ekattiṁse ito kappe sugandho nāma khattiyo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. sabbaññuṁ tamanāsakaṁ. Yu. sabbaññutamanāsavaṁ. 2 Ma. yathā ca sataraṁsino.
Itthaṁ sudaṁ āyasmā gandhodakiyo thero imā gāthāyo
abhāsitthāti.
Gandhodakiyattherassa apadānaṁ samattaṁ.
Pañcamaṁ sammukhāthavikattherāpadānaṁ (125)

[127] Jāyamāne vipassamhi nimittaṁ byākariṁ ahaṁ
nibbāpayaṁ ca janataṁ buddho loke bhavissati.
Yasmiṁ ca jāyamānasmiṁ dasasahassī pakampati
sodāni bhagavā satthā dhammaṁ deseti cakkhumā.
Yasmiṁ ca jāyamānasmiṁ āloko vipulo ahu
sodāni bhagavā satthā dhammaṁ deseti cakkhumā.
Yasmiṁ ca jāyamānasmiṁ saritāyo na sandisuṁ 1
sodāni bhagavā satthā dhammaṁ deseti cakkhumā.
Yasmiṁ ca jāyamānasmiṁ avīciggi na pajjali
sodāni bhagavā satthā dhammaṁ deseti cakkhumā.
Yasmiṁ ca jāyamānasmiṁ pakkhisaṅgho na sañcari
sodāni bhagavā satthā dhammaṁ deseti cakkhumā.
Yasmiñca jāyamānasmiṁ vātakkhandho na vāyati
sodāni bhagavā satthā dhammaṁ deseti cakkhumā.
1 ma sandayuṁ.
Yasmiñca jāyamānasmiṁ sabbaratanāni jotisuṁ
sodāni bhagavā satthā dhammaṁ deseti cakkhumā.
Yasmiñca jāyamānasmiṁ sattāsuṁ padavikkamā
sodāni bhagavā satthā dhammaṁ deseti cakkhumā.
Jātamattova sambuddho disā sabbā vilokayi
vācāsabhimudīresi esā buddhāna dhammatā.
Saṁvejayitvā janataṁ thavitvā lokanāyakaṁ
sambuddhaṁ abhivāditvā pakkāmiṁ pācināmukho.
Ekanavute ito kappe yaṁ buddhamabhithomayiṁ
duggatiṁ nābhijānāmi thomanāya idaṁ phalaṁ.
Ito navutikappamhi sammukhāthavikavhayo
sattaratanasampanno cakkavatti mahabbalo.
Paṭhavīdundubhi nāma ekūnanavutimhito
sattaratanasampanno cakkavatti mahabbalo.
Aṭṭhāsītimhito kappe obhāso nāma khattiyo
sattaratanasampanno cakkavatti mahabbalo.
Sattāsītimhito kappe saritacchedanavhayo
sattaratanasampanno cakkavatti mahabbalo.
Agginibbāpano nāma kappānaṁ chaḷasītiyā
sattaratanasampanno cakkavatti mahabbalo.
Rājā vātasamo nāma kappānaṁ pañcasītiyā
sattaratanasampanno cakkavatti mahabbalo.
Gatipacchedano nāma kappānaṁ cullasītiyā 1
sattaratanasampanno cakkavatti mahabbalo.
Ratanappajjalo nāma kappānaṁ te asītiyā
sattaratanasampanno cakkavatti mahabbalo.
Padavikkamano nāma kappānaṁ dve asītiyā
sattaratanasampanno cakkavatti mahabbalo.
Rājā vilokano nāma kappānaṁ ekasītiyā
sattaratanasampanno cakkavatti mahabbalo.
Girisāroti 2 nāmena kappesītimhi khattiyo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sammukhāthaviko thero imā gāthāyo
abhāsitthāti.
Sammukhāthavikattherassa apadānaṁ samattaṁ.
1 Ma. pañcasītiyā. 2 Ma. girasāroti.
Chaṭṭhaṁ kusumāsaniyattherāpadānaṁ (126)

[128] Nagare dhaññavatiyā ahosiṁ brāhmaṇo tadā
lakkhaṇe itihāse ca sanighaṇḍusakeṭubhe.
Padako veyyākaraṇo nimitte kovido ahaṁ
mante ca sisse vācesiṁ tiṇṇaṁ vedāna pāragū
pañca uppalahatthāni piṭṭhiyaṁ ṭhapitāni me
āhutiṁ yiṭṭhukāmohaṁ pitumātusamāgame.
Tadā vipassi bhagavā bhikkhusaṅghapurakkhato
obhāsento disā sabbā āgacchati narāsabho.
Āsanaṁ paññapetvāna nimantitvā mahāmuniṁ
santharitvāna taṁ pupphaṁ atinesiṁ sakaṁ gharaṁ.
Yaṁ me atthi sake gehe āmisaṁ paccupaṭṭhitaṁ
tāhaṁ buddhassa pādāsiṁ pasanno sehi pāṇibhi.
Bhuttāvīkālamaññāya ekaṁ atthaṁ adāsahaṁ
anumoditvāna sabbaññū pakkāmi uttarāmukho.
Ekanavute ito kappe yaṁ pupphamadadiṁ tadā
duggatiṁ nābhijānāmi pupphadānassidaṁ phalaṁ.
Anantarā ito kappe rājāhu varadassano
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā kusumāsaniyo thero imā gāthāyo
abhāsitthāti.
Kusumāsaniyattherassa apadānaṁ samattaṁ.
Sattamaṁ phaladāyakattherāpadānaṁ (127)

[129] Ajjhāyiko mantadharo tiṇṇaṁ vedāna pāragū
himavantassavidūre vasāmi assame ahaṁ.
Aggihuttañca me atthi puṇḍarīkaphalāni ca
puṭake nikkhipitvāna dumagge laggitaṁ mayā.
Padumuttaro lokavidū āhutīnaṁ paṭiggaho
mamuddharitukāmo so bhikkhanto mamupāgami.
Pasannacitto sumano phalaṁ buddhassadāsahaṁ
pītisañjanano mayhaṁ diṭṭhadhamme sukhāvaho.
Suvaṇṇavaṇṇo sambuddho āhutīnaṁ paṭiggaho
antalikkhe ṭhito satthā imaṁ gāthaṁ abhāsatha.
Iminā phaladānena cetanāpaṇidhīhi ca
kappānaṁ satasahassaṁ duggatiṁ nūpapajjati.
Teneva sukkamūlena anubhutvāna sampadā
pattomhi acalaṁ ṭhānaṁ hitvā jayaparājayaṁ.
Ito sattakappasate rājā āsiṁ sumaṅgalo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā phaladāyako thero imā gāthāyo
abhāsitthāti.
Phaladāyakattherassa apadānaṁ samattaṁ.
Aṭṭhamaṁ ñāṇasaññakattherāpadānaṁ (128)

[130] Pabbate himavantamhi vasāmi pabbatantare
puḷinaṁ sobhanaṁ disvā buddhaseṭṭhaṁ anussariṁ.
Ñāṇe upanidhaṁ 1 natthi saṅgāmaṁ 2 natthi satthuno
sabbadhammaṁ abhiññāya ñāṇena adhimuccati.
Namo te purisājañña namo te purisuttama
ñāṇena te samo natthi yāvatā ñāṇamuttamaṁ.
Ñāṇe cittaṁ pasādetvā kappaṁ saggamhi modahaṁ
avasesesu kappesu kusalaṁ karitaṁ 3 mayā.
1 Ma. Yu. upanidhā. 2 Ma. saṅkhāraṁ. 3 Ma. caritaṁ.
Ekanavute ito kappe yaṁ saññamalabhiṁ tadā
duggatiṁ nābhijānāmi ñāṇasaññāyidaṁ phalaṁ.
Ito tesattatikappe 1 eko puḷinapupphiyo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ñāṇasaññako thero imā gāthāyo
abhāsitthāti.
Ñāṇasaññakattherassa apadānaṁ samattaṁ.
Navamaṁ gandhapupphiyattherāpadānaṁ 2 (129)

[131] Suvaṇṇavaṇṇo bhagavā vipassī dakkhiṇāraho
purakkhato sāvakehi ārāmā abhinikkhami.
Disvānahaṁ buddhaseṭṭhaṁ sabbaññutaṁ anāsavaṁ
pasannacitto sumano gatamaggaṁ 3 apūjayiṁ.
Tena cittappasādena dipadindassa tādino
haṭṭho haṭṭhena cittena puna vandiṁ tathāgataṁ.
Ekanavute ito kappe yaṁ pupphamabhiropayiṁ
duggatiṁ nābhijānāmi buddhapūjāyidaṁ phalaṁ.
1 Ma. sattatikappamhi. 2 Ma. Yu. ganthipupphiyattherāpadānaṁ.
3 Ma. Yu. ganthipupphaṁ.
Ekatāḷīsito kappe varuṇo 1 nāma khattiyo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā gandhapupphiyo thero imā gāthāyo
abhāsitthāti.
Gandhapupphiyattherassa apadānaṁ samattaṁ.
Dasamaṁ padumapūjakattherāpadānaṁ (130)

[132] Himavantassavidūre gotamo nāma pabbato
nānārukkhehi sañchanno mahābhūtagaṇālayo.
Vemajjhamhi ca tassāsi assamo abhinimmito
purakkhato sasissehi vasāmi assame ahaṁ.
Āyantu me sissagaṇā padumaṁ āharantu me
buddhapūjaṁ karissāmi dipadindassa tādino.
Evanti te paṭissutvā padumaṁ āhariṁsu me
tathā nimittaṁ katvāhaṁ buddhassa abhiropayiṁ.
Sisse tadā samānetvā sādhukaṁ anusāsahaṁ
mā kho tumhe pamajjittha appamādo sukhāvaho.
1 Ma. caraṇo. Yu. varaṇo.
Evaṁ samanusāsitvā sa 1 sisse vacanakkhame
appamādaguṇe yutto tadā kālaṁ kato ahaṁ.
Ekanavute ito kappe yaṁ pupphamabhiropayiṁ
duggatiṁ nābhijānāmi buddhapūjāyidaṁ phalaṁ.
Ekapaññāsakappamhi rājā āsiṁ jaluttamo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā padumapūjako thero imā gāthāyo
abhāsitthāti.
Padumapūjakattherassa apadānaṁ samattaṁ.
Uddānaṁ
sereyyako pupphathūpi pāyāsodaki 2 thomako
āsani phalasaññī ca gandhapadumapupphiyo
pañcuttarasatā gāthā gaṇitā atthadassibhi.
Sereyyavaggo terasamo.
---------
1 Ma. Yu. te. 2 Ma. pāyasogandhathomako.
Cuddasamo sobhitavaggo
paṭhamaṁ sobhitattherāpadānaṁ (131)

[133] Padumuttaro nāma jino lokajeṭṭho narāsabho
mahato janakāyassa deseti amataṁ padaṁ.
Tassāhaṁ vacanaṁ sutvā vācāsabhimudīritaṁ
añjaliṁ paggahetvāna ekaggo āsahaṁ tadā.
Yathā samuddo udadhīnamaggo
meru nagānaṁ pavaro siluccayo
tatheva ye cittavasena vattare
na buddhañāṇassa kalaṁ upenti te.
Dhammavidhiṁ ṭhapetvāna buddho kāruṇiko isi
bhikkhusaṅghe nisīditvā imā gāthā abhāsatha.
Yo so ñāṇaṁ pakittesi buddhamhi lokanāyake
kappānaṁ satasahassaṁ 1 duggatiṁ so na gacchati.
Kilese jhāpayitvāna ekaggo susamāhito
sobhito nāma nāmena hessati satthusāvako.
Kilesā jhāpitā mayhaṁ bhavā sabbe samūhatā
tisso vijjā anuppattā kataṁ buddhassa sāsanaṁ.
1 Yu. satasahasse.
Paññāse kappasahassamhi sattevāsuṁ samuggatā
sattaratanasampannā cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sobhito thero imā gāthāyo
abhāsitthāti.
Sobhittatherassa apadānaṁ samattaṁ.
Dutiyaṁ sudassanattherāpadānaṁ (132)