[368] Oghe jāte mahabbhayeti kāmoghe bhavoghe diṭṭhoghe
avijjoghe jāte sañjāte nibbatte abhinibbatte pātubhūte.
Mahabbhayeti jātibhaye jarābhaye byādhibhaye maraṇabhayeti oghe
jāte mahabbhaye.

[369] Jarāmaccuparetānanti jarāya phuṭṭhānaṁ paretānaṁ samohitānaṁ
samannāgatānaṁ maccunā phuṭṭhānaṁ paretānaṁ samohitānaṁ samannāgatānaṁ
jātiyā anugatānaṁ jarāya anusaṭānaṁ byādhinā abhibhūtānaṁ
maraṇena abbhāhatānaṁ atāṇānaṁ aleṇānaṁ asaraṇānaṁ asaraṇībhūtānanti
jarāmaccuparetānaṁ.

[370] Dīpaṁ pabrūhi mārisāti dīpaṁ tāṇaṁ leṇaṁ saraṇaṁ gatiparāyanaṁ 1
brūhi ācikkhāhi desehi paññapehi paṭṭhapehi vivarāhi
1 Ma. gatiṁ parāyanaṁ. evamuparipi.
Vibhajāhi uttānīkarohi pakāsehi. Mārisāti piyavacanaṁ garuvacanaṁ
sagāravasappatissādhivacanametaṁ mārisāti dīpaṁ pabrūhi mārisa.

[371] Tvañca me dīpamakkhāhīti tvanti bhagavantaṁ bhaṇati.
Dīpamakkhāhīti dīpaṁ tāṇaṁ leṇaṁ saraṇaṁ gatiparāyanaṁ akkhāhi ācikkhāhi
desehi paññapehi paṭṭhapehi vivarāhi vibhajāhi uttānīkarohi
pakāsehīti tvañca me dīpamakkhāhi.

[372] Yathāyidaṁ nāparaṁ siyāti yathā idaṁ 1 dukkhaṁ idheva
nirujjheyya vūpasameyya atthaṁ gaccheyya paṭippassambheyya puna paṭisandhikaṁ
dukkhaṁ na nibbatteyya kāmadhātuyā vā rūpadhātuyā vā arūpadhātuyā
vā kāmabhave vā rūpabhave vā arūpabhave vā saññābhave vā
asaññābhave vā nevasaññānāsaññābhave vā ekavokārabhave vā
catuvokārabhave vā pañcavokārabhave vā puna gatiyā vā puna
upapattiyā vā puna paṭisandhiyā vā bhave vā saṁsāre vā vaṭṭe
vā na janeyya na sañjaneyya na nibbatteyya [2]- idheva nirujjheyya
vūpasameyya atthaṁ gaccheyya paṭippassambheyyāti yathāyidaṁ nāparaṁ
siyā. Tenāha so brāhmaṇo
majjhe sarasmiṁ tiṭṭhataṁ (iccāyasmā kappo)
oghe jāte mahabbhaye
jarāmaccuparetānaṁ
dīpaṁ pabrūhi mārisa
1 Ma. yathayidaṁ. 2 Ma. nābhinibbatteyya.
Tvañca me dīpamakkhāhi
yathāyidaṁ nāparaṁ siyāti.

[373] Majjhe sarasmiṁ tiṭṭhataṁ (kappāti bhagavā)
oghe jāte mahabbhaye
jarāmaccuparetānaṁ
dīpaṁ pabrūmi kappa te.

[374] Majjhe sarasmiṁ tiṭṭhatanti saro vuccati saṁsāro
āgamanaṁ gamanaṁ gamanāgamanaṁ kālaṁ gati bhavābhavo cuti ca upapatti
ca nibbatti ca bhedo ca jāti ca jarā ca maraṇañca. Saṁsārassa
purimāpi koṭi na paññāyati pacchimāpi koṭi na paññāyati
.pe. Majjhe ca saṁsāre sattā ṭhitā patiṭṭhitā allīnā upagatā
ajjhositā adhimuttā. Kathaṁ saṁsārassa purimā koṭi na paññāyati
.pe. Evampi 1 saṁsārassa purimā koṭi na paññāyati. Kathaṁ
saṁsārassa pacchimā koṭi na paññāyati .pe. Evampi 1 saṁsārassa
pacchimā koṭi na paññāyati. Evaṁ saṁsārassa purimāpi koṭi
na paññāyati pacchimāpi koṭi na paññāyati. Majjheva saṁsāre
sattā ṭhitā patiṭṭhitā allīnā upagatā ajjhositā adhimuttāti
majjhe sarasmiṁ tiṭṭhataṁ. Kappāti bhagavāti kappāti bhagavā taṁ
brāhmaṇaṁ nāmena ālapati. Bhagavāti gāravādhivacanametaṁ .pe.
Sacchikā paññatti yadidaṁ bhagavāti kappāti bhagavā.
1 Ma. evaṁ.

[375] Oghe jāte mahabbhayeti kāmoghe bhavoghe diṭṭhoghe
avijjoghe jāte sañjāte nibbatte abhinibbatte pātubhūte.
Mahabbhayeti jātibhaye jarābhaye byādhibhaye maraṇabhayeti oghe
jāte mahabbhaye.

[376] Jarāmaccuparetānanti jarāya phuṭṭhānaṁ paretānaṁ
samohitānaṁ samannāgatānaṁ maccunā phuṭṭhānaṁ paretānaṁ samohitānaṁ
samannāgatānaṁ jātiyā anugatānaṁ jarāya anusaṭānaṁ byādhinā
abhibhūtānaṁ maraṇena abbhāhatānaṁ atāṇānaṁ aleṇānaṁ asaraṇānaṁ
asaraṇībhūtānanti jarāmaccuparetānaṁ.

[377] Dīpaṁ pabrūmi kappa teti dīpaṁ tāṇaṁ leṇaṁ saraṇaṁ
gatiparāyanaṁ brūmi ācikkhāmi desemi paññapemi paṭṭhapemi vivarāmi
vibhajāmi uttānīkaromīti dīpaṁ pabrūmi. Kappa teti kappāti
bhagavā taṁ brāhmaṇaṁ nāmena ālapatīti dīpaṁ pabrūmi kappa te.
Tenāha bhagavā
majjhe sarasmiṁ tiṭṭhataṁ (kappāti bhagavā)
oghe jāte mahabbhaye
jarāmaccuparetānaṁ
dīpaṁ pabrūmi kappa teti.