[266] Tattha katamaṁ dukkhe ñāṇaṁ. Dukkhaṁ ārabbha yā
uppajjati paññā pajānanā vicayo pavicayo dhammavicayo sallakkhaṇā
upalakkhaṇā paccupalakkhaṇā paṇḍiccaṁ kosallaṁ
nepuññaṁ vebhabyā 1 cintā upaparikkhā bhūri medhā pariṇāyikā
vipassanā sampajaññaṁ patodo paññā paññindriyaṁ paññābalaṁ
paññāsatthaṁ paññāpāsādo paññāāloko paññāobhāso
paññāpajjoto paññāratanaṁ amoho dhammavicayo sammādiṭṭhi
idaṁ vuccati dukkhe ñāṇaṁ.

[267] Dukkhasamudayaṁ ārabbha .pe. Dukkhanirodhaṁ ārabbha .pe.
Dukkhanirodhagāminiṁ paṭipadaṁ ārabbha yā uppajjati paññā pajānanā
.pe. Amoho dhammavicayo sammādiṭṭhi idaṁ vuccati dukkhanirodhagāminiyā
paṭipadāya ñāṇaṁ taṁ ñātaṭṭhena ñāṇaṁ pajānanaṭṭhena
paññā tena vuccati dukkhe ñāṇaṁ dukkhasamudaye
1 Sī. vebhabbā.
Ñāṇaṁ dukkhanirodhe ñāṇaṁ dukkhanirodhagāminiyā paṭipadāya
ñāṇaṁ.
--------

[268] Kathaṁ atthapaṭisambhide ñāṇaṁ dhammapaṭisambhide ñāṇaṁ
niruttipaṭisambhide ñāṇaṁ paṭibhāṇapaṭisambhide ñāṇaṁ. Atthesu
ñāṇaṁ atthapaṭisambhidā dhammesu ñāṇaṁ dhammapaṭisambhidā niruttīsu
ñāṇaṁ niruttipaṭisambhidā paṭibhāṇesu ñāṇaṁ paṭibhāṇapaṭisambhidā
atthanānatte paññā atthapaṭisambhide ñāṇaṁ dhammanānatte
paññā dhammapaṭisambhide ñāṇaṁ niruttinānatte paññā
niruttipaṭisambhide ñāṇaṁ paṭibhāṇanānatte paññā paṭibhāṇapaṭisambhide
ñāṇaṁ atthavavatthāne paññā atthapaṭisambhide ñāṇaṁ
dhammavavatthāne paññā dhammapaṭisambhide ñāṇaṁ niruttivavatthāne
paññā niruttipaṭisambhide ñāṇaṁ paṭibhāṇavavatthāne paññā
paṭibhāṇapaṭisambhide ñāṇaṁ atthasallakkhaṇe paññā atthapaṭisambhide
ñāṇaṁ dhammasallakkhaṇe paññā dhammapaṭisambhide ñāṇaṁ
niruttisallakkhaṇe paññā niruttipaṭisambhide ñāṇaṁ paṭibhāṇasallakkhaṇe
paññā paṭibhāṇapaṭisambhide ñāṇaṁ atthaupalakkhaṇe
paññā atthapaṭisambhide ñāṇaṁ dhammaupalakkhaṇe paññā dhammapaṭisambhide
ñāṇaṁ niruttiupalakkhaṇe paññā niruttipaṭisambhide
ñāṇaṁ paṭibhāṇaupalakkhaṇe paññā paṭibhāṇapaṭisambhide ñāṇaṁ
Atthappabhede paññā atthapaṭisambhide ñāṇaṁ dhammappabhede
paññā dhammapaṭisambhide ñāṇaṁ niruttippabhede paññā niruttipaṭisambhide
ñāṇaṁ paṭibhāṇappabhede paññā paṭibhāṇapaṭisambhide
ñāṇaṁ atthappabhāvane paññā atthapaṭisambhide ñāṇaṁ dhammappabhāvane
paññā dhammapaṭisambhide ñāṇaṁ niruttippabhāvane
paññā niruttipaṭisambhide ñāṇaṁ paṭibhāṇappabhāvane paññā
paṭibhāṇapaṭisambhide ñāṇaṁ atthajotane 1 paññā atthapaṭisambhide
ñāṇaṁ dhammajotane paññā dhammapaṭisambhide ñāṇaṁ niruttijotane
paññā niruttipaṭisambhide ñāṇaṁ paṭibhāṇajotane paññā
paṭibhāṇapaṭisambhide ñāṇaṁ atthavirocane paññā atthapaṭisambhide
ñāṇaṁ dhammavirocane paññā dhammapaṭisambhide ñāṇaṁ niruttivirocane
paññā niruttipaṭisambhide ñāṇaṁ paṭibhāṇavirocane
paññā paṭibhāṇapaṭisambhide ñāṇaṁ atthappakāsane paññā
atthapaṭisambhide ñāṇaṁ dhammappakāsane paññā dhammapaṭisambhide
ñāṇaṁ niruttippakāsane paññā niruttipaṭisambhide ñāṇaṁ
paṭibhāṇappakāsane paññā paṭibhāṇapaṭisambhide ñāṇaṁ taṁ
ñātaṭṭhena ñāṇaṁ pajānanaṭṭhena paññā tena vuccati atthapaṭisambhide
ñāṇaṁ dhammapaṭisambhide ñāṇaṁ niruttipaṭisambhide
ñāṇaṁ paṭibhāṇapaṭisambhide ñāṇaṁ.
1 Sī. atthajānane.

[269] Katamaṁ tathāgatassa indriyānaṁ paropariyatte ñāṇaṁ.
Idha tathāgato satte passati apparajakkhe mahārajakkhe tikkhindriye
mudindriye svākāre dvākāre suviññāpaye duviññāpaye
appekacce paralokavajjabhayadassāvino appekacce
naparalokavajjabhayadassāvino.

[270] Apparajakkhe mahārajakkheti saddho puggalo apparajakkho
assaddho puggalo mahārajakkho āraddhaviriyo puggalo apparajakkho
kusīto puggalo mahārajakkho upaṭṭhitassati puggalo apparajakkho
muṭṭhassati puggalo mahārajakkho samāhito puggalo apparajakkho
asamāhito puggalo mahārajakkho paññavā puggalo apparajakkho
duppañño puggalo mahārajakkho.

[271] Tikkhindriye mudindriyeti saddho puggalo tikkhindriyo
assaddho puggalo mudindriyo āraddhaviriyo puggalo
tikkhindriyo kusīto puggalo mudindriyo upaṭṭhitassati puggalo
tikkhindriyo muṭṭhassati puggalo mudindriyo samāhito puggalo
tikkhindriyo asamāhito puggalo mudindriyo paññavā puggalo
tikkhindriyo duppañño puggalo mudindriyo.

[272] Svākāre dvākāreti saddho puggalo svākāro
assaddho puggalo dvākāro āraddhaviriyo puggalo svākāro
kusīto puggalo dvākāro upaṭṭhitassati puggalo svākāro
Muṭṭhassati puggalo dvākāro samāhito puggalo svākāro
asamāhito puggalo dvākāro paññavā puggalo svākāro
duppañño puggalo dvākāro.

[273] Suviññāpaye duviññāpayeti saddho puggalo
suviññāpayo assaddho puggalo duviññāpayo āraddhaviriyo
puggalo suviññāpayo kusīto puggalo duviññāpayo upaṭṭhitassati
puggalo suviññāpayo muṭṭhassati puggalo duviññāpayo
samāhito puggalo suviññāpayo asamāhito puggalo duviññāpayo
paññavā puggalo suviññāpayo duppañño puggalo
duviññāpayo.

[274] Appekacce paralokavajjabhayadassāvino appekacce
naparalokavajjabhayadassāvinoti saddho puggalo paralokavajjabhayadassāvī
assaddho puggalo naparalokavajjabhayadassāvī āraddhaviriyo puggalo
paralokavajjabhayadassāvī kusīto puggalo naparalokavajjabhayadassāvī
upaṭṭhitassati puggalo paralokavajjabhayadassāvī muṭṭhassati puggalo
naparalokavajjabhayadassāvī samāhito puggalo paralokavajjabhayadassāvī
asamāhito puggalo naparalokavajjabhayadassāvī paññavā puggalo
paralokavajjabhayadassāvī duppañño puggalo naparalokavajjabhayadassāvī.

[275] Lokoti khandhaloko dhātuloko āyatanaloko vipattibhavaloko
Vipattisambhavaloko sampattibhavaloko sampattisambhavaloko
eko loko sabbe sattā āhāraṭṭhitikā dve lokā
nāmañca rūpañca tayo lokā tisso vedanā cattāro lokā
cattāro āhārā pañca lokā pañcupādānakkhandhā cha lokā
cha ajjhattikāni āyatanāni satta lokā satta viññāṇaṭṭhitiyo
aṭṭha lokā aṭṭha lokadhammā nava lokā nava sattāvāsā
dasa lokā dasāyatanāni dvādasa lokā dvādasāyatanāni aṭṭhārasa
lokā aṭṭhārasa dhātuyo.