[418] Nānājanā janapadehi saṅgatā
tava vīra vākyaṁ abhikaṅkhamānā
tesaṁ tuvaṁ sādhu viyākarohi
tathā hi te vidito esa dhammo.

[419] Nānājanā janapadehi saṅgatāti nānājanāti khattiyā
ca brāhmaṇā ca vessā ca suddā ca gahaṭṭhā ca pabbajitā
ca devā ca manussā ca. Janapadehi saṅgatāti aṅgā ca magadhā ca
[1]- Kāsiyā ca kosalā ca vajjiyā ca mallā ca cetiyamhā ca
sāgaramhā 2 ca [3]- pañcālā ca [4]- avantiyā ca yonā ca kambojā
ca. Saṅgatāti saṅgatā samāgatā samohitā sannipatitāti
nānājanā janapadehi saṅgatā.

[420] Tava vīra vākyaṁ abhikaṅkhamānāti vīrāti vīro.
Bhagavā viriyavāti vīro. Pahūti vīro. Visavīti vīro.
1 kaliṅgā ca. 2 Ma. vaṁsā. 3 Ma. kurumhā ca. 4 Ma. macchā ca surasenā ca
assakā ca.
Alamattoti vīro .pe. Vigatalomahaṁsoti vīro.
Virato idha sabbapāpakehi
nirayadukkhamaticca viriyavāso
so viriyavā padhānavā
vīro tādi pavuccate tathattāti.
Tava vīra vākyaṁ abhikaṅkhamānāti tuyhaṁ vacanaṁ byapathaṁ desanaṁ
anusandhiṁ. Abhikaṅkhamānāti kaṅkhamānā abhikaṅkhamānā icchamānā
sādiyamānā patthayamānā pihayamānā abhijappamānāti tava vīra
vākyaṁ abhikaṅkhamānā.

[421] Tesaṁ tuvaṁ sādhu viyākarohīti tesanti tesaṁ khattiyānaṁ
brāhmaṇānaṁ vessānaṁ suddānaṁ gahaṭṭhānaṁ pabbajitānaṁ devānaṁ
manussānaṁ. Tuvanti bhagavantaṁ bhaṇati. Sādhu viyākarohīti sādhu
ācikkhāhi desehi paññapehi paṭṭhapehi vivarāhi vibhajāhi
uttānīkarohi pakāsehīti sādhu viyākarohi.

[422] Tathāhi te vidito esa dhammoti tathāhi te vidito
ñāto tulito tīrito vibhāvito vibhūto esa dhammoti tathāhi
te vidito esa dhammo. Tenāha so brāhmaṇo
nānājanā janapadehi saṅgatā
tava vīra vākyaṁ abhikaṅkhamānā
tesaṁ tuvaṁ sādhu viyākarohi
Tathāhi te vidito esa dhammoti.

[423] Ādānataṇhaṁ vinayetha sabbaṁ (bhadrāvudhāti bhagavā)
uddhaṁ adho tiriyaṁ vāpi majjhe
yaṁ yaṁ hi lokasmiṁ upādiyanti
teneva māro anveti jantuṁ.

[424] Ādānataṇhaṁ vinayetha sabbanti ādānataṇhā vuccati
rūpataṇhā. Kiṁkāraṇā ādānataṇhā vuccati rūpataṇhā.
Tāya rūpaṁ ādiyanti upādiyanti gaṇhanti parāmasanti abhinivisanti
vedanaṁ saññaṁ saṅkhāre viññāṇaṁ gatiṁ upapattiṁ paṭisandhiṁ bhavaṁ
saṁsāraṁ vaṭṭaṁ ādiyanti upādiyanti gaṇhanti parāmasanti abhinivisanti
taṁkāraṇā ādānataṇhā 1 vuccati rūpataṇhā. Ādānataṇhaṁ
vinayetha sabbanti sabbaṁ ādānataṇhaṁ vinayetha vineyya 2 pajaheyya
vinodeyya byantīkareyya anabhāvaṅgameyyāti ādānataṇhaṁ vinayetha
sabbaṁ. Bhadrāvudhāti bhagavāti bhadrāvudhāti bhagavā taṁ brāhmaṇaṁ
nāmena ālapati. Bhagavāti gāravādhivacanametaṁ .pe. Sacchikā
paññatti yadidaṁ bhagavāti bhadrāvudhāti bhagavā.

[425] Uddhaṁ adho tiriyaṁ 3 vāpi majjheti uddhanti vuccati 4
anāgataṁ. Adhoti atītaṁ. Tiriyaṁ vāpi majjheti paccuppannaṁ.
Uddhanti kusalā dhammā. Adhoti akusalā dhammā. Tiriyaṁ vāpi
majjheti abyākatā dhammā. Uddhanti devaloko. Adhoti
1 Ma. ayaṁ pāṭho natthi. 2 Ma. vinayeyya paṭivineyya. 3 Ma. tiriyañcāpi.
evamuparipi. 4 Ma. ayaṁ pāṭho natthi.
Apāyaloko. Tiriyaṁ vāpi majjheti manussaloko. Uddhanti
sukhā vedanā. Adhoti dukkhā vedanā. Tiriyaṁ vāpi majjheti
adukkhamasukhā vedanā. Uddhanti arūpadhātu. Adhoti kāmadhātu.
Tiriyaṁ vāpi majjheti rūpadhātu. Uddhanti uddhaṁ pādatalā.
Adhoti adho kesamatthakā. Tiriyaṁ vāpi majjheti vemajjheti
uddhaṁ adho tiriyaṁ vāpi majjhe.

[426] Yaṁ yaṁ hi lokasmiṁ upādiyantīti yaṁ yaṁ hi rūpagataṁ
vedanāgataṁ saññāgataṁ saṅkhāragataṁ viññāṇagataṁ ādiyanti upādiyanti
gaṇhanti parāmasanti abhinivisanti. Lokasminti apāyaloke .pe.
Āyatanaloketi yaṁ yaṁ hi lokasmiṁ upādiyanti.

[427] Teneva māro anveti jantunti teneva kammābhisaṅkhāravasena
paṭisandhiko khandhamāro dhātumāro āyatanamāro gatimāro upapattimāro
paṭisandhimāro bhavamāro saṁsāramāro vaṭṭamāro anveti anugacchati
anvāyiko hoti. Jantunti sattaṁ naraṁ mānavaṁ 1 posaṁ puggalaṁ jīvaṁ
jātuṁ 2 jantuṁ indaguṁ manujanti teneva māro anveti jantuṁ.
Tenāha bhagavā
ādānataṇhaṁ vinayetha sabbaṁ (bhadrāvudhāti bhagavā)
uddhaṁ adho tiriyaṁ vāpi majjhe
yaṁ yaṁ hi lokasmiṁ upādiyanti
teneva māro anveti jantunti.
1 Ma. māṇavaṁ. 2 Ma. jāguṁ. evamuparipi.