[408] Upasanto carissasīti rāgassa santattā 1 upasanto [2]-
dosassa santattā upasanto mohassa santattā upasanto kodhassa
upanāhassa .pe. Sabbākusalābhisaṅkhārānaṁ santattā samitattā [3]-
vūpasamitattā vijjhātattā nibbāpitattā 4 vigatattā paṭippassaddhattā
santo upasanto vūpasanto nibbuto paṭippassaddho carissasi
vicarissasi vattissasi pālessasi yapessasi yāpessasīti upasanto
carissasi. Tenāha bhagavā
yaṁ pubbe taṁ visosehi pacchā te māhu kiñcanaṁ
majjhe ce no gahessasi upasanto carissasīti.

[409] Sabbaso nāmarūpasmiṁ vītagedhassa brāhmaṇa
āsavassa 5 na vijjanti yehi maccuvasaṁ vaje.

[410] Sabbaso nāmarūpasmiṁ vītagedhassa brāhmaṇāti sabbasoti
sabbena sabbaṁ sabbathā sabbaṁ asesaṁ nissesaṁ pariyādāyavacanametaṁ
sabbasoti. Nāmanti cattāro arūpino khandhā. Rūpanti
cattāro ca mahābhūtā catunnañca mahābhūtānaṁ upādāyarūpaṁ.
Gedho vuccati taṇhā yo rāgo sārāgo .pe. Abhijjhā
lobho akusalamūlaṁ. Sabbaso nāmarūpasmiṁ vītagedhassa brāhmaṇāti
sabbaso nāmarūpasmiṁ vītagedhassa vigatagedhassa cattagedhassa vantagedhassa
1 Ma. samitattā. 2 Ma. carissasi. 3 Ma. upasamitattā. 4 Ma. nijjhātattā
nibbutattā. 5 Ma. āsavāssa. evamuparipi.
Muttagedhassa pahīnagedhassa paṭinissaṭṭhagedhassa vītarāgassa
vigatarāgassa cattarāgassa vantarāgassa muttarāgassa pahīnarāgassa
paṭinissaṭṭharāgassāti sabbaso nāmarūpasmiṁ vītagedhassa brāhmaṇa.

[411] Āsavassa na vijjantīti āsavāti cattāro āsavā
kāmāsavo bhavāsavo diṭṭhāsavo avijjāsavo. Assāti arahato
khīṇāsavassa. Na vijjantīti ime āsavā tassa natthi na santi
na saṁvijjanti nupalabbhanti pahīnā samucchinnā vūpasantā
paṭippassaddhā abhabbuppattikā ñāṇagginā daḍḍhāti āsavassa
na vijjanti.

[412] Yehi maccuvasaṁ vajeti yehi āsavehi maccuno vā vasaṁ
gaccheyya maraṇassa vā vasaṁ gaccheyya mārapakkhassa vā vasaṁ gaccheyya
te āsavā assa natthi na santi na saṁvijjanti nupalabbhanti
pahīnā samucchinnā vūpasantā paṭippassaddhā abhabbuppattikā
ñāṇagginā daḍḍhāti yehi maccuvasaṁ vaje. Tenāha bhagavā
sabbaso nāmarūpasmiṁ vītagedhassa brāhmaṇa
āsavassa na vijjanti yehi maccuvasaṁ vajeti.
Saha gāthāpariyosānā .pe. Satthā me bhante bhagavā
sāvakohamasmīti.
Jatukaṇṇīmāṇavakapañhāniddeso ekādasamo.
---------------
Bhadrāvudhamāṇavakapañhāniddeso

[413] Okañjahaṁ taṇhacchidaṁ anejaṁ (iccāyasmā bhadrāvudho)
nandiñjahaṁ oghatiṇṇaṁ vimuttaṁ
kappañjahaṁ abhiyāce sumedhaṁ
sutvāna nāgassa apanamissanti ito.

[414] Okañjahaṁ taṇhacchidaṁ anejanti okañjahanti
rūpadhātuyā yo chando yo rāgo yā nandi yā taṇhā ye
upāyupādānā cetaso adhiṭṭhānābhinivesānusayā te buddhassa bhagavato
pahīnā ucchinnamūlā tālāvatthukatā anabhāvaṅgatā āyatiṁanuppādadhammā
tasmā buddho okañjaho. Vedanādhātuyā saññādhātuyā
saṅkhāradhātuyā viññāṇadhātuyā yo chando yo rāgo yā
nandi yā taṇhā ye upāyupādānā cetaso adhiṭṭhānābhinivesānusayā
te buddhassa bhagavato pahīnā ucchinnamūlā
tālāvatthukatā anabhāvaṅgatā āyatiṁanuppādadhammā tasmā buddho
okañjaho. Taṇhacchidanti taṇhāti rūpataṇhā saddataṇhā
gandhataṇhā rasataṇhā phoṭṭhabbataṇhā dhammataṇhā sā taṇhā
buddhassa bhagavato chinnā ucchinnā samucchinnā vūpasantā
paṭippassaddhā abhabbuppattikā ñāṇagginā daḍḍhā tasmā buddho
taṇhacchido. Anejanti ejā vuccati taṇhā yo rāgo
Sārāgo .pe. Abhijjhā lobho akusalamūlaṁ. Sā ejā taṇhā
buddhassa bhagavato pahīnā ucchinnamūlā tālāvatthukatā anabhāvaṅgatā
āyatiṁanuppādadhammā tasmā buddho anejo. Ejāya pahīnattā
anejo. Bhagavā lābhepi na iñjati alābhepi na iñjati yasepi
na iñjati ayasepi na iñjati pasaṁsāyapi na iñjati nindāyapi
na iñjati sukhepi na iñjati dukkhepi na iñjati na calati na
vedhati na pavedhati na sampavedhati 1 tasmā buddho anejoti
okañjahaṁ taṇhacchidaṁ anejaṁ. Iccāyasmā bhadrāvudhoti iccāti
padasandhi .pe. Padānupubbakametaṁ iccāti. Āyasmāti
piyavacanaṁ garuvacanaṁ sagāravasappatissādhivacanametaṁ āyasmāti.
Bhadrāvudhoti tassa brāhmaṇassa nāmaṁ .pe. Abhilāpoti
iccāyasmā bhadrāvudho.

[415] Nandiñjahaṁ oghatiṇṇaṁ vimuttanti nandi vuccati
taṇhā yo rāgo sārāgo .pe. Abhijjhā lobho akusalamūlaṁ.
Sā nandi taṇhā buddhassa bhagavato pahīnā ucchinnamūlā
tālāvatthukatā anabhāvaṅgatā āyatiṁanuppādadhammā tasmā buddho
nandiñjaho. Oghatiṇṇanti bhagavā kāmoghaṁ tiṇṇo bhavoghaṁ
tiṇṇo diṭṭhoghaṁ tiṇṇo avijjoghaṁ tiṇṇo sabbaṁ saṁsārapathaṁ
tiṇṇo uttiṇṇo nittiṇṇo atikkanto samatikkanto vītivatto
so vuṭṭhavāso ciṇṇacaraṇo .pe. Jātijarāmaraṇasaṁsāro natthi
1 Ma. sampavedhatīti.
Tassa punabbhavoti nandiñjahaṁ oghatiṇṇaṁ. Vimuttanti bhagavato
rāgā cittaṁ muttaṁ vimuttaṁ suvimuttaṁ dosā cittaṁ muttaṁ vimuttaṁ
suvimuttaṁ mohā cittaṁ muttaṁ vimuttaṁ suvimuttaṁ kodhā
upanāhā .pe. Sabbākusalābhisaṅkhārehi cittaṁ muttaṁ vimuttaṁ
suvimuttanti nandiñjahaṁ oghatiṇṇaṁ vimuttaṁ.

[416] Kappañjahaṁ abhiyāce sumedhanti kappāti dve kappā
taṇhākappo ca diṭṭhikappo ca .pe. Ayaṁ taṇhākappo .pe.
Ayaṁ diṭṭhikappo. Buddhassa bhagavato taṇhākappo pahīno
diṭṭhikappo paṭinissaṭṭho taṇhākappassa pahīnattā diṭṭhikappassa
paṭinissaṭṭhattā buddho kappañjaho. Abhiyāceti yācāmi
abhiyācāmi ajjhesāmi sādiyāmi patthayāmi pihemi abhijappāmi.
Sumedhanti medhā vuccati paññā yā paññā pajānanā .pe.
Amoho dhammavicayo sammādiṭṭhi. Bhagavā imāya medhāya paññāya
upeto samupeto upāgato samupāgato upapanno samupapanno
samannāgato tasmā buddho sumedhoti kappañjahaṁ abhiyāce
sumedhaṁ.

[417] Sutvāna nāgassa apanamissanti itoti nāgassāti
nāgo. Bhagavā āguṁ na karotīti nāgo. Na gacchatīti nāgo.
Na āgacchatīti nāgo .pe. Evaṁ bhagavā na āgacchatīti nāgo.
Sutvāna nāgassa apanamissanti itoti tuyhaṁ vacanaṁ byapathaṁ desanaṁ
Anusandhiṁ sutvā suṇitvā uggahetvā upadhārayitvā upalakkhayitvā
ito apanamissanti vajissanti disāvidisaṁ gamissantīti sutvāna
nāgassa apanamissanti ito. Tenāha so brāhmaṇo
okañjahaṁ taṇhacchidaṁ anejaṁ (iccāyasmā bhadrāvudho)
nandiñjahaṁ oghatiṇṇaṁ vimuttaṁ
kappañjahaṁ abhiyāce sumedhaṁ
sutvāna nāgassa apanamissanti itoti.