[558] Brahmacariyamacariṁsūti brahmacariyaṁ vuccati asaddhammasamāpattiyā
ārati virati paṭivirati veramaṇī viramaṇaṁ akiriyā akaraṇaṁ
anajjhāpatti velāanatikkamo setughāto. Apica nippariyāyavasena
brahmacariyaṁ vuccati ariyo aṭṭhaṅgiko maggo seyyathīdaṁ sammādiṭṭhi
sammāsaṅkappo sammāvācā sammākammanto sammāājīvo
sammāvāyāmo sammāsati sammāsamādhi. Brahmacariyamacariṁsūti
brahmacariyaṁ [1]- acariṁsu samādāya vattiṁsūti brahmacariyamacariṁsu.

[559] Varapaññassa santiketi varapaññassa aggapaññassa
seṭṭhapaññassa [2]- pāmokkhapaññassa uttamapaññassa pavarapaññassa.
Santiketi santike sāmantā āsanne avidūre upakaṭṭheti varapaññassa
santike. Tenetaṁ vuccati
te tositā cakkhumatā buddhenādiccabandhunā
brahmacariyamacariṁsu varapaññassa santiketi.

[560] Ekamekassa pañhassa yathā buddhena desitaṁ
1 Ma. cariṁsu. 2 Ma. viseṭṭhapaññassa. evamīdisesu ṭhānesu.
Tathā yo paṭipajjeyya gacche pāraṁ apārato.

[561] Ekamekassa pañhassāti ekamekassa ajitapañhassa
ekamekassa tissametteyyapañhassa .pe. Ekamekassa piṅgiyapañhassāti
ekamekassa pañhassa.

[562] Yathā buddhena desitanti buddhenāti yo so bhagavā .pe.
Sacchikā paññatti yadidaṁ buddhoti. Yathā buddhena desitanti
yathā buddhena ācikkhitaṁ desitaṁ paññapitaṁ paṭṭhapitaṁ vivaritaṁ
vibhattaṁ 1 uttānīkataṁ pakāsitanti yathā buddhena desitaṁ.

[563] Tathā yo paṭipajjeyyāti sammāpaṭipadaṁ anulomapaṭipadaṁ
apaccanīkapaṭipadaṁ anvatthapaṭipadaṁ dhammānudhammapaṭipadaṁ paṭipajjeyyāti
tathā yo paṭipajjeyya.

[564] Gacche pāraṁ apāratoti pāraṁ vuccati amataṁ nibbānaṁ
yo so sabbasaṅkhārasamatho sabbūpadhipaṭinissaggo taṇhakkhayo virāgo
nirodho nibbānaṁ. Apāraṁ vuccanti kilesā ca khandhā ca
abhisaṅkhārā ca. Gacche pāraṁ apāratoti apārato pāraṁ gaccheyya
pāraṁ adhigaccheyya pāraṁ phuseyya 2 pāraṁ sacchikareyyāti gacche
pāraṁ apārato. Tenetaṁ vuccati
ekamekassa pañhassa yathā buddhena desitaṁ
tathā yo paṭipajjeyya gacche pāraṁ apāratoti.

[565] Apārā pāraṁ gaccheyya bhāvento maggamuttamaṁ
1 Ma. vibhajitaṁ. 2 Ma. phasseyya. evamuparipi.
Maggo so pāragamanāya 1 tasmā pārāyanaṁ iti.

[566] Apārā pāraṁ gaccheyyāti apāraṁ vuccanti kilesā
ca khandhā ca abhisaṅkhārā ca. Pāraṁ vuccati amataṁ nibbānaṁ
yo so sabbasaṅkhārasamatho sabbūpadhipaṭinissaggo taṇhakkhayo virāgo
nirodho nibbānaṁ. Apārā pāraṁ gaccheyyāti apārā pāraṁ
gaccheyya pāraṁ adhigaccheyya pāraṁ phuseyya pāraṁ sacchikareyyāti
apārā pāraṁ gaccheyya.

[567] Bhāvento maggamuttamanti magganti 2 maggo vuccati
ariyo aṭṭhaṅgiko maggo seyyathīdaṁ sammādiṭṭhi .pe.
Sammāsamādhi. Uttamanti aggaṁ seṭṭhaṁ viseṭṭhaṁ pāmokkhaṁ uttamaṁ
pavaranti maggamuttamaṁ. Bhāventoti bhāvento āsevanto
bahulīkarontoti bhāvento maggamuttamaṁ.