[328] Sabbantaṁ itihītihanti sabbantaṁ itihītihaṁ itikirāya
paramparāya piṭakasampadāya takkahetu nayahetu ākāraparivitakkena
diṭṭhinijjhānakkhantiyā na sāmaṁ sayamabhiññātaṁ na attapaccakkhaṁ
dhammaṁ kathayiṁsūti sabbantaṁ itihītihaṁ.

[329] Sabbantaṁ takkavaḍḍhananti sabbantaṁ takkavaḍḍhanaṁ vitakka-
vaḍḍhanaṁ saṅkappavaḍḍhanaṁ kāmavitakkavaḍḍhanaṁ byāpādavitakkavaḍḍhanaṁ
vihiṁsāvitakkavaḍḍhanaṁ ñātivitakkavaḍḍhanaṁ janapadavitakkavaḍḍhanaṁ
amaravitakkavaḍḍhanaṁ 1 parānuddayatāpaṭisaṁyuttavitakkavaḍḍhanaṁ lābhasakkāra-
silokapaṭisaṁyuttavitakkavaḍḍhanaṁ anavaññattipaṭisaṁyuttavitakkavaḍḍhananti
sabbantaṁ takkavaḍḍhanaṁ.

[330] Nāhaṁ tattha abhiraminti na vindiṁ nādhigacchiṁ na paṭilabhinti
nāhaṁ tattha abhiramiṁ. Tenāha so brāhmaṇo
yeme pubbe viyākaṁsu (iccāyasmā hemako)
huraṁ gotamasāsanā
iccāsi iti bhavissati
sabbantaṁ itihītihaṁ
sabbantaṁ takkavaḍḍhanaṁ
nāhaṁ tattha abhiraminti.

[331] Tvañca me dhammamakkhāhi taṇhānigghātanaṁ muni
1 Ma. amarāvitakkavaḍḍhanaṁ. evamuparipi.
Yaṁ viditvā sato caraṁ tare loke visattikaṁ.

[332] Tvañca me dhammamakkhāhīti tvanti bhagavantaṁ bhaṇati.
Dhammamakkhāhīti dhammanti ādikalyāṇaṁ majjhekalyāṇaṁ pariyosānakalyāṇaṁ
sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ
cattāro satipaṭṭhāne cattāro sammappadhāne cattāro iddhipāde
pañcindriyāni pañca balāni satta bojjhaṅge ariyaṁ
aṭṭhaṅgikaṁ maggaṁ nibbānañca nibbānagāminiñca paṭipadaṁ akkhāhi
ācikkhāhi desehi paññapehi paṭṭhapehi vivarāhi vibhajāhi
uttānīkarohi pakāsehīti tvañca me dhammamakkhāhi.

[333] Taṇhānigghātanaṁ munīti taṇhāti rūpataṇhā
saddataṇhā gandhataṇhā rasataṇhā phoṭṭhabbataṇhā dhammataṇhā.
Taṇhānigghātananti taṇhānigghātanaṁ taṇhāpahānaṁ taṇhāvūpasamaṁ
taṇhāpaṭinissaggaṁ taṇhāpaṭippassaddhiṁ amataṁ nibbānaṁ. Munīti
monaṁ vuccati ñāṇaṁ .pe. Saṅgajālamaticca so munīti
taṇhānigghātanaṁ muni.

[334] Yaṁ viditvā sato caranti yaṁ viditaṁ katvā tulayitvā
tīrayitvā vibhāvayitvā vibhūtaṁ katvā sabbe saṅkhārā aniccāti
viditaṁ katvā tulayitvā tīrayitvā vibhāvayitvā vibhūtaṁ katvā sabbe
saṅkhārā dukkhāti sabbe dhammā anattāti .pe. Yaṅkiñci
samudayadhammaṁ sabbantaṁ nirodhadhammanti viditaṁ katvā tulayitvā tīrayitvā
Vibhāvayitvā vibhūtaṁ katvā. Satoti catūhākārehi sato kāye
kāyānupassanāsatipaṭṭhānaṁ bhāvento sato .pe. So vuccati
sato. Caranti caranto vicaranto iriyanto vattento pālento
yapento yāpentoti yaṁ viditvā sato caraṁ.

[335] Tare loke visattikanti visattikā vuccati taṇhā
yo rāgo sārāgo .pe. Abhijjhā lobho akusalamūlaṁ. Visattikāti
kenatthena visattikā .pe. Visaṭā vitthatāti visattikā.
Loketi apāyaloke manussaloke devaloke khandhaloke dhātuloke
āyatanaloke. Tare loke visattikanti yā sā loke visattikā
loke taṁ visattikaṁ sato tareyya uttareyya patareyya
samatikkameyya vītivatteyyāti 1 tare loke visattikaṁ. Tenāha
so brāhmaṇo
tvañca me dhammamakkhāhi taṇhānigghātanaṁ muni
yaṁ viditvā sato caraṁ tare loke visattikanti.

[336] Idha diṭṭhasutamutaṁ (viññātesu) piyarūpesu hemaka
chandarāgavinodanaṁ nibbānapadamaccutaṁ.

[337] Idha diṭṭhasutamutaṁ viññātesūti diṭṭhanti cakkhunā
diṭṭhaṁ. Sutanti sotena sutaṁ. Mutanti mutaṁ ghānena ghāyitaṁ
jivhāya sāyitaṁ kāyena phuṭṭhaṁ. Viññātanti manasā ñātanti 2
idha diṭṭhasutamutaṁ viññātesu.
1 Ma. tareyyaṁ ... vītivatteyyanti. 2 Ma. viññātanti.