[398] Jātijjarāya idha vippahānanti idheva jātiyā jarāmaraṇassa
1 Ma. lāmakapañño. 2 Ma. chatukapañño. 3 Ma. phasseyyaṁ. evamīdisesu padesu.
Pahānaṁ vūpasamo paṭinissaggo paṭippassaddhi amataṁ
nibbānanti jātijjarāya idha vippahānaṁ. Tenāha so brāhmaṇo
bhagavā hi kāme abhibhuyya iriyati
ādiccova paṭhaviṁ tejī tejasā
parittapaññassa me bhūripañño
ācikkha dhammaṁ yamahaṁ vijaññaṁ
jātijjarāya idha vippahānanti.

[399] Kāme vinaya gedhaṁ (jatukaṇṇīti bhagavā)
nekkhammaṁ daṭṭhu khemato
uggahitaṁ nirattaṁ vā
mā te vijjittha kiñcanaṁ.

[400] Kāmesu vinaya gedhanti kāmesūti uddānato dve
kāmā vatthukāmā ca kilesakāmā ca .pe. Ime vuccanti vatthukāmā
.pe. Ime vuccanti kilesakāmā. Gedhanti gedho vuccati
taṇhā yo rāgo sārāgo .pe. Abhijjhā lobho akusalamūlaṁ.
Kāmesu vinaya gedhanti vinaya paṭivinaya pajaha vinodehi byantīkarohi
anabhāvaṅgamehīti kāmesu vinaya gedhaṁ. Jatukaṇṇīti bhagavā taṁ
brāhmaṇaṁ gottena ālapati. Bhagavāti gāravādhivacanametaṁ .pe.
Sacchikā paññatti yadidaṁ bhagavāti jatukaṇṇīti bhagavā.

[401] Nekkhammaṁ daṭṭhu khematoti nekkhammanti sammāpaṭipadaṁ
Anulomapaṭipadaṁ apaccanīkapaṭipadaṁ anvatthapaṭipadaṁ dhammānudhammapaṭipadaṁ
sīlesu paripūrikāritaṁ indriyesu guttadvārataṁ bhojane mattaññutaṁ
jāgariyānuyogaṁ satisampajaññaṁ cattāro satipaṭṭhāne cattāro
sammappadhāne cattāro iddhipāde pañcindriyāni pañca balāni
satta bojjhaṅge ariyaṁ aṭṭhaṅgikaṁ maggaṁ nibbānañca nibbānagāminiñca
paṭipadaṁ khemato tāṇato leṇato saraṇato saraṇībhūtato abhayato
accutato amatato nibbānato daṭṭhuṁ passitvā tulayitvā tīrayitvā
vibhāvayitvā vibhūtaṁ katvāti nekkhammaṁ daṭṭhu khemato.

[402] Uggahitaṁ nirattaṁ vāti uggahitanti taṇhāvasena
diṭṭhivasena gahitaṁ parāmaṭṭhaṁ abhiniviṭṭhaṁ ajjhositaṁ adhimuttaṁ.
Nirattaṁ vāti nirattaṁ vā muñcitabbaṁ 1 pajahitabbaṁ vinodetabbaṁ
byantīkātabbaṁ anabhāvaṅgametabbanti uggahitaṁ nirattaṁ vā.

[403] Mā te vijjittha kiñcananti rāgakiñcanaṁ dosakiñcanaṁ
mohakiñcanaṁ mānakiñcanaṁ diṭṭhikiñcanaṁ kilesakiñcanaṁ duccaritakiñcanaṁ
idaṁ kiñcanaṁ tuyhaṁ mā vijjittha mā pavijjittha mā saṁvijjittha
pajaha vinodehi byantīkarohi anabhāvaṅgamehīti mā te vijjittha
kiñcanaṁ. Tenāha bhagavā
kāmesu vinaya gedhaṁ (jatukaṇṇīti bhagavā)
nekkhammaṁ daṭṭhu khemato
uggahitaṁ nirattaṁ vā
1 Ma. vijahitabbaṁ.
Mā te vijjittha kiñcananti.

[404] Yaṁ pubbe taṁ visosehi pacchā te māhu kiñcanaṁ
majjhe ce no gahessasi upasanto carissasi.

[405] Yaṁ pubbe taṁ visosehīti atīte saṅkhāre ārabbha
ye kilesā uppajjeyyuṁ te kilese sosehi visosehi
sukkhāpehi visukkhāpehi avījaṁ 1 karohi pajaha vinodehi byantīkarohi
anabhāvaṅgamehīti evampi yaṁ pubbe taṁ visosehi. Athavā ye
atītā kammābhisaṅkhārā vipakkavipākā 2 te kammābhisaṅkhāre sosehi
visosehi sukkhāpehi visukkhāpehi avījaṁ karohi pajaha vinodehi
byantīkarohi anabhāvaṅgamehīti evampi yaṁ pubbe taṁ visosehi.

[406] Pacchā te māhu kiñcananti pacchā vuccati anāgataṁ
kiñcanaṁ 3 anāgate saṅkhāre ārabbha rāgakiñcanaṁ dosakiñcanaṁ
mohakiñcanaṁ mānakiñcanaṁ diṭṭhikiñcanaṁ kilesakiñcanaṁ duccaritakiñcanaṁ
idaṁ kiñcanaṁ tuyhaṁ mā ahu mā ahosi mā janehi 4 mā sañjanehi
mā nibbattehi pajaha vinodehi byantīkarohi anabhāvaṅgamehīti pacchā
te māhu kiñcanaṁ.

[407] Majjhe ce no gahessasīti majjhe vuccati paccuppannaṁ
rūpaṁ vedanā saññā saṅkhārā viññāṇaṁ paccuppanne saṅkhāre
taṇhāvasena diṭṭhivasena no gahessasi na gaṇhissasi na parāmasissasi
na nandissasi [5]- na ajjhosissasi abhinandanaṁ [6]- ajjhosānaṁ
1 Ma. abījaṁ. evamuparipi. 2 Ma. avipakkavipākā. 3 Ma. dve pāṭhā natthi.
4 Ma. janesi. evamuparipi. 5 Ma. nābhinandissasi. 6 Ma. abhivadanaṁ.
Gāhaṁ parāmāsaṁ abhinivesaṁ pajahissasi vinodessasi byantīkarissasi
anabhāvaṅgamessasīti majjhe ce no gahessasi.