[14] Siddhatthassa bhagavato mahāpugagaṇo 1 ahu
saraṇaṁ gatā ca te buddhaṁ saddahanti tathāgataṁ.
Sabbe saṅgamma mantetvā māḷaṁ kubbanti satthuno
ekatthambhaṁ alabhantā vicinanti brahāvane.
Tehaṁ araññe disvāna upagamma gaṇaṁ tadā
añjaliṁ paggahetvāna paripucchiṁ gaṇaṁ ahaṁ.
Te me puṭṭhā viyākaṁsu sīlavanto upāsakā
māḷaṁ mayaṁ kattukāmā ekatthambho na labbhati.
Ekatthambhaṁ mamaṁ detha ahaṁ dassāmi satthuno
āharissāmahaṁ thambhaṁ appossukkā bhavantu te.
Te me thambhaṁ pavecchiṁsu pasannā tuṭṭhamānasā
tato paṭinivattitvā āgamaṁsu sakaṁ gharaṁ.
Aciraṁ gate pugagaṇe 2 thambhaṁ adāsahaṁ 3 tadā
haṭṭho haṭṭhena cittena paṭhamaṁ ussapesahaṁ.
Tena cittappasādena vimānaṁ upapajjahaṁ
ubbiddhaṁ bhavanaṁ mayhaṁ sattabhūmaṁ samuggataṁ.
Vajjamānāsu bherīsu paricāremahaṁ sadā
pañcapaññāsakappamhi rājā āsiṁ yasodharo.
1-2 Ma. Yu. mahāpūgagaṇo - gaṇe. 3 Po. Ma. ahāsahaṁ.
Tatthāpi bhavanaṁ mayhaṁ sattabhūmaṁ samuggataṁ
kūṭāgāravarūpetaṁ ekatthambhaṁ manoramaṁ.
Ekavīsatikappamhi udeno nāma khattiyo
tatrāpi bhavanaṁ mayhaṁ sattabhūmaṁ sulaṅkataṁ.
Yaṁ yaṁ yonūpapajjāmi devattaṁ atha mānusaṁ
anubhomi sabbametaṁ 1 ekatthambhassidaṁ phalaṁ.
Catunavute ito kappe yaṁ thambhamadadiṁ 2 tadā
duggatiṁ nābhijānāmi ekatthambhassidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā ekatthambhiko thero imā gāthāyo
abhāsitthāti.
Ekatthambhikattherassa apadānaṁ samattaṁ.
Tatiyaṁ nandattherāpadānaṁ (13)

[15] Padumuttarassa bhagavato lokajeṭṭhassa tādino
vatthaṁ khomaṁ mayā dinnaṁ sayambhussa mahesino.
Tamme buddho viyākāsi jalajuttamanāyako
iminā vatthadānena hemavaṇṇo bhavissasi.
1 Ma. sukhaṁ sabbaṁ. 2 Ma. thambhamadadaṁ.
Dvesampattiṁ anubhotvā sukkamūlena codito
gotamassa bhagavato kaniṭṭho tvaṁ bhavissasi.
Rāgaratto sukhasīlo kāmesu gedhamāyuto
buddhena codito santo tato 1 tvaṁ pabbajissasi.
Pabbajitvāna tvaṁ tattha kusalamūlena codito
sabbāsave pariññāya nibbāyissatyanāsavo.
Satakappasahassamhi caturo celanāmakā
saṭṭhikappasahassamhi upacelā catujjanā.
Pañcakappasahassamhi celāva caturo janā
sattaratanasampannā catudīpamhi issarā.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā nando thero imā gāthāyo
abhāsitthāti.
Nandattherassa apadānaṁ samattaṁ.
Catutthaṁ cullapanthakattherāpadānaṁ (14)

[16] Padumuttaro nāma jino āhutīnaṁ paṭiggaho
gaṇamhā vūpakaṭṭho so himavante vasī tadā.
1 Ma. tadā.
Ahaṁpi himavantamhi vasāmi assame tadā
acirāgataṁ mahāvīraṁ upesiṁ lokanāyakaṁ.
Pupphacchattaṁ gahetvāna upagañchiṁ narāsabhaṁ
samādhiṁ samāpajjantaṁ antarāyamakāsahaṁ.
Ubhohatthehi paggayha pupphacchattaṁ adāsahaṁ
paṭiggahesi bhagavā padumuttaro mahāmuni.
Sabbe devā attamanā himavantaṁ upenti te
sādhukāraṁ pavattiṁsu anumodissati cakkhumā.
Idaṁ vatvāna te devā upagañchuṁ naruttamaṁ
ākāse dhārayantassa padumaṁ chattamuttamaṁ.
Sattapattachattaṁ 1 paggayha adāsi tāpaso mama
tamahaṁ kittayissāmi suṇātha mama bhāsato.
Pañcavīsatikappāni devarajjaṁ karissati
catuttiṁsatikkhattuñca cakkavatti bhavissati.
Yaṁ yaṁ yoniṁ saṁsarati devattaṁ atha mānusaṁ
abbhokāse patiṭṭhantaṁ padumaṁ dhārayissati.
Kappasatasahassamhi okkākakulasambhavo
gotamo nāma gottena satthā loke bhavissati.
Pakāsite pāvacane manussattaṁ labhissati
manomayamhi kāyamhi uttamo so bhavissati.
1 Yu. padumachattaṁ.
Dve bhātaro bhavissanti ubhopi panthakavhayā 1
anubhotvā uttamatthaṁ jotayissanti sāsanaṁ.
So aṭṭhārasavassohaṁ pabbajiṁ anagāriyaṁ
visesāhaṁ na vindāmi sakyaputtassa sāsane.
Dandhā mayhaṁ gati āsi paribhūto pure ahaṁ 2
bhātā ca maṁ paṇāmesi gaccha dāni sakaṁ gharaṁ.
Sohaṁ paṇāmito santo saṅghārāmassa koṭṭhake
dummano tattha aṭṭhāsiṁ sāmaññasmiṁ apekkhavā.
Athettha 3 satthā āgacchi sīsaṁ mayhaṁ parāmasi
bāhāya maṁ gahetvāna saṅghārāmaṁ pavesayi.
Anukampāya me satthā adāsi pādapuñchaniṁ
evaṁ suddhaṁ adhiṭṭhehi ekamantaṁ adhiṭṭhitaṁ.
Hatthehi tamahaṁ gayha sariṁ kokanadaṁ ahaṁ
tattha cittaṁ vimuccī me arahattaṁ apāpuṇiṁ.
Manomayesu kāyesu sabbattha pāramiṁ gato
sabbāsave pariññāya viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā cullapanthako thero imā gāthāyo
abhāsitthāti.
Cullapanthakattherassa apadānaṁ samattaṁ.
1 Po. Yu. panthasvahayā. 2 Ma. ahuṁ. 3 Ma. bhagavā tattha āgacchi.
Pañcamaṁ pilindavacchattherāpadānaṁ (15)

[17] Nibbute lokanāthamhi sumedhe aggapuggale
pasannacitto sumano thūpapūjaṁ akāsahaṁ.
Ye ca khīṇāsavā tattha chaḷabhiññā mahiddhikā
tehaṁ tattha samānetvā saṅghabhattamakāsahaṁ.
Sumedhassa bhagavato upaṭṭhāko tadā ahu
sumedho nāma nāmena anumodittha so tadā.
Tena cittappasādena vimānaṁ upapajjahaṁ
chaḷāsītisahassāni accharāyo ahesu 1 me.
Mameva anuvattanti sabbakāmehi 2 tā sadā
aññe deve abhibhomi puññakammassidaṁ phalaṁ.
Pañcavīsatikappamhi varuṇo nāma khattiyo
visuddhabhojano āsiṁ cakkavatti ahaṁ tadā.
Na te bījaṁ pavappanti napi nīyanti naṅgalā
akaṭṭhapākimaṁ sāliṁ paribhuñjanti mānusā.
Tattha rajjaṁ karitvāna devattaṁ puna gañchahaṁ 3
tadāpi edisā mayhaṁ nibbattā bhogasampadā.
Na maṁ mittā amittā vā hiṁsanti sabbapāṇino
sabbesaṁ ca piyo homi puññakammassidaṁ phalaṁ.
1 Ma. Yu. ramiṁsu. 2 Po. sabbakāmasamohito. 3 Yu. gacchahaṁ.
Tiṁsakappasahassamhi yaṁ dānamadadiṁ tadā
duggatiṁ nābhijānāmi gandhalepassidaṁ phalaṁ.
Imamhi bhaddake kappe eko āsiṁ janādhipo
mahānubhāvo rājisi 1 cakkavatti mahabbalo.
Sohaṁ pañcasu sīlesu ṭhapetvā janataṁ bahuṁ
pāpetvā sugatiṁyeva devatānaṁ piyo ahaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā pilindavaccho thero imā gāthāyo
abhāsitthāti.
Pilindavacchattherassa apadānaṁ samattaṁ.
Chaṭṭhaṁ rāhulattherāpadānaṁ (16)

[18] Padumuttarassa bhagavato lokajeṭṭhassa tādino
sattabhūmimhi pāsāde ādāsaṁ santhariṁ ahaṁ.
Khīṇāsavasahassehi parikiṇṇo mahāmuni
upāgami gandhakuṭiṁ dipadindo narāsabho.
Virocayaṁ gandhakuṭiṁ devadevo narāsabho
bhikkhusaṅghe ṭhito satthā imā gāthā abhāsatha.
1 Ma. rājāhaṁ.
Yenāyaṁ jotitā seyyā ādāsova susanthato.
Tamahaṁ kittayissāmi suṇātha mama bhāsato.
Soṇṇamayā rūpimayā atho veḷuriyāmayā
nibbattissanti pāsādā yekeci manaso piyā.
Catusaṭṭhikkhattuṁ devindo devarajjaṁ karissati
sahassakkhattuṁ cakkavatti bhavissati anantarā.
Ekavīsatikappamhi vimalo nāma khattiyo
cāturanto vijitāvī cakkavatti bhavissati.
Nagaraṁ reṇuvati nāma iṭṭhakāhi sumāpitaṁ
āyāmato tīṇisataṁ caturassasamāyutaṁ.
Sudassano nāma pāsādo visukammena māpito
kūṭāgāravarūpeto sattaratanabhūsito.
Dasasaddāvivittantaṁ vijjādharasamākulaṁ
sudassanaṁva nagaraṁ devatānaṁ bhavissati.
Pabhā niggacchate tassa uggacchanteva sūriye
virocissati taṁ niccaṁ samantā aṭṭhayojanaṁ.
Kappasatasahassamhi okkākakulasambhavo
gotamo nāma nāmena satthā loke bhavissati.
Tusitāva cavitvāna sukkamūlena codito
gotamassa bhagavato atrajo so bhavissati.
Sace vaseyya agāraṁ cakkavatti bhaveyya so
aṭṭhānametaṁ yaṁ tādi agāre ratimajjhagā.
Nikkhamitvā agāramhā pabbajissati subbato
rāhulo nāma nāmena arahā so bhavissati.
Kikīva aṇḍaṁ rakkheyya cāmarīriva vāladhiṁ
nipako sīlasampanno mamaṁ dakkhi 1 mahāmuni.
Tassāhaṁ dhammamaññāya vihāsiṁ sāsane rato
sabbāsave pariññāya viharāmi anāsavo.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā rāhulo thero imā gāthāyo
abhāsitthāti.
Rāhulattherassa apadānaṁ samattaṁ.
Sattamaṁ upasenavaṅgantaputtattherāpadānaṁ (17)

[19] Padumuttaraṁ bhagavantaṁ lokajeṭṭhaṁ narāsabhaṁ
pabbhāramhi nisinnaṁ 2 taṁ upagañchiṁ naruttamaṁ.
Kaṇikāraṁ 3 pupphitaṁ disvā vaṇṭe chetvāna taṁ tadā
alaṅkaritvā chattamhi buddhassa abhiropayiṁ.
1 Po. ajja rakkhe mahāmuni. Ma. Yu. .. rakkhi ... 2 Ma. nisīdantaṁ.
3 Ma. kaṇikārapupphaṁ.
Piṇḍapātañca pādāsiṁ paramannaṁ subhojanaṁ
buddhena navame tattha samaṇe aṭṭha bhojayī.
Anumodi mahāvīro sayambhū aggapuggalo
iminā chattadānena paramannapavecchanā.
Tena cittappasādena sampattiṁ anubhossasi
tiṁsakkhattuṁ 1 ca devindo devarajjaṁ karissati.
Ekavīsatikkhattuṁ ca cakkavatti bhavissati
padesarajjaṁ vipulaṁ gaṇanāto asaṅkhayaṁ.
Yaṁ vadanti sumedhoti bhūripaññaṁ sumedhasaṁ
kappeto satasahasse okkākakulasambhavo.
Gotamo nāma gottena eso 2 buddho bhavissati
sāsane dippamānamhi manussattaṁ gamissati.
Upasenoti nāmena [3]- hessati satthusāvako
carimaṁ vattate mayhaṁ [4]- bhavā sabbe samūhatā
dhāremi antimaṁ dehaṁ jetvā māraṁ savāhanaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā upaseno vaṅgantaputto thero imā
gāthāyo abhāsitthāti.
Upasenavaṅgantaputtattherassa apadānaṁ samattaṁ.
Tatiyabhāṇavāraṁ niṭṭhitaṁ.
1 Ma. chattiṁsakkhattuṁ. 2 Ma. satthā loke bhavissati. 3 Ma. tassa dhammesu
dāyādo oraso dhammanimmito. 4 Ma. samantapāsādikattā aggaṭṭhāne ṭhapessati.
Aṭṭhamaṁ raṭṭhapālattherāpadānaṁ (18)

[20] Padumuttarassa bhagavato lokajeṭṭhassa tādino
varanāgo mayā dinno īsādanto uruḷhavo 1 .
Setacchattopasedhito 2 sāthabbaṇo 3 sahatthipo
agghāpetvāna taṁ sabbaṁ saṅghārāmaṁ akārayiṁ.
Catupaññāsasahassāni pāsāde kārayiṁ ahaṁ
mahoghadānaṁ karitvāna niyyādesiṁ mahesino.
Anumodi mahāvīro sayambhū aggapuggalo
sabbe jane hāsayanto desesi amataṁ padaṁ.
Taṁ me buddho viyākāsi jaladuttamanāyako 4
bhikkhusaṅghe nisīditvā imā gāthā abhāsatha.
Catupaññāsasahassāni pāsāde kārayi ayaṁ
kathayissāmi vipākaṁ suṇātha mama bhāsato.
Aṭṭhārasasahassāni kūṭāgārā bhavissare
byamhuttamamhi nibbattā sabbasoṇṇamayā ca te.
Paññāsakkhattuṁ devindo devarajjaṁ karissati
aṭṭhapaññāsakkhattuṁ ca cakkavatti bhavissati.
Kappasatasahassamhi okkākakulasambhavo
gotamo nāma nāmena satthā loke bhavissati.
1 Ma. uruḷhavā. 2 Ma. setacchattopasodhito. Yu. .. pasevato. 3 Ma. sakappaṇo.
4 Po. jalajuttamanāmako. Ma. jaladuttaranāmako.
Devalokā cavitvāna sukkamūlena codito
phīte 1 kule mahābhoge nibbattissati tāvade.
So pacchā pabbajitvāna sukkamūlena codito
raṭṭhapāloti nāmena hessati satthusāvako.
Padhānaṁ pahitatto so upasanto nirūpadhi
sabbāsave pariññāya nibbāyissatyanāsavo.
Uṭṭhāya abhinikkhamma jahitvā bhogasampadā
kheḷapiṇḍeva bhogamhi pemaṁ mayhaṁ na vajjati.
Viriyaṁ me dhuradhorayhaṁ yogakkhemādhivāhanaṁ
dhāremi antimaṁ dehaṁ sammāsambuddhasāsane.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā raṭṭhapālo thero imā gāthāyo
abhāsitthāti.
Raṭṭhapālattherassa apadānaṁ samattaṁ.
Navamaṁ sopākattherāpadānaṁ (19)

[21] Pabbhāraṁ sodhayantassa pavare 2 pabbatuttame
siddhattho nāma bhagavā āgacchi mama santikaṁ.
1 Ma. Yu. addhe. 2 Ma. vipine.
Buddhaṁ upagataṁ disvā lokajeṭṭhassa tādino
santharaṁ paññāpetvāna 1 pupphāsanamadāsahaṁ.
Pupphāsane nisīditvā siddhattho lokanāyako
mamañca gatimaññāya aniccataṁ udāhari.
Aniccā vata saṅkhārā uppādavayadhammino
uppajjitvā nirujjhanti tesaṁ vūpasamo sukho.
Idaṁ vatvāna sabbaññū lokajeṭṭho narāsabho
nabhe 2 abbhuggami dhīro haṁsarājāva ambare.
Sakaṁ diṭṭhiṁ jahitvāna bhāvayāniccasaññahaṁ
ekāhaṁ bhāvayitvāna tattha kālakato ahaṁ.
Dve sampattī anubhotvā sukkamūlena codito
pacchimabbhavasampatto 3 sāpākayonupāgamiṁ.
Agārā abhinikkhamma pabbajiṁ anagāriyaṁ
jātiyā sattavassohaṁ arahattaṁ apāpuṇiṁ.
Āraddhaviriyo pahitatto sīlesu susamāhito
tosetvāna mahānāgaṁ alatthaṁ upasampadaṁ.
Catunavute ito kappe yaṁ kammamakariṁ tadā
duggatiṁ nābhijānāmi pupphadānassidaṁ phalaṁ.
Catunavute ito kappe yaṁ saññaṁ bhāvayiṁ tadā
taṁ saññaṁ bhāvayantassa patto me āsavakkhayo.
1 Ma. santharitvāna. 2 Ma. Yu. nabhaṁ abbhuggami vīro. 3 Ma. Yu. pacchime
bhave samupatte.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sopāko thero imā gāthāyo
abhāsitthāti.
Sopākattherassa apadānaṁ samattaṁ.
Dasamaṁ sumaṅgalattherāpadānaṁ (20)

[22] Āhutiṁ yiṭṭhukāmohaṁ paṭiyādetvāna bhojanaṁ
brāhmaṇe paṭimānento visāle māḷake ṭhito.
Athaddasāsiṁ sambuddhaṁ piyadassiṁ mahāyasaṁ
sabbalokaṁ vinetāraṁ sayambhuṁ aggapuggalaṁ.
Bhagavantaṁ jutimantaṁ sāvakehi purakkhataṁ
ādiccamiva rocantaṁ rathiyaṁ paṭipannakaṁ.
Añjaliṁ paggahetvāna sakaṁ cittaṁ pasādayiṁ
manasāva nimantesiṁ āgacchatu mahāmuni.
Mama saṅkappamaññāya satthā loke anuttaro
khīṇāsavasahassehi mama dvāraṁ upāgami.
Namo te purisājañña namo te purisuttama
pāsādaṁ abhirūhitvā sīhāsane nisīdatu 1 .
1 Ma. nisidataṁ. Yu. nisida tvaṁ.
Danto dantaparivāro tiṇṇo tārayataṁ varo
pāsādaṁ abhirūhitvā nisīdi pavarāsane.
Yaṁ me atthi sake gehe āmisaṁ paccupaṭṭhitaṁ
tāhaṁ buddhassa pādāsiṁ pasanno sehi pāṇibhi.
Pasannacitto sumano vedajāto katañjalī
buddhaseṭṭhaṁ namassāmi aho buddhassuḷāratā.
Aṭṭhannaṁ payirupāsataṁ bhuñjaṁ khīṇāsavā bahū
tuyheveso ānubhāvo saraṇantaṁ upemahaṁ.
Piyadassī ca bhagavā lokajeṭṭho narāsabho
bhikkhusaṅghe nisīditvā imā gāthā abhāsatha.
Yo so saṅghaṁ abhojesi ujubhūtaṁ samāhitaṁ
tathāgatañca sambuddhaṁ suṇātha mama bhāsato.
Sattavīsatikkhattuṁ so devarajjaṁ karissati
sakakammābhiraddho so devaloke ramissati.
Dasa ca aṭṭhakkhattuṁ so cakkavatti bhavissati
paṭhabyā rajjaṁ pañcasataṁ vasudhaṁ āvasissati.
Araññaṁ vanamoggayha kānanaṁ byagghasevitaṁ
padhānaṁ padahitvāna kilesā jhāpitā mayā.
Aṭṭhārase kappasate yaṁ dānamadadiṁ tadā
duggatiṁ nābhajānāmi bhattadānassidaṁ phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā sumaṅgalo thero imā gāthāyo
abhāsitthāti.
Sumaṅgalattherassa apadānaṁ samattaṁ.
Uddānaṁ
sīhāsanī ekatthambhī nando ca cullapanthako
pilindarāhulo ceva vaṅganto raṭṭhapālako.
Sopāko maṅgalo ceva daseva dutiye vagge
satañca sattatiṁsā ca gāthā cettha pakāsitā.
Sīhāsaniyavaggo dutiyo.
-----------
Tatiyo subhūtivaggo
paṭhamaṁ subhūtittherāpadānaṁ (21)

[23] Himavantassa avidūre nisabho nāma pabbato
assamo sukato mayhaṁ paṇṇasālā sumāpitā.
Kosiyo nāma nāmena jaṭilo uggatāpano
ekāyiko 1 adutiyo vasāmi nisabhe tadā.
Phalamūlañca paṇṇañca na bhuñjāmi ahaṁ tadā
pavattañca supātāhaṁ upajīvāmi tāvade.
1 Ma. ekākiyo. Yu. ekākiko.
Nāhaṁ kopemi ājīvaṁ cajamānopi jīvitaṁ
ārādhemi sakaṁ cittaṁ vivajjemi anesanaṁ.
Rāgūpasaṁhitaṁ cittaṁ yadā uppajjate mama
sayaṁva paccavekkhāmi ekako 1 taṁ damemahaṁ.
Rajjasi 2 rajanīye ca dosanīye ca dussase
muyhase mohanīye ca nikkhamassu vanā tuvaṁ.
Visuddhānaṁ ayaṁ vāso nimmalānaṁ tapassinaṁ
mā kho visuddhaṁ dūsesi nikkhamassu vanā tuvaṁ.
Āgāriko bhavitvāna dayā yuttaṁ 3 labhissasi
ubhopi mā virādhesi nikkhamassu vanā tuvaṁ.
Chavālātaṁ yathā kaṭṭhaṁ na kvaci kiccakārakaṁ
neva gāme araññe vā na hi taṁ kaṭṭhasammataṁ.
Chavālātūpamo tvaṁsi na gihi napi saññato
ubhato muttako ajja nikkhamassu vanā tuvaṁ.
Siyā nukho tava etaṁ ko pajāni 4 hi te idaṁ
sīghaṁ 5 dhuraṁ vahisi 6 me kosajjabahulāya ca.
Jigucchissanti taṁ viññū asuciṁ nāgariko yathā
ākaḍḍhitvāna isayo codayissanti taṁ sadā.
Taṁ viññū pavadissanti samatikkantasāsanaṁ
saṁvāsaṁ alabhanto hi kathaṁ jīvihisī tuvaṁ.
1 Ma. Yu. ekaggo. 2 Ma. rajjase. 3 Ma. puttaṁ. 4 Ma. pajānāti.
5 Ma. saddhādharuṁ. 6 Yu. pāhisi.
Tidhappabhinnaṁ mātaṅgaṁ kuñjaraṁ saṭṭhihāyanaṁ
balināgo upagantvā yūthā nīharate gajaṁ.
Yūthā vinissaṭo santo sukhaṁ sātaṁ na vindati
dukkhito vimano hoti pajjhāyanto 1 pavedhati.
Tatheva jaṭilā taṁpi nīharissanti dummatiṁ
tehi tvaṁ nissaṭo santo sukhaṁ sātaṁ na lacchasi.
Divā vā yadi vā rattiṁ sokasallasamappito
dayhasi pariḷāhena gajo yūthāva nissaṭo.
Jātarūpaṁ yathā kuṭaṁ neva yāyati 2 katthaci
tathā sīlavihīno tvaṁ na yāyissasi 3 katthaci.
Agārāvasamānopi 4 kathaṁ jīvihisī tuvaṁ
mattikaṁ pettiñcāpi natthi te nihitaṁ dhanaṁ.
Sakaṁ kammaṁ karitvāna gatte sedaṁ pamocayaṁ
evaṁ jīvihisī gehe sādhu te taṁ na ruccati.
Evāhaṁ tattha vāremi saṅkilesagataṁ manaṁ
nānādhammakathaṁ katvā pāpā cittaṁ nivārayiṁ.
Evaṁ me viharantassa appamādavihārino
tiṁsavassasahassāni pavane me atikkamuṁ.
Appamādena 5 maṁ disvā uttamatthaṁ gavesakaṁ
padumuttarasambuddho āgañchi mama santikaṁ.
1 Yu. ojjhāyanto padhāvati. 2 Ma. jhāyati. 3 Ma. jhāyissati.
4 Po. anāgāravasamānopi. 5 Ma. Yu. appamādarataṁ.
Timbarūsakavaṇṇābho appameyyo anūpamo
rūpenāsadiso buddho ākāse caṅkamī tadā.
Suphullo sālarājāva vijjuvabbhaghanantare
ñāṇenāsadiso buddho ākāse caṅkamī tadā.
Sīharājāvasambhīto gajarājāva dappito 1
abhīto 2 byaggharājāva ākāse caṅkamī tadā.
Siṅginikkhasuvaṇṇābho khadiraṅgārasannibho
maṇi yathā jotiraso ākāse caṅkamī tadā.
Visuddhakelāsasannibho puṇṇamāyeva candimā
majjhantikeva 3 suriyo ākāse caṅkamī tadā.
Disvā nabhe caṅkamantaṁ evaṁ cintesahaṁ tadā
devo nukho ayaṁ satto udāhu manujo ayaṁ.
Na me suto va diṭṭho vā mahiyā ediso naro
api mantapadaṁ atthi ayaṁ satthā bhavissati.
Evāhaṁ cintayitvāna sakaṁ cittaṁ pasādayiṁ
nānāpupphañca gandhañca sannipātesahaṁ tadā.
Pupphāsanaṁ paññāpetvā sādhucittaṁ manoramaṁ
narasārathinaṁ aggaṁ idaṁ vacanamabraviṁ.
Idaṁ me āsanaṁ vīra paññattaṁ tavanucchakaṁ 4
hāsayanto mama cittaṁ nisīda kusumāsane.
1 Po. dampito. 2 Ma. Yu. lāsito. 3 Yu. majjhantiko. 4 Ma. Yu. tavanucchavaṁ.
Nisīdi tattha bhagavā asambhītova kesarī
sattarattindivaṁ buddho pavare kusumāsane.
Namassamāno aṭṭhāsiṁ sattarattindivaṁ ahaṁ
vuṭṭhahitvā samādhimhā satthā loke anuttaro.
Mama kammaṁ pakittento idaṁ vacanamabravi
bhāvehi buddhānussatiṁ bhāvanānaṁ anuttaraṁ.
Imaṁ satiṁ bhāvayitvā pūrayissasi mānasaṁ
tiṁsakappasahassāni devaloke ramissasi.
Asītikkhattuṁ devindo devarajjaṁ karissasi
sahassakkhattuṁ cakkavatti rājā raṭṭhe bhavissasi.
Padesarajjaṁ vipulaṁ gaṇanāto asaṅkhayaṁ
anubhossasi taṁ sabbaṁ buddhānussatiyā phalaṁ.
Bhavābhave saṁsaranto mahābhogaṁ labhissasi
bhogehi 1 onatā natthi buddhānussatiyā phalaṁ.
Kappasatasahassamhi okkākakulasambhavo
gotamo nāma gottena satthā loke bhavissati.
Asītikoṭiṁ chaḍḍetvā dāsakammakare bahū
gotamassa bhagavato sāsane pabbajissasi.
Ārādhayitvāna sambuddhaṁ gotamaṁ sākyapuṅgavaṁ
subhūti nāma nāmena hessasi 2 satthusāvako.
1 Ma. Yu. bhoge te ūnatā natthi. 2 Po. Ma. hessati.
Bhikkhusaṅghe nisīditvā dakkhiṇeyyagaṇamhi 1 taṁ
tathāraṇavihāre ca dvīsu aggaṁ 2 ṭhapessati.
Idaṁ vatvāna sambuddho jalajuttamanāyako
nabhaṁ abbhuggami dhīro haṁsarājāva ambare.
Sāsito lokanāthena namassitvā tathāgataṁ
sadā bhāvesiṁ 3 mudito buddhānussatimuttamaṁ.
Tena kammena sukatena cetanāpaṇidhīhi ca
jahitvā mānusaṁ dehaṁ tāvatiṁsaṁ agañchahaṁ.
Asītikkhattuṁ devindo devarajjaṁ akārayiṁ
sahassakkhattuṁ rājā ca cakkavatti ahosahaṁ.
Padesarajjaṁ vipulaṁ gaṇanāto asaṅkhayaṁ
anubhomi susampattiṁ buddhānussatiyā phalaṁ.
Bhavābhave saṁsaranto mahābhogaṁ labhāmahaṁ
bhoge me onatā natthi buddhānussatiyā phalaṁ.
Satasahassito kappe yaṁ kammamakariṁ tadā
duggatiṁ nābhijānāmi buddhānussatiyā phalaṁ.
Paṭisambhidā catasso vimokkhāpica aṭṭhime
chaḷabhiññā sacchikatā kataṁ buddhassa sāsananti.
Itthaṁ sudaṁ āyasmā subhūti thero imā gāthāyo
abhāsitthāti.
Subhūtittherassa apadānaṁ samattaṁ.
1 Po. Ma. dakkhiṇeyyaguṇamhi taṁ. 2 Ma. agge. 3 Ma. bhāvemi.
Dutiyaṁ upavāṇattherāpadānaṁ (22)