[458] Kathaṁsatassa carato viññāṇaṁ uparujjhati
bhagavantaṁ puṭṭhumāgamhā taṁ suṇoma vaco tava.

[459] Kathaṁsatassa caratoti kathaṁsatassa sampajānassa carato
vicarato iriyato vattayato pālayato yapayato yāpayatoti kathaṁsatassa
carato

[460] Viññāṇaṁ uparujjhatīti viññāṇaṁ nirujjhati vūpasammati
Atthaṁ gacchati paṭippassambhatīti viññāṇaṁ uparujjhati.

[461] Bhagavantaṁ puṭṭhumāgamhāti buddhaṁ bhagavantaṁ puṭṭhuṁ pucchituṁ
yācituṁ ajjhesituṁ pasādetuṁ āgamhā āgatamhā upāgatamhā
sampattamhā tayā saddhiṁ samāgatamhāti bhagavantaṁ puṭṭhumāgamhā.

[462] Taṁ suṇoma vaco tavāti tanti tuyhaṁ vacanaṁ byapathaṁ
desanaṁ anusandhiṁ suṇoma uggaṇhāma upadhārema upalakkhemāti
taṁ suṇoma vaco tava. Tenāha so brāhmaṇo
kathaṁsatassa carato viññāṇaṁ uparujjhati
bhagavantaṁ puṭṭhumāgamhā taṁ suṇoma vaco tavāti.

[463] Ajjhattañca bahiddhā ca vedanaṁ nābhinandato
evaṁsatassa carato viññāṇaṁ uparujjhati.

[464] Ajjhattañca bahiddhā ca vedanaṁ nābhinandatoti ajjhattaṁ
vedanāsu vedanānupassī viharanto vedanaṁ nābhinandati nābhivadati
na ajjhosāya 1 tiṭṭhati abhinandanaṁ abhivadanaṁ ajjhosānaṁ gāhaṁ
parāmāsaṁ abhinivesaṁ pajahati vinodeti byantīkaroti anabhāvaṅgameti.
Bahiddhā vedanāsu vedanānupassī viharanto vedanaṁ nābhinandati
nābhivadati na ajjhosāya tiṭṭhati abhinandanaṁ abhivadanaṁ ajjhosānaṁ
gāhaṁ parāmāsaṁ abhinivesaṁ pajahati vinodeti byantīkaroti anabhāvaṅgameti.
Ajjhattabahiddhā vedanāsu vedanānupassī viharanto vedanaṁ nābhinandati
nābhivadati na ajjhosāya tiṭṭhati abhinandanaṁ abhivadanaṁ ajjhosānaṁ
1 Ma. ajjhoseti. evamuparipi.
Gāhaṁ parāmāsaṁ abhinivesaṁ pajahati vinodeti byantīkaroti
anabhāvaṅgameti. Ajjhattaṁ samudayadhammānupassī vedanāsu [1]-
viharanto ajjhattaṁ vayadhammānupassī vedanāsu viharanto ajjhattaṁ
samudayavayadhammānupassī vedanāsu viharanto bahiddhā samudayadhammānupassī
vedanāsu viharanto bahiddhā vayadhammānupassī vedanāsu viharanto
bahiddhā samudayavayadhammānupassī vedanāsu viharanto ajjhattabahiddhā
samudayadhammānupassī vedanāsu viharanto ajjhattabahiddhā
vayadhammānupassī vedanāsu viharanto ajjhattabahiddhā samudayavayadhammānupassī
vedanāsu viharanto vedanaṁ nābhinandati nābhivadati na
ajjhosāya tiṭṭhati abhinandanaṁ abhivadanaṁ ajjhosānaṁ gāhaṁ parāmāsaṁ
abhinivesaṁ pajahati vinodeti byantīkaroti anabhāvaṅgameti. Imehi
dvādasahākārehi vedanāsu vedanānupassī viharanto vedanaṁ nābhinandati
nābhivadati na ajjhosāya tiṭṭhati abhinandanaṁ abhivadanaṁ
ajjhosānaṁ .pe. Anabhāvaṅgameti. Athavā vedanaṁ aniccato
passanto vedanaṁ nābhinandati nābhivadati na ajjhosāya tiṭṭhati
abhinandanaṁ abhivadanaṁ ajjhosānaṁ gāhaṁ parāmāsaṁ abhinivesaṁ pajahati
vinodeti byantīkaroti anabhāvaṅgameti. Vedanaṁ dukkhato rogato
gaṇḍato sallato aghato ābādhato .pe. Anissaraṇato
passanto vedanaṁ nābhinandati nābhivadati na ajjhosāya tiṭṭhati
abhinandanaṁ abhivadanaṁ ajjhosānaṁ gāhaṁ parāmāsaṁ abhinivesaṁ pajahati
1 Ma. vedanānupassī. evamīdisesu padesu.
Vinodeti byantīkaroti anabhāvaṅgameti. Imehi dvācattāḷīsāya 1
ākārehi vedanāsu vedanānupassī viharanto vedanaṁ nābhinandati
nābhivadati na ajjhosāya tiṭṭhati abhinandanaṁ abhivadanaṁ ajjhosānaṁ
gāhaṁ parāmāsaṁ abhinivesaṁ pajahati vinodeti byantīkaroti anabhāvaṅgametīti
ajjhattañca bahiddhā ca vedanaṁ nābhinandato.

[465] Evaṁsatassa caratoti evaṁsatassa sampajānassa carato
vicarato iriyato vattayato pālayato yapayato yāpayatoti evaṁsatassa
carato.

[466] Viññāṇaṁ uparujjhatīti puññābhisaṅkhārasahagataṁ viññāṇaṁ
apuññābhisaṅkhārasahagataṁ viññāṇaṁ āneñjābhisaṅkhārasahagataṁ viññāṇaṁ
nirujjhati vūpasammati atthaṁ gacchati paṭippassambhatīti viññāṇaṁ
uparujjhati. Tenāha bhagavā
ajjhattañca bahiddhā ca vedanaṁ nābhinandato
evaṁsatassa carato viññāṇaṁ uparujjhatīti.
Saha gāthāpariyosānā .pe. Satthā me bhante bhagavā sāvakohamasmīti.
Udayamāṇavakapañhāniddeso terasamo.
------------
1 Ma. cattāḷīsāya.
Posālamāṇavakapañhāniddeso

[467] Yo atītaṁ ādisati (iccāyasmā posālo)
anejo chinnasaṁsayo
pāragū 1 sabbadhammānaṁ
atthī pañhena āgamaṁ.