[348] Taṇhā yassa na vijjatīti taṇhā yassa natthi [2]- na
saṁvijjati nupalabbhati pahīnā vūpasantā paṭippassaddhā abhabbuppattikā
ñāṇagginā daḍḍhāti taṇhā yassa na vijjati.

[349] Kathaṅkathā ca yo tiṇṇoti kathaṅkathā ca yo tiṇṇo
uttiṇṇo nittiṇṇo atikkanto samatikkanto vītivattoti
kathaṅkathā ca yo tiṇṇo.

[350] Vimokkho tassa kīdisoti vimokkho tassa kīdiso
kiṁsaṇṭhito kiṁpakāro kiṁpaṭibhāgo icchitabboti vimokkhaṁ pucchatīti
1 Ma. na parivasantīti yasmiṁ kāmā na vasanti. 2 Ma. na sati. evamuparipi.
Vimokkho tassa kīdiso. Tenāha so brāhmaṇo
yasmiṁ kāmā na vasanti (iccāyasmā todeyyo)
taṇhā yassa na vijjati
kathaṅkathā ca yo tiṇṇo
vimokkho tassa kīdisoti.

[351] Yasmiṁ kāmā na vasanti (todeyyāti bhagavā)
taṇhā yassa na vijjati
kathaṅkathā ca yo tiṇṇo
vimokkho tassa nāparo.

[352] Yasmiṁ kāmā na vasantīti yasminti [1]- arahante
khīṇāsave. Kāmāti uddānato dve kāmā vatthukāmā ca kilesakāmā
ca .pe. Ime vuccanti vatthukāmā .pe. Ime vuccanti
kilesakāmā. Na vasantīti yasmiṁ kāmā na vasanti na saṁvasanti
na āvasantīti [2]- yasmiṁ kāmā na vasanti. Todeyyāti bhagavāti
todeyyāti bhagavā taṁ brāhmaṇaṁ nāmena ālapati. Bhagavāti
gāravādhivacanametaṁ .pe. Sacchikā paññatti yadidaṁ bhagavāti
todeyyāti bhagavā.

[353] Taṇhā yassa na vijjatīti taṇhāti rūpataṇhā
saddataṇhā gandhataṇhā rasataṇhā phoṭṭhabbataṇhā dhammataṇhā.
Yassāti arahato khīṇāsavassa. Taṇhā yassa na vijjatīti taṇhā
1 Ma. yasmiṁ puggale. 2 Ma. parivasantīti. evamuparipi.
Yassa natthi na saṁvijjati nupalabbhati pahīnā vūpasantā
paṭippassaddhā abhabbuppattikā ñāṇagginā daḍḍhāti taṇhā
yassa na vijjati.

[354] Kathaṅkathā ca yo tiṇṇoti kathaṅkathā vuccati vicikicchā
dukkhe kaṅkhā .pe. Chambhitattaṁ cittassa manovilekho. Yoti
yo so [1]- khīṇāsavo. Kathaṅkathā ca yo tiṇṇoti kathaṅkathā
ca yo tiṇṇo uttiṇṇo nittiṇṇo atikkanto samatikkanto
vītivattoti kathaṅkathā ca yo tiṇṇo.

[355] Vimokkho tassa nāparoti natthi tassa aparo vimokkho
yena vimokkhena vimucceyya [2]- kathaṁ tassa vimokkhena karaṇīyanti
vimokkho tassa nāparo. Tenāha bhagavā
yasmiṁ kāmā na vasanti (todeyyāti bhagavā)
taṇhā yassa na vijjati
kathaṅkathā ca yo tiṇṇo
vimokkho tassa nāparoti.

[356] Nirāsaso so uda āsasāno
paññāṇavā so uda paññakappī
muniṁ ahaṁ sakka yathā vijaññaṁ
tamme viyācikkha samantacakkhu.

[357] Nirāsaso so uda āsasānoti nittaṇho so
1 Ma. arahaṁ. 2 Ma. vimutto so.
Udāhu sataṇho rūpaṁ āsiṁsati sadde gandhe rase phoṭṭhabbe kulaṁ
gaṇaṁ āvāsaṁ lābhaṁ yasaṁ pasaṁsaṁ sukhaṁ cīvarapiṇḍapātasenāsana-
gilānapaccayabhesajjaparikkhāraṁ kāmadhātuṁ rūpadhātuṁ arūpadhātuṁ kāmabhavaṁ
rūpabhavaṁ arūpabhavaṁ saññābhavaṁ asaññābhavaṁ nevasaññānāsaññābhavaṁ
ekavokārabhavaṁ catuvokārabhavaṁ pañcavokārabhavaṁ atītaṁ anāgataṁ
paccuppannaṁ diṭṭhasutamutaviññātabbe dhamme āsiṁsati icchati 1
sādiyati pattheti piheti abhijappatīti nirāsaso so uda
āsasāno.