[114] Atthadassī jinavaro lokajeṭṭho narāsabho
vihārā abhinikkhamma taḷākaṁ upasaṅkami.
Nhātvā pitvā ca sambuddho uttaritvekacīvaro
aṭṭhāsi bhagavā tattha vilokento disodisaṁ.
Bhavane upaviṭṭhohaṁ addasaṁ lokanāyakaṁ
haṭṭho haṭṭhena cittena appoṭhesiṁ ahaṁ tadā.
Sataraṁsiṁva jotantaṁ pabhāsantaṁva kañcanaṁ
nacce gīte ca yuttohaṁ pañcaṅgaturiyepica.
Yaṁ yaṁ yonūpapajjāmi devattaṁ atha mānusaṁ
sabbe satte abhibhomi vipulo hoti me yaso.
Namo te purisājañña namo te purisuttama
attānaṁ tosayitvāna pare tosesi tvaṁ muni.
Pariggahitvā 1 nisīditvā hāsaṁ katvāna subbato
upaṭṭhahitvāna sambuddhaṁ tusitaṁ upapajjahaṁ.
Soḷasito kappasate dvinavā ekacintitā
sattaratanasampannā cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sumaṅgalo thero imā gāthāyo
abhāsitthāti.
Sumaṅgalattherassa apadānaṁ samattaṁ.
Tatiyaṁ saraṇagamaniyattherāpadānaṁ (113)

[115] Ubhinnaṁ devarājūnaṁ saṅgāmo paccupaṭṭhito 2
ahosi samupabyuḷho mahāghoso avattatha.
Padumuttaro lokavidū āhutīnaṁ paṭiggaho
antalikkhe ṭhito satthā saṁvejesi mahājanaṁ.
Sabbe devā attamanā nikkhittakavacāvudhā
sambuddhaṁ abhivāditvā ekaggāsiṁsu tāvade.
Mayhaṁ saṅkappamaññāya vācāsabhimudīrayi
anukampako lokavidū nibbāpesi mahājanaṁ.
1 Ma. pariggahe. 2 Ma. samupaṭṭhito.
Paduṭṭhacitto manujo ekaṁ pāṇaṁ viheṭhayaṁ
tena cittappadosena apāyaṁ upapajjati.
Saṅgāmasī sa nāgova bahupāṇe viheṭhayaṁ
nibbāpetha sakaṁ cittaṁ mā haññittha punappunaṁ.
Dvinnaṁpi yakkharājūnaṁ senāpi samitā ahu 1
saraṇañca upāgañchuṁ lokajeṭṭhaṁ sutādinaṁ.
Saññāpetvāna janataṁ uddhari pana cakkhumā 2
pekkhamānova devehi pakkāmi uttarāmukho.
Paṭhamaṁ saraṇaṁ gañchiṁ dipadindassa tādino
kappānaṁ satasahassaṁ duggatiṁ nūpapajjahaṁ.
Mahācundabhināmā ca soḷasāsuṁ rathesabhā
tiṁsakappasahassamhi rājāno cakkavattino.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā saraṇagamaniyo thero imā gāthāyo
abhāsitthāti.
Saraṇagamaniyattherassa apadānaṁ samattaṁ.
Catutthaṁ ekāsaniyattherāpadānaṁ (114)

[116] Varuṇo nāma nāmena devarājā ahaṁ tadā
upaṭṭhapesiṁ sambuddhaṁ sayoggabalavāhano.
1 Ma. Yu. senāsāvimhitā ahu. 2 Ma. padamuddhari cakkhumā.
Nibbute lokanāthamhi atthadassidipaduttame 1
turiyaṁ sabbamādāya agamaṁ bodhimuttamaṁ.
Vāditena ca naccena sabbatāḷasamāhito 2
sammukhā viya sambuddhaṁ upaṭṭhiṁ bodhimuttamaṁ.
Upaṭṭhahitvā taṁ bodhiṁ dharaṇīrūhapādapaṁ
pallaṅkaṁ ābhujitvāna tattha kālaṁ kato ahaṁ.
Sakakammābhiraddhohaṁ pasanno bodhimuttame
tena cittappasādena nimmānaṁ upapajjahaṁ.
Saṭṭhī turiyasahassāni parivārenti maṁ sadā
manussesu ca devesu vattamānaṁ bhavābhave.
Tidhaggī 3 nibbutā mayhaṁ bhavā sabbe samūhatā
dhāremi antimaṁ dehaṁ sammāsambuddhasāsane.
Subāhu nāma nāmena catuttiṁsāsu khattiyā
sattaratanasampannā pañcakappasate ito.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ekāsaniyo thero imā gāthāyo
abhāsitthāti.
Ekāsaniyattherassa apadānaṁ samattaṁ.
1 Ma. Yu. atthadassīnaruttame. 2 Ma. Yu. sammatāḷasamāhito. 3 Ma. Yu. tividhaggī.
Pañcamaṁ suvaṇṇapupphiyattherāpadānaṁ (115)

[117] Vipassī nāma bhagavā lokajeṭṭho narāsabho
nisinno janakāyassa desesi amataṁ padaṁ.
Tassāhaṁ dhammaṁ sutvāna dipadindassa tādino
sovaṇṇapupphāni cattāri buddhassa abhiropayiṁ.
Suvaṇṇachadanaṁ āsi yāvatā parisā tadā
buddhābhā ca suvaṇṇābhā āloko vipulo ahu.
Udaggacitto sumano vedajāto katañjalī
pītisañjanano 1 tesaṁ diṭṭhadhammasukhāvaho.
Āyācitvāna sambuddhaṁ vanditvāna ca subbataṁ
pāmojjaṁ janayitvāna sakaṁ bhavanupāvisiṁ.
Bhavanaṁ 2 upaviṭṭhohaṁ buddhaseṭṭhaṁ anussariṁ
tena cittappasādena tusitaṁ upapajjahaṁ.
Ekanavute ito kappe yaṁ pupphamabhiropayiṁ
duggatiṁ nābhijānāmi buddhapūjāyidaṁ phalaṁ.
Soḷasāsiṁsu rājāno nemisammatanāmakā
tetāḷīse ito kappe cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. Yu. vittisañjanano. 2 Ma. Yu. bhavane.
Itthaṁ sudaṁ āyasmā suvaṇṇapupphiyo thero imā gāthāyo
abhāsitthāti.
Suvaṇṇapupphiyattherassa apadānaṁ samattaṁ.
Chaṭṭhaṁ citakapūjakattherāpadānaṁ (116)

[118] Vasāmi rājāyatane sāmacco saparijjano
parinibbute bhagavati sikhino lokabandhuno 1 .
Pasannacitto sumano citakaṁ agamāsahaṁ
turiyaṁ tattha vādetvā gandhamālaṁ samokiriṁ.
Citakamhi pūjaṁ katvāna vanditvā citakaṁ ahaṁ
pasannacitto sumano sakaṁ bhavanupāgamiṁ.
Bhavane upaviṭṭhohaṁ citakapūjaṁ anussariṁ
tena kammena dipadinda lokajeṭṭha narāsabha.
Anubhutvāna sampattiṁ devesu mānusesu ca
pattomhi acalaṁ ṭhānaṁ hitvā jayaparājayaṁ.
Ekattiṁse ito kappe yaṁ pupphamabhiropayiṁ
duggatiṁ nābhijānāmi citakapūjāyidaṁ phalaṁ.
Ekūnatiṁse kappamhi ito soḷasa rājino
uggatā nāma nāmena cakkavattī mahabbalā.
1 Yu. sikhine lokabandhune.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā citakapūjako thero imā gāthāyo
abhāsitthāti.
Citakapūjakattherassa apadānaṁ samattaṁ.
Sattamaṁ buddhasaññakattherāpadānaṁ (117)

[119] Yadā vipassi lokaggo āyusaṅkhāramossaji
paṭhavī sampakampittha medanījalamekhalā.
Ogataṁ 1 vitataṁ mayhaṁ suci cittaṁ papañcakaṁ
bhavanaṁpi pakampittha buddhassa āyusaṅkhaye.
Tāso mayhaṁ samuppanno bhavane sampakampite
uppādo nu kimatthāya āloko vipulo ahu.
Vessavaṇṇo idhāgamma nibbāpesi mahājanaṁ
pāṇabhūtaṁ 2 bhayaṁ natthi ekaggā hotha sagāravā 3 .
Aho buddho aho dhammo aho no satthusampadā
yasmiṁ uppajjamānasmiṁ paṭhavī sampakampati.
Buddhānubhāvaṁ kittetvā kappaṁ saggamha modahaṁ
avasesesu kappesu kusalaṁ karitaṁ mayā.
1 Ma. Yu. otataṁ vitataṁ mayhaṁ suvicittavaṭaṁsakaṁ. Ma. vitataṁ vithataṁ. 2 Ma. pāṇabhūte.
3 Ma. Yu. susaṁvutā.
Ekanavute ito kappe yaṁ saññamalabhiṁ tadā
duggatiṁ nābhijānāmi buddhasaññāyidaṁ phalaṁ.
Ito cuddasakappamhi rājā āsiṁ patāpavā
samito nāma nāmena cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā buddhasaññako thero imā gāthāyo
abhāsitthāti.
Buddhasaññakattherassa apadānaṁ samattaṁ.
Aṭṭhamaṁ maggasaññakattherāpadānaṁ (118)

[120] Padumuttarabuddhassa sāvakā vanacārino
vippanaṭṭhā brahāraññe andhāva anusuyyare.
Anussaritvā sambuddhaṁ padumuttaranāyakaṁ
tassa te munino puttā vippanaṭṭhā mahāvane.
Bhavanā oruhitvāna āgamiṁ bhikkhusantike
tesaṁ maggañca ācikkhiṁ bhojanañca adāsahaṁ.
Tena kammena dipadinda lokajeṭṭha narāsabha
jātiyā sattavassena arahattaṁ apāpuṇiṁ.
Sacakkhu nāma nāmena dvādasa cakkavattino
sattaratanasampannā pañcakappasate ito.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā maggasaññako thero imā gāthāyo
abhāsitthāti.
Maggasaññakattherassa apadānaṁ samattaṁ.
Navamaṁ paccupaṭṭhānasaññakattherāpadānaṁ (119)

[121] Atthadassimhi sugate nibbute samanantarā
yakkhayoniṁ upapajjiṁ yasaṁ patto cahaṁ tadā.
Dulladdhaṁ vata me āsi duppabhātaṁ duruṭṭhitaṁ
yaṁ me bhoge vijjamāne parinibbāyi cakkhumā.
Mama saṅkappamaññāya sāgaro nāma sāvako
mamuddharitukāmo so āgañchi mama santike 1 .
Kiṁ nu socasi mā bhāyi cara dhammaṁ sumedhasa
anuppadinnā buddhena sabbesaṁ vijjasampadā.
Yo ca pūjeyya sambuddhaṁ tiṭṭhantaṁ 2 lokanāyakaṁ
dhātuṁ sāsapamattampi nibbutassāpi pūjaye.
1 Ma. Yu. santikaṁ. 2 Yu. siddhatthaṁ.
Same cittappasādamhi samaṁ puññaṁ mahaggataṁ
tasmā thūpaṁ karitvāna pūjehi jinadhātuyo.
Sāgarassa vaco sutvā buddhathūpaṁ akāsahaṁ
pañca vasse paricariṁ munino thūpamuttamaṁ.
Tena kammena dipadinda lokajeṭṭha narāsabha
sampattiṁ anubhotvāna arahattaṁ apāpuṇiṁ.
Bhūripaññāva cattāro sattakappasate ito
sattaratanasampannā cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā paccupaṭṭhānasaññako thero imā gāthāyo
abhāsitthāti.
Paccupaṭṭhānasaññakattherassa apadānaṁ samattaṁ.
Dasamaṁ jātipūjakattherāpadānaṁ (120)

[122] Jāyantassa vipassissa āloko vipulo ahu
paṭhavī ca pakampittha sasāgarā sapabbatā.
Nemittā ca viyākaṁsu buddho loke bhavissati
aggo ca sabbasattānaṁ janataṁ uddharissati.
Nemittānaṁ suṇitvāna jātipūjaṁ akāsahaṁ
edisā pūjanā natthi yādisā jātipūjanā.
Saṁharitvāna 1 kusalaṁ sakaṁ cittaṁ pasādayiṁ
jātipūjaṁ karitvāna tattha kālaṁ kato ahaṁ.
Yaṁ yaṁ yonūpapajjāmi devattaṁ atha mānusaṁ
sabbe satte atītomhi 2 jātipūjāyidaṁ phalaṁ.
Dhātiyo maṁ upaṭṭhanti mama cittavasānugā
na te 3 sakkonti kopetuṁ jātipūjāyidaṁ phalaṁ.
Ekanavute ito kappe yaṁ pūjamakariṁ tadā
duggatiṁ nābhijānāmi jātipūjāyidaṁ phalaṁ.
Supāricariyā nāma catuttiṁsa janādhipā
ito tatiyakappamhi cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā jātipūjako thero imā gāthāyo
abhāsitthāti.
Jātipūjakattherassa apadānaṁ samattaṁ.
Uddānaṁ
parivārasumaṅgalyā 4 saraṇāsanapupphikā
citapūjī buddhasaññī maggupaṭṭhānajātinā
1 Ma. saṅkharitvāna. Yu. saṁsaritvāna. 2 Ma. Yu. abhibhomi. 3 Ma. tā.
4 Ma. parivārasumaṅgalā saraṇāsanapupphiyā.
Gāthāyo navuti vuttā gaṇitāyo vibhāvihīti.
Mahāparivāravaggo dvādasamo.
----------
Terasamo sereyyavaggo
paṭhamaṁ sereyyakattherāpadānaṁ (121)

[123] Ajjhāyiko mantadharo tiṇṇaṁ vedāna pāragū
abbhokāse ṭhito santo addasaṁ lokanāyakaṁ.
Sīhaṁ yathā vanacaraṁ byaggharājaṁva nittasaṁ
tidhappabhinna mātaṅgaṁ kuñjaraṁva mahesinaṁ.
Sereyyakaṁ gahetvāna ākāse ukkhipiṁ ahaṁ
buddhassa ānubhāvena parivārenti sabbaso.
Adhiṭṭhahi mahāvīro sabbaññū lokanāyako
samantā pupphachadanaṁ okiriṁsu narāsabhaṁ.
Tato sā pupphakañcukā antovaṇṭā bahimukhā
sattāhaṁ chadanaṁ katvā tato antaradhāyatha.
Tañca acchariyaṁ disvā abbhūtaṁ lomahaṁsanaṁ
buddhe cittaṁ pasādesiṁ sugate lokanāyake.
Tena cittappasādena sukkamūlena codito
kappānaṁ satasahassaṁ duggatiṁ nūpapajjahaṁ.
Paṇṇarasasahassamhi kappānaṁ pañcavīsate
vilāmālā sanāmā ca 1 cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sereyyako thero imā gāthāyo
abhāsitthāti.
Sereyyakattherassa apadānaṁ samattaṁ.
Dutiyaṁ pupphathūpiyattherāpadānaṁ (122)