[104] Suvaṇṇavaṇṇaṁ sambuddhaṁ nisabhājāniyaṁ yathā
tidhāppabhinnaṁ mātaṅgaṁ kuñjaraṁva mahesinaṁ.
Obhāsentaṁ disā sabbā sālarājaṁva 1 pupphitaṁ
rathiyā paṭipajjantaṁ lokajeṭṭhaṁ naruttamaṁ 2 .
Ñāṇe cittaṁ pasādetvā paggahetvāna añjaliṁ
pasannacitto sumano siddhatthaṁ abhivādayiṁ.
Catunavute ito kappe yaṁ kammamakariṁ tadā
duggatiṁ nābhijānāmi ñāṇasaññāyidaṁ phalaṁ.
Tesattatimhito kappe soḷasāsuṁ naruttamā
sattaratanasampannā cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ñāṇasaññiko thero imā gāthāyo
abhāsitthāti.
Ñāṇasaññikattherassa apadānaṁ samattaṁ.
1 Ma. Yu. uḷurājaṁva pūritaṁ. 2 Ma. apassahaṁ.
Tatiyaṁ uppalahatthiyattherāpadānaṁ (103)

[105] Tivarāyaṁ nivāsīhaṁ ahosiṁ māliko tadā
addasaṁ virajaṁ buddhaṁ siddhatthaṁ lokapūjitaṁ.
Pasannacitto sumano pupphahatthaṁ adāsahaṁ
yattha yatthupapajjāmi tassa kammassa vāhasā.
Anubhomi phalaṁ iṭṭhaṁ pubbe sukatamattano
parikkhitto sumallehi sasaññāya 1 idaṁ phalaṁ.
Catunavute ito kappe yaṁ pupphamabhiropayiṁ
duggatiṁ nābhijānāmi buddhapūjāyidaṁ phalaṁ.
Catunavute upādāya ṭhapetvā vattamānakaṁ
pañca rājasatā tattha najjupamasanāmakā 2 .
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā uppalahatthiyo thero imā gāthāyo
abhāsitthāti.
Uppalahatthiyattherassa apadānaṁ samattaṁ.
Catutthaṁ padapūjakattherāpadānaṁ (104)

[106] Siddhatthassa bhagavato jātipupphamadāsihaṁ
pādesu satta pupphāni hāsenokiritāni 3 me.
1 Ma. pupphadānassidaṁ phalaṁ. 2 Ma. najjasamasanāmakā. 3 Yu. hāsenokāritāni.
Tena kammenahaṁ ajja abhibhomi narāmare
dhāremi antimaṁ dehaṁ sammāsambuddhasāsane.
Catunavute ito kappe yaṁ pupphamabhiropayiṁ
duggatiṁ nābhijānāmi pupphapūjāyidaṁ phalaṁ.
Samantagandhanāmāsuṁ terasa cakkavattino
ito pañcamake kappe cāturantā gaṇādhipā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā padapūjako thero imā gāthāyo
abhāsitthāti.
Padapūjakattherassa apadānaṁ samattaṁ.
Pañcamaṁ muṭṭhipupphiyattherāpadānaṁ (105)

[107] Sudassanoti nāmena mālākāro ahaṁ tadā
addasaṁ virajaṁ buddhaṁ lokajeṭṭhaṁ narāsabhaṁ.
Jātipupphaṁ gahetvāna pūjayiṁ padumuttaraṁ
visuddhacakkhu sumano dibbacakkhuṁ samajjhagaṁ.
Etissā buddhapūjāya cittassa paṇidhīhi ca
kappānaṁ satasahassaṁ duggatiṁ nūpapajjahaṁ.
Soḷasāsiṁsu rājāno devuttarasanāmakā
chattiṁsamhi ito kappe cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā muṭṭhipupphiyo thero imā gāthāyo
abhāsitthāti.
Muṭṭhipupphiyattherassa apadānaṁ samattaṁ.
Chaṭṭhaṁ udakapūjakattherāpadānaṁ (106)

[108] Suvaṇṇavaṇṇaṁ sambuddhaṁ gacchantaṁ anilañjase
ghaṭāsanaṁva jalitaṁ ādittaṁva hutāsanaṁ.
Pāṇinā udakaṁ gayha ākāse ukkhipiṁ ahaṁ
sampaṭicchi mahāvīro buddho kāruṇiko mayi 1 .
Antalikkhe ṭhito satthā padumuttaranāmako
mama saṅkappamaññāya imā gāthā abhāsatha.
Iminādakadānena 2 pītiuppādanena ca
kappasatasahassamhi duggatiṁ nūpapajjati.
Tena kammena dipadinda lokajeṭṭha narāsabha
pattomhi acalaṁ ṭhānaṁ hitvā jayaparājayaṁ.
1 Ma. isi. 2 Yu. iminodakadānena.
Sahassarājanāmena tayo te cakkavattino
pañcasaṭṭhikappasate cāturantā janādhipā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā udakapūjako thero imā gāthāyo
abhāsitthāti.
Udakapūjakattherassa apadānaṁ samattaṁ.
Sattamaṁ naḷamāliyattherāpadānaṁ (107)

[109] Padumuttarabuddhassa lokajeṭṭhassa tādino
tiṇatthare nisinnassa upasantassa tādino.
Naḷamālaṁ gahetvāna bandhitvā vījaniṁ ahaṁ
buddhassa upanāmesiṁ dipadindassa tādino.
Paṭaggahetvāna sabbaññū vījaniṁ lokanāyako
mama saṅkappamaññāya imaṁ gāthaṁ abhāsatha.
Yathā me kāyo nibbāyi pariḷāho na vijjati
tatheva tividhaggīhi cittaṁ tava vimuccatu.
Sabbe devā samāgañchuṁ yekeci dumanissitā
sussāma buddhavacanaṁ hāsayantañca dāyakaṁ.
Nisinno bhagavā tattha devasaṅghapurakkhato
dāyakaṁ sampahaṁsento imā gāthā abhāsatha.
Iminā vījanidānena cittassa paṇidhīhi ca
subbato nāma nāmena cakkavatti bhavissati.
Tena kammāvasesena sukkamūlena codito
māluto nāma nāmena cakkavatti bhavissati.
Iminā vījanidānena sammānavipulena ca
kappasatasahassamhi duggatiṁ nūpapajjati.
Tiṁsakappasahassamhi subbatā aṭṭhatiṁsa te
ekūnatiṁsasahasse aṭṭha mālutanāmakā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā naḷamāliyo thero imā gāthāyo
abhāsitthāti.
Naḷamāliyattherassa apadānaṁ samattaṁ.
Sattamaṁ bhāṇavāraṁ.
Aṭṭhamaṁ āsanupaṭṭhāyakattherāpadānaṁ (108)

[110] Kānanaṁ vanamoggayha appasaddaṁ nirākulaṁ
sīhāsanaṁ mayā dinnaṁ atthadassissa tādino.
Mālahatthaṁ gahetvāna katvā ca naṁ padakkhiṇaṁ
satthāraṁ payirupāsitvā pakkāmiṁ uttarāmukho.
Tena kammena dipadinda lokajeṭṭha narāsabha
sannibbāpemi attānaṁ bhavā sabbe samūhatā.
Aṭṭhārase kappasate yaṁ dānamadadiṁ tadā
duggatiṁ nābhijānāmi sīhāsanassidaṁ phalaṁ.
Ito sattakappasate sannibbāpakakhattiyo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā āsanupaṭṭhāyako thero imā gāthāyo
abhāsitthāti.
Āsanupaṭṭhāyakattherassa apadānaṁ samattaṁ.
Navamaṁ biḷālidāyakattherāpadānaṁ (109)

[111] Himavantassa avidūre vasāmi paṇṇasanthare
ghāsesu gedhamāpanno seyyasīlovahaṁ 1 tadā.
Khaṇamālukalambāni 2 biḷālitakkaḷāni ca
kolaṁ bhallātakaṁ bellaṁ 3 āhatvā paṭiyāditaṁ.
1 Ma. seyyalolo cahaṁ tadā. 2 Ma. Yu. khanatālukalambāni. 3 Ma. billaṁ.
Padumuttaro lokavidū āhutīnaṁ paṭiggaho
mama saṅkappamaññāya āgacchi mama santikaṁ.
Upāgataṁ mahānāgaṁ devadevaṁ narāsabhaṁ
biḷāliṁ paggahetvāna pattamhi okiriṁ ahaṁ.
Paribhuñji mahāvīro tosayanto mamaṁ tadā
paribhuñjitvāna sabbaññū imaṁ gāthaṁ abhāsatha.
Sakaṁ cittaṁ pasādetvā biḷāliṁ me adā tuvaṁ
kappānaṁ satasahassaṁ duggatiṁ nūpapajjasi.
Carimaṁ vattate mayhaṁ bhavā sabbe samūhatā
dhāremi antimaṁ dehaṁ sammāsambuddhasāsane.
Catupaññāsito kappe sumekhalimasavhayo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā biḷālidāyako thero imā gāthāyo
abhāsitthāti.
Biḷālidāyakatthessa apadānaṁ samattaṁ.
Dasamaṁ reṇupūjakattherāpadānaṁ (110)

[112] Suvaṇṇavaṇṇaṁ sambuddhaṁ sataraṁsīva bhāṇumaṁ
obhāsentaṁ disā sabbā uḷurājaṁva pūritaṁ.
Purakkhataṁ sāvakehi sāgareneva 1 medaniṁ
nāgaṁ paggayha reṇūhi vipassissābhiropayiṁ.
Ekanavute ito kappe yaṁ reṇumabhipūjayiṁ
duggatiṁ nābhijānāmi buddhapūjāyidaṁ phalaṁ.
Paṇṇatāḷīsito kappe reṇu nāmāsi khattiyo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā reṇupūjako thero imā gāthāyo
abhāsitthāti.
Reṇupūjakattherassa apadānaṁ samattaṁ.
Uddānaṁ
bhikkhadāyī ñāṇasaññī hatthiyo padapūjako
muṭṭhipupphī udakado naḷamālī nidhāvako 2
biḷālidāyi reṇu ca gāthāyo cha ca saṭṭhi ca.
Bhikkhadāyivaggo ekādasamo.
1 Ma. sāgareheva. 2 Ma. upaṭṭhako. Yu. nivāsako.
Dvādasamo mahāparivāravaggo
paṭhamaṁ mahāparivārattherapadānaṁ (111)

[113] Vipassī nāma bhagavā lokajeṭṭho narāsabho
aṭṭhasaṭṭhisahassehi pāvisi bandhumaṁ tadā.
Nagarā abhinikkhamma agamiṁ dīpacetiyaṁ
addasaṁ virajaṁ buddhaṁ āhutīnaṁ paṭiggahaṁ.
Cullāsītisahassāni yakkhā mayhaṁ upantike
upaṭṭhahanti sakkaccaṁ indaṁva tidasā gaṇā.
Bhavanā abhinikkhamma dussaṁ paggayhahaṁ tadā
sirasā abhivādesiṁ tañcādāsiṁ mahesino.
Aho buddhā aho dhammā aho no satthusampadā
buddhassa ānubhāvena vasudhāyaṁ pakampatha.
Tañca acchariyaṁ disvā abbhūtaṁ lomahaṁsanaṁ
buddhe cittaṁ pasādemi dipadindamhi tādine.
Sohaṁ cittaṁ pasādetvā dussaṁ datvāna satthuno
saraṇañca upāgañchiṁ sāmacco saparijjano.
Ekanavute ito kappe yaṁ kammamakariṁ tadā
duggatiṁ nābhijānāmi buddhapūjāyidaṁ phalaṁ.
Ito paṇṇarase kappe soḷasāsiṁsu vāhanā
sattaratanasampannā cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā mahāparivāro thero imā gāthāyo
abhāsitthāti.
Mahāparivārattherassa apadānaṁ samattaṁ.
Dutiyaṁ sumaṅgalattherāpadānaṁ (112)