[448] Aññāvimokkhaṁ saṁbrūmīti aññāvimokkho vuccati
arahattavimokkho. Arahattavimokkhaṁ saṁbrūmi ācikkhāmi desemi
paññapemi paṭṭhapemi vivarāmi vibhajāmi uttānīkaromīti [1]-
aññāvimokkhaṁ saṁbrūmi.

[449] Avijjāya pabhedananti avijjāyāti dukkhe añāṇaṁ .pe.
Avijjālaṅgī moho akusalamūlaṁ. Avijjāya pabhedananti avijjāya
bhedanaṁ pabhedanaṁ pahānaṁ vūpasamo paṭinissaggo paṭippassaddhi amataṁ
nibbānanti avijjāya pabhedanaṁ. Tenāha bhagavā
upekkhāsatisaṁsuddhaṁ dhammatakkapurejavaṁ
aññāvimokkhaṁ saṁbrūmi avijjāya pabhedananti.

[450] Kiṁsusaññojano loko kiṁsu tassa vicāraṇaṁ
kissassa vippahānena nibbānaṁ iti vuccati.

[451] Kiṁsusaññojano lokoti kiṁ lokassa saṁyojanaṁ
1 Ma. uttānīkaromi pakāsemīti.
Lagganaṁ bandhanaṁ upakkileso kena loko yutto payutto āyutto
samāyutto laggo laggito palibuddhoti kiṁsusaññojano loko.

[452] Kiṁsu tassa vicāraṇanti kiṁ tassa cāraṇaṁ vicāraṇaṁ
paṭivicāraṇaṁ kena loko carati vicarati paṭivicaratīti kiṁsu tassa
vicāraṇaṁ.

[453] Kissassa vippahānena nibbānaṁ iti vuccatīti kissassa
vippahānena vūpasamena paṭinissaggena paṭippassaddhiyā nibbānaṁ iti
vuccati pavuccati kathiyati bhaṇiyati dīpiyati vohariyatīti 1 kissassa
vippahānena nibbānaṁ iti vuccati. Tenāha so brāhmaṇo
kiṁsusaññojano loko kiṁsu tassa vicāraṇaṁ
kissassa vippahānena nibbānaṁ iti vuccatīti.

[454] Nandisaññojano loko vitakkassa vicāraṇā
taṇhāya vippahānena nibbānaṁ iti vuccati.

[455] Nandisaññojano lokoti nandi vuccati taṇhā yo
rāgo sārāgo .pe. Abhijjhā lobho akusalamūlaṁ. Yā nandi
lokassa saññojanaṁ lagganaṁ bandhanaṁ upakkileso imāya nandiyā
loko yutto payutto āyutto samāyutto laggo laggito palibuddhoti
nandisaññojano loko.

[456] Vitakkassa vicāraṇāti vitakkāti nava vitakkā
kāmavitakko byāpādavitakko vihiṁsāvitakko ñātivitakko
1 Ma. kathīyati bhaṇīyati dīpiyati voharīyatīti. evamuparipi.
Janapadavitakko amaravitakko parānuddayatāpaṭisaṁyutto vitakko
lābhasakkārasilokapaṭisaṁyutto vitakko anavaññattipaṭisaṁyutto vitakko
ime vuccanti nava vitakkā. Ime nava vitakkā assa
lokassa cāraṇā vicāraṇā paṭivicāraṇā imehi navahi vitakkehi so
loko carati vicarati paṭivicaratīti vitakkassa vicāraṇā.

[457] Taṇhāya vippahānena nibbānaṁ iti vuccatīti taṇhāyāti
rūpataṇhā saddataṇhā gandhataṇhā rasataṇhā phoṭṭhabbataṇhā
dhammataṇhā. Taṇhāya vippahānena nibbānaṁ iti vuccatīti
taṇhāya vippahānena vūpasamena paṭinissaggena paṭippassaddhiyā
nibbānaṁ iti vuccati pavuccati kathiyati bhaṇiyati dīpiyati vohariyatīti
taṇhāya vippahānena nibbānaṁ iti vuccati. Tenāha
bhagavā
nandisaññojano loko vitakkassa vicāraṇā
taṇhāya vippahānena nibbānaṁ iti vuccatīti.