[548] Pucchantā nipuṇe pañheti pucchantāti pucchantā
yācantā ajjhesantā pasādentā. Nipuṇe pañheti gambhīre
duddase duranubodhe sante paṇīte atakkāvacare nipuṇe paṇḍitavedanīye
1 Ma. viseṭṭhacaraṇaṁ.
Pañheti pucchantā nipuṇe pañhe.

[549] Buddhaseṭṭhaṁ upāgamunti buddhāti yo so bhagavā .pe.
Sacchikā paññatti yadidaṁ buddhoti. Seṭṭhanti aggaṁ seṭṭhaṁ
viseṭṭhaṁ pāmokkhaṁ uttamaṁ pavaranti buddhaseṭṭhaṁ. Upāgamunti
upāgamiṁsu upasaṅkamiṁsu payirupāsiṁsu paripucchiṁsu paripañhiṁsūti buddhaseṭṭhaṁ
upāgamuṁ. Tenetaṁ vuccati
ete buddhaṁ upāgañchuṁ sampannacaraṇaṁ isiṁ
pucchantā nipuṇe pañhe buddhaseṭṭhaṁ upāgamunti.

[550] Tesaṁ buddho byākāsi pañhaṁ puṭṭho yathātathaṁ
pañhānaṁ veyyākaraṇena tosesi brāhmaṇe muni.

[551] Tesaṁ buddho byākāsīti tesanti soḷasannaṁ
pārāyaniyānaṁ brāhmaṇānaṁ. Buddhoti yo so bhagavā .pe.
Sacchikā paññatti yadidaṁ buddhoti. Byākāsīti tesaṁ buddho
byākāsi ācikkhi desesi paññapesi paṭṭhapesi vivari vibhaji
uttānīmakāsi pakāsesīti tesaṁ buddho byākāsi.

[552] Pañhaṁ puṭṭho yathātathanti pañhaṁ puṭṭhoti pañhaṁ
pucchito yācito ajjhesito pasādito. Yathātathanti yathā
ācikkhitabbaṁ tathā ācikkhi yathā desitabbaṁ tathā desesi yathā
paññapetabbaṁ tathā paññapesi yathā paṭṭhapetabbaṁ tathā paṭṭhapesi
yathā vivaritabbaṁ tathā vivari yathā vibhajitabbaṁ tathā vibhaji yathā
Uttānīkātabbaṁ tathā uttānīmakāsi yathā pakāsetabbaṁ tathā
pakāsesīti pañhaṁ puṭṭho yathātathaṁ.

[553] Pañhānaṁ veyyākaraṇenāti pañhānaṁ veyyākaraṇena
ācikkhaṇena desanena paññapanena paṭṭhapanena vivarena vibhajanena
uttānīkammena pakāsanenāti pañhānaṁ veyyākaraṇena.

[554] Tosesi brāhmaṇe munīti tosesīti tosesi vitosesi
pasādesi ārādhesi attamane akāsi. Brāhmaṇeti soḷasa
pārāyaniye brāhmaṇe. Munīti monaṁ vuccati ñāṇaṁ yā
paññā pajānanā .pe. Saṅgajālamaticca so munīti tosesi
brāhmaṇe muni. Tenetaṁ vuccati
tesaṁ buddho byākāsi pañhaṁ puṭṭho yathātathaṁ
pañhānaṁ veyyākaraṇena tosesi brāhmaṇe munīti.

[555] Te tositā cakkhumatā buddhenādiccabandhunā
brahmacariyamacariṁsu varapaññassa santike.

[556] Te tositā cakkhumatāti teti soḷasa pārāyaniyā
brāhmaṇā. Tositāti tositā vitositā pasāditā ārādhitā
attamanā katāti te tositā. Cakkhumatāti bhagavā pañcahi
cakkhūhi cakkhumā maṁsacakkhunāpi cakkhumā dibbacakkhunāpi cakkhumā
paññācakkhunāpi cakkhumā buddhacakkhunāpi cakkhumā samantacakkhunāpi
cakkhumā. Kathaṁ bhagavā maṁsacakkhunāpi cakkhumā .pe. Evaṁ
Bhagavā samantacakkhunāpi cakkhumāti te tositā cakkhumatā.

[557] Buddhenādiccabandhunāti buddhenāti yo so bhagavā .pe.
Sacchikā paññatti yadidaṁ buddhoti. Ādiccabandhunāti ādicco
vuccati suriyo. So gotamo gottena bhagavāpi gotamo
gottena bhagavā suriyassa gottañātako gottabandhu tasmā
buddho ādiccabandhūti buddhenādiccabandhunā.