[94] Tissassa lokanāthassa suddhapīṭhaṁ adāsahaṁ
haṭṭho haṭṭhena cittena buddhassādiccabandhuno.
Aṭṭhatiṁse 3 ito kappe rājā āsiṁ mahāruci
bhogo ca vipulo āsi sayanañca anappakaṁ.
Pīṭhaṁ buddhassa datvāna vippasannena cetasā
anubhomi sakaṁ kammaṁ pubbe sukatamattano.
1 Ma. Yu. phalitantare. 2 Ma. Yu. sucintikattherāpadānaṁ. 3 Ma. aṭṭhārase.
Dvenavute ito kappe yaṁ pīṭhaṁ adadiṁ tadā
duggatiṁ nābhijānāmi pīṭhadānassidaṁ phalaṁ.
Aṭṭhatiṁse ito kappe tayo te cakkavattino
ruci uparuci ceva mahāruci tatiyako.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā supīṭhiyo thero imā gāthāyo
abhāsitthāti.
Supīṭhiyattherassa apadānaṁ samattaṁ.
Tatiyaṁ aḍḍhacelakattherāpadānaṁ (93)

[95] Tissassāhaṁ bhagavato upaḍḍhadussamadāsahaṁ
paramakāruññapattomhi 1 duggatena 2 samappito.
Upaḍḍhadussaṁ datvāna kappaṁ saggamhi modahaṁ
avasesesu kappesu kusalañcakarimahaṁ 3 .
Dvenavute ito kappe yaṁ dussamadadiṁ tadā
duggatiṁ nābhijānāmi dussadānassidaṁ phalaṁ.
Ekapaññāsakappamhi 4 rājāno cakkavattino
samantāodanā 5 nāma khattiyāsuṁ 6 janādhipā.
1 Ma. Yu. paramakāpaññapattomhi. 2 Po. Yu. duggandhena. 3 Ma. kusalaṁ kāritaṁ mayā.
Yu. kusalaṁ tīritaṁ mayā. 4 Ma. ekūnapaññāsakappamhi. 5 Ma. samantacchadanā nāma.
6 Ma. bāttiṁsāsuṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā aḍḍhacelako thero imā gāthāyo
abhāsitthāti.
Aḍḍhacelakattherassa apadānaṁ samattaṁ.
Catutthaṁ sūcidāyakattherāpadānaṁ (94)

[96] Kammārohaṁ pure āsiṁ bandhumāyaṁ puruttame
sūcidānaṁ mayā dinnaṁ vipassissa mahesino.
Vajiraggasamaññāṇaṁ hoti kammena tādisaṁ
virāgomhi vimuttomhi pattomhi āsavakkhayaṁ.
Atītā 1 ca bhavā sabbe vattamānā ca anāgatā
ñāṇena viciniṁ sabbaṁ sūcidānassidaṁ phalaṁ.
Ekanavute ito kappe sattāsuṁ vajirāsamā
sattaratanasampannā cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sūcidāyako thero imā gāthāyo
abhāsitthāti.
Sūcidāyakattherassa apadānaṁ samattaṁ.
1 Ma. Yu. atīte ca bhave sabbe vattamāne ca anāgate.
Pañcamaṁ gandhamāliyattherāpadānaṁ (95)

[97] Siddhatthassa bhagavato gandhathūpaṁ akāsahaṁ
sumanehi paṭicchannaṁ buddhānucchavikaṁ ahaṁ.
Kañcanagghiyasaṅkāsaṁ buddhaṁ lokagganāyakaṁ
indīvaraṁva jalitaṁ ādittaṁva hutāsanaṁ
byagghusabhaṁva pavaraṁ abhijātaṁva kesariṁ
nisinnaṁ samaṇānaggaṁ bhikkhusaṅghapurakkhataṁ.
Vanditvā satthuno pāde pakkāmiṁ uttarāmukho
catunavute ito kappe gandhamālaṁ yato adaṁ.
Buddhe katassa kārassa phalenāhaṁ visesato
duggatiṁ nābhijānāmi buddhapūjāyidaṁ phalaṁ.
Cattāḷīsamhi ekūne kappe āsiṁsu soḷasa
devagandhasanāmā te rājāno cakkavattino.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā gandhamāliyo thero imā gāthāyo
abhāsitthāti.
Gandhamāliyattherassa apadānaṁ samattaṁ.
Chaṭṭhaṁ tipupphiyattherāpadānaṁ (96)

[98] Migaluddho pure āsiṁ araññe kānane brahā 1
pāṭaliṁ haritaṁ disvā tīṇi pupphāni okiriṁ.
Sukkhapaṇṇāni 2 gaṇhitvā bahi chaḍḍesahaṁ tadā
antosuddhaṁ bahisuddhaṁ vimuttaṁ 3 ca anāsavaṁ.
Sammukhā viya sambuddhaṁ vipassiṁ lokanāyakaṁ
pāṭaliṁ abhivādetvā tattha kālaṁ kato ahaṁ.
Ekanavute ito kappe yaṁ bodhiṁ abhipūjayiṁ
duggatiṁ nābhijānāmi bodhipūjāyidaṁ phalaṁ.
Samantapāsādikā nāma terasāsiṁsu rājino
ito tiṁsatikappamhi 4 cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā tipupphiyo thero imā gāthāyo
abhāsitthāti.
Tipupphiyattherassa apadānaṁ samattaṁ.
1 Ma. Yu. ahaṁ. 2 Ma. patitapattāni. Yu. sattapattāni. 3 Ma. Yu. suvimuttaṁ.
4 Ma. Yu. tettiṁsakappamhi.
Sattamaṁ madhupiṇḍikattherāpadānaṁ (97)

[99] Vivane 1 kānane disvā appasadde nirākule
siddhatthaṁ isinaṁ seṭṭhaṁ āhutīnaṁ paṭiggahaṁ.
Nibbutitaṁ 2 mahānāgaṁ nisabhājāniyaṁ yathā
osadhīva 3 virocantaṁ devasaṅghanamassitaṁ.
Vitti me pāhunā tāva ñāṇaṁ uppajji tāvade
vuṭṭhitassa samādhimhā madhuṁ datvāna satthuno.
Siddhatthassa bhagavato vipapasannena cetasā
vanditvā sirasā 4 pāde pakkāmiṁ pācināmukho.
Catuttiṁsamhi kappamhi rājā āsiṁ sudassano
madhubhiṁsehi savati bhojanamhi ca tāvade
madhuvassaṁ pavassittha pubbakammassidaṁ phalaṁ.
Catunavute ito kappe yaṁ madhuṁ adadiṁ tadā
duggatiṁ nābhijānāmi madhudānassidaṁ phalaṁ.
Catuttiṁse ito kappe cattāro te sudassanā
sattaratanasampannā cakkavattī mahabbalā.
Paṭisambhidā catasso vimokkhāpi ca aṭṭhime.
Chaḷabhiññā sacchikatā kataṁ buddhassa sāsananti.
1 Po. vivite. Ma. vipine. 2 Ma. Yu. nibbutattaṁ. 3 Ma. Yu. osadhiṁva.
4 Ma. Yu. satthuno.
Itthaṁ sudaṁ āyasmā madhupiṇḍiko thero imā gāthāyo
abhāsitthāti.
Madhupiṇḍikattherassa apadānaṁ samattaṁ.
Aṭṭhamaṁ senāsanadāyakattherāpadānaṁ (98)

[100] Siddhatthassa bhagavato adāsiṁ paṇṇasantharaṁ
samantā upakārañca kusumaṁ okiriṁ ahaṁ.
Pāsāde 1 ca guhaṁ rammaṁ anubhomi mahārahaṁ
mahagghāni ca pupphāni sayanebhivassanti 2 me.
Sayanehaṁ tuvaṭṭāmi vicitte pupphasanthate
pupphavuṭṭhi ca sayane abhivassati tāvade.
Catunavute ito kappe adāsiṁ paṇṇasantharaṁ
duggatiṁ nābhijānāmi santharassa idaṁ phalaṁ.
Ṭhitāsanthārakā 3 nāma sattete cakkavattino
ito te pañcame kappe uppajjiṁsu janādhipā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā senāsanadāyako thero imā gāthāyo
abhāsitthāti.
Senāsanadāyakattherassa apadānaṁ samattaṁ.
1 Ma. pāsādevaṁ guṇaṁ rammaṁ. 2 Ma. Yu. sayanebhisavante me. 3 Ma. tiṇasantharakā nāma.
Navamaṁ veyyāvaccakattherāpadānaṁ (99)

[101] Vipassissa bhagavato mahāpuggagaṇo 1 ahu
veyyāvaccakaro āsiṁ sabbakiccesu byāvaṭo 2 .
Deyyadhammo ca me natthi sugatassa mahesino
avandiṁ satthuno pāde vippasannena cetasā.
Ekanavute ito kappe veyyāvaccaṁ akāsahaṁ
duggatiṁ nābhijānāmi veyyāvaccassidaṁ phalaṁ.
Ito caṭṭhamake kappe rājā āsiṁ sucintiyo 3
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā veyyāvaccako thero imā gāthāyo
abhāsitthāti.
Veyyāvaccakattherassa apadānaṁ samattaṁ.
Dasamaṁ buddhupaṭṭhākattherāpadānaṁ (100)

[102] Vipassino bhagavato ahosiṁ saṅkhadhammako
niccupaṭṭhānayuttomhi sugatassa mahesino.
1 Ma. Yu. mahāpūgagaṇo. 2 Ma. vāvaṭo. 3 Ma. Yu. sucintito.
Upaṭṭhānaphalampassaṁ 1 lokanāthassa tādino
saṭṭhituriyasahassāni parivārenti maṁ sadā
ekanavute ito kappe upaṭṭhahiṁ mahāisiṁ
duggatiṁ nābhijānāmi upaṭṭhānassidaṁ phalaṁ.
Catunavute 2 ito kappe mahānigghosanāmakā
soḷasāsiṁsu rājāno cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā buddhupaṭṭhāko thero imā gāthāyo
abhāsitthāti.
Buddhupaṭṭhākattherassa apadānaṁ samattaṁ.
Uddānaṁ
sudhā pīṭhañca celañca kammāro gandhamāliyo
tipupphiyo madhu senā veyyāvacco va dhammako
samasaṭṭhiñca gāthāyo asmiṁ vagge pakittitā.
Sudhāvaggo dasamo.
Atha vagguddānaṁ
buddhavaggo hi paṭhamo sīhāsani subhūti ca
kuṇḍadhāno upāli ca vījanī sakacittanī
1 Ma. Yu. upaṭṭhānaphalampassa. 2 Ma. catuvīse.
Nāgasamālo timiri sudhāvaggena te dasa
catuddasasatā gāthā pañcapaññāsameva ca.
Buddhavaggadasakaṁ.
Paṭhamasatakaṁ samattaṁ.
---------
Ekādasamo bhikkhadāyivaggo
paṭhamaṁ bhikkhadāyakattherāpadānaṁ (101)

[103] Suvaṇṇavaṇṇaṁ sambuddhaṁ āhutīnampaṭiggahaṁ
pavanā 1 abhinikkhantaṁ vānā 2 nibbānamāgataṁ.
Kaṭacchubhikkhapādāsiṁ siddhatthassa mahesino
paññassa upasantassa mahāvīrassa tādino.
Padenānupadāyanto 3 nibbāpentaṁ 4 mahājanaṁ
vitti 5 me pāhunā tāva buddhassādiccabandhuno.
Catunavute ito kappe yaṁ dānamadadiṁ tadā
duggatiṁ nābhijānāmi bhikkhadānassidaṁ phalaṁ.
Sattāsītimhito kappe mahāreṇussanāmakā
sattaratanasampannā sattete cakkavattino.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. Yu. pavarā. 2 Ma. vanā. 3 Ma. padenānupadāyantaṁ. 4 Ma. nibbāpente.
5 Ma. uḷārā vitti me jātā buddhe ādiccabandhane.
Itthaṁ sudaṁ āyasmā bhikkhadāyako thero imā gāthāyo
abhāsitthāti.
Bhikkhadāyakattherassa apadānaṁ samattaṁ.
Dutiyaṁ ñāṇasaññikattherāpadānaṁ (102)