[378] Akiñcanaṁ anādānaṁ etaṁ dīpaṁ anāparaṁ
nibbānaṁ iti naṁ brūmi jarāmaccuparikkhayaṁ.

[379] Akiñcanaṁ anādānanti akiñcananti rāgakiñcanaṁ
dosakiñcanaṁ mohakiñcanaṁ mānakiñcanaṁ diṭṭhikiñcanaṁ kilesakiñcanaṁ
duccaritakiñcanaṁ kiñcanappahānaṁ kiñcanavūpasamo kiñcanapaṭinissaggo
kiñcanapaṭippassaddhi 1 amataṁ nibbānanti akiñcanaṁ. Anādānanti
ādānaṁ vuccati taṇhā yo rāgo sārāgo .pe. Abhijjhā
lobho akusalamūlaṁ ādānappahānaṁ ādānavūpasamo ādānapaṭinissaggo
ādānapaṭippassaddhi amataṁ nibbānanti akiñcanaṁ
anādānaṁ.

[380] Etaṁ dīpaṁ anāparanti etaṁ dīpaṁ tāṇaṁ leṇaṁ saraṇaṁ
gatiparāyanaṁ. Anāparanti tamhā paro añño dīpo natthi
athakho soyeva 2 dīpo aggo ca seṭṭho ca viseṭṭho ca pāmokkho
ca uttamo ca pavaro cāti etaṁ dīpaṁ anāparaṁ.

[381] Nibbānaṁ iti naṁ brūmīti vānaṁ vuccati taṇhā yo
rāgo sārāgo .pe. Abhijjhā lobho akusalamūlaṁ vānappahānaṁ
vānavūpasamo vānapaṭinissaggo vānapaṭippassaddhi amataṁ nibbānaṁ.
Itīti padasandhi .pe. Padānupubbakametaṁ itīti. Brūmīti brūmi
ācikkhāmi desemi paññapemi paṭṭhapemi vivarāmi vibhajāmi uttānīkaromi
pakāsemīti nibbānaṁ iti naṁ brūmi.

[382] Jarāmaccuparikkhayanti jarāmaraṇassa pahānaṁ vūpasamo
paṭinissaggo paṭippassaddhi amataṁ nibbānanti jarāmaccuparikkhayaṁ.
1 Ma. kiñcanavūpasamaṁ kiñcanapaṭinissaggaṁ kiñcanapaṭippassaddhi. evamīdisesu
ṭhānesu. 2 Ma. so evaṁ.
Tenāha bhagavā
akiñcanaṁ anādānaṁ etaṁ dīpaṁ anāparaṁ
nibbānaṁ iti naṁ brūmi jarāmaccuparikkhayanti.

[383] Etadaññāya ye satā diṭṭhadhammābhinibbutā
na te māravasānugā na te mārassa paṭṭhagū 1 .

[384] Etadaññāya ye satāti etanti amataṁ nibbānaṁ
yo so sabbasaṅkhārasamatho sabbūpadhipaṭinissaggo taṇhakkhayo virāgo
nirodho nibbānaṁ. Aññāyāti aññāya jānitvā tulayitvā
tīrayitvā vibhāvayitvā vibhūtaṁ katvā sabbe saṅkhārā aniccāti
.pe. Yaṅkiñci samudayadhammaṁ sabbantaṁ nirodhadhammanti aññāya
jānitvā tulayitvā tīrayitvā vibhāvayitvā vibhūtaṁ katvā. Yeti
arahanto khīṇāsavā. Satāti catūhi kāraṇehi satā kāye
kāyānupassanāsatipaṭṭhānaṁ bhāventā 2 satā .pe. Tena vuccanti satāti
etadaññāya ye satā.

[385] Diṭṭhadhammābhinibbutāti diṭṭhadhammā ñātadhammā tulitadhammā
tīritadhammā vibhāvitadhammā vibhūtadhammā. Abhinibbutāti
rāgassa nibbāpitattā nibbutā dosassa nibbāpitattā nibbutā
mohassa nibbāpitattā nibbutā kodhassa upanāhassa .pe.
Sabbākusalābhisaṅkhārānaṁ [3]- nibbāpitattā nibbutā paṭippassaddhāti
diṭṭhadhammābhinibbutā.
1 Ma. paddhagū. evamuparipi. 2 Ma. bhāvento. 3 Ma. santattā samitattā vūpasamitattā
nijjhātattā nibbutattā paṭippassaddhattā santā upasantā vūpasantā.

[386] Na te māravasānugāti mārāti yo so māro
kaṇho adhipati antabhū namuci pamattabandhu. Na te māravasānugāti
na te mārassa vase vattenti 1 napi māro tesu vasaṁ
vatteti te mārañca mārapakkhañca mārapāsañca mārabaḷisañca
mārāmisañca māravisayañca māranivāsañca māragocarañca mārabandhanañca
abhibhuyya abhibhavitvā ajjhottharitvā pariyādayitvā 2 madditvā [3]-
viharanti iriyanti vattenti pālenti yapenti yāpentīti na te
māravasānugā.

[387] Na te mārassa paṭṭhagūti na te mārassa paṭṭhā
paṭṭhacarā 4 paricārikā pesiyā 5 te buddhassa bhagavato paṭṭhā
paṭṭhacarā 4 paricārikā pesiyāti 5 na te mārassa paṭṭhagū.
Tenāha bhagavā
etadaññāya ye satā diṭṭhadhammābhinibbutā
na te māravasānugā na te mārassa paṭṭhagūti.
Saha gāthāpariyosānā .pe. Satthā me bhante bhagavā
sāvakohamasmīti.
Kappamāṇavakapañhāniddeso dasamo.
---------
1 Ma. vattanti. 2 Ma. pariyādiyitvā. evamuparipi. 3 Ma. caranti.
4 Ma. paddhā paddhacarā. 5 Ma. siyā.
Jatukaṇṇīmāṇavakapañhāniddeso