[24] Padumuttaro nāma jino sabbadhammāna pāragū
jalitvā aggikkhandhova sambuddho parinibbuto.
Mahājanā samāgamma pūjayitvā tathāgataṁ
citaṁ katvāna sukataṁ sarīraṁ abhiropayuṁ.
Sarīrakiccaṁ katvāna dhātuṁ tattha samānayuṁ
sadevamanussā sabbe buddhathūpaṁ akaṁsu te.
Paṭhamā kañcanamayā dutiyāpi 1 maṇīmayā
tatiyā rūpiyamayā catutthā phalikāmayā.
Tattha 2 pañcami yā bhūmi lohitaṅgamayā ahu
chaṭṭhā masāragallassa sabbaratanamayūpari.
Jaṅghā maṇimayā āsi vedikā ratanāmayā
sabbasoṇṇamayo thūpo uddhaṁ yojanamuggato.
Devā tattha samāgantvā ekato mantayuṁ tadā
mayaṁpi thūpaṁ karissāma 3 lokanāthassa tādino.
Dhātu āveṇikā natthi sarīraṁ ekapiṇḍitaṁ
imamhi buddhathūpasmiṁ karissāma kañcukaṁ mayaṁ.
Devā sattaratanehi aññaṁ vaḍḍhesu yojanaṁ
thūpo dviyojanubbedho timiraṁ byapahanti yo 4 .
1 Ma. dutiyāsi maṇīmayā. 2 Ma. tathā pañcamiyā bhūmi. 3 Ma. kassāmi.
4 Ma. Yu. so.
Nāgā tattha samāgantvā ekato mantayuṁ tadā
manussā ceva devā ca buddhathūpaṁ akaṁsu te.
Mā no pamattā assumhā appamattā sadevakā 1
mayampi thūpaṁ karissāma lokanāthassa tādino.
Indanīlaṁ mahānīlaṁ atho jotirasaṁ maṇiṁ
ekato sannipātetvā buddhathūpaṁ achādayuṁ 2 .
Sabbaṁ maṇimayaṁ āsi tāvatā buddhacetiyaṁ
tiyojanasamubbiddhaṁ ālokakaraṇaṁ tadā.
Garuḷā 3 ca samāgantvā ekato mantayuṁ tadā
manussā devanāgā ca buddhathūpaṁ akaṁsu te.
Mā no pamattā assumhā appamattā sadevakā
mayampi thūpaṁ karissāma lokanāthassa tādino.
Sabbaṁ maṇimayaṁ thūpaṁ akaruṁ tāva 4 kañcukaṁ
yojanaṁ tepi vaḍḍhesuṁ āyataṁ buddhacetiyaṁ.
Catuyojanamubbedho buddhathūpo virocati
obhāseti disā sabbā sataraṁsīva uggato.
Kumbhaṇḍā 5 ca samāgantvā ekato mantayuṁ tadā
manussā ceva devā ca nāgā ca garuḷā tadā.
Paccekaṁ buddhaseṭṭhassa akaṁsu thūpamuttamaṁ
mā no pamattā assumhā appamattā sadevakā.
1 Yu. sadevatā. 2 Yu. acchādayuṁ. 3 Po. Yu. kumbhaṇḍā. 4 Ma. te ca.
5 Po. Yu. yakkhā tattha ....
Mayampi thūpaṁ karissāma lokanāthassa tādino
ratanehi 1 chādayissāma āyataṁ buddhacetiyaṁ.
Yojanantepi vaḍḍhesuṁ āyataṁ buddhacetiyaṁ
pañcayojanamubbedho thūpo obhāsatī tadā.
Yakkhā 2 tattha samāgantvā ekato mantayuṁ tadā
manujā devatā nāgā kumbhaṇḍā garuḷā tadā.
Paccekaṁ buddhaseṭṭhassa akaṁsu thūpamuttamaṁ
mā no pamattā assumhā appamattā sadevakā.
Mayaṁpi thūpaṁ karissāma lokanāthassa tādino
phalikā 3 chādayissāma āyataṁ buddhacetiyaṁ.
Yojanantepi vaḍḍhesuṁ āyataṁ buddhacetiyaṁ
chayojanāni ubbiddho thūpo obhāsatī tadā.
Gandhabbā ca samāgantvā ekato mantayuṁ tadā
manujā devatā nāgā garuḷā kumbhayakkhakā.
4 Katā buddhathūpaṁ mayamettha akārakā
mayampi thūpaṁ karissāma lokanāthassa tādino.
Vediyo satta katvāna yāva jaṅghā akaṁsu te
sabbasovaṇṇamayaṁ thūpaṁ gandhabbā kārayuṁ tadā.
Sattayojanamubbedho thūpo obhāsate tadā
rattindivā na ñāyanti ālokā 5 honti sabbadā.
1 Po. Yu. phalikā chādayissāma. 2 Po. Yu. gandhabbā ca .... 3 Ma. phalikāhi.
4 Ma. sabbekaṁsu buddhathūpaṁ. 5 Ma. Yu. āloko hoti sabbadā.
Abhibhonti na tassābhā candasūrā satārakā
samantā yojanasate padīpo 1 pana pajjali.
Tena kālena yekeci thūpaṁ pūjenti mānusā
na te thūpaṁ āruhanti ambare ukkhipanti te.
Devehi ṭhapito yakkho abhisammatanāmako
dhajaṁ vā pupphadāmaṁ vā abhiropeti uttari.
Na te passanti taṁ yakkhaṁ dāmaṁ passanti gacchato
etaṁ 2 passitvā gacchanti sabbe gacchanti suggatiṁ.
Viruddhā ye pāvacane pasannā ye ca sāsane
pāṭihiraṁ daṭṭhukāmā thūpaṁ pūjenti mānusā.
Nagare haṁsavatiyā ahosiṁ varako 3 tadā
āmoditaṁ janaṁ disvā evaṁ cintesahaṁ tadā.
Oḷāro bhagavā eso yassa dhātugharedisaṁ
imā ca janatā tuṭṭhā kāraṁ kubbaṁ na tappare.
Ahaṁpi kāraṁ karissāmi lokanāthassa tādino
tassa dhammesu dāyādo bhavissāmi anāgate.
Sudhotaṁ rajakenāhaṁ uttareyya paṭaṁ mama
veḷugge 4 ālaggetvāna dhajaṁ ukkhipi ambare.
Abhisammatako gayha ambare hāsi me dhajaṁ
vāteritaṁ dhajaṁ disvā bhiyyo hāsaṁ janesahaṁ.
1 Ma. padīpopi na pajjali. 2 Ma. Yu. evaṁ passitvā gacchantā. 3 Ma. bhatako.
4 Ma. Yu. veḷagge.
Tattha cittaṁ pasādetvā samaṇaṁ upasaṅkamiṁ
taṁ bhikkhuṁ abhivādetvā vipākaṁ pucchahaṁ dhaje.
So me kathesi ānanda pītisañjananaṁ mama
tassa dhajassa vipākaṁ anubhossasi sabbadā.
Hatthī assā rathā pattī senā ca caturaṅginī
parivāressanti taṁ nicca dhajadānassidaṁ phalaṁ.
Saṭṭhī turiyasahassāni bheriyo samalaṅkatā
parivāressanti taṁ nicca dhajadānassidaṁ phalaṁ.
Chaḷāsītisahassāni nāriyo samalaṅkatā
vicittavatthābharaṇā āmuttamaṇikuṇḍalā.
Āḷāramukhā hasulā susaññā tanumajjhimā
parivāressanti taṁ nicca dhajadānassidaṁ phalaṁ.
Tiṁsakappasahassāni devaloke ramissasi
asītikkhattuṁ devindo devarājjaṁ karissasi.
Sahassakkhattuṁ rājāpi 1 cakkavatti bhavissasi
padesarajjaṁ vipulaṁ gaṇanāto asaṅkhayaṁ.
Kappasatasahassamhi okkākakulasambhavo
gotamo nāma nāmena satthā loke bhavissati.
Devalokā cavitvāna sukkamūlena codito
puññakammena saṁyutto brahmabandhu bhavissasi.
1 Ma. rājā ca.
Asītikoṭiṁ chaḍḍetvā dāsakammakare bahū
gotamassa bhagavato sāsane pabbajissasi.
Ārādhayitvā sambuddhaṁ gotamaṁ sakyapuṅgavaṁ
upavāṇoti nāmena hessasi satthusāvako.
Satasahasse kataṁ kammaṁ phalaṁ dassesi me idha
sumutto saravegova kilese jhāpayiṁ mamaṁ.
Cakkavattissa santassa cātudīpissarassa me
tīṇiyojanasamantā ussissanti 1 dhajā sadā.
Satasahasse ito kappe yaṁ kammamakariṁ tadā
duggatiṁ nābhijānāmi dhajadānassidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā upavāṇo thero imā gāthāyo
abhāsitthāti.
Upavāṇattherassa apadānaṁ samattaṁ.
Tatiyaṁ tīṇisaraṇāgamaniyattherāpadānaṁ (23)

[25] Nagare candavatiyā 2 mātupaṭṭhānako 3 ahaṁ
andhā mātāpitā mayhaṁ te posemi ahaṁ tadā.
1 Ma. ussīsanti. Yu. dassissanti. 2 Po. bandhamatiyā. 3 Ma. mātupaṭṭhāko
ahuṁ. Yu. mātupaṭṭhāyako ahuṁ.
Rahogato nisīditvā evaṁ cintesahaṁ tadā
posento mātāpitaro pabbajjaṁ na labhāmahaṁ.
Tamandhakārapihitā 1 tividhaggīhi dayhare
etādise bhave jāte natthi koci vināyako.
Buddho loke samuppanno dippeti dāni 2 sāsanaṁ
sakkā uddharituṁ attā puññakāmena jantunā.
Uggayha tīṇi saraṇe paripuṇṇāni gopayiṁ
tena kammena sukatena paṭimukkhāmi duggatiṁ.
Nisabho nāma samaṇo buddhassa aggasāvako
taṁ ahaṁ upagantvāna saraṇāgamanaṁ gahiṁ.
Vassasatasahassāni āyuṁ vijjati tāvade
tāvatā saraṇāgamanaṁ paripuṇṇaṁ agopayiṁ.
Carime vattamānamhi saraṇantamanussariṁ
tena kammena sukatena tāvatiṁsaṁ agañchahaṁ.
Devalokagato santo puññakammasamāhito
yaṁ yaṁ desaṁ upapajjāma aṭṭhahetū labhāmahaṁ.
Disāsu pūjito homi tikkhapañño bhavāmahaṁ
sabbe devānuvattanti amitabhogaṁ labhāmahaṁ.
Suvaṇṇavaṇṇo sabbattha paṭibhāṇo 3 bhavāmahaṁ
mittānaṁ acalo homi yaso accuggato mama.
1 Ma. mahandhakārapihitā. 2 Yu. jinasāsanaṁ. 3 Ma. Yu. paṭikkanto.
Asītikkhattuṁ devindo devarajjamakārayiṁ
dibbasukhaṁ anubhaviṁ accharāhi purakkhato.
Pañcasattatikkhattuñca cakkavatti ahosahaṁ
padesarajjaṁ vipulaṁ gaṇanāto asaṅkhayaṁ.
Pacchime bhavasampatte puññakammasamāhito
pure sāvatthiyaṁ jāto mahāsāle suaddhake.
Nagarā nikkhamitvāna dārakehi purakkhato
sāyaṁ 1 khiḍḍāsamaṅgīhaṁ saṅghārāmaṁ upāgamiṁ.
Tatthaddasāsiṁ samaṇaṁ vippamuttaṁ nirūpadhiṁ
so me dhammamadesesi saraṇañca adāsi me.
Sohaṁ sutvāna saraṇaṁ saraṇaṁ me anussariṁ
ekāsane nisīditvā arahattaṁ apāpuṇiṁ.
Jātiyā sattavassena 2 arahattaṁ apāpuṇiṁ
upasampādayi buddho guṇamaññāya cakkhumā
aparimeyye ito kappe saraṇāni agañchahaṁ
tāva 3 me sukataṁ kammaṁ phalaṁ dassesi me idha.
Sugopitaṁ me saraṇaṁ mānasaṁ suppaṇihitaṁ
anubhotvā yasaṁ sabbaṁ pattomhi acalaṁ padaṁ.
Yesaṁ sotāvadhānatthi suṇātha mama bhāsato
atthaṁ 4 vo kathayissāmi sāmaṁ diṭṭhaṁ padaṁ mama.
1 Ma. hasakhiḍḍasamaṅgīhaṁ. Yu. sahassakhiḍḍāsamaṅgīhaṁ. 2 Ma. sattame vasse.
3 Ma. Yu. tato. 4 Ma. ahaṁ.
Buddho loke samuppanno vattate jinasāsanaṁ
amatā vāditā bheri sokasallavinodanā.
Yathāsakena thāmena puññakkhette anuttare
adhikāraṁ kareyyātha passayissatha nibbutiṁ.
Paggayha tīṇi saraṇe pañcasīlāni gopiya
buddhe cittaṁ pasādetvā dukkhassantaṁ karissatha.
Mamopamaṁ 1 karitvāna silāni parigopiya
aciraṁ arahattaṁ vo sabbepi pāpuṇissatha.
Tevijjo iddhipattomha cetopariyakovido
sāvako te mahāvīra caraṇe 2 vandāmi satthuno.
Aparimeyye ito kappe saraṇaṁ buddhamagañchahaṁ
duggatiṁ nābhijānāmi saraṇāgamane phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā tīṇisaraṇāgamaniyo thero imā gāthāyo
abhāsitthāti.
Tīṇisaraṇāgamaniyattherassa apadānaṁ samattaṁ.
Catutthaṁ pañcasīlasamādāniyattherāpadānaṁ (24)

[26] Nagare candavatiyā bhatiko 3 āsihaṁ tadā
parakammāyane yutto pabbajjaṁ na labhāmahaṁ.
1 Ma. sammādhammaṁ bhāvetvā. 2 Ma. saraṇo vandati satthuno. Yu. saraṇe ....
3 Ma. Yu. bhatako āsahaṁ tadā.
Mahandhakārapihitā tividhaggīhi dayhare
kena nu kho upāyena visaṁyutto bhave ahaṁ.
Deyyadhammo ca me natthi varāko bhatiko ahaṁ
yannūnāhaṁ pañcasīlaṁ rakkheyyaṁ paripūrayaṁ.
Anomadassissa munino nisabho nāma sāvako
tamahaṁ upasaṅkamma pañcasikkhāpadaggahiṁ.
Vassasatasahassāni āyu vijjati tāvade
tāvatā pañcasīlāni paripuṇṇāni gopayiṁ.
Maccukāle ca sampatte devā assāsayanti maṁ
ratho sahassayutto te mārisāyaṁ upaṭṭhito.
Vattate carime citte mamaṁ sīlaṁ anussariṁ
tena kammena sukatena tāvatiṁsaṁ agañchahaṁ.
Tiṁsakkhattuñca devindo devarajjamakārayiṁ
dibbasukhaṁ anubhaviṁ accharāhi purakkhato.
Pañcasattatikkhattuñca cakkavatti ahosahaṁ
padesarajjaṁ vipulaṁ gaṇanāto asaṅkhayaṁ.
Devalokā cavitvāna sukkamūlena codito
pure vesāliyaṁ jāto mahāsāle suaddhake.
Vassūpanāyike kāle dippante jinasāsane
mātā ca me pitā ceva pañcasikkhāpadaggahuṁ.
Saha sutvānahaṁ sīlaṁ mama sīlaṁ anussariṁ
ekāsane nisīditvā arahattaṁ apāpuṇiṁ.
Jātiyā pañcavassena arahattaṁ apāpuṇiṁ
upasampādayi buddho guṇamaññāya cakkhumā.
Paripuṇṇāni gopetvā pañcasikkhāpadānahaṁ
aparimeyye ito kappe vinipātaṁ na gacchahaṁ.
Sohaṁ yasaṁ anubhaviṁ tesaṁ sīlāna vāhasā
kappakoṭiṁ pakittento kittaye ekadesakaṁ.
Pañcasīlāni gopetvā tayo hetū labhāmahaṁ
dīghāyuko mahābhogo tikkhapañño bhavāmihaṁ.
Pakittente 1 ca sabbesaṁ adhimattañca porisaṁ
bhavābhave saṁsaritvā ete ṭhāne labhāmahaṁ.
Aparimeyyesu sīlesu vattantā jinasāvakā
bhavesu yadi rajjeyyuṁ vipāko kīdiso bhave.
Suciṇṇaṁ me pañcasīlaṁ bhatakena tapassinā 2
tena sīlenahaṁ ajja mocayiṁ 3 sabbabandhanā.
Aparimeyye ito kappe pañcasīlāni gopayiṁ
duggatiṁ nābhijānāmi pañcasīlānidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
1 Ma. saṅkittento. Yu. pakittento. 2 Yu. vipassinā. 3 Yu. poṭhayiṁ.
Itthaṁ sudaṁ āyasmā pañcasīlasamādāniyo thero imā gāthāyo
abhāsitthāti.
Pañcasīlasamādāniyattherassa apadānaṁ samattaṁ.
Pañcamaṁ annasaṁsāvakattherāpadānaṁ (25)

[27] Suvaṇṇavaṇṇaṁ sambuddhaṁ gacchantaṁ antarāpaṇe
kañcanagghiyasaṅkāsaṁ dvattiṁsavaralakkhaṇaṁ.
Siddhatthaṁ lokapajjotaṁ appameyyaṁ anopamaṁ
alatthaṁ paramaṁ pītiṁ disvā dantaṁ jutindharaṁ.
Sambuddhaṁ abhināmetvā bhojayintaṁ mahāmuniṁ
muni kāruṇiko loke 1 anumodi mamaṁ tadā.
Tasmiṁ mahākāruṇike paramassāsakārake
buddhe cittaṁ pasādetvā kappaṁ saggamhi modahaṁ.
Catunavute ito kappe yaṁ dānamadadiṁ tadā
duggatiṁ nābhijānāmi bhikkhadānassidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā annasaṁsāvako thero imā gāthāyo
abhāsitthāti.
Annasaṁsāvakattherassa apadānaṁ samattaṁ.
1 Yu. muni kāruṇiko nātho anumodi ca maṁ tadā.
Chaṭṭhaṁ dhūpadāyakattherāpadānaṁ (26)

[28] Siddhatthassa bhagavato lokajeṭṭhassa tādino
kuṭidhūpaṁ mayā dinnaṁ vippasannena cetasā.
Yaṁ yaṁ yonūpapajjāmi devattaṁ atha mānusaṁ
sabbesaṁpi piyo homi dhūpadānassidaṁ phalaṁ.
Catunavute ito kappe yaṁ dhūpamadadiṁ tadā
duggatiṁ nābhijānāmi dhūpadānassidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā dhūpadāyako thero imā gāthāyo
abhāsitthāti.
Dhūpadāyakattherassa apadānaṁ samattaṁ.
Sattamaṁ puḷinapūjakattherāpadānaṁ (27)

[29] Vipassissa bhagavato bodhiyā pādamuttame
purāṇaṁ puḷinaṁ chaḍḍetvā 1 suddhaṁ puḷinamākiriṁ.
Ekanavute ito kappe yaṁ puḷinamadāsahaṁ
duggatiṁ nābhijānāmi puḷinadānassidaṁ phalaṁ.
1 Ma. purāṇapuḷinaṁ hitvā.
Tipaññāse 1 ito kappe rājā āsiṁ janābhibhū 2
mahāpuḷino nāmena cakkavatti mahabbalo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā puḷinapūjako thero imā gāthāyo
abhāsitthāti.
Puḷinapūjakattherassa apadānaṁ samattaṁ.
Aṭṭhamaṁ uttiyattherāpadānaṁ (28)

[30] Candabhāgānadītīre suṁsumāro ahaṁ tadā
sabhojanapasutāhaṁ 3 nadītitthaṁ agañchahaṁ.
Siddhattho tamhi samaye sayambhū aggapuggalo
nadiṁ taritukāmo so nadītitthaṁ upāgami.
Opāgate ca sambuddhe ahaṁpi tatthupāgamiṁ
upagantvāna sambuddhaṁ imaṁ vācaṁ udīrayiṁ.
Abhiruyha mahāvīra tārissāmi ahaṁ tuvaṁ
pettikaṁ visayaṁ mayhaṁ anukampa mahāmuni.
Mama uggajjanaṁ sutvā abhirūhi mahāmuni
haṭṭho haṭṭhena cittena tāresiṁ lokanāyakaṁ.
1 Yu. tiṁsatime. 2 Ma. Yu. janādhibhū. 3 Ma. sagocarampasutohaṁ.
Nadiyā pārime tīre siddhattho lokanāyako
assāsesi mamaṁ tattha amataṁ pāpuṇissasi.
Tamhā kāyā cavitvāna devalokaṁ agañchahaṁ
dibbaṁ sukhaṁ anubhaviṁ accharāhi purakkhato.
Sattakkhattuñca devindo devarajjaṁ akāsahaṁ
tīṇikhattuṁ cakkavatti mahiyā issaro ahaṁ.
Vivekamanuyuttohaṁ nipako ca susaṁvuto
dhāremi antimaṁ dehaṁ sammā sambuddhasāsane.
Catunavute ito kappe tāresiṁ yaṁ narāsabhaṁ
duggatiṁ nābhijānāmi taraṇāya idaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā uttiyo thero imā gāthāyo
abhāsitthāti.
Uttiyattherassa apadānaṁ samattaṁ.
Navamaṁ ekañjalikattherāpadānaṁ (29)

[31] Suvaṇṇavaṇṇaṁ sambuddhaṁ gacchantaṁ antarāpaṇe
vipassiṁ satthavāhaggaṁ naravīraṁ vināyakaṁ.
Adantadamanaṁ tādiṁ mahāvādiṁ mahāmatiṁ
disvā pasanno sumano ekañjaliṁ akāsahaṁ.
Ekanavute ito kappe yaṁ añjalimakariṁ tadā
duggatiṁ nābhijānāmi añjalissa idaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ekañjaliko thero imā gāthāyo
abhāsitthāti.
Ekañjalikattherassa apadānaṁ samattaṁ.
Dasamaṁ khomadāyakattherāpadānaṁ (30)

[32] Nagare bandhumatiyā ahosiṁ vāṇijo tadā
teneva dāraṁ posemi ropemi bījasampadaṁ.
Vīthiyaṁ 1 paṭipannassa vipassissa mahesino
ekaṁ khomaṁ mayā dinnaṁ kusalatthāya satthuno.
Ekanavute ito kappe yaṁ khomaṁ adadiṁ tadā
duggatiṁ nābhijānāmi khomadānassidaṁ phalaṁ.
Sattavīse 2 ito kappe eko sindhavasandano
sattaratanasampanno cātuddīpamhi issaro.
1 Ma. Yu. rathiyaṁ. 2 Ma. sattarase.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā khomadāyako thero imā gāthāyo
abhāsitthāti.
Khomadāyakattherassa apadānaṁ samattaṁ.
Uddānaṁ
subhūti upavāṇo ca saraṇo sīlagāhako
annasaṁsāvako dhūpo puḷino uttiyena ca.
Añjalī khomadāyī ca daseva tatiye gaṇe
pañcāsītisataṁ vuttā gāthāyo sabbapiṇḍitā.
Subhūtivaggo tatiyo.
Catutthaṁ bhāṇavāraṁ.
---------
Catuttho kuṇḍadhānavaggo
paṭhamaṁ kuṇḍadhānattherāpadānaṁ (31)

[33] Sattāhaṁ paṭisallīnaṁ sayambhuṁ aggapuggalaṁ
pasannacitto sumano buddhaseṭṭhaṁ upaṭṭhahiṁ.
Vuṭṭhitaṁ kālamaññāya padumuttaraṁ mahāmuniṁ
mahantaṁ kadalikaṇṇiṁ gahetvā upagañchahaṁ.
Paṭiggahesi 1 bhagavā sabbaññū 2 lokanāyako
mama cittaṁ pasādento paribhuñji mahāmuni.
Paribhuñjitvāna sambuddho satthavāho anuttaro
sakāsane nisīditvā imā gāthā abhāsatha.
Ye ca santi samītāro 3 yakkhā imamhi pabbate
araññe bhūtagaṇā sabbe 4 suṇantu vacanaṁ mama.
Yo so buddhaṁ upaṭṭhāsi migarājaṁva kesariṁ
tamahaṁ kittayissāmi suṇātha mama bhāsato.
Ekādasañca khattuṁ so devarājā bhavissati
catuttiṁsatikhattuñca cakkavatti bhavissati.
Kappasatasahassamhi okkākakulasambhavo
gotamo nāma gottena satthā loke bhavissati.
Akkositvāna samaṇe sīlavante anāsave
pāpakammavipākena nāmadheyyaṁ labhissati.
Tassa dhammesu dāyādo oraso dhammanimmito
kuṇḍadhānoti nāmena sāvako so bhavissati.
Pavivekaṁ anuyutto jhāyī jhānarato ahaṁ
tosayitvāna satthāraṁ viharāmi anāsavo.
Sāvakehi 5 parivuto bhikkhusaṅghapurakkhato
bhikkhusaṅghe nisīditvā salākaṁ gāhayī jino.
1 Ma. Yu. paṭiggahetvā. 2 Yu. taṁ phalaṁ. 3 Yu. ye vasanti sametāro.
4 Ma. Yu. araññe bhūtabhabyāni. 5 Yu. sāvakaggehi.
Ekaṁsaṁ cīvaraṁ katvā vanditvā lokanāyakaṁ
vadataṁ varassa purato paṭhamaṁ aggahesahaṁ.
Tena kammena bhagavā dasasahassīpakampako
bhikkhusaṅghe nisīditvā aggaṭṭhāne ṭhapesi maṁ.
Viriyaṁ me dhuradhorayhaṁ yogakkhemādhivāhanaṁ
dhāremi antimaṁ dehaṁ sammā sambuddhasāsane.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā kuṇḍadhāno thero imā gāthāyo
abhāsitthāti.
Kuṇḍadhānattherassa apadānaṁ samattaṁ.
Dutiyaṁ sāgatattherāpadānaṁ (32)