[44] Anomadassissa munino lokajeṭṭhassa tādino
sudhāya lepanaṁ katvā caṅkamaṁ kārayiṁ ahaṁ.
Nānāvaṇṇehi pupphehi caṅkamaṁ santhariṁ ahaṁ
ākāse vitānaṁ katvā bhojayiṁ buddhamuttamaṁ.
Añjaliṁ paggahetvāna abhivādetvāna subbataṁ
dīghasālaṁ bhagavato niyyādesimahantadā.
Mama saṅkappamaññāya satthā loke anuttaro
paṭiggahesi bhagavā anukampāya cakkhumā.
Paṭiggahetvāna sambuddho dakkhiṇeyyo sadevake
bhikkhusaṅghe nisīditvā imā gāthā abhāsatha.
Yo so haṭṭhena cittena dīghasālaṁ adāsi me
tamahaṁ kittayissāmi suṇātha mama bhāsato.
Imassa maccukālamhi puññakammasamaṅgino
sahassayuttassaratho upaṭṭhissati tāvade.
Tena yānenayaṁ poso devalokaṁ gamissati
anumodissare devā sampatte kusale bhave.
Mahārahaṁ byamhaṁ seṭṭhaṁ ratanamattikalepanaṁ
kūṭāgāravarūpetaṁ byamhaṁ ajjhāvasissati.
Tiṁsakappasahassāni devaloke ramissati
pañcavīsatikappāni devarājā bhavissati.
Sattasattatikkhattuñca cakkavatti bhavissati
yasodharasanāmā te sabbepi ekanāmakā.
Dve sampattī anubhotvā cinitvā 1 puññasañcayaṁ
aṭṭhavīsatikappamhi cakkavatti bhavissati.
1 Ma. vaḍḍhetvā. Yu. viditvā.
Tatthāpi byamhaṁ pavaraṁ visukammena māpitaṁ
dasasaddāvivittantaṁ puraṁ ajjhāvasissati.
Aparimeyye ito kappe bhūmipālo mahiddhiko
okkāko nāma nāmena rājā raṭṭhe bhavissati.
Soḷasitthisahassānaṁ sabbāsaṁ pavarāvayā 1
abhijātā khattiyānī nava putte janissati.
Nava putte janitvāna khattiyānī marissati
taruṇī ca piyā kaññā mahesittaṁ karissati.
Okkākaṁ tosayitvāna varaṁ kaññā labhissati
varaṁ laddhā ca sā kaññā putte pabbājayissati.
Pabbājitā 2 ca te sabbe gamissanti naguttamaṁ
jātibhedabhayā sabbe bhaginīhi vasissare 3 .
Ekā ca kaññā byādhīhi bhavissati purakkhatā 4
mā no jāti pabhijjati nikhaṇissanti khattiyā.
Khattiyo nīharitvāna tāya saddhiṁ vasissati
bhavissati tadā bhedo okkākakulasambhavo.
Tesaṁ pajā bhavissanti koliyā nāma jātiyā
tattha mānusakaṁ bhogaṁ anubhossantinappakaṁ.
Tamhā kāyā cavitvāna devalokaṁ gamissati
tatrāpi pavaraṁ byamhaṁ labhissati manoramaṁ.
1 Ma. pavarā ca sā. Yu. pavarā mayā. 2 Yu. pabbajitvā. 3 Yu. saṁvasissare.
4 Ma. parikkhatā.
Devalokā cavitvāna sukkamūlena codito
āgantvāna manussattaṁ soṇo nāma bhavissati.
Āraddhaviriyo pahitatto padahaṁ satthu sāsane
sabbāsave pariññāya nibbāyissatyanāsavo.
Anantadassī bhagavā gotamo sakyapuṅgavo
visesaññū mahāvīro aggaṭṭhāne ṭhapessati.
Vuṭṭhamhi deve caturaṅgulamhi
tiṇe anileritāṅgulamhi 1
ṭhapetvāna yogassa payuttatādino
tatottari pāramatā na vijjati.
Uttame damathe danto cittaṁ me suppaṇīhitaṁ
bhāro me ohito sabbo nibbutomhi anāsavo.
Aṅgīraso mahānāgo abhijātova kesarī
bhikkhusaṅghe nisīditvā etadagge ṭhapesi maṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā soṇo koṭiyavesso 2 thero imā gāthāyo
abhāsitthāti.
Soṇakoṭiyavessattherassa apadānaṁ samattaṁ.
1 Ma. ... aṅgaṇamhi. 2 Ma. koḷiviso. Yu. koḷiyavesso.
Tatiyaṁ bhaddiyakāḷigodhāyaputtattherāpadānaṁ (43)

[45] Padumuttarasambuddhaṁ mettacittaṁ mahāmuniṁ
upeti janatā sabbā sabbalokagganāyakaṁ.
Sattukañca pavākañca 1 āmisampānabhojanaṁ
dadanti satthuno sabbe puññakkhette anuttare.
Ahampi dānaṁ dassāmi devadevassa tādino
buddhaseṭṭhaṁ nimantetvā saṅghampi ca anuttaraṁ.
Uyyojitā mayā cete nimantesuṁ tathāgataṁ
kevalaṁ bhikkhusaṅghañca puññakkhettaṁ anuttaraṁ.
Satasahassapallaṅkaṁ sovaṇṇaṁ gonakatthataṁ
tulikāpaṭalikāya khomakappāsikehi ca.
Mahārahaṁ paññāpayiṁ āsanaṁ buddhayuttakaṁ
padumuttaro lokavidū devadevo narāsabho.
Bhikkhusaṅghaparibyuḷho mama dvāraṁ upāgami
paccuggantvāna sambuddhaṁ lokanāthaṁ yasassinaṁ.
Pasannacitto sumano atināmayi sagharaṁ 2
bhikkhūnaṁ satasahassaṁ buddhañca lokanāyakaṁ.
Pasannacitto sumano paramannena tappayiṁ
padumuttaro lokavidū āhutīnaṁ paṭiggaho.
1 Ma. Yu. baddhakañca. 2 Ma. abhināmayiṁ saṅgharaṁ. Yu. ... saghāraṁ.
Bhikkhusaṅghe nisīditvā imā gāthā abhāsatha
yenidaṁ āsanaṁ dinnaṁ sovaṇṇaṁ gonakatthataṁ.
Tamahaṁ kittayissāmi suṇātha mama bhāsato
catusattatikkhattuṁ so devarajjaṁ karissati.
Anubhossati sampattiṁ accharāhi purakkhato
padesarajjaṁ sahassaṁ vasudhaṁ āvasissati.
Ekapaññāsakkhattuñca cakkavatti bhavissati
sabbāsu bhavayonīsu uccākulī bhavissati.
So ca pacchā pabbajitvā sukkamūlena codito
bhaddiyo nāma nāmena hessati satthu sāvako.
Vivekamanuyuttomhi pantasenanivāsahaṁ
phalaṁ vādhigataṁ 1 sabbaṁ cittaklesomhi ajjahaṁ.
Mama sabbaṁ abhiññāya sabbaññū lokanāyako
bhikkhusaṅghe nisīditvā etadagge ṭhapesi maṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā bhaddiyo kāḷigodhāyaputto thero imā
gāthāyo abhāsitthāti.
Bhaddiyassa kāḷigodhāyaputtattherassa apadānaṁ samattaṁ.
1 Ma. cādhigataṁ. Yu. phalañca vigataṁ sabbaṁ vattaklesomhi ajjahaṁ.
Catutthaṁ sanniṭṭhāpakattherāpadānaṁ (44)

[46] Aññe kuṭikaṁ katvā vasāmi pabbatantare
lābhālābhena santuṭṭho yasena ayasena ca.
Padumuttaro lokavidū āhutīnaṁ paṭiggaho
bhikkhusatasahassehi 1 āgañchi mama santike.
Upāgataṁ mahānāgaṁ 2 jalajuttamanāmakaṁ
tiṇasantharaṁ paññāpetvā adāsiṁ satthuno ahaṁ.
Pasannacitto sumano āmaṇḍaṁ pāniyañcahaṁ
adāsiṁ ujubhūtassa vippasannena cetasā.
Kappe ito satasahasse yaṁ dānamadadiṁ tadā
duggatiṁ nābhijānāmi āmaṇḍassa idaṁ phalaṁ.
Ekatāḷīsakappamhi eko āsi arindamo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sanniṭṭhāpako thero imā gāthāyo
abhāsitthāti.
Sanniṭṭhāpakattherassa apadānaṁ samattaṁ.
1 Ma. Yu. vīsasatasahassehi. 2 Yu. mahāvīraṁ.
Pañcamaṁ pañcahatthiyattherāpadānaṁ (45)

[47] Sumedho nāma sambuddho gacchate antarāpaṇe
okkhittacakkhu mitabhāṇī satimā saṁvutindriyo.
Pañca uppalahatthāni āvelatthamakāsu 1 me
tena buddhaṁ apūjesiṁ pasanno sehi pāṇibhi.
Āropitā ca te pupphā chadanamassa satthuno
samādhīsu 2 mahānāgaṁ sisso 3 ācariyaṁ yathā.
Tiṁsakappasahassamhi yaṁ pupphamabhiropayiṁ
duggatiṁ nābhijānāmi buddhapūjāyidaṁ phalaṁ.
Ito vīsakappasate ahesuṁ pañca khattiyā
hatthiyā nāma nāmena cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā pañcahatthiyo thero imā gāthāyo
abhāsitthāti.
Pañcahatthiyattherassa apadānaṁ samattaṁ.
Chaṭṭhaṁ padumacchadaniyattherāpadānaṁ (46)

[48] Nibbute lokanāthamhi vipassimhaggapuggale
suphullaṁ padumaṁ gayha citamāropayiṁ ahaṁ.
1 Ma. āvelatthaṁ ahaṁsu me. Yu. āvelatthaṁ akāsi me. 2 Ma. samādhiṁ su.
Yu. saṁsāviṁ su. 3 Ma. Yu. sissā.
Āropiteva 1 citake vehāsaṁ nabhamuggami
ākāsacchadanaṁ katvā citakamhi adhārayiṁ.
Ekanavute ito kappe yaṁ pupphamabhiropayiṁ
duggatiṁ nābhijānāmi buddhapūjāyidaṁ phalaṁ.
Sattatāḷīsito kappe padumissaranāmako
cāturanto vijitāvī cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā padumacchadaniyo thero imā gāthāyo
abhāsitthāti.
Padumacchadaniyattherassa apadānaṁ samattaṁ.
Sattamaṁ sayanadāyakattherāpadānaṁ (47)

[49] Siddhatthassa bhagavato mettacittassa tādino
sayanaggaṁ mayā dinnaṁ dussabhaṇḍena 2 atthataṁ.
Paṭiggahesi bhagavā kappiyasayanāsanaṁ
uṭṭhāya sayanā tamhā vehāsaṁ uggamī jino.
Catunavute ito kappe yaṁ sayanamadāsahaṁ
duggatiṁ nābhijānāmi sayanassa idaṁ phalaṁ.
1 Ma. Yu. āropite ca. 2 Ma. Yu. dussabhaṇḍehi.
Ekapaññāsito kappe varuṇo 1 devasavhayo
sattaratanasampanno cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sayanadāyako thero imā gāthāyo
abhāsitthāti.
Sayanadāyakattherassa apadānaṁ samattaṁ.
Aṭṭhamaṁ caṅkamadāyakattherāpadānaṁ (48)

[50] Atthadassissa munino lokajeṭṭhassa tādino
iṭṭhakāhi cinitvāna caṅkamaṁ kārayiṁ ahaṁ.
Uccato pañcaratanaṁ caṅkamaṁ sādhu māpitaṁ
āyāmato hatthasataṁ bhāvaneyyaṁ manoramaṁ.
Paṭiggahesi bhagavā atthadassī naruttamo
hatthena puḷinaṁ gayha imā gāthā abhāsatha.
Iminā puḷinadānena caṅkamaṁ sukatena ca
sattaratanasampannaṁ puḷinaṁ anubhossati.
Tīṇi kappāni devesu devarajjaṁ karissati
anubhossati sampattiṁ accharāhi purakkhato.
1 Ma. varako.
Manussalokaṁ āgantvā rājā raṭṭhe bhavissati
tikkhattuṁ cakkavattī ca mahiyā so bhavissati.
Aṭṭhārase kappasate yaṁ kammamakariṁ tadā
duggatiṁ nābhijānāmi caṅkamassa idaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā caṅkamadāyako thero imā gāthāyo
abhāsitthāti.
Caṅkamadāyakattherassa apadānaṁ samattaṁ.
Navamaṁ subhaddattherāpadānaṁ (49)

[51] Padumuttaro lokavidū āhutīnaṁ paṭiggaho
janataṁ uddharitvāna nibbāyati mahāyaso.
Nibbāyante ca sambuddhe dasasahassi kampatha
janakāyo mahā āsi devā sannipatuṁ tadā.
Candanaṁ pūrayitvāna tagarāmallikāhi ca
haṭṭho haṭṭhena cittena āropesiṁ naruttamaṁ.
Mama saṅkappamaññāya satthā loke anuttaro
nipannakova sambuddho imā gāthā abhāsatha.
Yo me pacchimake kāle gandhamallena chādayi
tamahaṁ kittayissāmi suṇātha mama bhāsato.
Ito cuto ayaṁ poso tusitakāyaṁ gamissati
tattha rajjaṁ karitvāna nimmānaṁ so gamissati.
Eteneva upāyena datvā mallaṁ 1 varuttamaṁ
sakakammābhiraddho so sampattiṁ anubhossati.
Punāpi 2 tusite kāye nibbattissatiyaṁ naro
tamhā kāyā cavitvāna manussattaṁ gamissati.
Sakyaputto mahānāgo aggo loke sadevake
bodhayitvā bahū satte nibbāyissati cakkhumā.
Tadā sopagato santo 3 sukkamūlena codito
upasaṅkamma sambuddhaṁ pañhaṁ pucchissati tadā.
Hāsayitvāna sambuddho sabbaññū lokanāyako
pubbakammamabhiññāya saccāni vivarissati.
Āraddho ca ayaṁ pañho tuṭṭho ekaggamānaso
satthāraṁ abhivādetvā pabbajjaṁ yācayissati.
Pasannamānasaṁ disvā sakakammena tositaṁ
pabbajissati so buddho aggadhammassa kovido.
Vāyamitvānayaṁ poso sammā sambuddhasāsane
sabbāsave pariññāya nibbāyissatyanāsavo.
Pañcamaṁ bhāṇavāraṁ.
1 Ma. mālaṁ. Yu. mālayaṁ. 2 Yu. cutopi. 3 Yu. pabbajjūpagato santo.
Pubbakammena saṁyutto ekaggo susamāhito
buddhassa oraso putto dhammatomhi sunimmito.
Dhammarājaṁ upāgamma āpucchiṁ pañhamuttamaṁ
kathayanto ca me pañhaṁ dhammasotaṁ upānayi.
Tassāhaṁ dhammamaññāya vihāsiṁ sāsane rato
sabbāsave pariññāya viharāmi anāsavo.
Satasahasse ito kappe jalajuttamanāyako
nibbāyi anupādāno dīpova telasaṅkhayā.
Sattayojanikaṁ āsi thūpañca ratanāmayaṁ
dhajaṁ tattha apūjesiṁ sabbabhaddaṁ manoramaṁ.
Kassapassa ca buddhassa tisso nāmaggasāvako
putto me oraso āsi dāyādo jinasāsane.
Tassa hīnena manasā vācaṁ bhāsiṁ abhaddakaṁ
tena kammavipākena pacchā me āsi bhaddakaṁ 1 .
Upavattane sālavane pacchime sayane muni
pabbājesi mahāvīro hito kāruṇiko jino.
Ajjeva dāni pabbajjā ajjeva upasampadā
ajjeva parinibbānaṁ sammukhā dipaduttame.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. pacchime addasaṁ jinaṁ.
Itthaṁ sudaṁ āyasmā subhaddo thero imā gāthāyo
abhāsitthāti.
Subhaddattherassa apadānaṁ samattaṁ.
Dasamaṁ cundattherāpadānaṁ (50)

[52] Siddhatthassa bhagavato lokajeṭṭhassa tādino
agghiyaṁ kārayitvāna jātipupphehi chādayiṁ.
Niṭṭhāpetvāna taṁ pupphaṁ buddhassa abhināmayiṁ
pupphāvasesaṁ paggayha buddhassa abhiropayiṁ.
Kañcanagghiyasaṅkāsaṁ buddhaṁ lokagganāyakaṁ
pasannacitto sumano pupphagghiyamupānayiṁ.
Vitiṇṇakaṅkho sambuddho tiṇṇoghehi purakkhato
bhikkhusaṅghe nisīditvā imā gāthā abhāsatha.
Dibbagandhaṁ pavāyantaṁ yo me pupphagghiyaṁ adā
tamahaṁ kittayissāmi suṇātha mama bhāsato.
Ito cuto ayaṁ poso devasaṅghapurakkhato
jātipupphehi parikiṇṇo devalokaṁ gamissati.
Ubbiddhaṁ bhavanaṁ tassa sovaṇṇañca maṇīmayaṁ
byamhā pātubhavissanti puññakammapabhāvitā.
Catusattatikkhattuṁ so devarajjaṁ karissati
anubhossati sampattiṁ accharāhi purakkhato.
Paṭhabyā rajjaṁ tisataṁ vasudhaṁ āvasissati
pañcasattatikkhattuñca cakkavatti bhavissati.
Dujjayo nāma nāmena hessati manujādhipo
anubhotvāna taṁ puññaṁ sakakammūpasaṁhito.
Vinipātaṁ agantvāna manussattaṁ gamissati
hiraññaṁ tassa nicitaṁ koṭisataṁpi anappakaṁ.
Nibbattissati yonimhi brāhmaṇo so bhavissati
vaṅgantassa suto dhīmā sāriyā oraso piyo.
So ca pacchā pabbajitvā aṅgīrasassa sāsane
cūḷacundoti nāmena hessati satthu sāvako.
Sāmaṇerova so santo khīṇāsavo bhavissati
sabbāsave pariññāya nibbāyissatyanāsavo.
Upaṭṭhahiṁ mahāvīraṁ aññe ca pesale bahū
bhātaramevupaṭṭhāsiṁ uttamatthassa pattiyā.
Bhātaraṁ me upaṭṭhahitvā dhātuṁ pattamhi ociya 1
sambuddhaṁ upanāmesiṁ lokajeṭṭhaṁ narāsabhaṁ.
Ubhohatthehi paggayha buddho loke sadevake
sandassayanto taṁ dhātuṁ kittayi aggasāvakaṁ.
1 Ma. ohiya. Yu. opiya.
Cittañca suvimuttaṁ me saddhā mayhaṁ patiṭṭhitā
sabbāsave pariññāya viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā cundatthero imā gāthāyo abhāsitthāti.
Cundattherassa apadānaṁ samattaṁ.
Uddānaṁ
upāli soṇo bhaddī ca sanniṭṭhāpaka hatthiyo
chadanaṁ seyyacaṅkamaṁ subhaddo cundasavhayo
gāthāsataṁ ca tāḷīsaṁ 1 catasso ca tatthuttari.
Upālivaggo pañcamo.
-----------
Chaṭṭho vījanīvaggo
paṭhamaṁ vidhūpanadāyakattherāpadānaṁ (51)

[53] Padumuttarabuddhassa lokajeṭṭhassa tādino
vījanekā 2 mayā dinnā dipadindassa tādino.
Sakaṁ cittaṁ pasādetvā paggahetvāna añjaliṁ
sambuddhaṁ abhivāditvā pakkāmi 3 uttarāmukho.
1 Ma. gāthāsataṁ satāḷīsaṁ. 2 Ma. bījanikā. Yu. vijanikā. 3 Ma. Yu. pakkāmiṁ.
Vījaniṁ paggahetvāna satthā lokagganāyako
bhikkhusaṅghe ṭhito santo imā gāthā abhāsatha.
Iminā vījanidānena cittassa paṇidhīhi ca
kappānaṁ satasahassaṁ vinipātaṁ na gacchati.
Āraddhaviriyo pahitatto cetoguṇasamāhito
jātiyā sattavassohaṁ arahattaṁ apāpuṇiṁ.
Saṭṭhikappasahassamhi bijjamānasanāmakā
soḷasāsiṁsu rājāno cakkavattī mahabbalā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā vidhūpanadāyako thero imā gāthāyo
abhāsitthāti.
Vidhūpanadāyakattherassa apadānaṁ samattaṁ.
---------
Dutiyaṁ sataraṁsiyattherāpadānaṁ (52)